كوردستان و دیكتاتۆریی قەزەمەكان

Thursday, 05/05/2011, 12:00

پەتای دیكتاتۆریی یەكێكە لەو پەتا ئاڵۆزە سەرنجڕاكێشانەی كە لە قۆناغە جیاوازەكانی مێژووی مرۆڤایەتییدا هەر جارەو بە شەپۆل ناوچەیەكی دیاریكراوی ئەم جیهانەی ئێمەی گرتۆتەوە، وەك ئەوەی لە سەدەكانی حەوتەمو شەشەمی پێش زاین لە یۆنان، یاخود لە سەدەی هەژدەو نوزدەی زاینی لە ئەوروپا، یان ئەوەكەی نێوان هەردوو جەنگی جیهانیی لە ئەڵمانیاو ئیتاڵیاو یاباندا دەركەوتوون. سەبارەت بە جیهانی سێیەمیش، شەپۆلێكی ئەم پەتایە لەدوای جەنگی دووەمی جیهانییەوە ئەم ناوچەیەی گرتووەتەوە، بەتایبەتی لەودەمەی پەرەگرتنی جەنگی سارددا كە بلۆكی رۆژئاواو بەتایبەتی ئەمەریكا، لە ترسی دێوەزمەی كۆمۆنیزم، ستراتیژیی پاڵپشتییكردنی هێنانەسەركاری رژێمە دیتاتۆرییەكان دەكردو پاراستنیان گرتبوونە ئەستۆ. ئەو رژێمانەی ئێستا لەپاش دوو دەیە لە كۆتاییهاتنی ئەو جەنگە، كەوتوونەتە بەر باهۆزی گۆڕانكارییو یەك بەدوای یەكدا وەك دەنكەكانی رستی تەزبیحێكی بێ ئیمام لەبەریەك هەڵدەوەشێن. هەر لێرەدا دەبێت ئاماژە بەو راستییە بدەین، كە ئەم دیكتاتۆرییانەی مێژووی مرۆڤایەتیی وێڕای ئەوەی لە زۆر رووەوە هاوشێوە بوون، بەڵام هەموویان سەد دەر سەد زادەی هەلومەرجێكی وەك یەك نەبوونو جیاوازییان هەبووە، هەندێكیان بەهۆی فاكتەری كۆمەڵایەتییەوە سەرهەڵدەدەنو هەندێكی تریشیان سەرەڕۆیی هێزە سەربازییەكانە كە بە (دیكتاتۆریی تەكنیكیی) دەناسرێت، هەروەها تیایاندایە وەك دیكتاتۆرییەكەی (بركلیسو لینینو ئەتاتورك) پێشكەوتووخوازبوون، هەشیانە وەك ئەوەكەی (نیرۆو هێتلەرو سەدامو خومەینیو قەزافی) سەرشێتو ماڵوێرانكەربوون.
گەلی كورد كە بەدرێژایی سەدەی بیستەم لەسایەی سیستمە دیكتاتۆرییەكانی ناوچەكەدا خەونی بە ئازادیی و دیموكراتییەوە بینیوەو هێزە سیاسییەكانی سەراپا دروشم و ئەدەبیاتەكانی خۆیان بە چەمكەكانی ئازادیی و دیموكراتیی و یەكسانیی و عەدالەتی كۆمەڵایەتیی ئاخنیبوو، لەساڵی 1991دا دەرفەتێكی بۆ هەڵكەوت كەلە سێ پارێزگای باشووری كوردستان كارگێڕییەك دابمەزرێنێت. بەداخەوە هەر لەیەكەم هەنگاوداو بەهۆكاری چەندین فاكتەر، ئەم ئەزموونە رووبەڕووی شكستێكی گەورە بووەوە. هەرچەندە هاتنەكایەی ئەزموونەكە لەسەردەمێكدا بوو كە جەنگی سارد كۆتایی پێهاتبوو، بلۆكی كۆمۆنیزمیی رووخا، ئەو رژێمانەی خەسڵەتەكانی حیزبی قائیدو سەرۆكی فەرماندەو باڵادەستی دەزگا پۆلیسییەكان و میدیای ئاراستەكراو كۆمەڵگای لەقاڵبدراو ئابووری قۆرغكراو ئازادیی سانسۆركراو روویان لە زبڵدانی مێژوو دەكرد، كەچی بنیاتنەرانی ئەو ئەزموونە بێ ئەوەی هیچ پەندێك لەو گۆڕانكارییانە وەرگرن و گۆڕانێك لە خۆیاندا بكەن، لەوپەڕی نەزۆكیی فیكریی و بێ گرتنەبەری هیچ لۆژیكێكی سیاسیی، رژێمە ستەمكارە داوەشاوەكانی ناوچەكەیان كردە نموونەو ئیلهامی دامەزراندنی ئەزموونێكی هەژموونگەرای دەستەبژێرێكی شاخەكیی جەنگاوەریان لەسەر بناغەی داروپەردوی دەزگا بەجێماوەكای بەعس سەپاند. دیارە لەم رووەوە فاكتەرە بابەتییو خۆییەكان زەمینەیان بۆ ئەم پرۆسەیە خولقاند بەتایبەتی: ژێرخانێكی ئابووریی وێران، كەلتورێكی دواكەوتوو كە بۆ پێش سەردەمی عەقڵانییەت دەگەڕایەوە، كۆمەڵگایەكی داخراوو دابەشو خێڵەكیی، بوونی سیستمە دیكتاتۆرییەكانی ناوچەكە، نەبوونی حیزبی سیاسیی هاوچەرخ، نەبوونی رێبەرایەتییەكی سیاسیی خاوەن ئەخلاقی مەدەنیی، نەبوونی دەزگاو رێكخراوە پیشەییە سەربەخۆكان..هتد. ئاكامی ئەم حاڵەتەش لەدایكبوونی ئەزموونێكی سەقەتو شێواو بوو كە نە دەسەڵاتدارێتییەكی نەتەوەییو نیشتمانیی هاوچەرخ، نە كارگێڕییەكی مەدەنی خاوەن پلانو ستراتیژ، نە ئامرازو ئالییەتێكی دیموكراتی بۆ ململانێی سیاسیی، نە دەستەبژێریی كارامەو دەوڵەتداری بەسەلیقەو ئەزموونداری بەرهەمهێنا، بەڵكو دەستەبژێرێكی شاخەكیی بێفەڕ هاتەمەیدان و تێكڕای ململانێیەكان لە لوولەی تفەنگی ملیشیا حیزبییەكانەوە هەوڵی یەكلاكردنەوەیان درا، بەوەش جەنگێكی نێوخۆی وێرانكەری لێكەوتەوە كە دەرفەتێكی مەزنی لەبەردەم دامەزراندنی دەسەڵاتێكی نیشتمانیی دیموكراتیی بۆ گەلی كورد لەباربردو زەمینەی بۆ دووبارە دابەشكردنەوەی ئەو ناوچە رزگاربووەی باشووری كوردستان رەخساند بۆ دوو ئیدارەی میلیشیایی مافیایی تاكڕەوی زەردی پارتیو سەوزی یەكێتی.
رووداوەكانی 17ی شوباتو 19ی نیسانی ئەمسالأ ئەو راستییەیان سەلماند كە هاتوهاواری چەندین ساڵەی دەسەڵاتدارانی ئەمڕۆی كوردستان بۆ بوونی حوكمەتێكی یەكگرتووی دیموكراتیی كوردیی سەرابەو ئێستاش هەردوو حیزبە میلشیاییەكە كوردستانیان كردۆتە پاوانێكی خۆیانو رێكەوتنەكەی نێوانیان تەنیا بۆ دابەشكردنی قودرەتو دەستبەسەرداگرتنی سەروەتی كوردستان و سەپاندنی تەرزە دەسەڵاتێكی ستەمكارە كە سێكوچكەی: سەركوت، جەردەسالارییو چەواشەكاریی بنەماكەی پێكدەهێنێتو هەڵكوتانە سەر دەنگی ئازادو ئەشكەنجەدانی رۆشنبیرانی ئازادیخوازو سەركوتو گرتن و زیندانییكردنی خەڵكی وەزاڵەهاتووی عەدالەتخوازو گەنجانی یەكسانییخوازی كردۆتە رێبازو نەك هەر ئامادەی گۆڕانكارییو ریفۆرمی سیستمەكەی نیە، بەڵكو پاش كودەتا میلیشیاییەكەی 19ی نیسان، بێئەوەی چاوی چارەنووسی دیكتاتۆرەكانی ناوچەكە ببینێت، تا ئەو جێگایەی دەرفەتی هەبێت دەسەڵاتێكی توندوتیژیی سەركوتكاری میلیشیایی حیزبیی دەسەپێنێت و كوردستانی خستۆتە سەرلێواری خولێكی تری شەڕی نێوخۆ كە ئەگەر بتەقێتەوە، پێش ئەوەی بە لەناوچوونی ئەزموونەكە كۆتایی بێت، سەری خودی دەسەڵات دەخوات و دەرفەتێكیان بۆ مانەوە نامێنێتەوە.
