ل پەی كوشتنا سەردەشت ئوسمان و ھەلوێستا رۆشنبیرێن ھەرێما زەر

Friday, 21/05/2010, 12:00

گوران راست دبێژیت و مافێ وێ ھەیە، دەما بەحسی ھندێ دكن كو ل ناوچەیا دھوك و ھەولێرێ دێ " شانەیێن" تەنزیماتێن ڤەشارتی دروستكن. ئەو ژ بەر ھندێ چمكو ل دەڤەرا بەھدینان و ھەولێرێ وەكو سەركردایەتی یا گوران دبێژی نەك تەنیا نانبرین ھەیە، بەلكو " گیانبرین" ھەیە.

ئەز ناچمە ناڤ چ تومەتباركرنا، ئەز ھیچ لایەكێ تومەتبار ناكەم، بەس ئەز وەكی ھاولاتی ھەرێما كوردستانێ ھندەك پرسان ئاراستەی سەركردایەتی پارتی یا خوە دكەم. ھیڤیدارم ئەو ژی بەرسڤا ڤان پرسان بدەن، ئەگەر ب راستی پارتی و پاراستنێ نەك بەشەكن ژ پلانا كوشتنا قوتابی سەرەدەشت ئوسمان؟

ئەو رەنگ و رویێ بەلاغا مەكتەبا سیاسی پارتی پێ ھاتە نڤیساندن، ئەو رەنگێ پاراستن بەلاغێ بەلاڤ دكت و ئەو رەنگێ ھندەك نڤیسكارێن سەر ب پارتی ڤە ژ وان ئاسو عەلی فەرەج تەھید ل ھاولاتی، روشنبیر و روژنامەنڤیس و ھێزێن سیاسی یێن ھەرێمێ دكەت، ھەمی ئیشارە ب ڤێ راستی دكن پارتی و پاراستن بەشەكن ژ ڤێ پلانێ. چەند خوشە ھندەك جاران بمارەك ل سەر دفنا مرۆڤی بیت و جار جار مرۆڤی ژ خەلەتی و كریارێن خوە ئاگاھدار بكت. بەلێ ھەكەر روژنامەیێن ھاولاتی، ئاوێنە، لفین و ل رەخ ڤان ڤە ژك كەنالا ك.ن.ن نەبیت، ئەرێ ئەم دێ ھندەك ئەخبار و راستین ھەرێما كوردستانێ ژ كوی بزانین؟ ھەر چەندە ئەز ب خوە كارگێرێ لەقا ئێكا پارتی مە، بەس بەرێز، ئەگەر مەبەستا مە گەھاندنا ئەخبار و راگەھاندنەك باشر بیت، ئەڤ ئێك ب روژنامەیا خەبات یان ئەڤرو نائێتە كرن. راستە روژناما خەبات و ئەڤرو ھندەك بابەتێن باش تێدا تێنە بەلاڤ كرن، بەس نەك ل وی ئاستی نە كو مرۆڤی رەوشەنبیر بكەن.

راگەھاندنا پارتی گەلەك زیرەكە كو د بەلاخێن خوەدا بەحسێ " تێكدانا ئەمن و ئاسایشا قەمی" بكن. ل دەڤ پارتی ئەڤ تێگەھیشتنە ھەیە، ھەر ھێرشە و دژایەتی یەك ل دژی پارتی بیت، ئەو دژایەتی كرنە بو سەر ئەمان و ئاسایشا قەومی. ئەرێ برا، كیژان ئەمن و ئاسایشا قەومی؟ ئەڤ چەند گرینگە بو پارتی و پاراستنێ؟ وەرن بەرێخوە بدەنە باژێرێ دھوك، زاخو، ھەولێر، ئاكرێ و ھتد ھەروەسا پایتەختێ ھەرێما كوردستانێ كا چاوان میتا توركیە، ئیتلاعاتا ئیرانێ و دەزگەھێن مخابراتا وەلاتێن دی ب ئازادی دچن و تێن و پارتی و پاراستن پێ زانن و ئاگاھدارن. ئەرێ كەنگێ پارتی و جەنابێ كاك مەسرور یان ژی دەزگەھێ پاراستانا ھەرێمێ(ب دیتنا من ئەڤە پتر دەزگاھێ پاراستنا پارت یە ھەتا ھەرێمێ) خوە گێژ و كورە دكن. چما جارەكێ مەقەرێ میتێ نەگرتن ؟ چما سەرێ خوە ل ھەمبەر توركیە چەماندن؟ بلا كاك مەسعود وەكی سەرۆكێ ھەرێمێ خوە ل سەرێرەش ل پشت دیواران ڤەشێرت و تەھدیا ل توركیە بكت و راگەیاندنا پارتی ژی وی وەكی قەھرەمان و پێمەرگە بدەن ناساندن، وەختی ئەم بینین دەھان بارەگایێ توركیە ل ھەرێما كوردستانێ ھەنە. بوچی كاك مەسعود و كاك مەسرور ڤان بارەگەھان داناخن؟ بوچی پاراستنا پارتی یان ژی ئەوا كو پارتی دبێژی یا ھەرێمێ بەری چەند سالان پێشی ل خوەپێشاندنا خەلكێ دەڤەرا بامەرنێ و ھتد گرت دەما دا بەرەڤ بارەگاھێ لەشكەری یا توركیە چن دا بگرن و ژ كوردستانێ دەركن؟ و گەلەك پرسێن دی ژی ھەنە، ب دیتنا من پێویستە كاك مەسەرور و سەرۆك بارزانی بەرسڤ و جوابێ بدەن.

