لەوەتەی باسی بانگەوازەکەی ئاپۆ دەکەن، ئۆردوگان هەمیشە پێداگریی دەکات لەوەی کە ئاپۆ دەبێت بە ڕاشکاوانە و بەبێ مەرج (بۆ ئەوەی خۆی بە براوە بناسێنێت) داوا لە پەکە بکات چەک دابنێت. باخچەلیش وابزانم دەیگوت دەبێت ئاپۆ لە زیندان بێتە دەرەوە.

لەم دوو ڕستەیە زیاتر بەهیچ جۆرێک دەسەڵاتدارانی تورک باسی ئاشتی و مافی کوردانیان نەکردوە، سەرەڕای ئەوەش نەوەستاون لە گرتن و کوشتن و مافخواردنی کوردان.

بانگەوازەکەی ئاپۆش جگە لەوەی کە بەهیچ جۆرێک باسی مافی کوردانی تێدا نەکراوە، بەتایبەتی بۆ خەڵکی عەوام، زۆر بە ڕوونیش بە دڵێ تورکان وتارەکە نوسراوە.

ئەوەی جێگەی سەرنجە لەم وتارەکەدا ئەم دوو پەرەگرافەی خوارەوەیە:

(لە کەشوهەوای ئێستادا، کە بە بانگەوازی بەڕێز دەوڵەت باخچەلی دروست بووە، هەروەها ئەو ئیرادەیەی کە بەڕێز سەرۆک کۆمار نیشانیداوە و هەڵوێستە ئەرێنییەکانی پارتە سیاسییەکانی دیکە بەرامبەر بەم بانگەوازە، من بانگەواز بۆ چەکدانان دەکەم و بەرپرسیارێتی مێژوویی ئەم بانگەوازە دەگرمە ئەستۆ.

وەک چۆن هەموو کۆمەڵگە و پارتە مۆدێرنەکان دەیکەین، کە نەتوانراوە بەهێز کۆتایی بە هەبوونیان بهێنرێت، لەسەر بەستنی کۆنگرەیەک و بڕیاردان لەسەر تێکەڵبوون لەگەڵ دەوڵەت و کۆمەڵگە رێکبکەون و پێویستە هەموو گرووپەکان دەستبەرداری چەک بن و پەکەکە خۆی هەڵبوەشێنێتەوە.)

ئەم دوو پەرەگرافە جگە لەوەی کە تۆزێک لێڵن بە تایبەتی لە جیهانی سیاسەت و ڕێککەتنی دوو بەرەدا، بۆ وڵاتێکی دیموکراسی ناشێ بەڵکو تایبەتە بە وڵاتێکی وەک تورکیا و ڕۆژهەڵاتی ناوەڕاست ڕاستە و دەزانین کە ئەو ناتوانێت مەرج بۆ ئۆردوگان دابنێت لەبەر ئەوەی ڕای گشتیی تورکیا ئەوە وەک سەرکەوتنێک دەبینن. بەڵام مەرجێک خۆی شاردۆتەوە لەو پەرەگرافەدا:

(لەسەر بەستنی کۆنگرەیەک و بڕیاردان لەسەر تێکەڵبوون لەگەڵ دەوڵەت و کۆمەڵگە رێکبکەون).

جگە لەوەی کە پەیامەکەی ئاپۆ ڕزگارکردنی تورکیایە لەم کاتەدا کە پێگەی جیهانیی لەدەستداوە و لاوازە. بەڵام ئاپۆ بە پێچەوانەوە لەبری ئەوەی ئەو هەلە بقۆزێتەوە و مەرجی خۆی بسەپێنێت، داشکان دەکات لە داواکارییەکانی و بە لێڵی باسی بانگەوزای باخچەلی و ئیرادەی ئۆردوغان دەکات لە کاتێکدا ئیرادە و بانگەوازەکانیان وەک بانگەوازەکەی ئاپۆ ناڕوونن. پێ دەچێت ئەمە سیاسەتی "براگەورە" بێت کە لە باشوور باوە یان هەر مەنتالیتێیەکی ڕۆژهەڵاتی بێت کە نهێنی بێ گەرەنتی لە خۆیدا حەشارداوە وەک چۆن ڕۆژهەڵاتیەکان ئاشنان پێی.

