کارەبای ٢٤ کاتژمێری لە کوردستاندا بووەتە چیرۆکێک کە هەموو ساڵێک دووبارە دەبێتەوە، بەڵێنێک کە هەرگیز نایەتە دی. ئێستا بە ناوی "پرۆژەی ڕووناکی" خزمەتگوزاریەکی نوێیان دەستپێکردووە، بەڵام لە ڕاستیدا چۆن خزمەتگوازاریەکە!

کارەبا هەیە، بەڵێ، بەڵام بە نرخێک کە لە توانای بەکارهێنان نییە. کارەبایەک ئەوەندە گرانە کە ئیتر نەبوونی و بوونی جیاوازییەکی نییە! ئەمە ئەو مەتەڵەیە کە ئێمەی تێخستووە: "ئەوە شتە چیە کە هەتەو نیتە؟"

ئەو بەرپرسانەی لە دەسەڵاتدان بیر لە چی دەکەنەوە؟ ئایا ئەوان لە هەمان کوردستاندا دەژین کە ئێمە تێیدا دەژین؟ ئایا ئەوانیش کارەبای ٢٤ کاتژمێرییان نییە لە ڤێلا و کۆشکەکانیاندا؟ ئایا ئەوانیش وەک خەڵکی ئاسایی سەدان هەزار دینار دەدەن بۆ یەک ئەمپێر؟

بەرپرسانی هەردوو حیزبی دەسەڵاتدار سیاسەتێکی سیستەماتیکیان داڕشتووە بۆ دۆشینی خەڵک. هەر ڕۆژەو داهێنانێکی نوێ:

ڕۆژێک لە بازگەکان سەرانە وەردەگرن ،ڕۆژێک تاقیگەی کەرتی تەندروستی دەدەنە کۆمپانیای ئەهلی خۆیان، ڕۆژێک پارەی خاشاکت لێ وەردەگرن بێ ئەوەی خزمەتگوزارییەکەت پێبدەن، ڕۆژێک باجی بێمانا بەسەر بازرگان و خەڵکدا دەسەپێنن.

ئەمانە هەمووی بۆچی؟ گەر پرسیار بکەین وەڵامەکە ئاشکرایە: ئەمە سیستەمێکی  قۆرخکارانەی (مۆنۆپۆلی) داراییە کە بۆ بەرژەوەندی کەمینەیەک فەرمانڕەوا و کۆمپانیاکانیان دامەزراوە، نەک بۆ خزمەتی خەڵک.

ئایا دەشێت بەرپرسانی ئەم هەرێمە ئاگاداری گیرفانی خەڵک نەبن؟ یان ڕاستییەکەی ئەوەیە کە ئاگادارن، بەڵام گرنگی پێنادەن؟ خۆ ئەگەر هەژاریی خەڵک کاریگەریی لەسەر ژیانی خۆیان دانەنێت، بۆچی خەمی بخۆن؟

پرۆژەی ڕووناکی لە ڕاستیدا ڕووناکییەکە بۆ ئەوەی باشتر ببینین چۆن گیرفانەکانمان بەتاڵ دەکرێن. پرۆژەیەکە بۆ ئەوەی ئاشکراتر وێنەی ناعەدالەتی کۆمەڵایەتی و ئابووری لەم هەرێمەدا ببینین.

دەسەڵاتدارانی هەرێم دەبێت بزانن کە خەڵکی کوردستان ماندوو بوون لە بەڵێنی بەتاڵ. ماندوو بوون لە پروپاگەندە و گەندەڵی و نەبوونی خزمەتگوزارییە سەرەتاییەکان. ماندوو بوون لە 

"شتێک کە هەتەو نیتە!"