بەرێزان، ھەتا نوكە ئەم زانین سیستەما وەلاتان چاوانە. ھەتا نوكە من نەدیتی یە كو سەرۆكێ پاراستنا چ وەلاتن تەمەتی سەرۆكێ پاراستنا وەلاتێ مە دەركەڤت سەر میدیا، یان ژی پێشەوازی ژ وەفدان نەكت. كاك مەسعود بوچی سنورەك ژ بوی ھەلسوكەوتێ كورێ خوە مەسرور دیار ناكەی، كە چ عەلاقەت ب سیاسەتێ ڤە نەبیت مادەم كو ئەو سەرۆكێ ئاژانسا پاراستنا ھەرێمێ یە؟ مە ل چ وەڵاتێن دیموكراتی نەدیتی یە كو سەرۆكێ دەزگەھێ پاراستنێ ئەندامێ سەركرادیەتی یا حزبەكێ بت، ئەگەر دەولەت و سیستەمەك دیكتاتوری نەبیت. كاك مەسرور، ئەندامێ مەكتەبا سیاسی یا پارت یە و رەخ ڤێ ژی سەرۆكێ ئاژانسا پاراستنا ھەرێمێ یە. ب دیتنا من باشترە كو حكومەتا ھەرێێ ھندەك رێنمای یان بو سەرۆكێ پاراستنێ دەینیت.

پرسەك دی ژی ھەیە، دەزگەھێ پاراستنا ھەرێمێ سەر ب كیژان وەزارەتێ ڤەیە؟ وەزارەتا ناڤخو دبێژی ئەڤ دەزگەھە نە سەر ب وەزارەتا وان ڤەیە، ئەگەر نا، ئایا سەر ب سەرۆكێ ھەرێمێ ڤەیە؟ یان ژی " جونتایا ھەرێما كوردستانێ یە" ھاوشێوەیێ دەولەتا توركیە كو خاوەن دەزگەھێ ڤەشارتی یێ " ژیتەمێ " بو. ئەز ھیڤیدارم روژەكێ ژی ھەرێما كوردستانێ ببیتە خاوەن " كەیسا ئەرگەنەكونا كوردستانێ" و دا ھنگێ بو خەلكێ كوردستانێ ئەشكەرە بیت چاوان پاراستن و پارتی ژیانا ھاولاتی یان نالەبار كری یە. وەلێ ھاتییە كو ئیرو مرۆڤ نەشێت باوەری ب براێ خوە بینیت. پاراستن و پارتی راستەوخو پەیرەو ژ سیستەما بەعپ دكن ژ بوی ترساندنا خەلكێ.


