یه‌کێک له ڤێللا قه‌شه‌نگه‌کانی عومه‌ر فه‌تاح
Thursday, 07/05/2009, 12:00
لە بەرزاییەكى سەرنج راكێشدا كە دەروانێت بەسەر ناوچەیەكى فراوانى شارەكەدا، لە دورەوە سەوزایى ڤێللایەكى قەشەنگ و دڵگیر وەكو ئەوەى لە گوندێكى ئەوروپا بروانیت بەئەندازەیەكى سیحر ئامێز و كەرەستەى گرانبەها ڤێللایەكى دوقات (كە تاسەى دڵ ئەتارێنێ) لەسەر روبەرى زیاتر لە 1000م2 لە گەرەكێكى شارۆچكەى دوكان و لە سەر پارچە زەوى یەكى زیادەرۆ و ئیفراز نەكراو بە بودجەى نزیكەى 400 هەزار دۆلار بەناوى ئەنجومەنى وەزیرانى حكومەتى هەرێمەوە دروست كراوە (كەبە ڤێللاى عومەر فەتاح ناوى دەركردووە). ئەو حكومەتەى وەكو خوا هەڵس و كەوت دەكات و مافى ئەوەى بەخۆى داوە لەناو دەریاشدا بینا دروست بكات و كەسیش بۆى نیە بڵێ بەرى چاوت كلى پێوەیە.
كاتێك لە نزیكەوە لە سیحرى ئەو ڤێللایە دەروانیت لەبیرت دەچێتەوە كە لە وڵاتێكى گەنجى خێر لەخۆ نەدیو ژیان دەگوزەرێنیت، لەبیرت دەچێتەوە ئەگەر تۆ خانوى زیادەرۆ دروست بكەیت راستەوخۆ دەروخێنرێت، لەبیرت دەچێتەوە كە بە دەیان گەنجى ئەم شارۆچكەیە لەبەر نەبونى شوێنى نیشتەجێبون ناتوانن خێزان پێكەوە بنێن و رێى هات و نەهاتى هەندەران دەگرنەبەر و شارەكەیان بەجێ دەهێڵن، لەبیرت دەچێتەوە كە بەدەیان گەنجى شارەكە لەبەر بێكارى پەنا دەبەنە بەر مەشروب خواردنەوەو كات بەسەربردن، لەبیرت دەچێتەوە كە زیاتر لە هەزار هاوڵاتى ناو شارەكە ناویان دەرچوە بۆ زەوى وەرگرتن، بەڵام زەوى نەماوە تا بەسەریاندا دابەش بكرێت چونكە لەبەر مۆنۆپۆڵ كردن و دابەشكردنى شوێنە گرنگ و باشەكان بەسەر بەرپرسەكان و كۆمەڵێك كەسى بەرژەوەندى خواز و نەبونى پلان، شوێنێك نەماوەتەوە بۆ پرۆژەى ستراتیژى و نەوەى نوێ كە ئومێدیان پێى هەبێت، ئەو ڤێللایەى كە لە ماوەى سێ ساڵى تەواوبونیدا تا ئێستا دەرگاكانى نەكراونەتەوە، ئەو ڤێللایەى كە جەنابى (عمر فتاح) ئەسڵەن هەر پێویستیشى پێى نیە، ئەو ڤێللایەى كە تەنها بودجەكەى شوقەیەكى گەورەى پێ دروست دەكراو بە دەیان گەنجى ئەم شارە لێى سودمەند دەبون، بەڵام ئەو ڤێللایە وەكو قەڵا بێباكانە هەڵس و كەوت دەكات و دەمێكە ویژدانى خۆى ئاسودە كردووەو گوێ بەنەهامەتیەكانى گەنجانى ئەم شارە نادات و ناشزانێت ژیانی لاوان چۆن دەگوزەرێت!!
وەلێ ئەمەیە وڵاتى من! ئەمەیە بەپرسیارێتى دەوڵەتى من! ئەمەیە حەقیقەتى دەسەڵاتى من! ئەمەیە ویژدان و بەرهەمى شۆرشى چەندین ساڵەى خەباتى من! ئەمەیە جیاوازى چینایەتى و سیاسەتى بەرژەوەندى خوازانەى وڵاتى من! ئەمەیە واى كردوە گەنج ئینتیماى بۆ نیشتمان نەمێنێ، ئایا ئەمە ناو بنێین چى!؟
تێبینی :
1. ئه‌م وتاره له ژماره (416) ی رۆژنامه‌ی هاوڵاتی 23/4/2008 بڵاوکراوه‌ته‌وه.
2. ئه‌م وێنه‌یه خۆم گرتومه له شارۆچکه‌ی دوکان. ته‌نها جارێک له رۆژنامه‌ی ئاوێنه به ناوی (وێنه‌ی تایبه‌ت) بڵاوکرایه‌وه. پێشکه‌شه به کوردستانپۆست له پێناو بنه‌برکردنی گه‌نده‌ڵیدا.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
