سەردەشت ودەسەلاتی کوردیی

Thursday, 10/01/2013, 12:00

((مێژووی ئازادبووونی ئەم مەملەکەتە سەرەتای مێژووی خنکاندنی خەونەکانی ئێمەیە))

((جگە لە پەنجەرەیەک بۆ خۆکوشتن ، لە دەلاقەیەک بۆسەفەر مەودایەکی تریان بۆ خەیاڵەکانمان نەهێشتۆتەوە))


دوو ساڵ دوای لەدایکبووونی سەردەشت، شەڕی کوێت و ئەوسا راپەرین و کۆڕەوە مەزنەکە دەستیپێکرد، تراژیدیای کورد لەدنیا دەنگی دایەوە. هەواری هێمن دورستکراو پیاوانی شاخ گەرانەوە و خۆیان کردە خاوەنی راپەرین و خەم و خەونەکانی سەردەشت و نەوەکەی، سەردەشت لە یەکەم وتاری بلاوکراوەیدا بە ناوی 'ئەوان هاتن و' بە هوشیارییەکی چرەوە تراژیدیاییبوونی ئەم هاتنەوەی پیاوانی شاخ دەردەبڕێ.
پیاوانی شاخ هەڵبژاردنیان کرد، پەرلەمانیان هەڵبژارد، ئەوسا لە رەگڕا هەڵیانکێشا، هەولێری سەردەشتیان لە سلێمانی (سەردەشت)ەکانی تر دابڕی، قوتابخانەکەی سەردەشتیان لە (خوێندنگا) کانی سەردەشتەکانی تر دابڕی، رەنگی زەردیان کردە دوژمنی رەنگی سەوز، رەنگی سووری خوین بوو بە خەتی جیاکەرەوەی رەنگەکان و وشەکان و سنوورەکان، شەرە پەرۆ و شەرە دەنگ و شەرە جنێو دەستی پێکرد، قوتابخانەکان ، خەستەخانەکان ، دادگاکان ، دایەنگەکان ، کارخانەکا ن....هتد ، هەمووی داگیرکران و بوونە بارەگای حزب و مولکی پیاوانی حزب.سەیارە و لۆری و کەرەستەی پرۆژەکان و دەرگا و پەنجەرەی قوتابخانەکان و ستونی کارەباکانیان ئاودیو کرد .
١٨٢٠٠٠ مرۆڤی کورد، کچ و کوڕی وەک سەردەشت و براکانی و، دایک و باوکانی وەکو دایک و باوکی سەردەشت، ئاگایان لەم بەزمە نەبوو، بێ سۆراغ بزر بووبوون، لەلایەن بەعسەوە بردرابووون و کەسیش نەیدەزانی بۆ کوێ بردراون و چارەنووسیان چی بووە ؟ لەدواییدا دەرکەوت کە هەموویان زیندەبەچال کراون. ٤٠٠٠ گوند و شارۆچکەش واتە هەموو جوگرافیای سروشتیی و ئابووری و کۆمەلایەتی و کەلتووری کوردستان فیزیۆساید کرابوو.
پیاوانی شاخ کە ئەندازیاری مێژووی ئەو ئەنفالە بوون، لەخەمی ئەوەدا نەبووون کە لە تاکە شەهیدێک بپرسنەوە، تاقە مال و گوندێک چاک بکەنەوە، تاقە دەروازەیەکی ژیان (ئیبراهیم خلیل) بوو. لەسەر داهاتەکانی قاچاخچێتی ئەو دەروازەیە گەورەترین جەنگی کوردکوژیان بەرپاکرد، ئەمە تەنها جەنگی خوێن و کوشتار نەبووو، زیاتر بەردەوامکردنی و شموولیکردنی ئەنفالستانی بەعس و لە رەگ و ریشە هەڵکەندنی ئەو کۆمەڵگا پاش ئەنفالەی ناو ئەو (هەواری هێمن) ە بووو کە بەزەیی دنیا بۆ خەڵکی کوردستانی دروسست کردبوو.
لەگەڵ خۆیان پرۆژەکانی داگیرکەران و پاوانخوازی حیزبیی و جەنگ و خوێن و برسێتی وژنکوشتن و هەموو پرینسیپە بەربەرییەکانی شاخیان هێنانەوە و کردیاننە بنەمای بەرێوەبردنی وڵاتێکی کەلاوەو میللەتێکی بریندارو لەڕەگهەڵکێشراو. (هەولێری) سەردەشت و گەڕەکە هەژارەکەی کرێکارانی شارەکەی، پشکی شێریان لەو پرۆسە تراژیدیاییە بەرکەوت. هەروەک چۆن راپەرین لە قەڵادزەوە بۆ رانییە و بیتوێن و سلێمانی و ئەوسا هەولێر کڵپەی کرد و بەرزگارکردنی هەولێر گیرسایەوە، ئاواش شەڕی ناوخۆیی لە ئەنجامی میراتی داگیرکاریی و بێ یاسایی مێژووی شاخ هەروا لە قەلادزەوە داگیرسا و لە رانییەو بیتوێن کڵپەی سەند و دواتر گەیشتە سلێمانی و بەتوندی و سەختی لە هەولێر گیرسایەوەو بوو بە قەڵای خیانەت و تراژیدیا.
تەمەنی سەردەشت نەگەیشتبووە حەوت ساڵ کە هەولێری پایتەختی کوردستانی ئازاد بوو بە ناوجەرگەی دڵرەقترین و تاوانکارانەترین شەڕی ناوخۆیی کە لوتکەکەی بە ٣١ی ئابی ١٩٩٦ کۆتایی هات کاتێ دەبابەکانی بەعس بەسەر لاشەی ١٨٢٠٠٠ شەهیدی ئەنفالکراودا گەرانەوە و پەرلەمانی کوردستان و مێژووی خەباتی کوردیان ئەتککرد. ئەوسا تەمەنی سەردەشت ٨ ساڵ و ٨ مانگ بوو ، سەردەشت ئەم مێژووەو شوێنی هەولێر لەو ناکۆکی و شەڕەکانی دەسەڵاتی کوردی بە وردی دیاری دەکا کە لە وتاری [ بارزانی بەدیار دواهەمین ئەلقەی کۆسرەت و نەوشیروانەوە سەردەشت عوسمان ٢-٣-٢٠٠٩)) دەنووسێ:
((((هەولێر لە هەموو گەمەکاندا خالی یەکلاکەرەوەیە))

