ڕۆژی ٢٦ مانگی شوباتی ڕابردوو، عەبدولڵا ئۆجەلان، لەچوارچێوەی ئەو پرۆسەیەی ناوی نراوە "پرۆسەی ئاشتی" لە تورکیا، لە ڕاگەیاندنێکدا کە لەڕێگای تیمی دانوسانکاری "دەم پارتی" یەوە خوێنرایەوە، داوای لە پەکەکە کرد چەك دابنێن و لە کۆنگرەیەکدا خۆیان هەڵبوەشێننەوە، هەروەها داوای لێکردن بچنە چوارچێوەی دەوڵەت و کۆمەڵگای تورکیاوە.

بێگومان تا ئەو جێگەیەی "ئاشتی لەتورکیا" بەچەکدانانی پەکەکە و ڕاگرتنی کوشتار و خوێنڕێژی کۆتایی دێت و لەوەبەدوا بۆ کێشەکان ڕێگای سیاسی بگرێتەبەر، ئەمەش هەنگاوێکی ئەرێنیە و سەرگرتنی لەقازانجی خەڵکی کوردستانی تورکیاو ناوچەکەدایە، بەڵام ئەوەی تائێستا لەلایەن تورکیاوە ڕاگەیەنراوە ئاماژەیەکی بەوجۆرە نیشان نادات کە دەوڵەتی تورکیا، بەشوێن ئاشتی و چارەسەری سیاسیانەی ئەو کێشەیەوە بێت، کاتێک بەرپرسانی حکومەتی تورکیا بە زمانی هەڕەشە و هێرشی سەربازی بۆسەر هێزەکانی پەکەکە و هەسەدە وەڵامی ئەو بانگەوازەی ئۆجەلانیان داوەتەوە. ئەوەی تورکیا دەیەوێ چەکدانانی پەکەکەیە بەبێ هیچ مەرج و گەرەنتیەک بەڕێبکرێت و لەلایەکی ترەوە لە بانگەوازەکەی ئۆجەلاندا ئاماژە بەهیچ مەرجێك ناکرێ، بێجگە لە دوبارەکردنەوەی چەند دەستەواژەیەکی گشتی و نادیار وەڵامێک بە کێشەی کورد و خواستەکانی دانیشتوانی کوردستان ناداتەوە.

هەرچەندە هێشتا ئەوەی ناویانناوە "پرۆسەی ئاشتی لەتورکیا" لەچوارچێوەی یاریەکی سیاسی لە پەیوەند بە ئاڵوگۆری سیاسی ناوچەکەوە دەرنەچووە، بەڵام ئەگەر سەربگرێ و پەکەکە چەک دابنێت، ئیتر هیچ بەهانەیەک بۆ مانەوەی بنکەو بارەگاو کردەوە سەربازیەکانی تورکیا لەکوردستانی عێراقدا نامێنێت. لەسەرێکی تریشەوە ڕیکەوتنی نیوان پەکەکەو تورکیا، ڕێگا دەکاتەوە تا بەشێوەیەک لەشێوەکان ناکۆکیەکانی نیوان پەیەدەو هەسەدە، لەگەڵ تورکیادا، لە بەرژەوەندی نەخش و ڕۆڵی تورکیا لە سوریادا یەکلابێتەوە.

بەڵام ئەم ئاشتەواییەی نێوان پەکەکەو تورکیا، ئەگەر سەربگرێ، یەکسان نیە بە چارەسەری کێشەی کوردو هەڵگرتنی ئەو ستەمەی بەسەر خەڵکی کوردستانی تورکیاوەیە. هەرچەندە هەم پەکەکە و خودی ئۆجەئالان و دەوڵەتی تورکیا و هەم ئەحزابە ناسیونالیستەکانی کورد و ڕۆشنبیرانی دەوروبەریان ئومێدێک ئەبەخشنەوە کە ئەم ڕیکەوتنە کێشەی کورد چارەسەر دەکات، لەکاتێکدا نمونەی ڕێگاچارەی ئەمریکایی و ئیمپریالیستی بۆ کێشەی کورد لەکوردستانی عێراق کە بەرگی فیدراڵیزمی قەومی بەبەردا کرا، نەک کێشەکەی چارەسەر نەکرد، بگرە خەڵکی کوردستانی روبەڕوی چەندین کارەسات کردەوە. ئەم نمونەیە کە زۆر زیاترو واوەترە لەو ڕیکەوتن و ئاشتەواییەی کە بڕیارە لەنێوان پەکەکە و تورکیادا بەڕیوەبچێت، بۆیە بەدڵناییەوە بەهیچ جۆرێک کێشەی کورد نە لە تورکیاو نە لە سوریاو نە لە ناوچەکە وەک ئەوەی ئۆجەلان بانگەوازی بۆ دەکات، چارەسەر نابێ و وەک برێنێک بە جەستەی کۆمەڵگاکانەوە دەمێنێتەوە و لە هەر گۆرانکاریەک کە لە بارودۆخ و هاوکێشە سیاسیەکاندا ڕووبدات، دوبارە سەرهەڵدەداتەوە. کێشەی کورد کاتێک دەتوانێ ڕێگایەکی سیاسی بۆ پەیداببێت کە سیستەمی سیاسی لەو وڵاتانەی ئەم کێشەیەیان تێدایە، سیستەمێکی ئازاد و سکولار و ناقەومی جێگیر نیە کەفرسەتی گەڕانەوە بۆ ڕای خەڵکی کوردزمان بڕەخسێنێ تا بڕیاری ئازادانە لەسەر داهاتوی خۆیان بەمانەوە یا جیابونەوە و پێکهێنانی دەوڵەتی سەربەخۆی خۆیان بدەن.