بەبێ بەرزكردنەوەی دروشمی بێكەڵكی (ارحل)، جەماوەری تونس بن عەلییان لە وولات دەرپەڕاند. جەماوەری میسر لەو تاقیكردنەوە لاوازەوە، (ارحل) ی كردە ستراتیژی نزیكی خۆی. زۆری نەبرد جەماوەری میسر، مبارەكیان لە ئاسمانەوە داگرتە سەر زەوی. بەلام بەبێ ئەوەی هیچ شتێك لە ژیانی ئابووری و كۆمەلایەتیان بگۆڕن. وە بە دوای راِپەڕینە جەماوەریەكاندا، هەژاری و بێكاری لە هەردوو تونس و میسردا، بە ڕێژەیەكی بێئەندازە چۆتە سەرەوە.

(گۆڕان) لە كوردستان، بە مەبەستی وەدی هێنانی خەونە سیاسیەكانیان، ئەو دروشمە بێكەڵكەیان لە میسرەوە گەیاندە كوردستان و (ارحل) یان لە خەڵكی كرد بە ئامانج. وە زۆر بە زوویی جەماوەر لەو حیلە سیاسیانە تێگەیشتن و بینیان نە ئەو دروشمە و نە دروشمە بێكەڵكەكانی تری (گۆڕان) و نە تاكتیكی دانوستانیش لەگەڵ دەسەلات، هیچ لە باری ئابووری و كۆمەلایەتی ناگۆڕن لە كوردستاندا. 

حكومەتە لەقیوەكەی یەكێتی و پارتیش، كەوتنە هەرا نانەوەی چاكسازی و بە نیازی دوورخستنەوەی مەترسی لە دەسەلاتەكەیان، تاكتیكی ناردنە دەرەوەی لاوانیان گرتە بەر بۆ دەرەوەی وولات بەناوی خوێندنەوە. ئەم تاكتیكەیش لەمێژە لە دەسەلاتەوە پەیڕەو دەكرێت. دەسەلاتی كوردی هەر لە سەرەتاوە، بە مەبەستی دوورخستنەوەی (ئاژاوە گێڕ) ە بێكارەكان لە شەقامە مەترسیدارەكانی شارەكان، دەرگای لەبەردەم لاواندا خستۆتە سەرپشت بۆ ئەوەی بەلێشاو ڕوو لە دەرەوەی وولات بكەن و لەبەرچاوا نەمێنن.

بەلام ئەم پلان و تاكتیكە لاوازە بە فریایان نەكەوت. ئەوان بێئاگابوون لەوەی لە ژێر پێیاندا، گڕكانێك لە تەقینەوەدایە. كام گڕكان؟ ئەو گڕكانەی لە 17 ی شوباتی 2011 دا چوو بە ئاسماناو خورپەی مەرگی خستە دڵی دەسەلاتدارانەوە. بە ئاستێك كە ئەگەر تاكتیكەكانی (گۆڕان) و ئیسلامیەكان نەبوایە، زۆر بەزوویی،جەماوەر لە تاكتیكی خۆپیشاندانەوە تیپەڕی دەكرد بۆ مانگرتن و تەنانەت سەنگەر لێدان لە ناوەڕاستی شەقامەكاندا.

(گۆڕان) و ئیسلامیەكان كەوتنە كۆنترۆڵ كردنی شەقامە ئاڵۆزاوەكانی شار لە سلێمانی. تاكتیكی یەكەمی (گۆڕان) بەند كردنی خەڵكی بوو لە سەرای سلێمانیدا. سەرای سلێمانی، سەرای خەبات و تێكۆشان، بووە سەرای مزایەدە، بووە جێگای بانگ و سەڵاو پاڕانەوە لە ئاسمان بۆ ڕزگار بوون لەو خوێنڕێژانەی (گۆڕان) گوڵ و شیرینی دابەش دەكرد بەسەریاندا.

تاكتیكی هەرە بەهێزی (گۆڕان) و (یەكێتی)، وەك پیشەی هەمیشەییان، وەك ڕۆڵی 40 ساڵی ڕابووردوویان لەگەڵ بەعس، نیشاندانی دانووستانەكانیان بوو لە تەلەفزیۆنە درۆزنەكانیانەوە. ئەمەیش بەو هیوایەی خەڵكی بە ئامانجێكی درۆینە بخەلەَتێنن، بەڵكو خەڵكی لەسەرادا، لە چاوەڕوانیدا بهێڵنەوە تا ئاوی قاچیان دادێت و بە مەئویسی دەگەڕێنەوە ماڵەوە. ڕۆشنبیرەكانی دەوری (گۆڕان) یش كە تا ئێستایش، تاكە هیوایان، دەستگیربوونە لە چمكێكی كورسیەكانی دەسەلات، بەووشەی قەبەی (ئێمە ناڕۆینەوە تا وەلاممان نەدەنەوە!)، هەموو جەماوەریان بە شیعرو سروودە ناخۆشەكانیان هەراسان كردبوو. دروشمی (بە ئاشتی! بە ئاشتی) یش، پڕ بە سەرا، بەڵكو پڕ بە شار دەنگی دەدایەوە، ئەو دروشمەی زەمینەی تێرۆر بۆ دەسەلات و ملكەچی بۆ جەماوەر دەسازێنێت، ئەو دروشمەی هیچ نیە قامچیەكەی دەستی (زێرەڤانی و دژە تێرۆر) نەبێت.

هەر بەم جۆرە، جەماوەر لە نێوان یاریەكانی سیاسیە تاكتیكبازەكاندا، بە هەگبەیەكی خاڵیەوە، بە ماندوێتی و ژمارەیەك شەهیدو بریندارەوە، ملی ڕێگایان گرتەوە بەرەو ماڵ.

ئەمەیە دواین دەرسی بزووتنەوەی شۆڕشگێری. بۆیە لێرە بەدواوە، دەبێت بە دەرس و تاقیكردنەوەكانماندا بچینەوە، دەبێت تاكتیكەكانمان دژ بە تاكتیكی سیاسیە تەڵەكەبازەكان بێت، دەبێ ئامرازەكانی خەبات بگۆڕین، نە خەباتی پەرلەمانی، نە تاكتیكی خۆ مەلاسدان لە سەراكاندا، هەنگاوێك لە بزووتنەوەكەمان نابەنە پێشەوە. مێژووی ڕەشی دانووستانیش لە كوردستاندا، هیچی بۆ هەژاران و بێكارانی كۆمەڵگا نەهێناوە، چارەڕەشی نەبێت.

دەبا لە خۆكۆكردنەوەی داهاتووماندا، خۆمان لە (مەجالسە هەڵبژێردراوەكانی جەماوەردا) گرد بكەینەوە!

دەبا تاكتیكەكانمان خۆپیشاندان و مانگرتن بێت و هەركاتیش پێویستی كرد، سەنگەری سەرشەقامەكان دامەزرێنین!

دەبا وەك یۆنان و ۆڵ ستریت، لە (بزووتنەوەی سۆشیالیستیی خۆرسك) دا تەعبیر لە بەرژەوەندیە چینایەتیەكانمان بكەین!

سەركەوتوو بێت خەباتی هەژاران و بێكاران!

بەم ئیمەیڵە پەیوەندیمان پێوە بكەن: [email protected]