"موریس دوفرجیە" لە كتێبی "سەبارەت بە دیكتاتۆریی"دا، هەوڵیداوە هەلومەرجی ئاڵۆزی فەرەنسای سەرەتای شەستەكان شەنوكەو بكاتو بەچەندین ئەگەر مەترسیی هاتنەكایەی حوكمێكی دیكتاتۆریی لەو وڵاتەدا كاڵكردۆتەوە. ئەم نووسەرە لە بەشی یەكەمی كتێبەكەیدا ئاماژەی بە "لێكدانەوەی سایكۆلۆژیی" كردووە بۆ دروستبوونی كەسایەتییە دیكتاتۆرەكانو لەوبارەیەشەوە "بنەمای بێبەشبوون/حرمان" لە لێكچوواندنی دیكتاتۆرەكاندا باسكردووە. ئەو دەڵێت:" لەراستییدا زۆربەی ستەمكارەكان كورتەبنەو قەزەم بوون وەك:(قەیسەر، كرومویل، روبسبیر، نابلیون، هتلەر، ستالین، فرانكۆ..هتد ئەمانە تێكڕایان منداڵییەكی پڕ بێبەشییو ئازاریان بردۆتە سەرو قۆناغی هەرزەكارییان سەختو ناخۆش بووە، ئەوەی وادەكات كەسایەتیی ئەم جۆرە كەسانە پڕ گرێو ئاڵۆزیی سایكۆاۆجیی بێت، هەرچەندە شوكور بۆ خوا هەموو كورتەبنەیەك نابێتە دیكتاتۆر". هەروەها "هربرت سپێتسەر" لە كتێبێكیدا بەناوی " ئیستاتیكای كۆمەڵایەتیی/" Social Statics " كاتێك باس لە كۆمەڵگای مرۆڤایەتیی دەكات، ئاماژە بە "كۆمەڵگا جەنگاوەرییەكان" دەكات كە بە كۆمەڵگای سەرەتاییش ناویان دەبات، ئەو دەلێت كە خەڵكانی ئەم كۆمەڵگایە كورتەبنەو كەمتر زیرەكو زووجۆشو هەڵچووترن لە خەڵكانی كۆمەڵگامانی ترو عەقڵیان منداڵانەیە، سەرۆكەكانیان جەنگاوەرنو بەهۆی چەكو بالۆرەی بنەماڵەییوخێڵەكییەوە دەسەڵاتی خۆیان دەپارێزن، هەوڵدەدەن باوكو باپیرانیان تا ڕادەی پەرستن پیرۆز بكەن و ئەم رێبازە دەكەنە ئاینی شوێنكەوتووەكانیان، لەم جۆرە كۆمەڵگایانەدا كۆمەلأ لە پێناوی تاكدایەو ژن پلەیەكی نزمی هەیەو بە سوكیی سەیری دەكرێت، سەركوت و كۆت و كۆیلەكردن لەم جۆرە كۆمەڵگایانەدا زۆرترە". دیارە ئەم بۆچوونانە وامان لێدەكەن لەو لەشكرە كورتەبنەو سایكۆباتەی دەسەڵاتدارێتی ئەمڕۆی كوردستان نیگەران بین و لە ئایندەدا هانی ئەوە بدەین كە سەرۆك و وەزیرەكانی جەنگو دەزگا ئەمنییەكان لە خەڵكانی باڵابەرز دیاربكرێن نەك كورتەبنەكان!!.
