كاتێك رق‌و كینه جێ به‌ویژدان له‌ق ده‌كات
Wednesday, 21/10/2009, 12:00
کوردستانپۆست: له به‌رگرنگی وه‌ڵامی کاک ئازاد چالاک ئه‌ندامی په‌رله‌مانی عێراق ،به باشمانزانی له کوردستانپۆست بلاوی بکه‌ینه‌وه تا خوێنه‌ران ئاگاداری ورده‌کاری کاری لیستی هاوپه‌یمانی کوردستان له نێو په‌رله‌مانی عێراق بن و ده‌رهه‌ق به لیستی جیاواز به‌شداریکردن له په‌رله‌مانی دادێ راوبۆچوونی سه‌رنجراکێشی تیایه ، تا پێی ئاشنابن.به‌هۆی سه‌رقاڵی‌‌و هاتوچۆی به‌غداوه، پاش دو هه‌فته زانیم كه كوردستانی نوێ له‌ژماره (4976)ی رۆژی 14/9/2009دا، راپۆرتێكی به‌ناونیشانی (بۆچی ده‌یانه‌وێت ده‌سه‌ڵاتی مه‌ركه‌ز بگه‌ڕێته‌وه)بڵاوكردۆته‌وه، تیایدا كۆمه‌ڵێك راوبۆچون له‌مه‌ڕ داوایه‌كی ئه‌نجومه‌نی پارێزگای سلێمانی خرابوه رو، ئه‌وه‌ش كارێكی ئاساییه بۆ هه‌ر كه‌سێك كه رای خۆی به‌و شێوه‌یه‌ی كه پێی راسته ده‌ربڕێ، ته‌نانه‌ت ئه‌گه‌ر له‌هه‌ندێك لایه‌نی ئه‌و باسه‌ش بێ ئاگابێ، بۆیه من زیاتر روی قسه‌م له‌لێدوانه‌كانی قسه‌كه‌ری لیستی هاوپه‌یمانی كوردستان ده‌بێت.
فریاد ره‌واندزی له‌سه‌ره‌تای قسه‌كانیدا، سه‌باره‌ت به‌و په‌رله‌مانتارانه‌ی كه ده‌یانه‌وێت داوای ئه‌نجومه‌نی پارێزگای سلێمانی بۆ وردبینی‌‌و پێداچونه‌وه‌ی ده‌فته‌رو سجلاتی ئه‌م چه‌ند ساڵه‌ی رابردویان بگه‌یه‌ننه لیژنه‌و ده‌سته‌ی نه‌زاهه‌ی عێراق، ده‌ڵێت: "له‌په‌یڕه‌وی ناوخۆو یاسای په‌رله‌مان نه‌گه‌یشتون، ئه‌گه‌ر نا، به‌چ هه‌قێك ئه‌ندام په‌رله‌مان ئاستی خۆی ده‌هێنێته خواره‌وه، كه داوا له‌فه‌رمانبه‌رێك بكات بێت چاودێری كاروباری دامه‌زراوه‌یه‌كی هه‌رێمی كوردستان بكات".
هه‌روه‌ها ده‌ڵێت: "ئه‌وان نوێنه‌ری خه‌ڵكی كوردستانن‌و په‌رله‌مانتاران ده‌بێت خۆیان چاودێری ده‌زگاكانی هه‌رێمی كوردستان بكه‌ن".
قسه‌كه‌ری لیستی هاوپه‌یمانی‌‌و هه‌مو خه‌ڵكی ده‌زانن كه ئه‌نجومه‌نی نوێنه‌رانی عێراق، له‌هه‌مو پارێزگاكاندا، به‌هه‌رێمی كوردستانیشه‌وه، نوسینگه‌ی تایبه‌ت به‌خۆیان ههیهو له‌سێ به‌ش پێكهاتوه، یه‌كێكیان به‌شی گله‌یی‌‌و شكاتی هاوڵاتییانه، هه‌ریه‌ك له‌وانه‌ش چه‌ندین فه‌رمانبه‌ر كاری تێدا ده‌كه‌ن‌و تا ئێستا چه‌ندین كێشه‌ی هاوڵاتییانیان ره‌وانه‌ی به‌غدا كردوه‌و زۆربه‌شیان وه‌ڵام دراونه‌ته‌وه، چونی ئه‌ندامانی په‌رله‌مان‌و فه‌رمانبه‌رانی ئه‌و نوسینگانه به‌ده‌نگ هه‌ر كێشه‌یه‌كی په‌یوه‌ندیدار به‌كاره‌كانیانه‌وه‌و بۆ ده‌بێت لادان له‌یاساو له‌په‌یڕه‌وی ناوخۆو بچوككردنه‌وه‌ی ئاستی په‌رله‌مانتاران بێت؟
ئه‌وه نییه خۆی ده‌ڵێت، په‌رله‌مانتاران ده‌بێت خۆیان چاودێری ده‌زگاكانی هه‌رێمی كوردستان بكه‌ن، خۆ ده‌بێت پێشمان بڵێت چۆن ئه‌و كاره ئه‌نجام بده‌ین، ئایا هیچ ده‌زگایه‌كی هه‌رێم رازی ده‌بێت ئێمه یان (جه‌ناب عالی) بچێت‌و پشكنینی تێدا بكه‌ین، یان داواكارییه‌كی ساده‌شیان پێشكه‌ش بكه‌ین؟ ئایا ده‌توانین باس‌و خواسی گه‌نده‌ڵی هه‌رێم به‌رینه په‌رله‌مانی عێراق، وه‌كو لایه‌نه‌كانی تر ده‌یكه‌ن؟
ئه‌گه‌ر ئه‌توانین ئه‌وه بكه‌ین، ئه‌كرێ به‌هاوڵاتییانی كوردستان بڵێیت، تا ئێستا چه‌ند گه‌نده‌ڵیت كه‌شفكردوه‌و چه‌ندت باسكردوه، په‌رله‌مانتارانی كوردستان‌و عێراق به‌درێژایی دو ده‌وره‌ی په‌رله‌مانی چه‌ند مه‌سه‌له‌ی له‌و جۆره‌یان خستۆته رو، كه نه‌كراوه هۆكاره‌كانی چی بون؟
قسه‌كه‌ری لیستی هاوپه‌یمانی پێیوایه، كه داواكه‌ی ئه‌نجومه‌نی پارێزگای سلێمانی بۆ لێكۆڵینه‌وه له‌حساباتی چه‌ند ساڵه‌ی خۆیان، نایاساییه، چونكه تا ئێستا ده‌سته‌ی نه‌زاهه‌ی عێراق به‌یاسای ژماره (55)ی بریمه‌ر كار ده‌كات‌و ده‌سته‌ی نه‌زاهه‌ش به‌پێی ئه‌و یاسایه ده‌بێت نوسینگه‌ی له‌شاره‌كاندا هه‌بێت.
ئه‌م قسه‌یه ده‌قاوده‌ق راسته، به‌ڵام پرسیاره‌كه ئه‌وه‌یه ئایا ده‌سته‌ی نه‌زاهه‌ی عێراق ده‌سته‌یه‌كی ئیتیحادییه وه‌كو كۆمسیۆنی باڵای هه‌ڵبژاردنه‌كان یان نا؟ ئه‌گه‌ر وایه قسه‌كه‌ری لیستی هاوپه‌یمانی ده‌توانێت پێمان بڵێ له‌ساڵی 2004ه‌وه هه‌تا ئێستا بۆ ئه‌و نوسینگانه له‌هه‌رێم نه‌كراونه‌ته‌وه‌و كێ رازی نه‌بوه به‌هاوكاری نه‌كردنی ده‌سته‌ی نه‌زاهه له‌عێراق؟
من لێره ته‌نها یه‌ك بڕگه‌ی ئه‌و یاسایه ده‌نوسمه‌وه كه به‌ئاشكرا باس له‌سه‌ڵاحیاتی ده‌سته‌ی نه‌زاهه ده‌كات كه به‌داخه‌وه هه‌رسێ رۆژنامه‌نوسه‌كه‌ی ئه‌و چاوپێكه‌وتنه‌ی كوردستانی نوێ پێیان وایه هاتنی ده‌سته‌ی نه‌زاهه كارێكی نایاسایی‌‌و ناده‌ستوریی‌‌و پێشێلكردنی سه‌روه‌ریی هه‌رێم‌و راكێشانی ده‌ستی به‌غدایه.
له‌به‌شی چواری یاسای ده‌سته‌ی نه‌زاهه‌ی (بریمه‌ر) به‌ناوی (السلاحیات والواجبات) ده‌ڵێ:
"یخول المحقق من الدرجه الا‌ولی بموجبه ممارسە السلاحیات المكفوله فی القانون العراقی لمحقق المحكمه، وله أن یمارس تلك السلاحیات فی أی منگقه من العراق....الخ".
له‌م به‌شه‌ی باسه‌كه‌دا، به‌ڕاشكاوی ده‌ڵێ، ده‌سه‌ڵاتی ده‌سته‌ی نه‌زاهه له‌هه‌مو ناوچه‌كانی عێراق پیاده ده‌كرێت".
به‌ڵام هه‌میشه به‌رپرسانی هه‌رێم به‌دو جۆر مامه‌ڵه له‌گه‌ڵ رۆڵی ده‌سته ئیتیحادییه‌كان ده‌كه‌ن، جارێك دژی ئه‌و ده‌ستانه ده‌وه‌ستن‌و به‌نایاسایی‌‌و ناده‌ستوری وه‌سفیان ده‌كه‌ن به‌بیانوی ئه‌وه‌ی له (سه‌ڵاحیاتی حه‌سری) ناویان نەهاتوه‌و جارێكیتر بانگیان ده‌كه‌ن بۆ هه‌رێم وه‌ك كۆمسیۆنی باڵای هه‌ڵبژاردنه‌كان بۆ ئه‌وه‌ی پاره‌و مه‌سره‌فی هه‌ڵبژاردنه‌كان بكه‌وێته ئه‌ستۆی ناوه‌ند.
