گوتارى بارزانی لە نێوان دوێنێ و ئەمڕۆدا
Tuesday, 13/07/2010, 12:00
توركیا و ئێران ساڵانێكی زۆرە بەبیانووی بوونی گەریلاكانی پژاك و پەكەكە ناوچە سنوورییەكانی هەرێمی كوردستان بۆردمان دەكەن و خەڵكی سڤیلی ئەو ناوچانەش ئاوارە و ماڵوێران دەكەن و رەز و باخ و ماڵات و سەرچاوەكانی ترى ژیانیان لی خاپوور دەكەن، بەڵام دەبینین تا ئێستا هەولێكی جدی لەلایەن دەسەڵاتە خۆماڵییەكەى خۆمان نەدراوە، بۆ بەرگری كردن لە گیان و مالًَی هاونیشتمانمان لە دەڤەرە سنوورییەكان، لە راستیدا نەنگی شورەییە بۆ دەسەڵاتدارانی هەرێم، بەرگری لە خەڵكی ئەو ناوچە سنوورییانە نەكەن، كە لانكەى شۆڕش و جموجۆڵە سیاسییەكانی كورد بوون، لە سەردەمی رژێمی بەعسی رووخاو.
لێرەدا پێویستە پێداچوونەوەیەك بكەین، لە گوتارى سەرۆكی هەرێمی كوردستان لە بەرامبەر ئەو تۆپبارانانە لە داهاتوو و ئێستادا، ئەویش ئەوەیە كە هەموومان بیرمانە و لە یادمان ناچێ، كاتێ لە ساڵی 2007 ئەمەریكا گڵۆپی سەوزی بۆ سوپاى توركیا هەڵكرد بۆ بەزاندنی سنوورى هەرێمی كوردستان لە دژى گەریلاكانی پەكەكە، مەسعوود بارزانی لە گوتارێكدا بۆ خەڵكی كوردستان و دنیا راى گەیاند "دەبێ سوپاى توركیا بەسەر لاشەی ئێمە سنوورى هەرێمی كوردستان ببەزێنێ"، هەر ئەو كاتیش بوو گەورەترین خۆپێشاندان لە هەولێر ئەنجامدرا، دژى سنوور بەزاندنی سوپاى توركیا و لە شكركێشی بۆ ناو خاكی هەرێمی كوردستان، هەروەها پێشمەرگە و خەڵكی كوردستانیش ئامادەبوون دەست بدەنە چەك و رووبەرووی لە شكرى توركیا بوەستنەوە.
بەڵام ئەگەر بەراوردێكی گوتارى بازرانی لەو كات و ئێستا بكەین، چیمان بۆ روون دەبێتەوە، بێگومان هەموومان ئاگادارین كە بارزانی كاتێ لە سەفەرەكەى لە توركیا و چەند وڵاتێكی ترى ئەوروپا گەڕایەوە لە فرۆكەخانەى نێودەوڵەتی هەولێر لە كۆنگرەیەكی رۆژنامەوانیدا گوتی "ئیدانەى ئەو رەفتارانە دەكەین كە لەلایەن چەند حزب و لایەنێكەوە لە دژى چەند ئامانجێك لە توركیا و ئێران دەكرێ"، هەروەها ناڕەزایی خۆشی لەوە دەربڕی كاتێ ئەو سەردانی توركیاى كردووە، پەكەكە دەستی بەشەڕ كردووە.
سەیركەن بارزانی لەماوەى 3 ساڵدا چۆن هەڵوێستەكانی گۆڕان، رێگرتن بەجۆرێ كە بەسەر لاشەى ئێمەدا تێپەڕێ و ئیدانەكردنی جموجۆڵەكانی پەكەكە، چەند لێك دوورن، دەبێ سەرۆك لە بەر چ هۆكارێك و چۆن و بۆچی ئەو هەڵوێستەى ئاوەژوو بووبێتەوە، تۆ بڵێی ئەمە نهێنییەكی لە پشتدا نەبێ و واى لە سەرۆك كرد بێ لە بۆچوونەكانی پێشترى پاشگەزبێتەوە و رێك پێچەوانەى گوتەكانی پێشترى قسە بكات، ئەگەر نهێنییەك هەبێ، دەبێ ئەو نهێنییە چی بێ، كە واى لە بارزانی كردووە لە نێوان 3 ساڵدا لەسەر پرسێكی گرنگی نەتەوەیی 2 بۆچوونی تەواو دژ بەیەك بدات.
ئەى ئەگەر ئێستا سەركردایەتیی سیاسی كوردستان بێ هەڵوێست بێ، لە بەرامبەر بۆردمانی ناوچە سنوورییەكان و خەڵكی سڤیلی ئەو هەرێمەش لە ناوچە سنوورییەكان ئاوارە بن، كێ خەمیان بۆ بخوا! یان دەسەڵاتدارانی هەرێم هەر بەقسە كردن داواى راگرتنی تۆپباران بكەن، چۆن چارەسەرى ئەو كێشەیە دەبێ.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