سیاسەت ئەگەر ئایدیپلۆژیا و زانستێکە لەهەمان کاتدا بەستراوەتەوە بە تەمەنی کەسایەتییەکانەوە، کاتێك ئاپۆ پەکەکەی دامەزاراند لەهەڕەتی لاویدا بوو، بزوتنەوەکەش ئەو شکڵەی لە خۆ گرتبوو. ئەمڕۆ سەرۆکەکانی ئەو بزوتنەوەیە لە تەمەنێکی بەساڵاچوودان، بڕیاردان و تێکۆشان بەستراونەتەوە بە هێزی جەستەییەوە، لەم تەمەنەدا وەها ئارەزوو دەکەن بچینە سەر مێزی گفتوگۆ.

ڕاستە، خۆ هەتا هەتایە لاوانی پەکەکە بەو شاخانەوە نامێننەوە، بەتایبەتی لەسەردەمی تەکنەلۆژیا و ئەنتەرنێتدا، دەبێت گۆڕانکاریی بکرێت لە جۆری خەبات، پەکەکەش لەناو خاکی تورکیادا بەهێزە و هەستی کوردایەتی لەم سەردەمەدا گەیشتۆتە ئەوپەڕی، لە ڕویەکی ترەوە چەکدانانی پەکەکە لەم کاتەدا و گۆڕینی خەباتیان بۆ خەباتی مەدەنیی، لە کاتێکدا کە تورکیا ڕوبەڕووی ئیسرائیل دەبێتەوە، ناچارە نەرمی بنوێنێت دەنا تورکیا دەتەقێتەوە. بۆیە ئەم وتارە ناڕوونە لەبەر ئەوەی شتێکی لە خۆیدا حەشارداوە بە مەنتیقی ڕۆژهەڵاتیی. بەتایبەتی کاتێک دەڵێت:

(من بەرپرسیاریەتی مێژوویی ئەم بانگەوزە دەگرمە ئەستۆ)

ئەم وتەیە وتەی کابرای عەشایەرمان دێنێتەوە بیر کاتێک ڕێفراندۆمی کرد و گوێێ بە قسەی کەس نەدا و گووتی:

(من بەرپرسسیاریەتی مێژوویی دەگرمە ئەستۆ).

ئەگەر باش وردببینەوە لە ناوەڕۆکی هەردوو ڕووداوەکە، ئەوا هەردووکیان لە کۆتایی تەمەنیاندا دەیانەوێت پیش ئەوەی ئەم جیهانە جێ بهێڵن، لە دواهەمین هەوڵدان (کارەسات)یاندا، بێ بنەما، بەهەرچۆنێک بێت ڕای خۆیان بسەپێنن.

ڕاستە کە ئاپۆ دەڵێت:

(وەک چۆن هەموو کۆمەڵگە و پارتە مۆدێرنەکان دەیکەین، کە نەتوانراوە بەهێز کۆتایی بە هەبوونیان بهێنرێت، لەسەر بەستنی کۆنگرەیەک و.....تاد.)

لێرەدا ئاپۆ هیوایەک دەدات بەو خەڵکە کە ناتوانرێت، بەتایبەتی لەسەردەمی مۆدێرندا کۆتایی بە هەبوونمان بهێنرێت...

لە کۆتاییدا دەڵێم، من وای دەبینم کە ئەوەی ناویان لێ ناوە بانگەوازی ئاشتی دەبێتە شەڕی کۆڵان بەکۆڵان، بەڵام ئەوەی کە دەبێتە هیوایەک لەم ئەزموونەدا هەل و مەرجی سەردەم و ناوچەکەیە بەتایبەتیی دەوری ئیسرائیل لە ناوچەکەدا، چونکە تورکیا ناتوانێت ئاژاوەی ناوخۆ و دەرەوە بگرێتە خۆی. بۆیەکا تورکیا چارەسەرێک دەدۆزێتەوە، بەڵام کام چارەسەر ؟

ناڕوونە وەک وتارەکەی ئاپۆ. ئەگەریش بەرپرسیاریەتی مێژوویی بگرێتە ئەستۆ.

وتارێکە بە مەنتالیتێی ڕۆژهەڵاتیی نوسراوە.