دەربارەی گۆڕان و نەگٶڕانەکانی: یادکردنەوەو رەخنە و روانگە! - بەشی سێیەم
Thursday, 07/03/2013, 12:00
ئامجەکانی پرۆژەی ئۆپۆزیسیۆنیی لە نێوان هیواو کردارو گوماندا
بنەما بناغەییەکان
وا بزانم هەر لەم دیدارە گرنگەدا [ کە لە بەشێ دووەمدا بلاوکرایەوە] ئەو کۆمەلە بنەما سەرەکییانە هەن کە پاکانەی هەڵینجانی ئەو بنەمایانەش بەمن بدەن کە لە بەشی یەکەمی ئەم باسەدا ریزم کردن.
لەم دیدارەدا کاک نەوشیروان بنەما فەلسەفیی و سیاسسی وئەخلاقییەکانی پرۆژەکەی بە روونی بەم جۆرەی خوارەوە دەخاتە روو:
１. وشە سەرەتای کارو پرۆژەکانی ژیانە، پەیامی بنچینەیی [کۆمپانیای وشە]ش وشەی ئازاد و ئازادکردنی وشەیە بە دروستکرنی میدیای ئازادی سەربەخۆی ناحیزبیی و ناحکومیی. کە مەرجێکی جەوهەری بنیاتنانی سیستم و کۆملەگای دیمۆکراسی و ئابووری ئازادە]
بۆ ئەوەی وانەزانن بوختان بە ناوی کۆمپانیای وشەوە دەکەم بە شیکردنەوە وتەکانی کاک نەوشیروان وەک خۆیان دادەنێمەوە:
[١،له‌به‌ر ئه‌وه‌ی هه‌موو كارێك له ژیاندا به وشه ده‌ستپێده‌كات
٢.راگه‌یاندنه‌كان كه له‌سه‌ر گۆڕه‌پانی كوردستاندا هه‌ن كه یان حیزبین یان حكومه‌تین، ئه‌وه‌ی زانراوه كه گۆڕه‌پانی كوردستان و عێراق بێبه‌شن له راگه‌یاندنی سه‌ربه‌خۆ ئه‌مه‌ش به كه‌موكورتیه‌كی گه‌وره داده‌نرێت سه‌باره‌ت به وڵاتێك كه هه‌نگاو به‌ره‌و دیموكراسی و ئابووری ئازاد ده‌نێت،
٣به‌ڕای من ناتوانرێت سیستمێكی دیموكراسی بنیات بنرێت یان گه‌شه به ئابووری ئازاد و پته‌و و دوور له راگه‌یاندنی ئازاد و سه‌ربه‌خۆ بدرێت،.
٤.له‌سه‌ر ئه‌و بنه‌مایه هه‌وڵده‌ده‌ین له‌ڕێگای ئه‌م كۆمپانیایه‌وه ده‌زگایه‌كی راگه‌یاندنی ئازاد و سه‌ربه‌خۆ دروستبكه‌ین له‌و هه‌لومه‌رجه سیاسیه‌ی له كوردستاندا هه‌یه
２. راگەیاندنی ئازاد پێداویستیی و ئامرازی جەوهەریی خەباتی مەدەنیی ناشاخیی یە: پەیام و ئامانجەکانی وشەی ئازادو راگەیاندنی سەربەخۆ: روونگۆیی و رونکاریی [شەفافییەت]، دیمۆکراسی، ئازادییە کەسییەکان، جیاکردنەوەی حیزب لە حکومەتو دروستکرن و بەهێزکردنی رای گشتی یە:
خەباتی مەدەنیی پێویستی بە راگەیاندنی ئازاد هەیە.
