مه‌کته‌ب سیاسی یه‌کێتی یان مه‌گعه‌م سیاسی!
Wednesday, 29/07/2009, 12:00
ماوه‌یه‌ک له‌مه‌به‌ر له‌دوکانی ده‌ڵاڵێکی ناسراوی خانووبه‌ره له‌سلێمانی، کارمه‌ندێکی مه‌کته‌ب سیاسی یه‌کێتی فه‌رمووی که‌مانگی به‌لای که‌مه‌وه بایی زۆرتر له (6) شه‌ش ملیۆن دینار که‌بابی سه‌فه‌ری به‌مه‌کته‌ب سیاسی ئه‌فرۆشێت به‌بێ منه‌ت، منیش که‌له‌و کاته‌دا له‌وێ بووم و پاش ڕۆیشتنی ئه‌و پیاوه، به‌فزولییه‌تێکه‌وه پرسیارم کرد ئه‌م زاته کێیه، وتیان بابه ئه‌مه که‌بابخانه‌ی هه‌یه‌و که‌بابچی تایبه‌تی کۆسره‌ت و مام جه‌لاله، که شه‌وانه له‌ماڵه‌کانیان تایبه‌ت که‌باب بۆ میوانه رۆح سوکه‌کانیان به‌گه‌رمی حازر ئه‌کات، وه مانگی به (600) شه‌سسه‌د هه‌زار دینار مۆزه‌فه له‌مه‌کته‌ب سیاسی به عینوانی (که‌بابچی)،
خه‌ڵکینه (6) ملێۆن یه‌عنی زۆرتر له (5000$) پێنج هه‌زار دۆلار به‌س که‌بابی سه‌فه‌ری، بۆیه من ته‌واو حه‌په‌سام، مۆزه‌ف به‌عینوانی (که‌بابچی) هه‌ر وڕی کردم وای، بابه........ ئه‌مه چ ده‌وره‌و زه‌مانه‌یه‌که؟
ڕۆژ هات رۆژیش ڕۆی، بانگ کراین بۆ ئه‌م مه‌کته‌ب سیاسیه‌ی یه‌کێتی له‌سلێمانی که‌له‌بینا کۆنه‌که‌ی دارولموعه‌لیماتی کۆن دابوو که‌ئێستا یه‌کێتی کردوویه‌تیه مه‌کته‌ب سیاسی، فه‌رقی نییه مه‌کته‌ب هه‌ر مه‌کته‌به، سیاسی بێت یان ..... هی تر. سه‌رتان نه‌ئێشێنم منیش چووم، له‌وێ دختۆر به‌رهه‌م و مه‌لا به‌ختیارو کۆمه‌ڵێکی تری لێ بوو، کۆبوونه‌وه‌یه‌کیان پێ کردین، خوا هه‌ڵناگری به‌دڵی خۆیان زه‌می ئه‌ملاو ئه‌ولایان کردو مه‌سه‌له‌که‌ش ده‌نگدان بوو، به‌ڕاستی کۆبوونه‌وه‌که تێرو ته‌سه‌ل بوو به‌مانای که‌لیمه، به‌ڵام ئێوه بڵێن چۆن؟ منیش ئێستا بۆتان ئه‌نووسم و وه‌ڵامتان ئه‌ده‌مه‌وه.
پاش کۆبوونه‌وه، دختۆر یه‌کێک له‌قات له‌به‌ره‌کانی بانگ کرد که‌ئه‌توت داری واوه‌یلایه نازانم ناوی چی بوو، به‌ڵام وتیان ئه‌مه ئیداره‌یه‌و له‌کاتی نانخواردنه‌که‌شدا سفره‌چی بوو، دختۆر پێی وت؛ نانه‌که حازره، وتی به‌ڵێ کاک دکتۆر، وه‌ک جاران سه‌عات یه‌ک تێ ئه‌کرێت، دختۆریش وتی؛ چاکه.
