گەنجی بێزاری كوردستان و پێشنیارێك

Friday, 19/03/2010, 12:00

گەنجان لە هەر وڵاتێ، یان لە نێو هەر گەلێ هێز و بازوی ئێستان بۆ بنیاتنان و درەوشانەوەی ئایندە. میللەتێك گەنجانی بێزار و دڵشكاو و عەمباری خەم و قەهر بن، ئایندەیەكی ئەوتۆی نیە جێگای دڵخۆشی بێ. لە كوردستان، گەنجان لە پیرانی پەككەوتە بێزارترن و، هەر یەكێكیان بدوێنی، بارێك خەم و پەژارە و بێزاری و ڕەشبینی و بێ هیوایی دەكەوێ بە سەرتا. ساڵی 2006 سەردانی كوردستانم كرد و بۆ ماوەی 10 مانگ مامەوە. لەم دە مانگەدا، تەنانەت یەك گەنجیش پێی نەگوتم شتێكی چاك دەكەی لە كوردستان ژیان بەسەر دەبەی! ڕاستیەكەی ئەو دە مانگە خۆشترین كاتەكانی ژیانم بوون. های لایڤ نەژیام و، زۆرێك لە گیر وگرفت و پابەندبوونی جیاواز بە سەرمدا كۆبووبوونەوە، وێڕای زەحمەتیەكانی كوردستان وەك نەبوونی كارەبا و خزمەتگوزاریەكانی تر، بەڵام ئەو خۆشیەی لە كوردستان هەیە بە هەموو ئازارەكانیشەوە، پەیدا كردنی لە شوێنێكی تر ئەستەمە. گەنجان هەقیانە گلەیی بكەن. هەر لە منداڵیەوە، هیچ شتێكیان بۆ نەكراوە لەو شتانەی لە دونیا بۆ مناڵان دەكرێ. لە هیچ بوارێك، حەز و ئارەزوی گەنج تێر نەكراوە. وەك زادی شەڕ و دارە وشكی سوتاندن بۆ دەسەڵاتی ئەم و ئەو بەكار هێنراوە و، خەونەكانیان ئەنفال و زیندە بە چاڵ كردوون. پارەیەكی زۆر لە كوردستان هەیە، كە دەكرێ هەزاران پڕۆژەی بەرهەم هێنەر و گەش و نما و پێشبردن و خۆشگوزەرانی بۆ گەنجان، پێ فەراهەم بێت، بەڵام ئەم پارەیە بێ ماندوو بوون، كەوتووەتە دەستی كۆمەڵێكی نەفام و گەندەڵ و مشەخۆر، بۆ شەهوەتبازیەكانی دەسەڵاتدارەكان پەرت و بڵاو دەكرێ. بەڵام گەر ئەمە ڕەوشی كوردستان بێ، خۆ ناكرێ بە تەواوی تەسلیم ببین و ژیانمان پڕ كەین لە تازیمانەیەكی هەمیشەیی. هەندێك هۆكاری بێزار بوونیش، دەگەڕێتەوە بۆ لە جوڵە وەستان و پەنگ خواردنەوەو، بە ئەنجام نەگەیاندنی بزاوت و جوڵە پێویستەكانی لەش و ڕۆح. ئەم گەردوونە، لە سەر یاسای جم و جۆڵی بەردەوام دروست بووە. مرۆڤیش بەشێكە لە گەردوون و، بەڵكو هەر مرۆڤێك بۆ خۆی گەردوونێكی بچوككراوە. یاسای گەردوون مرۆڤیش دەگرێتەوە. هەر گیان لەبەرێك لەم گەردوونەدا، بە سروشت، بونیاد و خۆشی پەیوەستە بە جم و جۆڵ. گیر و گرفتێكی گەورەی بەشێكی زۆری گەنجی كوردستان، حەپەساو بوون و تەسلیم بوونە بە ئیرادەی بێ هودەیی و بێ هیوایی و بێزاری. ئەمە داوێكە گەنج خۆی پێوە كردووە، كە ئەم داوە لە ڕاستیدا وەهمێكی بێ مانایە. ئێمە ئەوەندەی ژیانمان بۆ بڕاوەتەوە دەبێ بەجێی بهێنین. هونەر و خۆشی لەوەدایە ژیانمان بگۆڕین، بە جم و جۆڵێكی سود بەخش بە خۆمان و دەوروبەر. ئێستا كوردستان دەرگای ئاوەڵا كردووە بەرەو وەرزی بەهار و هاوین، كە وەرزی كار و گەشت و خۆ نوێكردنەوەیە. كوردستان پڕە لە چیا و شاخی بێ پایان. شوێنی زۆر گرنگ و خۆش و دڵڕفێنی سەرسامكەری هەیە. حەیفە ئێمە لە نیشتمانی خۆمان نەزانین چی هەیە! یەكێك لە جوانی و ئازایەتیەكانی مرۆڤی ڕۆژئاوایی حەزكردنیەتی بە دۆزینەوە و گەشت و سەیرانی -تەنانەت پڕ مەترسیش- بۆ ئەزموون پەیدا كردن و، خۆ نوێكردنەوە و داهێنان و توند و بەند بوون. لەم هاوینەدا گەنجانی كوردستان بە گروپ، هەر لە سێ كەس و چوار كەسەوە تا زیاتر، دەتوانن بە خیوەت و كەل و پەلی خەوتن و خواردنی ئامادەكراو و كەل و پەلی گەشت، بۆ چەندین ڕۆژ بە نێو شاخ و كوێستانی كوردستان گەشت بكەن، وەك ئەو گەشتانەی گەنجی ڕۆژئاوایی دەیكەن بۆ شوێنی دوور و لاپەڕگە. ئەم گەشتانە بێزاری و تەمبەڵی و ڕەشبینی دەڕەوێنێتەوە. هەروەها دەبێتە هۆی پێدانی وزە و ئەزمون و سەربەخۆیی و زانین بە گەنجی كوردستان. ئیسلامیەكان و بزوتنەوەی گۆڕان دەتوانن چەند ڕێكخراوێك دروست بكەن، بۆ هاندان و ئامادەكردنی ئەم جۆرە گەشتانە بۆ گەنجان، چونكە ئەمە ڕێگایەكی زۆر گرنگ و بە كەڵكە لە ڕێگای گۆڕانكاریكردن لە كۆمەڵگا. ئەم هۆكارە چەندین ئێكسپیریەنس و مەعریفەت و بەهرەی شاراوە دێنێتە كایەوە و، وزەی نوێ بە كۆمەڵگا دەبەخشێ و چەندین نەخۆشی ترسناك چارەسەر دەكا. هەروەها ئەم جۆرە هەنگاوە بازاڕێكی نوێ دێنێتە كایەوە و، جم و جۆڵێكی نوێ بە كۆمەڵگا دەبەخشێ و، گەنجانی كوردستانیش هەڵدەنێ بەرەو ئازایەتی و ئازادی و ژیانێكی نوێ. گۆڕانكاری تەنها چەقەبازی سیاسەت نیە و، دەنگ و باس و وتار و شڕۆڤەی ململانێی حزبی و سیاسی نیە. خەڵك مێشكی پڕ بووە و، پێویستی بە خۆ نوێكردنەوە هەیە. ئەوەی پێشنیارمان كرد هەنگاوێكە بۆ گۆڕان.