تا ئێستا هه‌رێم‌و ناوه‌ند له‌دو جیهانی جیادا ده‌ژین، نوێنه‌ری كورد له‌مه‌حكه‌مه‌ی ئیتیحادی‌‌و نه‌زاهه‌و كۆمسیۆنی باڵای هه‌ڵبژاردنه‌كان‌و ئه‌وانی تردا هه‌یه، به‌ڵام په‌یوه‌ندی نێوان ئه‌و ده‌زگایانه‌و هه‌رێم زۆر لاوازو شه‌رمنانه‌یه.
قسه‌كه‌ری لیستی هاوپه‌یمانی به‌رده‌وام ده‌بێت‌و ده‌ڵێ "ده‌سته‌ی نه‌زاهه ناتوانێت هیچ رۆڵێك ببینێت له‌كوردستان‌و ئه‌وه هه‌وڵێكی نه‌زۆكه، چونكه ناتوانێت تاك تاك له‌گه‌ڵ ده‌زگاكانی هه‌رێم مامه‌ڵه بكات‌و په‌رله‌مانتار ئه‌توانێت له‌ڕێگه‌ی لیژنه‌ی نه‌زاهه‌ی په‌رله‌مانه‌وه ئه‌و كاره بكات نه‌ك ده‌سته‌ی نه‌زاهه".
یه‌كه‌م: هه‌تا نوسینی ئه‌م وه‌ڵامه هیچ كه‌س‌و لایه‌نێك په‌نای بۆ ده‌سته‌ی نه‌زاهه نه‌بردوه‌و ئه‌و براده‌ره‌ش دوای هه‌ڵڵاكه كه‌وتوه، ئه‌وه‌ی كه كراوه داوا فه‌رمییه‌كه‌ی ئه‌نجومه‌نی پارێزگای سلێمانیمان له‌ڕۆژی دوشه‌ممه‌ی رێكه‌وتی 5/10/2009 داوه‌ته ده‌ست سه‌رۆكی لیژنه‌ی نه‌زاهه بۆ ئه‌وه‌ی له‌كۆبونه‌وه‌ی داهاتوی لیژنه بیخاته به‌رباس، هه‌رچه‌نده په‌نابردن بۆ ده‌سته‌ی نه‌زاهه‌ش كارێكی یاسایی‌‌و ده‌ستوری بێ غه‌ل‌و غه‌شه، به‌ڵام ئاخۆ چه‌ند كارئاسانی بۆ ده‌كرێ‌‌و چه‌ند خۆشیان (واته نه‌زاهه) پێیان باشه خۆیان توشی سه‌رئێشه‌و كێشمه‌كێش بكه‌ن له‌گه‌ڵ به‌رپرسانی هه‌رێم، ئه‌وه‌یان مه‌سه‌له‌یه‌كی تره‌و پێم وایه به‌دڵی قسه‌كه‌ری لیستی هاوپه‌یمانی‌‌و هاوچه‌شنه‌كانی ده‌بێت.
دوه‌م: زۆر خۆشحاڵم به‌وه‌ی كه زۆر له‌و كه‌سانه‌ی خۆیان له‌قه‌ره‌ی ئه‌و مه‌سه‌له‌یه داوه ئه‌وه‌نده به‌ته‌نگ ده‌ستورو یاساو سه‌روه‌ریی هه‌رێمه‌وه هاتون‌و ئازایانه‌ش به‌رگری له‌هه‌وڵی پێشێلكردنی مافی هه‌رێم‌و خه‌ڵكه‌كه‌ی ده‌كه‌ن‌و نایه‌ڵن نه‌زاهه یه‌ك هه‌نگاو پێ بنێته ئه‌مدیو سنوره‌وه، به‌دڵنیاییه‌وه ده‌ڵێم كه رۆژێك دادێ هاوڵاتییانی كوردستان (بۆ ئه‌م ئازایه‌تی‌‌و به‌رگری كردنه مێژوییه نیشانه‌و خه‌ڵاتی هه‌تاهه‌تایی ئه‌نێن به‌نێوچه‌وانییانه‌وه).
