بانگەوازێك: دیوارو سەر و سەرانی کورد!
Monday, 03/12/2012, 12:00
پێویستە ئۆپۆزیسیۆن، گەر هەبێ، داوای هەڵوەشاندنەوەی دەستبەجێی سەرۆکایەتی هەرێم و حکومەت و پەرلەمان و هەلبژاردنی بە پەلە بکات
فەیلەسوفی مارکسی ئیتالی ئەنتۆنیۆ گرامشی دەنووسێ: "گەر سەرت بەرامبەر دیوار وەستاو سەرت لە دیوارەکەدا ئەوە سەری خۆت دەشکێ نەک دیوارەکە."
حیکمەتەکە ئەوەیە لە پێشەوە بەرەو ئەو دیوارە هەنگاو مەنێ کە ناتوانی بیبڕی، دوایی هەرچەند کەلەسەری لێدەی کەڵكی نییە.
ئەو بنبەست و دیوارەی دەسەلاتی دەستووریی و سیاسیی و سەربازیی دەوڵەتی عێراقی نوێ کە ئێستا بەرامبەری وەستاوین سەرانی کورد لە پرۆسەی دروستکردنەوەی عێراقی عەرەبیدا خۆیان دروستیان کرد؛
ئێستاش دەیانەوێ خەڵکی کوردستانی داگیرکراوی خۆیان باجەکەی بدەن و بە سەری خۆیان ئەو دیوارەی ئەوان برۆخێنن یان پاشەکشەی پێ بکەن و ئەوانیش ، بە ماڵ و منداڵ و مافیاوە، سەر لە کۆشک و تەلارەکانیان نەهێننە دەرەوە.
سەیرە سەرۆک کۆمار بەو هەموو گیرفانە قورسە و هەزاران جەنەرالی ئەو سووپا پرۆفێشنالە نەتەوەییە عەقیدەیی یەی بیست ساڵە لە قەڵاچوالان دروستی دەکا، هێشتا ناوێرێ بچێتەوە بەغداش و دەبێ ئەمریکییەکان دووبارە بە زۆر بۆ جەولەیەکی تر راکێشی پایتەختی عروبەی بکەنەوە.
نا فەرموون چۆن دیوارەکەتان دروست کرد ئاواش هەڵیوەشیننەوە.
یان دەستبەجێ دەست لەکار بكێشنەوەو لە کۆڵ ئەم میللەتە ببنەوە.
با هەلبژاردنێکی نوێی بەپەلەی بە راستیی ئازادو دیمۆکراسی بکرێ و گەل نوێنەری راستەقینەی خۆی هەلبژێرێ و بە حوکمی دەستوور کوردستان بداتەوە بە خەلکی کوردو گەندەلیی و تاوانکاریی و داگیرکاریی ناوخۆ نەهێڵێ ئەوسا بەرەیەکی نەتەوەیی فراوانی بێ خۆفرۆشیی و خیانەت، بێ ساختەیی و هەڵخەلەتاندن، بۆ وەستان بەرامبەر هەر ناحەزێک و دیفاع لە خاک و گەلی کوردستان هەر لە خانەقین و کەرکوکەوە تا قامیشلی و دەرسیم و ئامەد ومەهابادو سنە پێکبێنێ.
لە ژێڕ سەرکردایەتی ئەم مافیا حیزبییە ئەنفالچی و داگیرکەرە ناوخۆێیەدا راستگۆیی و حەقیقەتناسیی و نەتەوەپەروەریی و بەرگری نەتەوەیی مەحاڵە.
رۆژانە خەلکی زیاتر بە تاوانی ئەوان لە هەرێمی بندەستی ئەواندا دەمرن لەوەی لە بەرەیەکی شەری پیشمەرگایەتی پێشوودا شەهید دەبوون.
زۆربەی ئەوانەی زیندووشن بە دانپێداهێنانی کاربەدەستانی خۆیان، تووشی نەخۆشی دەروونی بوون و وەک مردووی زیندووی وان.
فەرموون راپرسییەکی ىێلایەن لە هەرێمدا بکەن تا بزانین سەدی چەندی خەلک دلخۆشە یان بە دریژایی حوکمی ٢٠ ساڵەی ئێوە خۆشیی دیوە؟
ئایا میللەتێک ئاوای لێکرابێ دەتوانێ لە ژێر سایەی هەمان دەسەلاتی موجریمدا بەرگریی بکات؟
ئەمە لە هیچ ولات و ئەزموونیكی دنیادا نەبووە، هەمێشە خائینان و گەندەڵانی هەمان بنەمالەو دەسەلاتی فاشیل، مۆنۆپۆلی سیاسەتی و مێژوو-و ژیانی نەتەوەیەک بکەن و تا قیامەت سەرکردەو رێبەر بن.
لای گەلان لە پێشەوە پاراستنی میللەت، ئەوسا دەستوورو موئەسسەساتی دیمۆکراتی میللەت ئەرکی هەرە لەپێش وگرنگەو هەمیشە سەرکردەو تاکەکەس لە گەل دەرکەوتنی بچوکترین گومان و هەڵە لە ئەرگە گشتییەکانیادا قوربانی میللەت و بەرژەوەندی گشتیی و یاساو موئەسسەسسات دەکرێن و دەردەکرێن.
