مرۆڤ کاتێک مێژووی گەلی ڕووس  دەخوێنێتەوە ، باوەڕ بەچاوەکانی ناکات کە ئەم گەلانە  چ میراتێک لەقوربانی دان لەهەگبەکانیاندایە ؟  بۆیە  ئۆکرانیەش  بەشێکە لەو میراتە  لەخوێن هەڵکێشراوە  و  ئەو ووڵاتە ئاسان  نابێتە  خۆراکی ورچە سپێکە ، باخاوەنی  بۆمبی ئەتۆمیش بێت.

لام باشە بەراوردێک بکەم  لەمابەینی  ، سەرکردەیەک کە پاشخانێکی ئەکتەرێکی کۆمێدیە ، لەگەڵ سەرکردە کوردەکاندا ، کەخۆیان بادەداو لەڕیفراندۆمەکەدا هاواریان دەکرد ، "حسابی یەک ئەمەندە بۆ ڕەئی خەڵکی ناکەین ، کەچی کە کۆمەڵێک پلاس بەدەستی  عەفەج و سەید حاجی هاتن  لەترساندا کەرکوکمان جێهێشت  ، بەڵام لەبەردەم  مایکرۆفۆن و کامێراکاندا لەچەنەبازی نەکەوتین . بۆیە هەرکەسێک سەری بۆیاخکرد باشترە لەبۆردێلدا ئیشکات نەک لەسیاسەتدا .

فلادمیر زیلینسکی  لەسەرەتادا ووتی "ئێمە ڕووتان تێدەکەین و دەجەنگین ، ئەوەنین کە پشتان تێبکەین و هەڵبێین"

 من هیچ گومانم نییە کە ڕوسیا ئۆکرانیا داگیر دەکات ، بەڵام دەیان لێنینگرادی تر ئەچێتە سەر مێژووی گەلی ئۆکرانیا.  ئاخر لەلێنینگرادا بۆ ئەوەی تەسلیمی نازیەکان نەبن ، لاشەی مردۆکانی خۆیان خواردو شارەکەیان نەدایە دەست   نازیەکان و هەڵنەهاتن  . بڕواننە  کتێبی "مردووخۆرەکان".

ئێمە کۆمارێکمان هەبوو  کە لەو دەمانەدا  دوژمنێکی لەرزۆکمان هەبوو ، هەر کە کۆماری ئازرباینجان خۆیان تەسلیم کرد ، سەرانی کۆمارەکەی ئێمەش  کە دوژمن حەوت فرسەق دووربوو لێیانەوە ، بەبێ ئەوەی پرسیارێک راوێژێک گفتووگۆیەک بەرگریەک بکات ،چون بەرەو پیریان و خۆیان تەسلیم کردن .

لە ساڵی ١٩٧٤دا کە زیاتر لە ١٠٠٠٠٠ چەکدارمان هەبوو ، هەر کە ڕێکەوتنی  جەزائیر  مۆرکرا ، یان خەریک بوو مۆردەکرا ،  سەرانی کورد  بەر لەخەڵک  ئاشبەتاڵیان کرد  و هەریەکەیان   بەرەو وولاتێک رایانکرد ، نەداوای لێبوردنیان لەگەل کرد نەڕوونکردنەوەیەکیان دا  بەجیهان و گەلی خۆیان ، لەوکاتەدا ئەوت باوکم بڕیاری ئاشبەتاڵی داوە هۆن هۆن دەگریا ، من منداڵ بووم نەم دەزانی چی بووە بەڵام دەمزانی کەتێک شکاوین  و باوکم  کەلای من ئازاترین پیاوی جیهان بوو لەدایکم زیاتر لوشکە لوشکی بوو . دوایی زانیم کە ئەمە بۆتە کەڵچەرێک بۆمان . کەشەر دەبێت یان   کەچاومان لێبزدەکەنەوە لە هونەری هەڵهاتن و گریان و کڕوزانەوەو تەسلیمبوون شتێکی تر نازانین .

 بەڕاستی ئەم سەرانی کورد  تەنها بێنەو بمدەرێ دەزانن ، کاتێک مرۆڤ بیرەوەری  ئەو بەرپرسانە دەخوێنێتەوە کە مامەڵەیان لەگەڵ سەرانی کوردا هەبوە ، حەزدەکات بەناخی زەویدا بچێتەخوارەوەو شەرم لەمرۆڤ بوون و کورد بوونی خۆی دەکات .