ل داوی دا ھندەك بیروكان تینمە بەر چاڤ، ھیڤیدارم كو سەرۆكێ ھەرێم و كاك مەسرور بارزانی ڤان دیتنان ب ھەند وەربگرن بەری كو روژا تەنگ دەست پێبكەت. بەرێز سەرۆكێ ھەرێمێ ب دیتنا من وەكی كارگێری لەقێ و من چەندین جاران ژی ھەست ب ڤێ كری یە كو رابین و رونیشتنا جەنابێ تە وەكی سەروكێ ھەرێم نەل ئاستێ سەرۆكی دایە، بەلكو پتر رەنگ و رویەك ئەشایری پێڤە دیارە. گەلەك جاران تێتە گوتن جەنابێ تە مرۆڤ دوست و كەسەك مافپەروەرن و تە نەڤێت مافێ كەسێ بێتە خوارن. بەس بەرێز جەنابێ تە خو ل سەرێرەش ڤەشارتی یە و دەستێ كەسێ ناگەھیتە تە. جەنابێ تە ژك ھەست ب ھندێ ناكت كو پێویستە سەرەدانا دەڤەرێن كوردستانێ بكی و گوھێ خو بدی گازندە وەیان ژی سوپاس نامەیا ھاولاتی یان. جەنابێ سەرۆك، دەوروبەرێن تە ھندەك كەسان گرتی یە و ترس بو تە چێكرەن. ناھێلن خەلك نێزیكی تە بیت، ئەو ژك ژ بەر بەرژەوەندی یا وان دا ھەر دەم بەردەوام بن ل سەر دزی و بێ وژدانی یێن خوە ل ھەمبەر خەلكێ كوردستانێ‎. ئەز ترسم روژەكێ ل دیكتاتوران ھات، ئەو ب سەرێ تە ژك بێت. یان ب ھەلیكوپتەرێ ژ كوردستانێ برەڤی، یان ژی بەلایەك بێتە سەرێ تە. ‎

سەرۆكێ ھێژا، ب ڤان قەباحەتان و كردەوا پارتی ھێدی ھێدی بەرەڤ ھلوەشاندنێ دچت. خەلك ئێدی باوەری ب پارتی نائینن. ئەو روژ چو كەسەك خودان وژدان پەیدا ببیت و ل ھاوارا پارتی بێت. ‎بلا پارتی ھندە غرورا دەستھەلاتی ل دەڤ پەیدا نەبیت. ئەگەر ھەلبژارتنەك راستەقینە ل ھەرێما كوردستانێ ھاتبویا كرن، ب دیتنا من گەلەك زەحمەت بو پارتی دەنگێ ئێكەم بینیت. بەس دەستێ تەزویرێ خوشبن. ‎بەرێز ل ناڤ پارتی دا كومەك كادر ھەنە د ناڤ دەزگەھێ راگەیاندنا مە دا شول دكن، ئەز باوەر كم ئەڤە خەلەتی یە كو پارتی ھەمی راگەھاندنا خوە تەسلیمی كەڤنە شوعی یان كری یە. ‎د مێژویا پارتی دا پارتی ھندە د راگەھاندنا خوە دا ھندی سالێن شەرێ براكوژی و شەرێ ئیسلامی و نوكە ژی تەھید و توند و تیژی د راگەھاندنا خوە دا دیار نەكری یە. من ڤێت ئەز ڤێ بێژم گەلەك ژ كادرێن كەڤنە شوعی وەكی روژێ دیارە دوەختێ خوەدا چەند تەڤر و بڤر و چەكوچ و داس ل پشتا پارتی ددان، نەگەھیشتنە ئارمانجە خوە. نوكە ئەو بوینە بەشەك ژ پارتی و ب ھەمی رەنگانڤە دڤێن رویێ پارتی ل ناڤە خەلكێ دا رەش بكن. ئەو ژی ب نڤیساندن و چاوپێكەڤتنێن راگەھاندنێ. پارتی مەجبورە رێكەكێ ببینیت. لەوار جەنابێ سەرۆك‎ بیر ل ھندێ بێتە كرن ئەم وەكی پارتی سیاسەتەك حەكمیمانە بگرنە. بەیانا مەكتەبا سیاسی و دەزگەھێ پاراستنا ھەرێمێ بێھنا خوین رشتنێ ژێ تێت و داھات.

سەرۆك ئەڤێ ژ بیر نەكن نوكە ل ھەرێما كوردستانێ كەس مەجبور نیننە جارەك دی پێخامەتا بێ ئاقلی و سەرھشكی یا سەركردایەتی یا پارتی لاو و كورێن خوە بوی پاراستنا بەرژەوەندی سەركردایەتی یا پارتی بكەنە قوربان. سەرۆك رەوش گەھیشتی یە ئاراستەیەك وەھا، ئەگەر نوكە سەدام حوسێن و ھێزێن وی بڤێن ھەرێمێ داگیر بكن، كەس دەست نائاڤێتە چەك. چونكە ئەڤە بو خەلكێ ئاشكەرە بو كی ژ ڤێ شورەشێ و مالوێرانیێ مفادار دەركەت. بلا ھنگێ جاش و خوەفروش و فایلدار ژ بوی پارتی دەست باڤێنە چەكێ. شەرۆك بوچی جەنابێ تە و ئەم پێكڤە ئیعتراف ب ھندێ ناكین ھەرێما كوردستانێ وێ بیە فەرھوت و تالانكرن. سیستەمەك ھاتیە ھەرێما كوردستانێ كەس نزانیت چی یە. ژ ملكێ ڤە كورێن تەنە، ژ ملێ دی ڤە برازایێ تە نێچیرڤان بارزانی و كوتلا وی و ژ ئالی دی ڤە سیداد و نیھاد و ھتد و شێخ غالب و ھتد ھەر یەكێ ل ھەر باژێرەكێ كوردستانێ كومەك یا ئەردێ خستینە بن دەستێ خو و پروژەیان ل سەر چێدكن ب ناڤێ ھتد و ھكژ. وەسا دیارە كو ھەمی باژێرێن كوردستانێ ل سەر بنەمالا بارزانی ھاتینە تاپو كرن.