زیاتر دەنووسێ:
((هەولێر بەردەوام خاڵی وەچەرخان نییە، بەڵکو ئاراستەی وەچەرخانەکە تەواو دەکا ،هەولێر هەمیشە درەنگ بەدوای بارودۆخەکان دەکەویت ،جا ئەگەر شکست بێت یان سەرکەوتن، چاکە بێت یان خراپە. دوو نمونە لەبەردەستان کە بەتایبەت گەنجەکان لێی بەئاگان، ئەوانیش هەریەکە لە راپەرین و شەری ناوخۆیە، هەریەک لەو دوو ئەزموونەی کورد بە هەموو خالی نیگەتیڤ و ئەکتیڤیەوە ، بەهەموو جیاوازییەکانیشیەوە ، سایکۆلۆجیەتی هەولێرمان بۆ دەردەخات. لەو دوو ئەزموونەدا کە ئێمە لە نزیکەوە بنج و بناوانەکانی شارەزاین و تێیدەگەین ،هەولێر لەهیچ یەکیکیان دەستپیشخەر نەبووە، بەلام بێ لایەنیش نەبووە، بەڵکو تەواوکەری بازنەکە بووە ،هەولێر نە یەکەم ناوچەبوو راپەرینی کرد، نە یەکەم ناوچە بوو شەڕی ناوخۆیی کرد ، بەڵکو ئیشی هەولێر ئەوەبووو کە ئاگرەکە وەربگرێت و بیگەیەنێتە دوا مەنزلگا.))
ئەو وتانە دوو لایەنی گرینگی سەردەشت دەسەلمینیت :
گەنج بووونی یان قسەکردن لەجیاتی ئەزموونی گەنجانی نەوەکەی و هەولێریی بووونی .
هەروەها سەردەشت زۆر وردتر و زیرەکانەتر سەرەتای ژیانە تراژیدییەکەی خۆی بەسەرەتای ئەو ئازادییە دادەنێت کە دەسەڵاتی کوردی بۆ نەوەکەی ئەویان هێنا! لە وتاری [سلاو مردن زۆر لیتەوە دوورنیم] دەنووسیت ((مێژووی ئازادبووونی ئەم مەملەکەتە سەرەتای مێژووی خنکاندنی خەونەکانی ئێمەیە))
ئەمە بەهێزترین و جوانترین دەربڕینە لەهەست و هەڵویستی گەنجانی هۆشیار بەرامبەر بە حەقیقەتی دەسەڵاتی کوردی و بانگەشاکانی .
ئەو ئازادییەی ئەوان هێنایان ئازادییەکی خنکێنەری خەونینەوەکانی ئەم وڵاتە بوو.
ئەمەیە سەرەتای چیرۆکی تراژیدیای تیرۆرکردنی سۆرانی مامە حەمە. ئەمە سەرەتای سیناریۆی تراژیدیایی رفاندن و تیرۆرکردی سەردەشت عوسمان .
ئەمە سەرەتای چیرۆکی تراژیدیای ژیانی گەنجانی ئەم وڵاتە یە.
ئەو(ئازادییەی) دەسەڵاتی کوردی جی بۆ سەردەشت و گەنجانی هاوتەمەن و هاومیژووی هێناوە ؟!
سەردەشت دەنووسیت : ((جگە لە پەنجەرەیەک بۆ خۆکوشتن ، لە دەلاقەیەک بۆسەفەر مەودایەکی تریان بۆ خەیاڵەکانمان نەهێشتۆتەوە ..))