قسه‌كه‌ره‌كه‌ی لیستی هاوپه‌یمانی ده‌ڵێت: "ئه‌م كاره ته‌نها بۆ خۆ ده‌رخستنه، له‌كاتێكدا ئه‌مانه خۆیان له‌په‌رله‌ماندا ناچالاكن‌و نه‌كارێكیان پێده‌كرێت‌و له‌ناو لیژنه‌كه‌ی خۆشیاندا سه‌ركه‌وتو نه‌بون‌و كه‌وتونه‌ته ژێر كاریگه‌ری سه‌رۆكی لیژنه‌كه‌وه، ده‌نا من وه‌كو قسه‌كه‌ری لیستی هاوپه‌یمانی كوردستان‌و وه‌ك سه‌رۆكی ئه‌ندامانی لیستی هاوپه‌یمانی كوردستان، ئاگادارم كردوەتەوە دو نه‌ته‌وه‌كه ده‌بێت كه‌سایه‌تی خۆیان هه‌بێت‌و هه‌ڵه‌كانیانمان بۆ راستكردونه‌ته‌وه‌و، ئه‌و كاره‌ی ئێستا ده‌یكه‌ن بۆ چه‌واشه‌كردنی خه‌ڵكه، گوایه به‌ته‌نگ سه‌روه‌تی خه‌ڵكه‌وه‌ن له‌كاتێكدا ئه‌وه كاری ئه‌وان نییه، كاری ده‌زگای چاودێری داراییه له‌كوردستان".
ئه‌وه‌ی كه ئه‌م چه‌ند رسته‌یه به‌وردی بخوێنێته‌وه بۆی ده‌رده‌كه‌وێت كه خاوه‌نه‌كه‌ی كه‌سێكی خۆ به‌زل زانه، چونكه ئه‌گه‌ر ئه‌و هه‌م قسه‌كه‌رو هه‌م سه‌رۆكی لیستی هاوپه‌یمانییه، ئه‌ی كه‌واته دكتۆر فوئاد مه‌عسوم كاری چییه؟ بۆ ئه‌وه‌ش كه گوایه ئاگاداری كردبێتینه‌وه كه‌سایه‌تی خۆمان هه‌بێت تا ئێستا كه‌س زاتی ئه‌وه‌ی نه‌كردوه قسه‌ی وا له‌گه‌ڵ هیچ كه‌سێك بكات‌و ده‌بێ باش بزانێ كه كه‌سایه‌تی خۆی له‌ناو كوتله‌و لایه‌ن‌و زۆربه‌ی كادیره دێرینه‌كانه‌وه جێی گاڵته‌و قسه‌و باسی كۆڕو دانیشتنه‌كان بوه‌و له‌چه‌ند كه‌سێكی ده‌وروبه‌ری وه‌ك خۆی زیاتر ئه‌فعال‌و ئه‌تواری هی ئه‌وه نییه كه‌س چاوی لێبكات‌و ئه‌و زاته بۆ ئه‌وه ده‌ست نادات ببێته نه‌سیحه‌تكه‌ری كه‌س.
لای من‌و لای زۆركه‌س كه هه‌ردوكمان له‌نزیكه‌وه ده‌ناسن ئه‌م هێرشه كتوپڕه‌ی (ئه‌و سه‌ركرده مه‌زنه) جێی سه‌رسوڕمان بو، چونكه من له‌هیچ لێدوانێكدا باسی خۆمم نه‌كردوه، كه من چالاكترین ئه‌ندامی په‌رله‌مان بم، به‌ڵكو به‌پێچه‌وانه‌وه له‌ڕادیۆی وه‌زاره‌تی ناوخۆو له‌چاوپێكه‌وتنێكی رۆژنامه‌ی رۆژنامه ره‌خنه‌م له‌خۆم گرتوه‌و رازی نه‌بوم له‌ده‌وری خۆم له‌ناو هۆڵی په‌رله‌مان ئه‌مه‌ش له‌ئه‌رشیفی رادیۆكه‌دا پارێزراوه‌و هۆكاره‌كانیشم هه‌ڵگرتبو بۆ دواڕۆژ، چونكه پێم خۆشنه‌بوه كه‌س بریندار بكه‌م، به‌تایبه‌تی ئه‌وانه‌ی كه رۆژێك له‌شاخ پێكه‌وه ژیاوین.
به‌ڵام ئێستا پاش ئه‌و هێرشه ناڕه‌وایه‌ی قسه‌كه‌ری لیستی هاوپه‌یمانی ناچارم كه هه‌ندێكی باس بكه‌م‌و به‌شه‌كه‌یتر كه په‌یوه‌ندی به‌و زاته‌وه هه‌یه هه‌ڵگرم بۆ ده‌رفه‌تێكیتر، زۆربه‌ی به‌رپرس‌و ئه‌ندامانی لیستی هاوپه‌یمانی ده‌یزانن، له‌سه‌ره‌تای دانیشتنه‌كانی په‌رله‌ماندا لیستی هاوپه‌یمانی فۆڕمیان به‌سه‌ر ئه‌ندامان بڵاوكرده‌وه‌و داوایانكرد كه هه‌ر ئه‌ندامێك سێ لیژنه هه‌ڵبژێرێت، پاشان خۆیان له‌یه‌كێك له‌و لیژنانه دایده‌نێن.
من له‌جیاتی سێ لیژنه چوارم ده‌ستنیشانكرد، به‌ڵام له‌هیچ كام له‌و لیژنانه دایان نه‌نام، جگه له‌من زۆربه‌ی ئه‌ندامانی كوتله‌ی هاوپه‌یمانی له‌چۆنێتی پێكهاته‌ی لیژنه‌كان ناڕازیبون.