ئەوەی ئەمڕۆ بە وردیی بڕوانێتە هەلومەرجەكەی كوردستان، بەباشیی دەتوانێت دركی بوونی كۆمەڵێك دیاردەو فاكتەر بكات كە راستەخۆ كاریگەرییان لەسەر ئاڵۆزبوونو قەیرانییبوونی سیستمە سیاسییو بونیادە كۆمەڵایەتیی-ئابووریی-فەرهەنگییەكەی باشووری كوردستانەوە هەیە. لەلایەكەوە شەپۆلی ناڕەزایەتییەكانو رووداوەكانی ئەم دواییە، بەئاشكرا سەقەتییو ئیفلیجی سیستمە سیاسییوكارگێڕییەكەی دەبلأ ئیدارە حیزبییەكەی دەرخستو بەوەش متمانە لەنێوان خەڵكو حكومەتدا نەماوە، ئەوەی شەرعیەتیی دەسەڵاتەكەی لەم بەشەی كوردستاندا تەواو لەقكردووە. لەلایەكی ترەوە لەنێوخودی دەسەڵاتدا توێژێكی بەهێز لە كەسانی ملهوڕو توندوتیژ خاوەن پلەوپایەی دیارو بەرژەوەندیی مادیی زۆر گەورە هەیە كە خەو بە پیادەكردنی دەسەڵاتێكی ستەمكارەوە دەبینین، ئەو توێژەی كە لەنێو پارتە دەسەڵاتدارەكاندا پشكی مەزنیان لە پرۆسەی بڕیارسازییدا هەیەو نە باڵە میانڕەوەكانی ئەو پارتانەو نە جەماوەرە خەولێكەوتووەكانیشیان دەتوانن یان ئیرادەی ئەوەیان هەیە كە جڵەوی ئەنجامدانو ئاراستەكردنی توندوتیژیی لەو توێژە بسەننەوە. هەروەها پێویستە لەم رووەوە ئاماژە بەو راستییەش بكرێت كە لەگەلأ راپەڕینی ساڵی 1991وە، كوردستانی باشوور لە جەنگێكی درێژ خایەنو مالوێرانكەر لەگەلأ رژێمی بەعسدا هاتە دەرو بەكۆڵێك قەیرانی قووڵی ئابوورییو كۆمەڵایەتییەوە تێكەلأ بە جەنگێكی نێوخۆیی ماڵكاولكەرتر بوو كە هێندەی تر قەیرانەكانی پێش خۆی قووڵتر كردەوە، هەروەها باشووری كوردستان لە پرۆسەی گواستنەوە لە دیكتاتۆرییەوە بۆ دیموكراتیی شكستیخواردو پاش بیست سالأ لە دەسەڵاتدارێتی، هێشتا سیستمێكی چەقبەستووی بێمتمانەی دەبلأ ئیدارەیی حیزبی میلیشیایی بەرقەرارە. ئەو حیزبانەی كە تووشی نەزۆكی عەقلأو پەتای خۆبەپێشڕەوزانیو سەرۆكپەرستیی بوونو تادێت زیاتر بەرەو ئاكاری فاشیزمانە ملدەنێن، ئەوانەی ئۆپۆزسیۆنی سیاسیی وەك دوژمنێكی سەرسەخت دەبیننو خوێنیان بەحەڵالأ دەزاننو ناتوانن هەرگیز ئەوە بهێننە پێش چاوی خۆیان كە رۆژێك دوور لە كورسی دەسەڵات بگوزەرێنن. دیارە دوای ئەو بیست ساڵەو لە ئاكامی گڵۆبالیزەیشنو هەروەها ئەو داهاتە مەزنەی لەدوای رووخاندنی رژێمی سەدامەوە رووی لە كوردستان كردووە جگە لەو گەندەڵییە بێسنورەی پەیدابووە، شارەكانیش جۆرە هەڵتۆقینێكی كتوپڕیان بەخۆیانەوە بینیوە، شكستی ئاوەدانكردنەوەی لادێكانو گەڕانەوەی بنەماڵەكانیان لە شارە بۆ لادێ وایكردووە گۆڕانێكی هێواش لە بونیادی سەرەتایی كۆمەڵگای كوردیی لەم پارچەیەی كوردستاندا بێتەدی