لای سەردەشت (ئازادی دەسەلاتی کوردی یەکسانە بە کوشتنی گەنجان و خەونەکانیان). ئەمە زیاتر لە وتاری (هەموو راکەن ئازادیمان بۆ هات ..) روون دەکاتەوە: چاوەرێکردنی بەرهەمی خۆشی لەو ئازادییەی دەسەلاتی کوردی وەک دانیشتنی بەدیار بەردیکەوە بەراورد دەکا کە ماهیەتی بەردەکە دیار نییە ،بەردەکە توحفەیە یان هێلکە ؟!بەلام نەوەیەک تەمەنی خۆی بەدیار ئەو بەردەوە دەدۆرێنێت .
((بەدیار بەردێکەوە دانیشتوین ، وەڵێ خەریکە عومری نەوەیەک بەرێدەکەین } ..
نەوەی کۆن بەم بەردە راهاتوون و گوێ نادەنێ ،بەڵام نەوەی نوێ دەیانەوێت ماهییەتی ئەو بەردە بۆ خۆیان کەشف بکەن:
((نەوەیەک حەزدەکات ماهییەتی ئەو توحفەیە کەشف بکات کە میللەتیان پێوە سەرقاڵ کردوە ..))
گوتاری دەسەڵات ئەوەیە :ئێمە قارەمانی شاخین، ئێمە خاوەنی شەهید و قوربانییەکانین،ئێمە ئازادیمان بۆ ئێوە هێنا ،ئێوە لە بری ئەوە دەبێت تا هەتایە کۆیلە و خزمەتکار و گوێگرتە و کرێگرتەی ئێمە بن ! سەردەشت ئەم ئاخاوتنە قبووڵ ناکا، دەسەڵات لە (حەقیقەتی) گەنجەکان تێناگا یان گوێی خۆی لێ کەڕ دەکا:
((بەڵام هەرگیز ئەو پرسیارە نەکەوتۆتە مێشکەکانی دەسەڵاتەوە کە نەوەکانی ئەو مەملەکەتە لەچی رائەکەن ؟!ئایا ئەوە ئازادییە گەنجەکانی ئەو وڵاتە راو ئەنێن ؟! یان تاعونی ئەوانە کە بەناوی ئازادییەوە پێمان دەفرۆشنەوە ؟!))
کەوایە بەلای سەردەشت و نەوەکەی ، ئەو ئازادییەی کە دەسەڵاتی شاخ بۆ خەڵکی شاری هێنا: تاعونە ! تاعونێکی کوشندە ، یەکجار کوشندە ؟
ئەمە سەرەتا و کۆتایی تراژیدیایی ژیانی سەردەشت و نەوەکانی و مردنە تراژیدیاکەیانە ! بە هەڵاتن و مردن لە هەندەران و ئاوارەییدا ، بەخۆکوشتن لە وڵاتدا، بە مردنی هێواش و بێ هیوا لە مەملەکەتە تاعوناوییەکەی ئەواندا .
لەبەشەکانی دواییدا بە درێژیی لە وتاری رەخنەیی سەردەشت عوسمان بەرامبەر دەسەڵاتی کوردی دەدوێێن ئەوچەند کورتە سەرنجانەی سەرەوە پەیوەندی بەهێزی نێوان وتارییی رەخنەیی سەردەشت عوسمان و ئەزموونی ژیانی مناڵی و گەنجی لە هەولێردا لەژێر دەسەڵاتی کوردییدا روون دەکەنەوە.