زۆربه‌ی ئه‌و ئه‌ندامانه‌ی كه چونه لیژنه گرنگ‌و تایبه‌ته‌كان به‌ته‌وسیه‌ی به‌رپرسه هه‌ره باڵاكانی حیزب له‌ده‌ره‌وه‌ی لیستی هاوپه‌یمانی بو له‌به‌غداد، ئه‌مه جگه له‌و موحاسه‌سه‌یه‌ی كه له‌نێوان یه‌كێتی‌‌و پارتیدا به‌زه‌قی ره‌چاوده‌كرا.
سه‌ره‌ڕای ئه‌وانه به‌هه‌مان شێوه سه‌رۆك، جێگر، بڕیارده‌ر دانران‌و هیچ پێوه‌رو دادپه‌روه‌رییه‌ك بۆ ئه‌م دابه‌شكردنه‌ش نه‌بو ته‌نانه‌ت پرسێكیشیان پێنه‌كردین.
هه‌مو ئه‌و مه‌سه‌لانه‌ی كه له‌ژیانی پێشمه‌رگایه‌تیدا دژی ئه‌وه‌ستاین‌و قێزمان لێئه‌كردنه‌وه زۆر زه‌قتر روبه‌ڕومان بونه‌وه، ئه‌و كه‌سایه‌تییانه‌ی كه به‌چاوی سوك سه‌یری هه‌ڵسوكه‌وت‌و ره‌فتارمان ده‌كردن لێره‌ش بونه‌وه به‌ده‌م راستی كوردو شۆڕه‌سواری سیاسه‌ت.
فریاد ره‌واندزی كه هه‌م قسه‌كه‌رو هه‌م سه‌رۆكی ئه‌ندامانی لیستی هاوپه‌یمانییه‌و نازانم چۆن! رۆڵێكی زۆر خراپی گێڕا له‌وه‌ی كه ناعه‌داله‌تی ناو كوتله‌ی قبوڵ‌‌و په‌یڕه‌و كرد‌و به‌پێی ئه‌و وه‌سفه‌ی بۆخۆی كردویه‌تی ئه‌و ده‌بێت به‌رپرس بێت، له‌هه‌مو ئه‌و كێشه‌و كه‌موكورتییانه‌ی ناو كوتله، چونكه هه‌تا ئێستا كه چوار ساڵه‌كه به‌ره‌و ته‌واوبون ده‌چێ به‌كه‌سیان نه‌وت بۆ قسه ناكه‌یت‌و بۆ ده‌ورت نییه‌و نه‌هاتن له‌هۆكاره‌كان بكۆڵنه‌وه، هه‌تا ئێستا چه‌ندین دانیشتن‌و گفتوگۆ كراوه، بۆ كه‌س تا ئێستا ره‌خنه‌ی له‌كه‌س نه‌گرت، به‌ڵكو به‌پێچه‌وانه‌وه ره‌خنه له‌وانه ده‌گیرا كه جارجار قسه‌یان ده‌كردو له‌هه‌مو ئه‌و دانیشتنانه‌ی كه له‌كوتله كردمان‌و هه‌روه‌ها له‌گه‌ڵ سه‌رۆكایه‌تی هه‌رێم‌و سه‌رۆك كۆمار ئه‌نجامدران بۆ یه‌كجاریش له‌لایه‌ن سه‌رۆكایه‌تییه‌وه به‌كه‌س نه‌گوترا كه بۆچی قسه‌و ده‌ورتان نییه، به‌ڵكو به‌پێچه‌وانه‌وه زۆر به‌باشی ستایشی رۆڵی لیستی هاوپه‌یمانی ده‌كراو به‌سه‌نگه‌ری پێشه‌وه‌ی ململانێكان داده‌نراین.
من نازانم سه‌ركردایه‌تی سیاسی حیزبه‌كان بۆ بانگی ئه‌ندامه‌كانی خۆیان نه‌كردو داوای هه‌وڵ‌‌و ته‌قه‌لای زیاتریان لێنه‌كردن، بۆ داوایان له‌ئێمه‌مانان نه‌كرد ده‌ست له‌كار بكێشینه‌وه‌و كه‌سانی تر بخه‌نه شوێنمان؟
بۆ هه‌تا ئێستا كوتله‌ی هاوپه‌یمانی كوردستان یه‌ك پرۆژه یاسای تایبه‌ت به‌كێشه‌كانی كورد پێشکەش به‌په‌رله‌مان نه‌كرد؟ با سه‌ركه‌وتوش نه‌بوایه.