ئەم بنەمایەنە بە وشەی کاک نەوشیروان خۆی:
١ كاتێك سایته‌كه‌مان له جه‌ژنی نه‌ورۆزی پێشوودا ده‌ستی به په‌خش كرد له‌وێوه بنه‌ما تایبه‌ته‌كانی ده‌زگاكه‌مان بڵاو كرده‌وه، وتمان كه ئێمه هه‌وڵده‌ده‌ین كار بكه‌ینه سه‌ر رای گشتی كورد به‌ئاراسته‌ی
به‌ده‌ستهێنانی زیاتری شه‌فافیه‌ت و
دیموكراسی و ئازادییه كه‌سیه‌كان و
به‌ئاراسته‌ی جیاكردنه‌وه‌ی حیزب له حكومه‌ت و
چالاككردنی رۆڵی ده‌زگا حكومییه‌كان و پته‌وكردنی سه‌ربه‌خۆیی دادگا و
به‌هێزكردنی رۆڵی پارله‌مان له كوردستاندا،
٢ ئه‌مه‌ش هێڵه گشتییه‌كانی گوتاری راگه‌یاندنمانه كه هه‌ڵقوڵاوه له باوه‌ڕمانه‌وه به
كۆتایی هاتنی شه‌ڕی پارتیزانی و هاتنه كایه‌ی كات و سه‌رده‌می خه‌باتی مه‌ده‌نی كه پێویستی به راگه‌یاندنی ئازاد هه‌یه،
به‌تایبه‌ت كه ئێمه بڕوامان وایه رای گشتی كوردی ده‌توانێت كاربكاته سه‌ر سه‌ركردایه‌تی كورد
به‌ئاراسته‌ی به‌ده‌ستهاتنی زیاتری دیموكراسی و شه‌فافیه‌ت و دژایه‌تی كردنی گه‌نده‌ڵی دارایی و ئیداری و سیاسی كه له وڵاته‌كه‌دا بڵاوبووه‌ته‌وه.
３. گەر ئازادکردنی وشە لە حیزب و دەسەلات و راگەینادنی سەربەخۆی ناحیزبی پێویستی و ئامانجی خەباتی مەدەنیی بن، ئەوا ئامانجی ئەو خەباتەش دامەزراندنی موئەسسەسات و جیاکردنەوەی حیزب و حکومەتە. راستیی. ئەمە تاقە ئامانجی مەرکەزیی سەرەکیی پرۆژەی جیابوونەوەکەی کاک نەوشیروانە، هەر لە بەر گرنگی مەرکەزیی ئەو ئامانجەی پرۆژەکەی کۆمپانیای وشە، رۆژنامەی شرق الاوسگ یش کردوویەتی بە دروسمی مانشێتیی سەرەکیی دیدارەکە بەم جۆرە:
*سه‌ركرده‌ی پێشووی یه‌كێتیی نیشتمانی: وازم له یه‌کێتی هێنا له‌به‌ر ئه‌وه‌ی سه‌رکه‌وتوو نه‌بووم له گۆڕینی له حیزبی که‌سایه‌تیه‌کانه‌وه بۆ حیزبی موئه‌سه‌ساتی."
ئەنجام
بەکورتی دەتوانین ئامانج و پەیامی پرۆژەی کۆمپانیای وشە لە دوو مەبەستدا کۆبکەینەوە:
١. دامەزراندنی میدیای ناحیزبیی سەربەخۆی ئازادی رەخنەگر و دروستکەری رای گشتیی
٢. جیاکردنەوەی حیزب لە حکومەت و دروستکردن و بەکارخستنی سسیستمی مەدەنی دیمۆکراتی موئەسسەساتیی.
４. داوی ئەوە لە وتارێکی تری گرنگدا بە ناوی (ئێمەو ئەوان) [ رۆژنامەکانی کوردستان خێریان نییە لەگەڵ ئەو تەکنۆلۆجییە بەهێزو کاریگەرو ئاسان وهەرزانەشدا مەکینەی گەڕان یان هیچەو ئەرشیفیان نییە. لە گوگل و هەموو سایتەکان ورۆژنامەکان و تەنانەت لە [سبەی] شدا نەمتوانی وتارەکەی ئیمەو ئەوان بەدەست بێنمەوە]. کاک نەوشیروان زیاتر جیاوازی نێوان بیرکردنەوەی خۆی و حیزبەکانی دەسەلاتی روونکردنەوە. وەک لە بیرم مابێت جەوهەری ئەو وتارە دوو شت بوو:
１. هۆکاری ناکۆکیی کاک نەوشیروان لە یەکێتی شەخسی نییە بەلکو فەلسەفیی و فیکری یە. دوای ئەوەش زۆر بە وردی وریایی خۆی لە کەساندنی یان بە شەخسیکردنی کیشەو ناکۆکییەکان گرت. و هەمیشە جەختی لە سەر [دەزگاییکردن، واتە موئەسسەساتییکردن] و جیاکردنەوەی دەسەلات و دەستێوەردانی حیزب لە حکومەت و ئەرکەکانی دەکردەوە و لەئەنجامدا رزگارکردنی کۆمەلگاو کەلتووری کوردی لە [حیزبی کەسایەتییەکان] وەک خۆی لە چاوپێکەوتنەکەدا وتویەتی.
