چاکی مەکەن با خراپتر نەبێ
Wednesday, 10/09/2014, 12:00
ئەم بارودۆخەی خەڵکی هەرێمی کوردستانی پێدا تێپەڕدەبێ ، ئەگەر نشتەجێبوانی پاش مانەوەی شەرە یەک لەدوای یەکەکان نەبونایە ، باروگوزەرانێکە هێندە سەخت و مەترسیدارە ، ئەگەر فلێمی سینەمایی بوایە و لە وڵاتانی پێشکەوتوو نمایش بکرایە کەمترین کەس جورئەتی بینینی دەکرد ، کەچی خەڵکی کوردستان تێدا دەژێن .
کردەکانی دەوڵەتی ئیسلامی (داعش) لە سەربرین و کوشتن ، قرکردن لە سەر هزر ، ئاین و ئاینزا ..هتد دیارە لە دونیای دەرەوەی وڵاتانی ئێسلام نشیندا تەنها لە نێو لاپەرەکانی مێژوودا دەبینرێن . بەڵام ئەگەر بە مێژووی عیراقدا بچینەوە هەمان ئەم کارانەی ئەمرۆ لە رابردووداشدا بە شێوازی جۆراو جۆر هەر هەبووە ، پێم وایە ژینگەی مانەوەی ئەم عەقلیەتە لە عیراقی عەرەبی و وڵاتانی ئیسلامی فرە ئاین و ئاینزا بەشێوازێک بوتە باو گۆڕینی ئاسان نەبێ ، لەبەر ئەوەی هەمان ئەو فه‌رهه‌نگه سیاسیە كۆنه‌یە کە سەدان ساڵ لەمەوبەر لە باوباپیریان بۆیان ماوەتەوەو بە ئەرکی دەزانن بەم شێوازە قێزەونە پیادەی بکەن .
ئەگەر لە کارەساتەکانی ناو مێژوو دوور کەوینەوە ، تەنها باس لە ١٠ساڵی رابردوو بەکەین دەبینرێت تەنها لە شاری کەرکوک زیاتر لە ١٢٠ هاوڵاتی سڤیلی کاکەیی تیرۆکراوە ، جاران گەرەگی عەرەفە زۆرینەی مەسیحی نشین بوون ، لە ترسی کوشتن بە جێاهێشتووە ، ئەم دۆخە هێندە درێژەی کێشا ، ژیانی ئاسایی لەبیر خەڵک بردووتەوە ، بەڵام پاش هێرشی ئەم جارەی داعش و راگەیاندنی دەوڵەتی ئیسلامی کار گەیشتە ئەو ئاستەی گرەکەی بەر هەمووان بکەوێ بۆیە دنیای دەرەوەش هاتنە وەڵام ، بەڵام سەد مخابن خوێن لە ئێمەو گوتار لەوانە !
ئایا لە دۆخێکی وادا دەبێ ئەولویاتی کاری پەرلەمان چی بێت ؟ خۆ رزگارکردنبێ لە دۆزەخی عیراق یان خۆ سەرقاڵکردن بێ بە کاری لاوەکیەوە ؟
دیارە لە سیستەمی تەندروستدا هەر دامەزراوەیەک لە کاتی جەنگ بێ یان ئاسایی ، ئەرکی سەر شانی خۆی دەزانی ، بەڵام لە سیستەمی ناتەندروستدا لە هاتنە کایەی هەر تەنگەژەیەک هەموو شتێ تێگەل و پێگەل دەکرێ ، لەوەشدا زەرەرمەندی یەکەم هاوڵاتیە .