فریاد ره‌واندزی به‌ئاره‌زوی خۆی هه‌ندێك له‌هاوشێوه‌كانی ده‌نێرێ بۆ سه‌فه‌رو ئیفادو زۆربه‌ی جاریش ناوی خۆی ده‌نوسێ‌‌و به‌بێ ئاگاداری ئه‌ندامان‌و ته‌نانه‌ت سه‌رۆكایه‌تی كوتله‌ش وه‌ك سوێسكه بۆی ده‌رئه‌چێ، كه باقی ئه‌ندامانیش پرسیاری لێده‌كه‌ن ئه‌و ناعه‌داله‌تییه بۆ؟ ده‌ڵێ ئه‌وان پێیان خۆشه من بچم‌و هه‌ندێ جاریش ده‌ڵێن ئیفادو سه‌فه‌ر خۆ بۆ سیاحه‌ت نییه، بۆ ئیشه‌و ئه‌بێ ئینگلیزی بزانن‌و خوا هه‌ڵناگرێ قسه‌كانیشیان مه‌نتقی تیایه، به‌ڵام كێشه‌كه ئه‌وه‌یه به‌سه‌ر هه‌مو كه‌س په‌یڕه‌و ناكرێ‌‌و كه‌س نه‌ماوه له‌كوتله باسی ئه‌م كێشه‌یه‌ی نه‌كردبێ‌‌و هه‌تا ئێستاش هه‌ر به‌رده‌وامه.
فریاد ره‌واندزی هه‌م ویستویه‌تی كه‌سایه‌تی بۆ ئێمه‌مانان دروست بكات‌و هه‌م نه‌سیحه‌تیشی كردوین (خوا بیپارێزێ)و هه‌م ئاگاداریشی كردوینه‌ته‌وه كه نه‌كه‌وینه ژێر كاریگه‌ری سه‌رۆكی لیژنه‌ی نه‌زاهه.
ئه‌وه‌ی فریاد نه‌ناسێ له‌نزیكه‌وه ئه‌ڵی ئه‌م زاته ئه‌بێ چ بلیمه‌ت‌و چ عه‌بقه‌رییه‌كی بێوێنه‌ی ئه‌م عه‌سرو زه‌مانه بێ! له‌شۆڕشدا زۆر كه‌سی له‌م خۆش بابه‌ته‌مان بینی كه مه‌سئوله‌كان له‌خۆیانیان نزیك ده‌خستنه‌وه، چۆن له‌خۆیان ده‌گۆڕان‌و ئیتر به‌هیچ شتێك نه‌ده‌هاتنه‌وه تایم‌و دوایش كه په‌راوێز ده‌خران ئیتر وه‌ك دۆنكیشۆت یاخود وه‌ك بۆقی حیكایه‌ته‌كه هه‌تا ئێستاش هه‌ر فو ده‌كه‌نه خۆیان.
كاكه گیان كه‌مێك ئاوڕ بده‌ره‌وه له‌ڕابردوی خۆت‌و به‌زمانێكی ژیرانه له‌گه‌ڵ خه‌ڵكی فه‌قیرو به‌سته‌زمانی وه‌ك ئێمه‌مانان بدوێ، چونكه پێش تۆ له‌ڕێكخستن‌و پێشمه‌رگایه‌تی به‌شداریی سیاسه‌ت‌و كاری راگه‌یاندن‌و خه‌بات بوین‌و كاتێ تۆ هاتیته رێبازی نوێ، هه‌واڵ‌‌و ریپۆرتاژت حازر ده‌كرد به‌نده ئه‌ندامی ده‌زگای ناوه‌ندی راگه‌یاندن‌و لێپرسراوی رادیۆی ده‌نگی گه‌لی كوردستان بوم.
ئه‌و كاته ده‌زگای راگه‌یاندن ته‌نها سێ ئه‌ندامی هه‌بو، ته‌رجومه‌و هه‌واڵ‌‌و بێژه‌ری، وتاری سیاسی رۆژانه‌ی رادیۆ به‌عه‌ره‌بی كه ته‌عبیر له‌بۆچون‌و سیاسه‌تی یه‌كێتی ده‌كرد به‌نده ده‌ینوسی‌‌و پێویست ناكات ده‌ورو كاریگه‌ری ئه‌و رادیۆیه‌ت بۆ باسبكه‌م‌و چ رۆڵێكی له‌ڕاپه‌ڕینی خه‌ڵكی كوردستان بینی‌‌و ناشمه‌وێت درێژه به‌م باسه بده‌م، چونكه ده‌كه‌ومه خۆ پێهه‌ڵدان‌و دێمه ریزی خه‌ڵكی تره‌وه، ئه‌گه‌ر واشبزانی كه من به‌تۆمه‌تی كه‌وتنه ژێر كاریگه‌ری شێخ سه‌باح ساعیدی سه‌رۆكی لیژنه‌ی نه‌زاهه قه‌ڵس ده‌بم، پێموایه له‌وه‌شدا هه‌ڵه‌ی، چونكه لای من په‌نجه‌یه‌كی شێخ سه‌باح هه‌مو گه‌نده‌ڵه‌كانی عێراق‌و