رۆژهەڵاتی کوردستان پێویستی بە پلانە

Sunday, 11/01/2015, 12:00

دوای ئەوەی رابەرایەتی شۆڕشی ئیران لەلایەن ئیسلامیەکانەوە کۆنترۆڵکرا ، زۆرینەی وڵاتە زڵهێزەکان ، لە نێویاندا ئەمریکا و ئەوروپا ، جگە لە بەرکەوتنێ سەربازی راستەوخۆ ، هەموو رێگاکانی تریان گرتە بەر بۆ دژایەتی کردنی . لەتەک ئەوانیشدا وڵاتانی عەرەبی و ئیسلامی سننە ئاینزا (جگە لە حوکومەتی سوریا) سەرجەمیان کەوتنە هەمان سەنگەرو پشتگیری سەدامیان لە جەنگی هەشت ساڵەی دژ بە ئێران کرد .

ئەگەر بپرسین وڵاتێک لە رۆژهەڵاتی ناوین ئەو هەموو نەیارە دەرەکیەی هەبێ ، دانیشتوانه‌که‌ى فرە نه‌ته‌وه‌و ئاین و ئاینزای نەیار بەیەک بن ، دەبێ لەناوخۆدا بەرهەڵستگارانی لە چی ئاستێکدا بێت ؟

دیارە دەرخستنی رێژەی بەرهەڵستگاران ، لەسیستەمی ناتەندرۆستدا زۆر سەختە پێش چاوبخرێت ، بەلام کۆمەڵی سیماو ئاماژە هەن ، لەوانە ؛ سیستەمی سیاسی ، نادادگەری ، گەندەڵی ماڵی و ئیداری ، رێژەی بێکاری و كەمدەرامەتی ، رەوشی مافی مرۆڤ و ئازادی بیرورا ، زۆربوون و پربوونی زندان و زندانیەکان ، ئاستی توندی سزاكان و لە سێدارەدان و...هتد بەزانیان دەردەکەوێت رەوشی ئەو وڵاتە چۆنە . بەو پێیە بێت ، دەبوایە سنوری دەسەڵاتی بەرهەڵستگارانی رژێمی ئێران ، لایەنی کەم شارەوانیەکانی کوردستان و ئازەربایجان و بلوجستانیان تێپەراندایەو ئێستا لە دەوروپشتی قم بونایە ! . کەچی بەپێچەوانەوە ، بەرهەڵستکاران هیچ بەدەستن ، کۆماری ئیسلامیش بۆتە زڵهێزی ناوچەکەو دۆست و پێرەوکەرانشی دەپارێزێ . بەتایبەت جموجۆلەکانی ئەم دواییەی ، واتە پاش هێرشی رێكخراوی ده‌وڵه‌تی ئیسلامی (داعش) بۆ سەر شاری موسل و هەرێم ، واپێدەچی کۆماری ئێسلامی بییەوێت رۆڵی تورکیا ، لە سوریاو ، رۆژئاواو باشووری کوردستان نەهێڵێت . پێکهاتەی شاندی ئێرانی (سه‌رۆكی ئه‌نجومه‌نی شورای ئیسلامی ئێران) بە یاوەری محەمەدی جەعفەریی سەحرارودی، (کە بە فەرماندەی تیمی تیرۆرکردنی ، عەبدولڕەحمان قاسملوو تومەتبارە) بۆ هەولێر ، ئاماژەیە بە دەرکەوتنی سیمای پیادەکردنی سیاسەتی گێزەرو دار ، نەک تەنها لەسەر هەرێم ، بەڵکو ئاگادارکردنەوەی سەرجەم وڵاتانی ناوچەکەیە ، پێش هەموانش تورکیاو وڵاتانی کەنداو .

تێکچونی هاوسەنگی هێز

دیارە کاراتر بوونی ئێران لە ناوچەکە ، تێکچونی هاوسەنگی هێزی بەدوادادێ ، ئەمیش بێ بەرپەرچدانەوە نابێ . ئەمریکاو وڵاتانی کەنداو بەتایبەت سعودیە ، هەر یەکەیان بەمەبەستی جێاواز ، هەنگاوی یەکمیان بە دابەزاندنی نرخی نەوت دەستپێکرد ، یەکمیان دەیەوێت ئێران نەبێتە خاوەنی چەکی ئەتۆمی . ولاتانی کەنداویش سەرەرای ئەوەی هەمان خواستیان هەیە ، لەگەڵ ئەویشدا دەیانەوێت ولایەتی فەقێ لەناو بەرن ، دیارە ئەمەش لێکەوتەی نەرێنی ئابووری ، كۆمەلایەتی و سیاسی گەورەی بەدوادا دێت .

حزبەکانی رۆژهەڵاتی کوردستان

ئەوەی بە ئاگا بێت لە کاروکردەی حزبەکانی رۆژهەڵاتی کوردستان ، دەزانێت کۆیەک فاکتەر ببوونە تەنگەژەی بەردەم گەیشتنیان بەدەسەڵات . لەوانە ؛ نەبوونی ستراتیژییەتێکی پراكتیكی هاوبەشی نەتەوەیی لە نێوان لایەنە سیاسیەکان . خۆ بەستنەوەی لایەنە کوردستانیەکان بە بیری سەرتاسەری (ئێرانچیەتی) . سەرقاڵبوون بەیەکترەوە . سستبوونی رۆڵیان لە گەمە سیاسی و سیناریۆکانی ناوچەکە . دەستێوەردان و کردەی ناتەندروستی حزبەکانی باشوور ، بەتایبەت پدک لە رابردوو ، حوکومەتی هەرێمی کوردستان لە پاش راپەرینی ساڵی ١٩٩١ وە...هتد .

بەرەنجام :

حزبەکانی رۆژهەڵات شەری یەکلاکەرەوەیان لەگەڵ کۆماری ئیسلامی لەدەست دەرهێندراوە . و تا ئێستا لە دانوستاندن (بە تاک حزب) لەسەر پرسی مافی نەتەوەیی شکستیان خواردووە . بەڵام باشورو باکوورو رۆژئاڤای کوردستان لە کێشمەکێشیکی بەهێزدان ، ئەگەر لەسەر ستراتیژییەتێکی هاوبەشی نەتەوەیی پێکبێن و بە راوێژ لەتەک یەکدا كارتەكانی ژێر دەستیان بەكاربێنن ، دەتوانن زەمینەی رێگا چارە بۆ باشکردنی رەوشی سیاسی لە رۆژهەڵاتی کوردستان هەنگاوێک بەرەو پێش بەرن .
بەتایبەت لەمەودوا واپێدەچێ بە هۆی دابەزینی نرخی نەوتەوە ، بێکاری و برسیەتی ، زۆر تونتر لەوەی هەیە ، رووبەرووی ئێران ببێتەوە ، ئایا حزب و رێکخراوەکانی رۆژهەڵاتی کوردستان هیچ نەخشەو پلانێکیان بۆ ئەم پرسە هەیە ؟