２. پرسی دادپەروەریی کۆمەلایەتی بە زەقیی و بەهیز هێنایە گۆڕێ لە رووی ئاستی ژیان و مووجەو بودجەو ساماندا.
وتاری (ئێمەو ئەوان) بەهیزترین ئاماژە بوو کە کاک نەوشیروان گەیشتۆتە ئەو قەناعەتەی ئیدی چاکسازیی لە ناو یەکیتی و پارتییدا ناکرێ و پێویستە ئەو بۆچوونانەی خۆی کە زیاترو زیاتر هیوای بە خەلک دەداو پستگیری بەدەستدەهینا، لە بزاوتنەوە یان خەباتیکی رێکخراویی نوێدا بەرجەستە بکات.
لە نێوان ئەو ترس و هیوایەدا بە پرۆژەی کۆمپانیای وشە، وتاریکی ڵێدوانیی گرنگی د، فائق گوڵپی م دەربارەی وتاری [ئیمەو ئەوان] لە سایتەکاندا بەرچاوکەوت. ئەم وتارە سەرەتای دایەلۆگێکی راستگۆیانەو جددی لەسەر پرۆژەکەی کاک نەوشیروان دەنەخشێنی و چەند هیڵێکی گرنگ بۆ سەرخستن و بە‌یزکردنی پەیام و ناوەرۆکی پرۆژەکە پێشکەش دەکات کە لەم خالانەی خوارەوەدا کۆیان دەکەمەوە:
１. کوردستانێتیی پرۆژەکە:
ئەم پرۆژەیە پێویستە کوردستانیی بێت یان دامێنی کوردستانی هەبێت و وەک پارتی و یەکێتی ناوچەیی و حیزبیی نەبێت [کە نەک هەر سیاسەتێکى نا نەتەوەیى پەیڕەو دەکەن،بەڵکوو مافێکى سەرەتایى خەڵکى کوردستانیش پێشێل دەکەن، بەوەى کە ئامادە نین هەواڵەکانى دەوروبەر بۆ خەڵکى کوردستان بگوێزنەوە].
２. پرسی ژن
پرسی ژن و خەبات دژی ژنکوژیی و سوکایەتیکردن بە ژن دەبیت ئامانجیکی گرنگی پرۆژە نوێکە بێت. لەم رووەوە د. فائق گومان و مەترسیی خۆ نیشان داوە کە رەنگە ئەم ئامانجە بەدی نەیەت. بە ئاگاداریی و پشبینییەکی زیرەکانەو بە داخەوە رەشبینانەوە دەنووسێت:
[[لایەنێکى ترى گرنگى سیاسەتى شارستانى ئەم سەردەمە هەڵوێستوەرگرتن و کارکردنە بۆ ماف و ئازادییەکانى ژنان بە گشتیى و ژنى کورد بە تایبەتى. لە رابردوودا کاتێک کاک نەوشیروان سکرتێرى کومەڵەى رەنجدەرانى کوردستان(کۆرەک) بوو بەرامبەر بە ماف و ئازادى ژن هەڵویستێکى کۆنەپارێزیى هەبوو،لەو ماوەیەشدا کە لە کومپانیاى وشەدا کاردەکات، بە تیۆریى و بە پراکتیکیى دیار نییە کاک نەوشیروان دەربارەى ژن بە هەڵوێستە کۆنەکانى خۆیدا چووبێتەوە،ئەگەر لە ئایندەشدا بەو عەقلییەتەى جارانەوە دەربارەى ژن کاربکات وگۆڕانکاریى نەکات و لە پرۆژەى ئۆپۆزسۆینبوونییدا ماف و ئازادیی ژن رەنگ نەداتەوە،ئەو کات ناتوانین بڵێین کاک نەوشیروانى ئۆپۆزسیۆن دەتوانێت کەمێک لە دیاردەى توند وتیژىی سەر ژنان کەم بکاتەوە، ناتوانێت لە سەر ئەم بابەتە هەستیارە بۆڕى حزبە دەسەڵاتدارەکانى باشورى کوردستان بداتەوە، ئەو کاتەش پێیەکى ترى ئۆپۆزسیۆنبوونەکەى کاک نەوشیروان دەشکێت.."]]
