لێم ببوورە نیشتمان
Saturday, 01/07/2017, 12:04
لێم ببوورە نیشتمانم
ئەگەر بڵێم ئەوها چاکە
دووریت دەردو ئێشە بۆ دڵ
بۆ دەماغم هەوای پاکە
ژیان لە تەك تۆ وەك دۆزەخە
کەی بەهەشت وایە ، سامناکە
خێرو بێرت بۆ گەندەڵە
بۆ هەژارانیش سووتماکە
ڕۆلەی مەردی خۆت ئەبینم
بستێك شك نابا لەو خاکە
ڕووت و برسی و بێ پارەو پوول
نازانی چۆن ، بۆ کوێ راکا
قوتابی یا دەرچووی زانکۆیە
بێ کارە ، بە دووای خاشاکە
ناکەس بەچەو دزو جەردەش
خاوەن ماڵەو خۆی پێ تاکە
دەگ داڕزین سەرانی کورد
شەرمە پێتان بڵێین کاکە
سەرو ژێرتان بە تاڵان برد
لە تەك دوژمنی ناپاکا
داری بەڕوو مازووش ئیتر
لە داختانا چرۆ ناکا
تا خاوەنی ئێوەی دز بین
خودا کەسمان عەفوو ناکا
نیشتمانیش لە سایەی دز
ئاوەدانی ڕووی تێ ناکا
تێبینی:
ئەوشعرەم بە کۆڵێك فرمێسكەوە لەدایك بووە
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