 من خۆم  شەرم دەکەم کە  گەلەکەم مرۆڤی ترسنۆک بە سەرکردەی خۆی قبوڵ دەکات . سەرکردەکانی کورد هەر بۆنی ڕووداوەکە بکەن  کوردترین ڕێگە بۆ هەڵهاتن دەگرنەبەر ، بەڵام سەیری گەلێکی بچکۆلەی وەک ئیسرائیلێکان بکە ، هەموو موسڵمانی جیهان  دوژمنیانە ، بەڵام کاتێک سەرکردەیەکی وەک گۆلدەمایەر لە مانگەکانی کۆتایی جەنگی جیهانیدا لە جنێفی سویسرا   ، هاوڕێکانی بانگ دەکات  دەڵێت :" بەسە سەردەمی کڕوزانەوە بەسەر چوو".

 کەسەیری چاوپێکەوتنی سەرانی کورد دەبینی کە ٢٠ملیۆن کورد  هیوایی پێدەخواست  و دایکم هەموو ژەمێک سینێکەی هەڵدەگرت و نزای دەکرد کە لەتەمەنی ماڵ و منداڵی هەڵگری بیخەیتە سەر تەمەنی سەرکردە  بۆئەوەی ئازادمان بکات .. لەچاوپێکەوتنەکەدا دەڵێت" ئێمە میللەتێکی مەزڵومین" . ئەوەیە   فلادمیری کورد .

 کەڕاپەڕین کرا  رژێمی عێراق  سوپاکەی هەڵوەشایەوە  ، هەر کەووتیان هات ...ئیتر  چوارملیۆن خەڵک بەرەو تورکیاو ئیران  هەڵهات بۆ باوەشی ئێران و کڕوزانەوەو وەرگرتنی  سەمونەڕەقەو شەق و سوکایەتی  جەندرمەو ئیتلاعات و پاڕانەوە بۆ نان و  ئاو مەسینەو کەمپوتی ترشاو .

 وەک چۆن باوکو دایک پایەیی خێزانە سەرکردەش گەورەترین پایەی هەموو میللەتێکە ، ئێمە کە داعش هات  بە کۆمەڵی منداڵ و مەزنەوە   ٧٠٠٠ چەکداری کورد  هەڵهات و گەلی خۆمان دایە دەست  بەربەرێکانی ئیسلام  ، دواش بازرگانیمان لەگەڵ دەکردن ودەمان ووت : دراوسیەکی ئامانتان دەبین .

 تا جیهان لەو ناخپیسانە هاتنەدەنگ،  ئێمەش هەمیشە خۆمان بەخەڵکەوە بادەدەین  و لەوێنەگرتن  بەچەکەوە  نمونەمان نییە و پەستا پەستا سەرکردەو ئەولادەکانیان  بەرەڵاو منداڵەکان و گۆرانی بێژو شایەرو مۆدێلەسلیکۆنەکانمان  و پیرێژنەکان و بەرپرسەکان  بەقات و ئەستۆبەست و چاویلکەی ڕەشەوە دەچوون لەسادرەکاندا وێنەیان دەگرت بێئاگا لەوەی ئەو وێنانە  لەڕووی سەربازێوە بۆهێرشی پێچەوانە  دەسکەوتە بۆداعشەکان .

سەرکردە  گەر ترسنۆک بوو ئیتر گەلێک  دەبێتە کۆپێ ، بۆیە تائێمە  سەرکردەکانمان ئاوا  ترسنۆک ڕارا و پێش ڕووداوەکان هەڵبێن  دوودەیەی تر دەبینە قەرەج و  لەهیچ شوێنێک جێگەیەکمان نابێت بۆی بگەڕێنەوە .

 ئەوەتانێ  بەغدادی تاوان ئەو هەموو  هەڕەشيیەمان لێدەکان ، نازانم ئەم سیاسیە ترسنۆکانەی ئێمە باشترین چەکیان بەدەستەوەیە بۆ بەکاری ناهێنن ، هەرچی عەرەبە  لە هەرێمە لاقەکراوەکەدا بیانکەنەدەرەوە  و هەموو ئەو شتانە فەرز بکەن کە دەکڕوزێنەوە بۆی . ئێمە سەرکردەمان نییە خۆشمان سەرگەرمی  ئەوەین گوێ لەمەلا  چڵکنەکان بگرین  تا نزامان بۆ بکەن ، ئاخر نزا بەرامبەر هۆردوی تورک و فارس و عەرەب چیمان بۆدەکات؟  من دڵخۆشم بە ڕۆژئاڤا  لەگیانی  ئەو بەرگریەی  ئۆکرانیادا خوێنی گەشی  شەهیدانی ڕۆژئاڤاکەم  دەبینمم لە شەڕکەرەکانی ئۆکرانیادا دەڕوات . ئەوان دەزانن  جیهان پشتی تێکردوون بەڵام  ئەوان نیشتمانی خۆیان  هەراج ناکەن و هەڵنایەن  بۆ پەتاتە خواردن لەسنورەکان .  بەتایبەتی سەرکردەکانیان .