３. ئازادیی یروراو قبوڵکرنی ئەوی دیکە:
بەرای من ئەم خالەی د. فائق گرنگترین و مەترسیترین و سەختترین لێکدانەوەی جەوهەرییە دەربارەی ئایندەی پرۆژە ئۆپۆزییۆنییەکەی کاک نەوشیروان وەک د. فائو ناوی دەنێت و بە بەلگەی کۆنکریتیی و لۆجیکیی و ئەزموونیی تالی خۆیەوە روانگەی خۆی بۆ ئەم بابەتە بە زەقیی روون دەکاتەوە: لە بەر گرنگی ئەم لایەنە تەواوی ئەم خالەی وەک خۆی وەردەگرم:
[[ لایەنێکى ترى گرنگى بەرنامە ئۆپۆزسیۆنیەکەى کاک نەوشیروان کە پێویستە پەى پێببات ئەوەیە،ئەگەررۆژێک لە رۆژان ئەو توانى ببێتە دەسەڵات،بۆچوونى لەگەڵ ئازادى بیروراى سیاسیدا چۆنە،ئایا دەتوانێت لە ئەمرۆى دەسەڵاتى هەرێم باشتر هەڵسووکەوت لە گەڵ بنەماکانى سیستەمى دیموکراسى و ئازادى بیروراداهەڵسووکەوت بکات؟ ئایا بڕواى بە دیاردەى فرەحزبى هەیە؟ یان وەک جاران بیردەکاتەوە؟ کاتى خۆى کان نەوشیروان هەڵوێستى هەرە نادیموکرات وهەرە توندرەوى بەرامبەر بە هەر بیروبۆچوونى جیاوازى ناو ریزەکانى یەکێتیدا نواندوە،ئەو کادر و بەرپرسانەى کە لەیەکێتى جیابوونەتەوە و لە دەرەوەى رێکخستنى یەکێتیدا کاریان کردووە،کاک نەوشیروان لە هەموو بەرپەرسەکانى ترى یەکێتى زیاتر دژیەتى کردوون.ئەو کاتانەى کاک نەوشیروان بەرپرسى باڵاى یەکێتى بووە،پێوەندى ئەو لە چاو بەرپرسەکانى ترى یەکێتیدا لەگەڵ حزبە کوردستانیەکانداخرابتر بووە.لە ماوەى دە ساڵى رابوردوودا حکومەتى هەرێمى سلێمانى چەندان شەڕى ناوخۆیى و هەڵسووکەوتى نادیموکراتى بەرامبەر بە هێزە سیاسیەکان و گەنجانى کوردستان بەڕێوەبرد،زۆر کەسى باوەڕپێکراو رایدەگەیەنن کە کاک نەوشیروان بریاردەرى سەرەکى ئەو کردەوە ناشارستانى و ناتەوەیى و نادیموکراتیانە بووە،وەک لێدانى حزبى کۆمۆنیستى کریکارى لە سلێمانى ساڵى 1999 و شەرى ساڵى 2000 نێوان ى ن ک و پ ک ک، پارچەکردنى حزبى سوسیالیستى دیموکراتى کوردستان، تەقەکردن لە رێپێوانى گەنجەکان لە ساڵانى 2005-2006 کە لەو کاتەدا کوتلەى ریفۆرم لە وەزارەتى ناوخۆ و ئاسایشى شارى سلێمانیدا بالادەستبوون و بڕیاریان لە مەکتەب سیاسى یەکێتى (لە کاک نەوشیروان) وەرگرتووە. منیش وەک کەسێکى ئۆپۆزسیۆنى دەسەڵاتى هەرێمى کوردستان کە لە ساڵانى رابوردوودا چەند جارێک زیندانى کراوم و چەندان جاریش رووبەرووى هەرەشەى دەرکردن و تەسفیەى فیزیکى بوومەتەوە، پرسیارێکى راستەوخۆ لە کاک نەوشیروان دەکەم ئەویش ئەوەیە،رۆژى 7-9-2006 لە سلێمانى لە لایەن پۆلیسەکانى ئاسایشى سلێمانیەوە کەمینێکم بۆ دانراو کەوتمە کەمین و بۆ ماوەى 6 شەر رۆژ زیندان کرام و دواى لێکۆڵینەوە بە بڕیارى حاکم ئازاد کرام.