میسر.... دناڤبەرا هەڤركیا ئیسلامیان و لەشكەریدا

Wednesday, 20/06/2012, 12:00

میسر ئێك ژوەلاتێن گرنگێن دەڤەرا روژهەلاتا ناڤەراستە، دكەڤندا ودگەل پەیدابوونا شارستانیەتان كاریگەریاوىَ لسەر ڤىَ دەڤەرا دیاركرى، یاكو ب "ناڤەندا قەیران" هاتیە بناڤكرن هەبوویە، نها ژى مینا كاراكتەرەكىَ بەرچاڤ دناڤ هاوكێشەیێن سیاسى ونێڤدەولەتیدا دهێتە تەماشە و نەرخاندن، ژبەر جهىَ وىَ یىَ جیوپولیتیكیىَ گرنگ ب تایبەتى، كو وەلاتەكىَ (ئەرەبى، روژهەلاتا ناڤەراستى، دەریایا ناڤەراستا سپى، دەریایا سور، ئەفریقییە،...هتد)، ژبەرڤىَ ب دایكا دونیایى، واتە ب "أم الدنیا" دهێتە بناڤكرن وهەر گوهورینەكا دسەروبەرىَ وێدا پەیدادبیت، رەنگڤەدانىَ لسەر بارودوخىَ سیاسیىَ ڤىَ دەڤەرا روژهەلاتا ناڤین دكەت، ژبەر هندىَ هەموو ئالیەك ب رژدى تەماشەیى كاودانێت وىَ دكەن، نەمازە چەند سالەكە بالانسا ڤىَ دەڤەرىَ دچارەسەریا كێشەیاندا بتایبەتى كێشەیێن "ئەرەبى ـ ئیسرائیلى" راگرتیە، پشتى سەركەفتنا شورەشا 25ىَ یەنایرىَ 2011ىَ و روخانا رژێما "حوسنى موبارەك"ى، ئەڤ بالانس راگرتنە دمەترسیىَ دایە، دیار نینە دىَ ئەڤ وەلات بەر ب چو ئاراستەیەكىَ چیت، چو گوهورینەكا بنەرەتى دسیاسەت و ستراتیژیەتاوێدا دىَ هێتەكرن؟ بەلىَ.... ئەڤە پرسیارەكە؟ لىَ بەرسڤا وىَ تا نها زەلال نینە!، هەرچەندە "محەمەد مورسى" كاندیدىَ بزاڤا ئیخوان موسلیمین بو سەروكاتیا میسرىَ راگەهاندیە (دىَ هەمان سیاسەتا بەرىَ پەیرەوكەت، ژوانا ژى دگەل ئیسرائیلىَ)، رەنگە ئەڤە تەنها تەكتیك بیت داكو پشتەڤانیا ئەمریكا و روژئاڤا مسوگەربكەت، ژبەركو میسر سالانە هاریكاریەكا دەراڤى باش ژئەمریكا دوەرگریت داكو نەهێنە برین و بەردەوام بیت، ئەگەر تەكتیك نەبیت؟، واتە ستراتیژیەت بیت، ئانكو دىَ هەمان سیاسەتا "موبارەك"ى جێبەجىَ كەت، دەرئەنجام دىَ هەمبەرى ملیونەها خەلكىَ نەرازى بیت ل گورەپانا تەحریر بتایبەتى تەخا روشەنبیر وگەنجان، ژلایەكىَ دن هەڤركىَ وى یىَ سەرەكى دگەرا ئێكىَ دا ژهەلبژارتنان "فەریق ئەحمەد شەفیق" یىَ كو ئەفسەر و دویماهیك سەروك وەزیرىَ سەردەمىَ موبارەكى، دوپاتكر (دىَ وەلاتىَ میسرىَ بەر ب پێشڤە بەت و ناڤەگەرینیت بو دوهى)، مەبەستاوى ژدوهى بو هەمان سیاسەتا سەردەمىَ موبارەكى، هەروەسا (ئارمانجێت شورەشىَ وشورەشگێران دىَ ئینیتە دى و زێرەڤانىَ شورەشىَ بیت)، گەلو...كیژان ژ "محەمەد و ئەحمەدى" دىَ دەربرینى ژئیرادەیا خەلكىَ میسرىَ كەت و ڤى وەلاتى بەر ب ئاراستەیەكا راست ودروست بەت؟ ژقەیران و مەترسیان دوور كەت؟ ئەگەر كاندیدىَ ئیخوانان ب سەركەفت كو یىَ هەولا دروستكرنا بەرەیەكىَ ئیسلامى دكەت دژى "ئەحمەد"ى دگەرا دووێدا ژهەلبژارتنان كو دىَ 16 و17ى حوزەیرانىَ برێڤەچیت و شانسەكىَ ب هێزتر هەیە كو سەروك كومارىَ داهاتوو بیت، ئەرىَ دىَ ڤێت دیموكراسیەت بنەجه ببیت؟ یان دىَ شێت بەلانسىَ راگیریت وهەموو ئالیێن دن رازى كەت وڤى وەلاتى ژدەردەسەرى و قەیرانان رزگاركەت؟، ب من نەخێرە، چنكو ل پەرلەمانىَ میسرىَ ئەندامێن وان كونترولا پەرلەمانى كرینە وسەروك كومار ژى ئەگەر ژوان بیت، دىَ شێن حكومەتەكىَ لگورەى دیتن و خواستەكا خوە پێكبینن وئەجیندایێت مەكتەبا ئیرشادىَ ئانكو سەركردایەتیا ئیخوانان ب سەپینن، واتە دىَ ئیخوانان كونترولا رەهایى هەبیت لسەر دوخا سیاسى وهەموو بوارێت دنێن ژیارىَ، ئانكو زڤراندنا میسرىَ بو حكومرانیەكا مەركەزیا بهێزا ئێك لایەنى وئەڤە ژى كێشەیان چارەسەرناكەت، بەلكو دىَ ئالوزتركەت ومەترسیان زێدەتركەت، چنكو رژێما موبارەكى ژى هەر وەسان بوو، دیسان ئەگەر هاتوو "ئەحمەد شەفیق" یىَ كو ئەنجومەنى سەربازى یا دەسەلاتدار و لایەنگەرێت موبارەكى و هەڤركێن دەسەلات گرتنىَ ژلایىَ ئیسلامیان ڤە پشتگیریاوى دكەن ب سەركەفت و بو سەروك كومارىَ میسرىَ بەرامبەر پەرلەمانەكىَ، تێدا ئیسلامى بهێز و بالادەست، دىَ وەلاتەكىَ كێشەداربیت وئەركىَ وى قورس تربیت وكێشەیان بنبرناكەت، ل وى دەمى ئیخوان ولایەنێن دنێن ئیسلامى رازى نابن كو سەروكایەتى ژدەست وان بچیت و رەنگە دیسان بەر ب گورەپانا تەحریرىَ بچن وسەروبەرىَ میسرىَ تێك بدەن و داكوكیىَ ل روخانا وى ژى بكەن، لبن هێجەتا جارەك دن "میسر" كەفتیە ددەستێن زەلامێن موبارەكیدا و كودەتا لسەر شورەشا 25ىَ یەنایەرىَ هاتیەكرن، بو وان گرنگ نینە دىَ وى وەلاتى بەر ب چو تارستان و ئاراستەیەكىَ ڤە پالدەن، چنكو ئارمانجاوان تەنها دەسهەلاتە یاكو زێدەتر ژ 80ىَ سالانە خەونان پێڤەدبین وئاخینكا بو دهەلكێشن و لایىَ وان وەلاتىَ میسرىَ و درووشمێت تەیسوك و شورەشا 25ىَ یەنایەرىَ، هەموو ئامرازن بو گەهشتن بو سەر دەسهەلاتىَ، ئاها ئەڤە كەتوارىَ تازەیىَ میسرىَ یە وباوەرناكەم ژى هەردوو ئالى، "محەمەد وئەحمەد" پێكوەرن و"ئیسلامى و لەشكەر" ئێك بگرن، چنكو "گورگ و میه" پێكڤە ناچەرن، هەر چەوان بیت ئاراستە و پاشەروژاوىَ ئاشكرانینە و ب هەلبژارتنا سەروكەكىَ ئیخوانى بیت یان لەشكەرى، گەرەنتیا پاشەروژەكا گەشا نێزیك مسوگەر ناكەت و سەقامگیریا سیاسى بنەجه نابیت وكێشەیێن وىَ یێن جڤاكى بو دەمەكىَ كورت چارەنابن، دەرئەنجام مللەتێن میسرىَ وئالیێن وىَ یێن سیاسى، چو ئاینى یان عیلمانى بن، یێن كەفتینە دبن ئەزموون و تاقیكرنەكا مەزندا وهەموو لایەك دیسان ب رژدى تەماشەى دایكا دونیایىَ دكەن دىَ سەروبەر و چارەنڤیسىَ وىَ، چەوان وب چو رەنگى بیت...