سه‌عات یه‌ک لای دابوو که‌مێک، دختۆر فه‌رمووی لێکردین و له‌گه‌ڵ ڕه‌عییه‌ت چووین به‌مه‌مه‌ڕێکی پێچاوپێچدا بۆ قاتێک خوارتر که‌وتیان ئه‌مه مه‌گعه‌مه‌که‌یه یان کافتریا و له‌ڕێگادا دختۆر بانگی کابرایه‌کی کرد له‌ده‌ستو پێوه‌نده‌که‌ی پێی وت به‌ئیداره بڵێ بۆ سبه‌ی سه‌عات (11) هۆڵه‌که حازر بکه‌ن حسابی (240) دووسه‌دو چل که‌س بکه‌ن بۆ کۆبوونه‌وه، به‌نانخواردنی نیوه‌ڕۆوه، کابراش وتی به‌سه‌ر چاو هه‌ر ئێستا... تا ئێره ئاساییه به‌ڵام با باسی ئه‌وه‌ی ئه‌مڕۆتان بۆ بکه‌م، که دڵنیابن ئه‌وه‌ی سبه‌ینێش هه‌ر وه‌ک ئه‌وه‌ی ئه‌مڕۆ ئه‌بێت.
له‌قاتی خواره‌وه چویینه مه‌گعه‌مه‌که، خه‌ڵکینه چیم دی؟
مێز و کورسی ڕیز کرابوو، ڕازێنرابۆوه به‌جۆره‌ها خواردن، تکا ئه‌که‌م بۆ ئه‌م جاره ڕێگه‌م بده‌ن بۆتان باس که‌م و مه‌یکه‌ن به‌عه‌یبه له‌سه‌رم، چونکه له‌ده‌ستوری سلێمانی و کورده‌واری عه‌یبه‌یه باسی خواردن بکرێ، به‌ڵام چونکه ئه‌مه له‌سه‌ر حسابی میلله‌ته کڵۆڵه‌که‌مان بوو، بۆ من عه‌یبه نابێت باسی که‌م. سفره جۆره‌ها خواردنی له‌سه‌ر بوو که‌هه‌ندێک له‌و خواردنانه‌م هه‌ر له‌بیر چووبۆوه ئیتر به‌هه‌ر هۆیه‌ک بێ، له‌وانه‌ش؛ قه‌ل به‌هه‌موو جۆره‌کانی (کوڵاو، برژاو، سوره‌وه‌کراو)، مریشک به‌هه‌مان شێوه که‌که‌س لێی نه‌ئه‌پرسی، قۆزی، ساوه‌ری زه‌رد و سوور، قه‌ره‌خه‌رمانی پڕ له‌گۆشتی چه‌ور، بریانی، ئه‌نواع شله، یاپراخ، ماسی برژاویش هه‌ر باس ناکرێ که‌به‌قه‌ده‌ر نیوه‌ی ماسی ده‌م پرده‌که‌ی قه‌شقۆڵی به‌برژاوی له‌سه‌ر مێز بوو، له‌گه‌ڵ که‌بابه‌که‌ی ئه‌و زاته‌ش که‌سه‌ره‌تا بۆم باس کردن که‌له‌وێ زانیم ناوی ساڵه‌حه‌و هه‌ر له‌و شوێنه‌ش که‌بابی ئه‌برژان به‌گه‌رمی، باسی هیچی ترتان بۆ ناکه‌م، ئه‌وه‌نده ئه‌ڵێم که‌له‌هیچ شوێنێک ئه‌وه‌م نه‌دیبوو تا ئه‌و ڕۆژه، له‌هیچ ماڵێک له‌ئاغاو ده‌وڵه‌مه‌ند، له‌فلیمی سه‌ته‌لایت و سینه‌ماشدا که‌ده‌عوه‌تی شاهانه‌و پاشاو حاکمه‌کان نیشان ئه‌دات هه‌ر وانه‌بوون، به‌ڵام که‌مناڵ بووم باسی به‌هه‌شت و خواردنه