ماوەیەک لەمەوبەر کوڕەکەی نێچیرەڤان بە ناوی ئیدریس نێچیرەڤان بارزانی، لە سەردانێکییدا لە رێگای تورکیاوە بەرەو ئیتالیا بۆ رابوردن و کەیفکردن دەچێتە نێو پاپۆڕە تایبەتە گرانبەها گەشتگوزارییەکان. لە رێستۆرانێک داوای شەربەتێک دەکات، هەروەک یەکێک لە سەرنشینەکانی ناو ئەو پاپۆڕە دەگێڕێتەوە، دوایی کاکە ئیدریسی کوڕی نێچیر دەپرسێت کردییە چەند؟! کارمەندی رێستۆرانەکە دەڵێت: دەکاتە (٤٠)!، مەبەستی ٤٠ دۆلار دەبێت، کوڕەکەی نێچیریش دیارە بە هەڵە لە ژمارەکە دەگات، دەست دەبات ٤٠ گەڵای دەداتێ، واتە (٤ هەزار دۆلار). کارمەندەکە کە ئەمە دەبینێت بە سەرسوڕمانێکەوە دەڵێت: ئەم پارەیە چییە!؟ زۆرە! دەیەوێت باقییەکەی بداتەوە، بەڵام ئیدریس هەر وەکو ئەمیرەکانی قەتەر و سعودییە و ئیمارات، خۆی تەریق ناکاتەوە و خۆشی تێک نادات  دەڵێت: نا باقییەکەی بەخشیسە بۆ خۆتانی هەڵبگرە!

ئیدی ئیدریسی کوڕی نێچیر بۆ وا نەکات، خۆ تەنیا هەر ئەم نییە لەو ناز و نیعمەتەدا دەژیی،  ئەوەتا منداڵی هەموو بەرپرسە گەورە و بچوکەکان، بە خۆیان و منداڵ و کچ و کوڕیانەوە لەوپەڕی رابواردن و خۆشگوزەرانییدان،  ئەوەی ئەمانە دەیکەن دیوێکی دیکەشی هەیە، ئەوەش چاونەترسیی و سووکایەتییکردنیشە بە کورد و بە ئیرادەی گەلێک، ئەو گەلەی ئەمڕۆ برسیکراوە، توانای ئەوەشی نییە نووزەیەکی لێبێت و دەنگیان لێ هەڵبڕێت! ئەو دەنگەش بە راپەڕینێکی خۆڕسکانە نابێت، بەڵکو بە خۆرێکخستن دەبێت کە نەهێڵێت دوای ئەمانە هیچ حیزب و کاربەدەست و بەرپرسێکی حیزبەکانی تر رۆڵی تێدا ببینن و وەکو ١٧ شوبات خەڵکەکە بخەنەوە نێو باوەشی دەسەڵات.