كوردستان ده‌هێنێ، ئه‌و مرۆڤێكی ئازاو خاوه‌ن بیرو ویژدانه‌‌و له‌و به‌غدایه به‌ته‌نیا به‌ره‌نگاری ئه‌و هه‌مو باندو مافیایه بۆتەوە جێی شانازییه كه یه‌كه‌م كه‌س بو له‌په‌رله‌مان لێپرسینه‌وه‌ی خسته بواری جێبه‌جێكردن‌و رازی رازی سه‌رۆكی ده‌سته‌ی نه‌زاهه‌و دوابه‌دوای ئه‌ویش وه‌زیری بازرگانی، ئیتر بۆ ده‌بێت شێخ سه‌باخ كه‌سێكی خراپ بێ لای جه‌نابی قسه‌كه‌ری لیستی هاوپه‌یمانی؟
هه‌ق وابو هه‌مو ئه‌و قسه ناشرینانه‌ی كه ئاڕاسته‌ی منتكرد، بتكردایه به‌پرسیارو ئاڕاسته‌ی سه‌ركردایه‌تی بكه‌یت، كه بۆچی كه‌سێكی بێتوانای وه‌ك ئێمه مانانیان له‌وێ داناوه‌و ئه‌وان بڕیار به‌ده‌ستن خۆشت باش ده‌زانی‌‌و هه‌مو سه‌ركردایه‌تی‌‌و مه‌كته‌بی سیاسی یه‌كێتی زیندون‌و منیش ده‌ناسن بڕۆ لێیان بپرسه‌و با خۆشیان بێنه جواب، بزانه گه‌ر رۆژێك هه‌وڵێك یاخود واسته‌یه‌كم به‌كه‌سێكیان كردبێت بۆ ئه‌وه‌ی هه‌ر پله‌و پۆستێكم بده‌نێ، ئه‌وجا هه‌قی گله‌یت ههیهو بۆ ئاگاداریشت له‌ساڵی 1989 كه داوایان لێكردم ببمه به‌رپرسی رادیۆی ده‌نگی گه‌لی كوردستان به‌برای به‌ڕێز كاك یوسف زۆزانیم وت ئه‌و كاره به‌من ناكرێ‌‌و با هه‌ر به‌رپرسی به‌شی عه‌ره‌بی بم، وتی "ئه‌وه بڕیاره‌و له‌تۆ باشترمان ده‌ست ناكه‌وێت‌و هه‌مو كارمه‌ندانی رادیۆ تۆیان خۆش ده‌وێت‌و شاره‌زایی كاروباری ئیداره‌شی". من بۆ رادیۆو سه‌عدون فه‌یلی بۆ چاپخانه‌و مامۆستا موحسینیش سه‌رپه‌رشتی راگه‌یاندن‌و رێبازی نوێی ده‌كرد.
پێش كۆنگره‌ی یه‌كه‌می یه‌كێتی، به‌ڕێز مام جه‌لال له‌شه‌قڵاوه من‌و مه‌حمود ره‌زای بانگكرد‌و وتی: "ئه‌بێ یه‌كێكتان خۆتان هه‌ڵبژێرن بۆ سه‌ركردایه‌تی، بۆ ئه‌وه‌ی یه‌كێك له‌خۆتان ببێته لێپرسراوی راگه‌یاندن، منیش واته (مام جه‌لال) پشتگیریتان ده‌كه‌م".
به‌ڵام ئێمه به‌سوپاسه‌وه پێماوت كه خۆمان هه‌ڵنابژێرین، كاتێكیش ناوی ئێمه‌یان نوسی بۆ كێبڕكێی هه‌ڵبژاردن هه‌ردوكمان داوامان كرد ناوه‌كانمان بسڕنه‌وه‌و قبوڵمان نه‌كرد.
بۆ هه‌ڵبژاردنه‌كانی یه‌كه‌م په‌رله‌مانی كوردستانیش كه هێشتا مه‌سه‌له‌ی نیسبی‌‌و دائیری بڕیاری لێنه‌درابو، كاك نه‌وشیروان بانگی كردم‌و وتی من پێمباشه خۆت كاندید بكه‌یت بۆ په‌رله‌مان، چونكه هه‌م رابردوت پاكه‌و هه‌م له‌بنه‌ماڵه‌یه‌كی تێكۆشه‌رو ناسراوی شاری سلێمانیت، منیش هه‌م به‌شه‌رم‌و هه‌م به‌سوپاسه‌وه پێموت كه زۆر كه‌س هه‌ن له‌م شاره پێشمه‌رگه‌و حیزبی نه‌بون، به‌ڵام خه‌ڵكی نیشتیمان په‌روه‌رو ماقوڵی سلێمانین ئه‌وان دابنێن، من به‌ڕێوه‌به‌ری رادیۆشم پێ زۆره.