جەنابێ سەرۆك ما ل دەڤەرا بارزان ئەرد نینە؟ بنەمالا بارزانی ناوچەیا بارزان ئاڤادان ناكن و پروژا ل وێ دەرێ چێ بكن بەلكو ئەڤ فەقیر و ھەژارێن بارزانی، پاشماوێن ئەنفالكری و پاشماوێن معەسكەرێ قوشتەپێ ژیانەك باش بو خوە دابین بكن. بوچی جەنابێ تە ھاریراكی یا وان فەقیرێن بارزانی ناكت؟ ما وان ژی ماف نینن یان كو بەس خوارن و ڤەخوارن مافێ شێخ و مەشایخێن بارزانی نە. ‎دیارە ئەردێ ناوچەیا بارزان " مودقەدەسە" و نابیت كەس ژ بلی بنەمالا بارزان ل سەر ڤێ ئەردێ ببیتە خودان پارچەیەك زەفی!!!

سەرۆك جەنابێ بوچی ھەتا نوھكە پروژەیا سەدا بێخمێ ئیمزا ناكت ھەتا ھەرێما كوردستانێ ببن خودان سەدەك مەزن و ستراتیژیك. یان ژی ژ بەر ھندێ یە كو ھندەك گوندێن ناوچەیا بارزان دكەڤن بن ئاڤێ ڤە جەنابێ تە ئیمزا ناكەت. ئەڤە ژی دیار دكەت جەنابێ سەرۆكی بەز بیر ل بەرژەوەندی خو و ئەشیرەتا خو دكەت. سەرۆك بیر ل بەرژەوەندی یا ھەرێما كوردستانێ ناكەت.

سەرۆك ئەڤێ ژ بیر نەكە. بەلكو خەون بیت جارەك دی ل ھەلبژاردنەك دی پارتی دەنگێ یەكەم بینیت. فەرە مە گوت پارتی دێ دەنگێ یەكەم ئینیت، بەس ئایا لایەنێن سیاسیێن كوردستانێ ئامادەنە ب ڤان ھەلسوكەوتێن پارتی ھاوپەیمانی د گەل پارتی دروست بكەن بو پێكئینانا حكومەتێ و پشترە پشتگیری ژ جەنابێ تە بكەن بو پوستا سەرۆكایەتی یا ھەرێمێ؟ نا، ئەز باوەر ناكەم ب ڤان ھەلسوكەوتان ئەم بشێن حكومەتێ پێك بینین. ‎ل ھەلبژارتنێن 25 تەمموز 2009ێ چەند ركابەرێن تە ھەبین و ژ وان ژی بھێز تر ئەو بو، كو كەسەكێ نەناس ل ھەرێما كوردستانێ وەكو كەمال میراودەلی 26% دەنگ ئینان و ب ھەمی ھەولێن ینك و لایەنێن ئیسلامی و ب وان تەزویرێن كو ھاتینە كرن جەنابێ تە 70 ژ سەدێ ئینان. ڤێ جارێ رەنگە بو ھەلبژاردنەك دی یەندین ركابەرێن تە ھەبن. ڤێ جارێ دێ چ بكەی؟ باشترە كو بیر ل ھندێ بێتە كرن كا پارتی دێ چاوان بشێت متمانەیا خەلكێ بو لایێ خوەڤە بكێشیت. كوردستان تەقەبولا ھندێ ناكەت جەنابێ تە سەرۆكێ ھەرێم، برازایێ تە سەرۆكێ حكومەت و كورێ تە سەرۆكێ ئاژانسا پاراستنا ھەرێمێ بیت. پێویستە ھاوسەنگی یەك د ڤێ ناڤبەرێ دا ھەبیت.