دواى ئازاد کردنم کەسێک هاتە لام وپێیڕاگەیاندم کە بە بڕیارى بەرێزتان من دەستگیر کراوم،بڕوام نەدەکرد،بەڵام کاتێک ئەو کەسە باسەکەى بۆ گێرامەوە زیاتر لە باوەرکردنەوە نزیک بوومەوە: ئەو کەسە وتى من لە لایەن لایەنێکى سیاسیەوە پەیامێکم بۆ مام جەلال هێنا کە تۆ ئازاد بکات،مام جەلال وتى ئەو لە لایەن کاک نەوشیروانەوە بڕیارى دەستگیرکردنى دەرچووە، برۆ بۆ لاى نەوشیروان قسەى لەگەڵ بکە،ئەو برادەرە وتى کە چوومە لاى کاک نەوشیروان و دەربارەى دەستگیرکردنى تۆ قسەم لەگەڵ کرد،کاک نەوشیروان نکوڵى لەوە نەکرد کە دەستى لە دەستگیرکردنى تۆدا نەبێت و وتى کاک فڵان ئەو زۆر بە خرابى لە سەرمان دەنووسێت بۆیە وامان لێکردووە.کاتێکیش لە ئاسایش ئازاد کرام مامۆستا سەیفەدین نارەزایى خۆى لەسەر ئەوە نیشاندئەدا کە من رەخنەى زۆر لە یەکێتى دەگرم و رەخنە لە لایەنەکانى تر ناگرم،کاتێک من لە زیندانى ئاسایش دەستگیرابووم و مانم لە خواردن گرتبوو،داناى ئەحەمد مەجید گوتبووى من بەوکارە رازى نەبووم کە هاورَییەکى قوتابخانە و پێشمەرگایەتى خۆم بخەمە زیندانەوە، بەڵام مەکتەبى سیاسى ئەو هەڵەیەیان پێکردم. باشە کاک نەوشیروان سێ مانگ کەم نییە بۆ ئەوەى تۆ لە قۆناغى سەرکوتکردنى ئۆپۆزسیۆنەوە بۆ قۆناغى ئۆپۆزسیۆنى لە کۆمپانیاى وشەدا(7-9-2006 بۆ 6-12-2006) بگوێزیتەوە و دواى دوو ساڵیش بتەوێت قەناعەت بە خەڵک بکەیت کە ئۆپۆزسیۆنى دەسەڵاتى یەکێتیت؟ بەو زانیاریانەدا دەردەکەوێت کە کاک نەوشیروان لە چاو بەرپرسەکانى ترى یەکێتیدا، دەستى لە سەرکوتکردنى ئازادى خەڵکدا بە هێزتربووە،باشە گەرەنتى چیە لە ئایندەدا ئەگەر بوویتە دەسەڵاتدارى ناو یەکێتى،یان بوویتە دەسەڵاتدارى کوردستان، هەمان سیناریۆى سەرکوتکردن و زیندانى کردن و سیاسەتى نادیموکراتى و نانەتەوەیى و شەڕى براکوژى دووبارە ناکەیتەوە؟]]
４. ناوچەگەرێتیی:
مەترسییەکی گرنگی تر کە د. فائق دیسانەوە لە ئەنجامی ئەزموونی کەسیی خۆیەوە دەیخاتە بەرباس پرسی ناوجەگەرێتیی و دەرهاویشتە سەلبییەکانیگی. دەنووسێ:
[[خاڵێکى ترى لاواز لە سیاسەت و هەڵسوکەوتى کاک نەوشیرواندا عەقڵییەتى ناوچەگەرێتییە. لە سەرەتاى هەشتاکاندا ماوەى ساڵێک زیاترلەبارەگاى کاک نەوشیروان بووم، لە کاتى کێشە ناوخۆییەکانى ناو کۆمەڵەشدا من هەر سەر بە خەتى کاک نەوشیروان بووم، لە بەرئەوە یەک لەو کەسانەم کە لە نزیکەوە کاک نەوشیروان دەناسم، ئەو پیاوە ئەگەرچى سیاسەتمەدارێکى بەتوانا و لێهاتووە، بەڵام هەڵگرى عەقڵییەتێکى ناوچەگەریى دەرەبەگایەتییە، تەنها خەڵکى سلێمانى بە کورد دەزانێت.