له‌كۆتاییدا ده‌ڵێم ئه‌و قسانه‌ی فریاد ره‌واندزی كردویتی به‌رامبه‌رم هیچ په‌یوه‌ندییه‌كی به‌چالاكی منه‌وه نییه له‌په‌رله‌مان، هه‌ق وابو ئه‌گه‌ر مه‌به‌ستی هه‌ڵسه‌نگاندنی مه‌وزوعی ئه‌ندامانی په‌رله‌مانه، ده‌بو باسی هه‌موانی بكردایه‌و پێشتریش بۆچونی ئه‌ندامه‌كانی وه‌رگرتایه، به‌ڵام دیاره هه‌مو ئه‌و رق‌و كینه په‌نگ خواردوه شاراوه‌یه هی شتی تره. وایان راسپاردون كه ده‌بێ له‌كه‌سایه‌تی چه‌ند كه‌سێك بده‌ن كه راو بیرو بۆچونیان له‌گه‌ڵ لیستی گۆڕان یاخود خۆیان وته‌نی كۆمپانیای وشه هاوجوته‌و ئه‌وه‌ش لای من جێی شانازییه‌و به‌تۆمه‌تیشی نازانم.
قسه‌كه‌ری لیستی هاوپه‌یمانی له‌دوا قسه‌یدا ده‌ڵێت: "ئه‌و قسانه‌ی ده‌یكه‌ن ده‌یانه‌وێت خۆیان وه‌ك پاڵه‌وان نیشان بده‌ن، به‌ڵام ئه‌وانه پاڵه‌وانی به‌فرینه‌ن‌و هه‌ر ئه‌وانه‌ن كه ده‌یانه‌وێت به‌لیستی جیاواز به‌شداربن".
باره‌كه‌ڵا (ئاقڵ‌‌و عه‌بقه‌ری كورد) خۆ هه‌ر له‌ئه‌وه‌ڵه‌وه بڵی ئه‌و هێرشه‌ی خۆت‌و هاوشێوه‌كانت له‌به‌ر ئه‌م مه‌سه‌له‌یه‌یه، خۆ تۆ خۆت به‌دیموكراتخواز‌و ئازادیخواز ناوزه‌د ده‌كه‌یت. فره لیستی، یاساو ده‌ستور رێی پێداوه‌و له‌عێراق ده‌یان‌و بگره سه‌دان لیست ههیهو له‌كوردستانیش كورد له‌هه‌ڵبژاردنه‌كانی پێشو به‌دو لیستی جیاواز چوه به‌غدادو كورد كێشه‌ی نه‌بو، هه‌ر هه‌موشمان ستایشی رۆڵی لیستی یه‌كگرتومان كرد.
ده‌یان‌و سه‌دان كه‌س له‌سه‌ر باشی یاخود خراپی یه‌ك لیستی یا فره لیستی قسه‌و باسیان له‌میدیاكان كرد، له‌ناویاندا سه‌رۆكی پێشوتری په‌رله‌مانی هه‌رێمی كوردستان كاك جه‌وهه‌ر نامیق، ئه‌ی باشه بۆ زاتی ئه‌وه‌ت نه‌كرد به‌باش یا به‌خراپ ناوی بێنی یان ره‌خنه‌ی لێبگریت؟
پێم خۆشبو راشكاوانه‌و راستگۆیانه له‌گه‌ڵ خۆت، بڵێی فره لیستی زه‌ره‌ر له‌كورد نادات، به‌ڵام زه‌ره‌ر له‌پله‌و پۆست‌و ده‌ستكه‌وته تایبه‌تییه‌كانتان ده‌دات، یه‌كجار راستگۆبن له‌گه‌ڵ خۆتان‌و له‌گه‌ڵ ئه‌و خه‌ڵكه‌ی كه گوێتان لێئه‌گرێت، ده‌نا به‌غه‌یری ئه‌وه ئێوه ئه‌و كه‌سه نین كه بڕوانامه‌ی نیشتیمان په‌روه‌ری به‌كه‌س بده‌ن‌و به‌دڵنیاییه‌كی زیاتریشه‌وه ناتوانن له‌كه‌سی زه‌وت بكه‌ن.
بۆ زاراوه‌ی پاڵه‌وانی به‌فرینه‌ش ئه‌وه ده‌مێكه سواوه‌و باوی نه‌ماوه، شەڕی سارد ده‌مێكه به‌سه‌رچو، ئه‌وه رابردوی دورو درێژی من‌و جه‌نابیشت چیت له‌هه‌گبه‌دایه هه‌ڵیڕێژه، ئه‌وه خه‌ڵك‌و ئه‌وه پێشمه‌رگه‌و ته‌نانه‌ت ئه‌وه هه‌مو مه‌سئوله‌كانیشت، كه ئێستا دور نییه قسه‌كانم به‌قسه‌ی ناحه‌ز له‌قه‌ڵه‌م بده‌ن، با ئه‌وان حوكم بده‌ن‌و بڕۆ لێیان بپرسه‌و بزانه تای ته‌رازوه‌كه‌ت له‌كوێیه؟
تێبینی: ئەم بابەتە وەک نەریتێکی رۆژنامەنوسی ئاڕاستەی رۆژنامەی کوردستانی نوێ کرا بەڵام رۆژنامەی ناوبراو ئامادە نەبوە بڵاویبکاتەوە بە ناچاری نوسەرەکەی ئاڕاستەی ئاوێنەی کرد.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