ئەوەی جێگای تێڕامانە لە دوخێکی مەترسیداری لەم جۆرە ، وێرای خەم و پەرۆشی خەڵکی کوردستان بۆ رۆڵەکانیان لە بەرەکانی جەنگ ، قەیرانی دواکەوتنی موچەی فەرمانبەران ، و لەسەرووی گشتیانەوە فرۆشتنی کچان و خوشکەکانمان... کەچی قیچی لە ئەندام پەرلەمانەکان بەپاساوی بەرژەوەندی ھاوڵاتی لە سەر خاوەن ئوتۆمبیلەکان هاتوونەتە دەنگ و کۆمەڵانی خەڵکی هەرێمان سەرقالکردووە ، دەیانەوێت وێرای ئەو نائارامییەی مللەتی تێدایە شەری کارە چەوتەکانی حکومەتیشی پێبکەن . کە من پێم وایە ئەمە جگە لە یاری کردن بە هه‌ست‌و سۆزی ئەم مللەتە هیچی دیکە نیە . ئەگینا با بپرسین خەڵکی کوردستان پەرلەمانی بۆچیە ؟ بۆ ئەوەیە هەموو رۆژی لە میدیاکان دەرکەون و بە شان و بالی خۆیان هەلبدەن و یەکتر بشکیننەوە یان بۆ ئەوەیە کۆمەڵگا دوورخەنەوە لە شەری دەروونی و خۆیان بەپێی ئەو دەسەڵاتەی هەیانە ئەو شەرە لە نێو پەرلەمان ئەنجام بدەن و بەرهەمەکەی بەخەڵک راگەینن ، ئەگینا ئەو قسانەی ئەوان دەیکەن خەڵک لەبەری کردووە زۆر بە باشی دەزانن نادادپەروەری هەیە ، بۆیە دەنگیاندا تا گوزەرانیان باشبکرێت و به‌ئاسووده‌یی بژین ، نەک رۆژانە سەرودڵیان بگرن و منەتباریان بکەن بەوەی کە لەسەریان هاتوونەتە وەڵام !
با نموونەیەک بکەینە پرسیار لێیان ؛ ئایا کەمکردنەوەی نرخی سوتەمەنی لە بەرژەوەندی گشتیدایە ؟ دیارە ئەرکی حکومەتە هاوسەنگی نرخی هەر شتومەگی کە پێداویستی پێویست و گشتیە ، لەگەل داهاتی تاکدا بگونجینێت!.
بەپێی قسەی وەزیری سامانە سروشتیەکان حکومەت نزیکەی (٣٠٠ ٧٠٠) هەزار دینار لە سامانی گشتی دەخاتە سەر هەر لترێک لە بەنزین ، من ناڵیم نرخی بەنزین کەم یان زیاد بکرێت ، ئەوە ئەرکی خەڵکانی پسپورە لە بوارەکانی ژینگە ، دارایی ...هتد بەڵام دەپرسم : بۆ هەر ٤٠ لترێ بەنزین نزیکەی ٢٠ هەزار دینار دەکات ئەگەر هەر ئۆتۆمبیلێک لە مانگیکدا ١٥جار بەنزین وەربکرێت دەکاتە ٣٠٠ هەزار دینار ، دەستان خۆش بێ کە لە سامانی گشتی بەشی ئەو هاوڵاتیانە دەدەن کە سیارەیان هەیە ، ئەی ئەوانەی سیارەیان نیە چی ؟
جگە لە پیسکردنی ژینگەو هەڵمژینی هەوای ناتەندروست چیان بۆ دەمێنێتەوە ، ئایا هەقی ئەوانش نیە پارەیان پێبدرێت ؟ ئایا بەم شێوەیە لە دادپەروەری گەیشتوون ؟
وام پێ باشه ئەندام پەرلەمانەکان ئه‌و پرسیاره له‌خۆیان بكه‌ن ، ئایا خەریکی باشتر کردنی سیستمی بەڕێوەبردن و دەربازبوون لە دۆزەخی عیراق بن باشترە یان خۆیان سەرقالکەن بەشتگەلێکەوە تەنانەت ئەگەر " چاکشی کەن " کاتیە ! بۆیە ناچارم پێان بڵێم هەندی شت هەیە تکایە چاکی مەکەن با خراپتر نەبی .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
