ملیۆنان دۆلاری وەزارەت و نێوەندێكی پووكاو

Tuesday, 20/04/2010, 12:00

سێ ساڵ لەمەوبەر وەزارەتی بەناو ڕۆشنبییریم بە "وەزارەتی دۆق ویلیەم" ناو هێنا. بەكورتی، دۆق ویلیەم وەك ئاڕنۆڵد توینبی مێژوو نوس دەڵێ: سەركردەی سوپایەكی خاچ هەڵگران بوو، پێش شەڕی (حەتین) هاتبوو لە پێناو قودسدا لە گەڵ مسوڵمانان بجەنگێ. ئەسقوف مونیز دەڵێ: "ژمارەی (كچە هونەرمەندەكان!) لە سوپای دۆق ویلیەمدا، لە ژمارەی كتێبەكانی كتێبخانە زیاتر بوون. مونیز دەڵێ: (تەنها ئەم "كچە هونەرمەندانە!" بە ساغی مانەوە و سوپای دۆق بە تەواوی لە نێو چوو، دۆقیش بە سەر شۆڕی گەڕایەوە). بێ گومان مونیز بە "داوێن پیس" ناوی ئەم كچانە دەبا، بەڵام ئەوانیش لە واقیعدا لە ژێر پەردەی سەماكەر و گۆرانی بێژ كاری داوێن پیسیی خۆیان بە ڕێوە دەبرد! وەزیری پێشووی وەزارەتی ڕۆشنبییری، فەلەكەددین كاكەیی، لە دیمانەیەكدا گوتی: (ئێمە بایەخی زۆر بە گۆرانی دەدەین چونكە لە ڕێگای گۆرانیەوە دەتوانین كورد بە دونیا بناسێنین)! سەیرە، دەبێ جگە لە كورد خۆی كێ گوێ لە گۆرانی كوردی بگرێ؟ تۆ بڵێی ئەوروپی و ئەمریكی و یابانی و چینی، گوێ لە گۆرانی كوردی بگرن. ئا لێرەدا هەقە، هەر هەموومان تا ڕادەی زگ ئێشان پێبكەنین. ئابڕو چوونێكی لەم جۆرەیە، عەبدوڵلا پەشێو، لە شیعرێكدا باسی لێوە دەكا، كە دەیەوێ لە شەرما ببێتە كرم و بە ناخی زەویدا بچێتە خوارەوە. وەزارەتی بە ناو ڕۆشنبییری، شوێنێك بوو بۆ داوێن پیسیی و مێ كێشی كردن، بۆ ئەم كاربەدەست و ئەو مەسول. چەند گۆرانی بێژێكی ئافرەت بە سوپاسەوە، هەندێك لەم داوێن پیسیەیان باسكرد، كە چۆن پارە و پول و زەویان نراوەتە بەردەم لە پای سێكس كردن لە گەڵیاندا، تا هەروەها كار ئاسانی هونەریشیان بۆ بكرێ. ئا ئەمە بوو وەزارەتەكەی فەلەكەددین، كە ملیۆنان دۆلاری بۆ سەرفكرا، كەچی لە نێوەندەكانی جیهان كورد نە دەنگی هەیە نە ڕەنگ، تەنانەت كلكێكیش بەم ناوە دیار نیە! كچی ئەو بەڕێزە وەزیرە، نەك هەر ئەوەندە بە سەیارەی مۆنیكا تەشریفی دەبردە كولێژی مامۆستایانی ئینگلیزی لە هەولێر، بەڵكو ملیۆنان دیناریشی بۆ سەرفكراوە، گوایە گۆڤارێكی هونەری گشتی دەردەكا چونكە خوشكەكەی گۆڤاری مناڵانی دەردەكرد! بە ناو ڕاوێژكار و فەرمانبەر لەم وەزارەتە، وێڕای دەست بەتاڵی لە ڕۆشنبییریدا، لە پێشبڕكێیەكی پیسدا، ئەم دەستبەتاڵیە بە داوێن پیسیی و پارە دزین پڕ كراوەتەوە. فەرموو ببینە، ئەو هەموو ڕۆژنامە و گۆڤار و بڵاوكراوەی زۆر بێ مانا كە تەنها هەبوونیان بۆ پارە دزینە، چ پێشبردنێكیان هێناوەتە ئاراوە بۆ كورد؟ نزیكەی 1000 بڵاوكراوە هەیە لە كوردستان، بەڵام لە جۆر و ناوەڕۆكدا فش و بۆش! لە ئاستی ڕِۆشنبییری، هونەری، ئەدەبی، كار و پیشەی بە ناو وەزارەتی ڕۆشنبییری و دارودەستەكانیان جگە لە كۆپیكردنی بەرهەمی میللەتانی دراوسێ، تەنها بەتاڵی بەخشینەوە بووە. فەرموو ببینە و بەراورد بكە، سینەمای كوردی لە گەڵ هی خەڵك، دڕامای كوردی لە گەڵ هی میللەتانی دراوسێ، بەرهەمی زانستی و ئەدەبی، پەروەردە...هتد. لە سینەمادا، هەیە و نیە بەهمەن قوبادیە، ئەویش خەڵكی ڕۆژهەڵاتە و بە پارەی وەزارەت پێنەگەیشتووە، هەر چەندە بەرهەمەكانیشی زیاتر ڕیسوای كوردی كردووە و وەك میللەتێكی زۆر سەرەتایی وێنای كردووە! سوریا كە بە قەدەر چارێكێكی كوردستان پارەی لە دەست نیە بە بەراورد لە ڕێژەی دانیشتواندا، لە ڕوی هونەری دڕاما، ئەوپەڕی سەركەوتنی بە دەست هێناوە. خەڵك، بە چەند ساڵێك داهێنان دەكا و سەركەوتن بە دەست دێنێ. كورد، نزیكەی بیست ساڵە حوكمی خۆی دەكا و دوو بانكی گەورەش پاڵپشتی بوو، گومرگەمەی ئیبراهیم خەلیل و بودجەی نەوت، كەچی تەنها ڕۆشنبییریەكی كز و مات و مەلول، هونەرێكی شەرمن لە ئاست گەلان، بەتاڵیەكی پڕ درۆ و دزینی بۆ ماوەتەوە. گورگ شوانی پەز بێ هەر ئەوە حاڵی دەبێ.