بو شەهیدكرنا سەردەشت عوسمانى ئەم ژى بەهیداریـــن

Friday, 14/05/2010, 12:00

بو شەهیدكرنا سەردەشت عوسمانى ئەم ژى بەهیداریـــن

من بابەتێ كاك (قاسم محمد) خواند، كو ل مالپەرێ كوردستانپوست هاتبوو بەڵاڤكرن. بەلێ برا براستى تو هەقى گازندا ژ خەڵكى دەڤەرا بەهدینا بكەى، چونكى بدیتنا من و تە و گەلەك كەسێت دى ژى دەڤەرا بەهدینان بێدەنگە، بەرانبەرى ڤێ تاوانا هۆڤایەتى كو براستى مەزنترین تاوانە روژا نیڤرو لناڤ پایتەختێ هەرێما كوردستانێ خواندەڤانەك بهێتە رەڤاندن و پاشان ل میسل بهێتە تیروركرن.
برا ئەم ژى دزانین ئەڤە تاوانەكى هوڤایەتیە، بەلێ ژبیرنەكە مەژى لدەڤەرا بەهدینا بەرى چەندین ساڵا شەهیدێت قەلەمى و هزروبیرا یێت پێشكێشى ئازادیێ كرین، وەكى شەهیدێ نەمر (رەئوف ئاكرەى) كو ئەز باوەر دكەم ئێكەم شەهیدێ قەلەمى بیت پشتى سەرهلدانا سالا 1991 بدەستى چەكچەكیلكێن شەڤێ هاتیە شەهید كرن، بێگومان ئەوێت (رەئوف ئاكرەى و رێناس) و چەندین كەسێت دى لدەڤەرا بەهدینا شەهیدكرین هەر ئەون كو ئەڤروكەژى (سەردەشت عوسمان) شەهیدكری و ساڵا 2008 ێ ژى (سوران مامەحەمە) شەهیدكری.
ئەم ژى دزانین ستەمكارى لدەڤەرا بەهدینا یا بەردەوامە و گەلەك تەعدا ل خەلكێ دەڤەرا بەهدینا دهێتە كرن، بەلێ لڤێرە پسیار ئەوە گەلو ئەو ئازادیا كو ل سلێمانیێ هەى، لدەڤەرا بەهدینا و هەڤلێرێ ژى هەیە؟! بێشك نەخێر نینە، ئەز حەز دكەم وەكى بەهدینییەكێ بێژم، مخابن ڤێگاڤێ لدەڤەرا بەهدینا تنێ (پارتى) دەستهەڵاتدارە و ئیكەتى و هەمى حزبێت دى لدەڤەرا بەهدینا مێهڤانن و هەر تشتەكێ پارتى بڤێت دێ شێت كەتن و كەسەك نەشێت بئاخڤیت، بەلێ لدەڤەرا سلێمانیێ ئەڤ قەید و زنجیرە یێت هاتینە شكاندن و ژبەر هەبوونا گۆڕان و گەلەك سەبەبێت دى ل سلێمانیێ پتر دەلیڤا دیموكراسییەتێ و ئازادیێ یا هەى، بەلێ مخابـن ل بەهدینا دەستهەلاتا بنەمالێ دەستێ بسەر هەمى تشتەكێ دا گرتى و حەتا ژیانا روژانە یا خەڵكێ دەڤەرێ ددەستێ بنەمالێدایە، بەلێ ئەم هەر بێئومێد نابین و روژا مەژى دێ هێت و ئەم پسمامێت خو یێت گۆران و سۆران ژبیر ناكەین و ئەم هەر پسمامیت هەوەنە.
پسمام باوەر بكە گەلەك ژ خەلكێ دەڤەرا بەهدینا ل سەر شەهیدكرنا (سەردەشت عوسمان)ێ شەهیدێ قەلەمى و هزروبێرێت ئازاد زوور زوور نەڕازى نە و ل مالا خو بەهیدارن، ئەم شریكى خەماوەنە.
ببورە ئەز نەشێم وەكى هەوە وێنەیێ خو بەڵاڤ بكەم چونكە چارەنڤیسێ من ژ یێ رەحمەتى یێ رەحمەتى سەردەشت عومانى باشتر نابیت.