ساڵى 1983بە ئاشکرا لەبەر چاوى خۆم لە گوندى سێروانى ناوچەى مەرگە وتى: من بادینانى بە کورد نازانم، لە چەندان کات وشوێنى تردا قسەى واى بەخانەقینى و هەولێرى وتووە، چەند ساڵێک لەمەوبەریش رووى کردە کەرکوکى برینداروپاداشتى پێشمەرگە کەرکوکى و گەرمیانیەکانى یەکێتى نیشتمانى کوردستانى دایەوە و وتى: کەرکوکییەکان حزبەکانى کوردستان دەدۆشن. ساڵى 1995 لەبارەگاى مەکتەبى سیاسى بووم لە سلێمانى،کاک نەوشیروان دوو پێشمەرگەى هەورامى بانگ کردبوو، لە سەر هەورامییەکانى شارى سلێمانى زانیارى لێوردەگرتن، ئەو دوو بەرێزەش لە بەرچاوى کاک نەوشیروان هەموو هەورامییەکانى شارى سلێمانیان کردن بە پارتى، کاک نەوشیروانیش توورەبوو وتى هەرچى هەورامی لە سلێمانیدا بێت لەم شارە دەریدەکەم، منیش یەکسەر توڕەبووم و وتم ئەى بۆچى لە شاخ دەرتنەکردین. ئەو کاتە هەورامییەکانى ناوشاخەکانى سلێمانیتان دەرکردبایە باشتر نەبوو!!،کاک نەوشیروان هەڵوەستەیەکى کردوو تووڕەبونەکەى گۆڕى وزەردەخەنەیەکى کرد و وتى: ئەو قسەیەم بە سوحبەتەوە کرد.من لێرەدا پرسیارێک دەکەم، ئایا ئێستەش کاک نەوشیروان ئەو هەڵوێستە بە پەلەو هزرە ناوچەگەرییانەى ماوە؟ ئایا کاک نەوشیروان بۆ ئەوە ئۆپۆزسیۆنە تا دەسەلات پەیدا بکات و هەرچى هەورامى و هەولێرى و خانەقینى و بادینى و کەرکوکى شارى سلێمانى هەیە هەر هەمووى دەربکات و لەگەڵ ئاغا و کەسایەتییە ناودارەکانى شارى سلێمانیدا دابنیشێ وبحەوێتەوە؟ یان کاک نەوشیروان گۆڕاوە و دەیەوێت لە ئایندەدا سیاسەتێکى شارستانیى و دیموکراتیى و نەتەوەیى پەیڕەوبکات لە کوردستاندا جێگیر بکات؟ ]]
http://www.pcdk.org/kurdi/pcdknews.php?sid=2943 دانی پێدا دەنێم من پێشتر ئەم نووسینەم نەبینیبوو. تەنیا کە لە گوگل بە دوای [ئێمەو ئەوان] دا گەڕام ئەم وتارە گرنگەم بەرچاوکەوت کە لە سایتی [پارتی چارەسەری دیمۆکراتی ] و چەند سایتێکی تریشدا بلاوبۆتەوە. بەراستی جێی شانازییە میللەتێک نووسەرو کەسێتیی ئاوا راستگۆو وردبین و پێشبین و خۆبەختکەری هەبێت. گەر پرۆژەکە ئۆپۆزیسیۆنییکەی کاک نەوشیروان جددی بووایە دوو سێ کەسی رووناکبیر و بە ئەزموون و ئەمین و ناخۆپەرستی وەک د. فائق - ی بەستبوو کە ببێتە خاوەن پەیام و پرۆگرامی راستەقینەو بەهەڵەدا نەڕوات و هیوای خەلک نەپروکێنێتەوە. نازانم بۆ دەبێ نووسینی ئاوا دەگمەن نەبێتە بابەت و کەرەسەی زۆرترین دایەلۆگ و دیبات؟ چۆن دووای ئەم نووسینەش رۆشنبیران ئاوا بێدەربەست و گومڕایانە بزوتنەوەی گۆڕان یان وەک شتیکی تازە وەک بەفری سپی بێت و لە ئاسمان هاتبێتە خوار وێنا کرد؟ ئەی دایەلەکتیکی کۆن و نوێ؟ ئەی ئەزموونی رابردووی هێشتا زیندە؟ ئەی سەدان کێشەی چارەسەرنەکراو؟ ئەی پرسی قورسی گۆڕانی عەقلییەت و بیرکردنەوەو هەڵوێست؟ ئەی ناکۆکی بەرژەوەندییەکان؟ ئەی نەبوونی سیسیتم و موئەسسەسات؟ پرسیارەکان زۆرن بەلام کارەساتەکە ئەوەیە زۆربەی نووسەران دەنووسن و ناپرسن.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