كە رۆڵی خۆی لە شڵەقاندنی بونیادەكەدا هەیە بەجۆرێك لەگەلأ سەرخانە سیاسییەكەدا نایەتەوە، دواتر گەشەكردنی هۆشیاریی سیاسییو كۆمەڵایەتیی لەئاكامی ئینتەرنێتو ئامرازەكانی پەیوەندییو بارگاوییبوونی لاوانو نەوەی نوێو تێكەڵبوونیان بەمجۆرە پەیوەندییانە ئاسۆی بیركردنەوەو خواستو داواكارییەكانی ئەم توێژە كۆمەڵایەتییە بایەخدارەی فراوانكردووە، ئەم توێژەی نە ئامادەیە گوێ بۆ بالۆرەكانی "خەباتی شاخ" بگرێتو نە لەو فەشەلەش دەبورێت كە دەستەبژێری شاخەكییو حیزبە میلیشیاییەكان بەدرێژایی بیست ساڵە لێی بەرپرسیارن، نە ئامادەشە مل بەو قۆرغكارییە بدات كە باوكانی تفەنگچیی لەتێكڕای بوارەكانی كۆمەڵگای كوردییدا سەپاندوویانە، نە باوەڕ بەو بیانووانەش دەكات كە عەیامێكە بەناوی "بەعسی شۆفێنیی و ئیسلامی سیاسیی و ناسكیی ئەزمونەكە " پاساوی چەقبەستوویی خۆیانی پێدەكەن . ئەوەی بۆخۆی تۆوی "شۆڕشێكی لاوان"ەو لە 17ی شوباتەوە روویەكی ئاشكراتری پێشانداوین. بەڵام ئایا ئەو باوكانە هەروا بە ئاسانی و بە چەپڵەی لاوان ئامادەییان هەیە كورسی دەسەڵات و قۆرغكارییەكانیان جێبهێڵن كە بەلای ئەوانەوە وەك ماركس دەڵێت "مەسەلەكە مەسەلەی ما كوردستان و دیكتاتۆریی قەزەمەكان و نەمانە". بەتایبەت، ئەو باوكانە هەریەكەیان خاوەن ریشەیەكی مێژوویی، سامانو پارە، میدیای چەواشەكارو پیاوی جەنگاوەرن كە ئەزموونێكی مەزنیان لە كوردكوژیی و خەفەكردنی دەنگی ئازادییخوازاندا هەیە.
لەراستییدا، ئەوەی زیاتر ئاڵۆزییەكان پەرەپێدەدات و پشكۆی شۆڕشی لاوان دەگەشێنێتەوە بریتییە لەو قەیرانانەی لە بونیادی ئابووریی كوردستاندا دەركەوتووەو تادێت پەرەگرتووتر دەبێت بەجۆرێك دوورنییە لە داڕمانی ئابووریی نزیك نەكاتەوە. چونكە بەدرێژایی ئەم بیست ساڵە دەسەڵاتدارانی كوردستان لەبەر بێبەرنامەیی و نەبوونی كارگێڕییەكی لێهاتووو خاوەن ستراتیژ، نەیانتوانیوە بەرنامەیەكی تۆكمە بۆ چاككردنی ئابووریی كوردستان پێشكەش بكەن، هەربۆیە هەمیشە: گرانیی، بەرزبوونەوەی تێچوونی ژیان، هەڵاوسان، بێكاریی ..هتد بەشێكی سەرەكیی پەتاو سیماكانی ئابووری كوردستان بوون، دیارە قۆرغكاریی بازاڕو گەندەڵیی دارایی و وێرانكردنی ئابووری ئاراستەكراو كە رژێمی پێشوو تاڕادەیەك هاوسەنگیی بازاڕی پێڕاگرتبوو، چینی ناوەڕاستی تاڕادەیەكی زۆر تەنك كرد، ئەوەش كۆمەڵگای لەبەردەم دووچیندا هێشتەوە، كە كەمینەیەكی زۆر دەوڵەمەندی سەرمایەداری حیزبیی و زۆرینەیەكی هەژارە، ئەوەش بۆشاییەكی گەورەی چینایەتیی پێكهێناوەو بونیادە كۆمەڵا-ئابوورییەكەی شێواندووە.