جۆراو جۆره‌کانیان ئه‌کرد، ته‌سه‌ورێکم هه‌بوو، به‌ڵام ئه‌ویش هه‌ر وانه‌بوو، بۆیه واقم وڕماو جه‌ماعه‌ت له‌نانخواردن ته‌واو بوون منیش چه‌ند نوقورچێکم له‌ماسییه‌کی به‌رده‌مم دابوو، هیچی تر، که‌ده‌ست گه‌ڵگیرا، سه‌رم هه‌ڵبڕی بینیم چه‌ندین که‌س به‌قات و ریباته‌وه ده‌ستیان له‌پشت قوونه‌و فه‌رموو ئه‌که‌ن، ئه‌و ئه‌ڵێ بێنه‌و ئه‌و ئه‌ڵێ بڕۆ، به‌مه‌زه‌نه‌ی ئه‌قڵ ئه‌و سفره‌یه لانی که‌م (5) پێنج ملیۆنێک له‌م پاره تازه‌یه‌ی تێچووبوو که‌نزیکه (4000$) ئه‌کات، له‌وه که‌متر باوه‌ڕ ناکه‌م... نا تیای نابێت.
خه‌ڵکینه وه‌ک پێم وتن ئه‌وه به‌س بۆ ئه‌مڕۆ بوو که‌ئێمه چل که‌س بووین، به‌س بۆ ئێمه، حیمایه‌کانی ئه‌و زاتانه‌‌ی له‌گه‌ڵمان بوون له‌ده‌ره‌وه که‌بابی سه‌فه‌رییان بۆ چووبوو، یه‌کێک له‌به‌رپرسه‌کان به‌سایه‌قه‌که‌ی وت به‌پۆزه‌وه (نانتان خوارد؟، وتی به‌ڵێ که‌بابی سه‌فه‌رییان بۆ هێناین)، له‌هه‌مووی سه‌یرتر ئه‌وه‌بوو له‌کاتی هاتنه‌ده‌ره‌وه‌ماندا چه‌کدارو مونته‌سیبه‌کانی مه‌کته‌ب سیاسی زه‌لیل زه‌لیل له‌ده‌سته‌ی هجومدابوون بۆ سه‌ر به‌رماوه‌که‌مان تا تێر سکی خۆیان نانبخۆن، ئای که‌دیمه‌نێکی ناخۆش بوو قێزم له‌یاساکانی ژیان ئه‌هاته‌وه، سبه‌ینێش (240) که‌سی تر کۆبوونه‌وه‌ی تێرو ته‌سه‌لیان پێ ئه‌کرێ، به‌ڵام نازانم بۆ داوای سبه‌ینێش چه‌ندی تر،
به‌ڕێزان...
مۆزه‌ف به‌عینوانی که‌بابچی و که‌بابی سه‌فه‌ری، سفره‌ی دووسه‌دو چل که‌سی (شاهانه) و به‌و شێوه‌یه‌ی که‌باسم کرد به‌بێ زیاد، لافو گه‌زاف..... دیوانی چاودێری داراییش له‌گوێی گادا نووستوون، یان چاوو گوێیان داخستووه، ئه‌گه‌ر درۆش ناکه‌ن ئه‌وه ئه‌رزو ئه‌وه گه‌ز، نه‌زاهه‌تی خۆیان بسه‌لمێنن، قابیله ئیداره‌ی گشتییان نه‌بێت و وسولاتیان نه‌بێت، ئه‌گه‌ر نه‌یان بێت ئه‌وه عوزر له‌قه‌باعه‌ت خراپتر.
ئه‌وه‌ی له‌وێ ئه‌کرێ، له‌سه‌ر حسابی کێیه؟
هه‌ق وایه ئیتر نه‌ڵێن؛ مه‌کته‌ب سیاسی یه‌کێتی، بڵین مه‌گعه‌م سیاسی!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