ئاوا میللەتان دەتوانن بمێینن و بنە خاوەنی مێژوو-و، خۆیان نوێ بکەنەوەو هەمێشە پێشکەون و نەچەقن و نەبەزن و سەریان بەرامبەر دیوار نەبێتەوە.
ئەگەر بە مانای سفریش ئۆپۆزیسیۆنی راستەقینە هەبایە دەبوو لە جیاتی سواربوونی باندواگۆنەکە: ئێستا، بەڵێ ئێستا، بە هەموو دەنگ و هێزی خۆی و شەقامی کوردیی، داوای هەلوەشاندنەوەی سەرۆکایەتی هەرێم و حکومەت و پەرلەمان و سیستیمی حیزبیی بنەمالەیی و مافیایی و هەڵبژاردنی نوێی بکردایە.
نەچووە بچێ، گەر ئۆپۆزیسیۆنن ئەمە تاکە ئەرکی ئەخلاقیی و مێژوویی تانە.
رەنگە بیانووی بۆشتان بۆ نەکردنی ئەم کارە ئەوە بێ کە کاتەکەی زۆر هەستییارە،
نەخێر: کاتەکە نە زۆر هەستیارە بەلکو زۆر لە بارە.
راستە مالکی لە پرۆسەکەی دیجلە پەشیمان نابێتەوە بەلام لەم هەلومەرجەدا کە هەرەشەی متمانەسەندنەوەی هەر لە سەرماوە، هەلبژاردنی لەپێشە و بە تایبەتی لە بەر ئەوەی هێشتا ئەمریکا لە سەر خەتەو کێشەکە لایەنی ناوچەیی جیهانیی هەیە و
بە تایبەتیتر چونکە کێشەی خەتەرناک و چارەنووسسازی سوریا یەک لایی نەبۆتەوەو تا ٢٠١٣ یەکلایی نابێتەوە، هیچ موغامەرەیەکی سەربازیی ناکاو دەشزانێ پێویست ناکا چونکە لاوازیی و بۆشیی سەرانی کورد باش ئاگادارە.
لەلایەکی تریشەوە، لە بەر ئەوەی مەحالە ئەم دەسەلاتە نەک هەر چاکسازیی ناکا بەلکو وەک هەموو شتەکانی تر ئەم کێشەیەی دەستکردی خۆی و کێشەی خەباتی کوردی رۆژاواو باکوور بۆ بەهێزکردنی حوکمی داگیرکاریی بنەمالەیی خۆی و لەبیربردنەوەی تاوانە بەردەوامەکانی گەندەڵیی و دزیی وداگیرکاریی بەکاردێنێ
بۆیە تاقە نەخشەرێگای راست و بێ فێڵ و خیانەت داواکردنی کۆتاییپێهێنانیی دیمۆکراتییانەی ئەم دەسەلاتە بنەمالەییە مافایییە خیانەتاوییەیە لە رێگای هەلبژاردنێکی نوێی بەپەلەی پەرلەمان و سەرۆکایەتییەوە و دروستکردنی حکومەتێكی تەکنۆکراتی ناحیزبی تا دوای هەلبژاردن.
*****
ئەمە تاقە ئیختیاری نەتەوەیی راستەقینەو هەرەپێویستە.
ئەگینا، با بزانین کێ لە پێشەوە سەری لە دیوارەکە دەدا؟
با بزانین ئەم دەسەلاتە لە سینارێۆکەی بەرامبەر مالکی پەشیمان دەبێتەوەو بە سەرشٶریی و خیانەتکاریی و خشکەیی وەک تا ئێستا کردوویانە دیجلەش قووت دەدەن و کوردستان دەخەنەوە ناو دەمی نەهەنگ؟
یان راستگۆن و دەتوانن سەری خۆیان نەک قوربانیانی خەلک لەو دیوارە نەعلەتییە بدەن کە خۆیان بە خیانەت، بە ناهەق، بۆ خاتری دەسەڵاتی بنەماڵەیی و دۆلارو دزیی و داگیرکردنی خەلک و خاک و ولاتی خۆیان دروستیان کرد؟
یان لە لەحزەیەکی عەقڵ و ویژدان و شەرەفدا، بەبێ داواکاری ئۆپۆزیسۆنیش خۆیان دەست لە کاردەکێشنەوەو بۆ میللەت دەگەڕێنەوەو رێگا بۆ دروستکردنی حکومەتێکی تەکنۆکراتی ئینتیقالی بێلایەن و هەلبژاردنی دیمۆکراتی نوێ خۆش دەکەن؟
رۆژان رۆژی لە دوایە. میللەت و مێژوو چاویان کراوەیە.
ئەوە هەموومان دیوارەکە دەبینین بزانین چۆن دەسەلات و ئۆپۆزیسیۆن سەری خۆیان یان میللەتی لێدەدەن؟ بەسەرشۆڕیی یان بە سەربەرزیی لێی دەردەچن.
کەمال میراودەلی
==============
سەرنج: ئەم بانگەوازە بۆ هاولاتی،سبەی، ئاوینە، لڤین و هەموو سایتەکان دەنێردرێ تکایە هەر نەبێ وەک رێزگرتن لە جیاوازی بیرو راو بەرپاکردنی دایەلۆگێکی جددیی بلاوی بکەنەوە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