دەشێت یەكێك لە هەرە بایەخدارترینی ئەو فاكتەرانەی زەمینە بۆ هێنانەكایەی دیكتاتۆریی دەرەخسێنن بریتیبێت لە دابەشبوونێكی توندی رای گشتیی لە نێوان دووبەرەی بەرفراوانو بەهێز، كە یەكێكیان بەرەی ئۆپۆزسیۆنە، ئەو بەرەیەی تەواوی بنەماكانی سەرەكییەكانی دەسەڵاتی داوەتە بەر نەشتەری رەخنەو داوای گۆڕانكارییەكی ریشەیی دەكات، لەبەرامبەر بەرەی دەسەڵاتدا كە بەچەشنێك لە لیتەی دەسەڵاتپەرستییو گەندەڵییدا چەقیبەستووە كە هەر داوایەك بۆ چاكسازیی بە سەرەتای هەڵتەكاندنی بناغەی دەسەڵاتەكەی دەزانێتو ئامادەنیە هیچ ئاوڕێك لەو داوایە بداتەوە. ئەوەی لێرەدا جێگەی بایەخە بریتیە لە شكستی دەسەڵاتی كوردیی لە گرتنەبەری ئالییەتێكی دیموكراسیی بۆ مامەڵەكردن لەگەڵ ئەو ئۆپۆزسیۆنەی كە نزیكەی دووساڵێكە لە دوای هەڵبژاردنەكانی 25ی تەموزی 2009وە سەریهەڵداوە. وەك ئاشكرایە ئەم شكستە بەجۆرێكە كە نەك هەر زەمینەیەكی گونجاوی بۆ ئاراستەكردنی ململانێكان لەناو پەرلەماندا بەقازانجی گشتیی بەدینەهێناوە، بەڵكو ململانێكان دابەزیونەتە سەرشەقامو دەسەڵاتیش بێ سڵەمینەوە لە هەر بەرپرسیارێتییەكی ئەخلاقییو قانوونیی، تا ئەو پەڕی ئامادە شەقام بە خوێنی خەڵكی ناڕازیی سووربكاتو لە دوای كودەتا میلیشیاییەكەی 19ی نیسانیشەوە دوورنیە پیلان بۆ پەلاماردانی هێزە ئۆپۆزسیۆنەكانو ریشەكێشكردنیان نەخرێتە بواری جێبەجێكردنەوە، ئەم پیلانەی ئەگەر سەربگرێت دەبێتە خاڵێكی وەرچەرخان لەمێژووی كوردستان بەرەو دیكتاتۆریی ، بەڵام ئایا لە زەمەنێكدا كە شەپۆلێكی بەرفراوانی دیموكراتیو باهۆزێكی گەورەی گۆڕانكاریی ناوچەی خۆرهەڵاتی ناوەڕاستی گرتۆتەوەو وڵاتەكانی وەك تونسو میسر لە دەستی دیكتاتۆریی رزگاریان بوو، وڵاتانی وەك یەمەنو لیبیاو سوریاش لەسەرەدانو وڵاتانی رۆژئاواش بەرابەری ئەمەریكا نەك هەر وازیان لە پشتگیریی دیكتاتۆران هێناوە، بەڵكو لە لیبیاش لەرێگەی هێزە ئاسمانییەكانیانەوە رۆڵ لە راونانی هێزەكانی قەزافیدا دەگێڕن، لە زەمەنێكی وادا تاچەند دامەزراندنی دەسەڵاتێكی دیكتاتۆریی لە كوردستان پەسەندە؟ ئایا كاتی جێبەجێكردنی پیلانی هێرشكردنە سەر ئۆپۆزسیۆن (گۆڕان، یەكگرتووو كۆمەلأ) ئەم هێزانە هەروا پارویەكی چەورن و بە ئاسانیی ملیان ئەخەنە بەر چەقۆی دەسەڵات یان لایەنگرانیان كە نزیكەی ملیۆنێك كەسە بەگژ دەسەڵاتدا دەچنەوەو شۆڕشێكی چەكداریی دەتەقێننەوە؟ یان هێشتا هەلومەرجەكە تێیدا ماوە لەم خاڵەی توندوتیژەی ئێستایدا بوەستێت و عەقڵی نەزۆكی دەسەڵاتدارێتیی موفلیسیى كوردیی لەباریایەتیی بارودۆخێك بڕەخسێنێت و ئالییەتێكی نوێ بۆ دەستپێكردنەوەی گەمەی سیاسیی لە كوردستاندا بە قازانجی گشتیی بهێنێتەكایەوە؟! زۆر هیوادارم موعجیزەیك رووبدات و ئەگەری سێیەم بێتەدیو جارێكی تر خوێنی هەژاران و رۆڵەكانی ئەم گەلە بۆ بەرژەوەندیی قەزەمە سایكۆباتەكان و داگیركەرانی كوردستان نەڕژێت.