دڵی شکاو

Thursday, 10/01/2013, 12:00

بۆچی دڵی منت شکاند هێشتت بێ دڵ بڕۆمه‌وه

وات لێکردم له‌ ڕوباری خوێنی دیه‌م بخۆمه‌وه

سوکناییت هات به‌ ژانی من ، وه‌ک چێژ له‌ ئازار چه‌شتنێ

بڕیاری سه‌رکێشیت داوه له‌سه‌ر هه‌ڵه‌ تێگه‌یشتنێ

چۆن پێت کرا ڕۆژمێری ، ئه‌م ئه‌وینه‌مان بدڕێنی

به چاوتروکانێک دڵ و جێژوانمان ، بسوتێنی

که من دڵم وردوخاش بێ ، تۆ بی هۆکاری ئه‌م زامه

چۆن ده‌توانی ماڵئاوایی بنوسیت له دوتوێی نامه‌

وه‌کو هه‌ورێکی مانگرتوو ، به‌سه‌ر شه‌پۆلی ده‌ریاوه

به گوژمی که‌ناری په‌ستم ، تا دێیت هه‌ر ده‌چیته دوواوه

چاوه‌ڕێی چیت تا دوور بڕۆیت هه‌ر ده‌بێ به‌سه‌ر‌ما داکه‌یت

ده‌رگای ڕێژنه‌بارانێکت ، بۆ دڵی شکاو واڵاکه‌یت

به‌کرحه‌بیب