ئه‌ڤین ئاسۆشیان فێرکرد، تا په‌لاماری میدیا ئازاده‌کان بدات
Monday, 07/06/2010, 12:00
که‌ناڵ چوار که گوایه کوردایه‌تیه‌که‌ی هێنده به‌هێزه به‌ناوی هه‌ر چوار پارچه‌ی کوردستانه‌وه ناو نراوه و دروشمه‌که‌شی (ئێوه شایه‌نی باشترینن) ه. گوایه ئه‌و که‌ناڵه په‌یوه‌ندی به سیاسه‌ته‌وه نیه‌و مشورخۆری گه‌نج و ژنه!! یه‌کێك له به‌رنامه دوورودرێژه‌کانی که نیوه‌ی کاتی که‌ناڵه‌که‌ی بۆ خۆی ته‌رخانکردوه (به‌رنامه‌ی ئه‌ڤین ژین و ژیانه)، ئه‌و به‌رنامه‌یه که گوایه گرنگی ده‌دات به ژن و کێشه‌کانی ژنان و لاوان! به‌ڵام زۆر جار ده‌بینین ئه‌ڤین خان خۆی ده‌دات له قه‌ره‌ی سیاسه‌ت و هه‌ندێ جاریش هێرش ده‌کاته سه‌ر ڕۆژنامه‌ی ئازاد و ده‌ستناخاته سه‌ر هۆ سه‌ره‌کیه‌کان که بونه‌ته نائومێدی گه‌نجان و ژنان. بۆ نمونه له‌و به‌رنامه‌یه‌ی که بۆ خۆکوشتنی ژن و لاو ته‌رخانکرابوو به‌هیچ جۆرێك نه‌چوو به‌لای ئه‌و بارو دۆخه‌ی که مه‌سئوله‌کان خولقاندویانه‌و بۆته هۆی بێ ئومێدی لاوان و په‌نا ده‌به‌نه به‌ر خۆکوشتن! ژنانیش بۆچی خۆیان ده‌سوتێنن و ده‌کوژرێن! هه‌موو کێشه‌که‌شی په‌یوه‌ندکرد به باری ده‌رونی و کۆمه‌ڵایه‌تیه‌وه!
من به ئه‌ڤین خان ده‌ڵێم: گه‌ر جه‌نابت خۆت به ژنپاریزی وڵاته‌که‌م ده‌زانیت، ئازار چێژ و خه‌مخۆری ژنانی کوردیت و نه‌بویته ده‌سکه‌لا به‌ده‌ست ده‌سه‌ڵاته‌وه، به به‌ڕێوه‌به‌ری که‌ناڵ چوار بڵێ که چه‌ند به‌رنامه‌یه‌ك له‌سه‌ر ئه‌م بابه‌تانه‌ی خواره‌وه ئاماده بکات
1. لێکۆڵینه‌وه‌یه‌ك بۆ بارودۆخی ژنان له ژێر ده‌سه‌ڵاتی یه‌کێتی و پارتیدا له ماوه‌ی ئه‌م 19 ساڵه‌ی حکومڕانیاندا و بۆچی له پاش پڕۆسه‌ی ئازادی سوکایه‌تیکر‌دن و کوشتنی ژنان له زیاد بوندایه؟
2. ئه‌و مه‌ترسیانه‌ی به‌ره‌و ڕوی ژنان ده‌بێته‌وه له سایه‌ی ده‌سه‌ڵاتدارانی هه‌ردوو حزبه‌که
3. بارو دۆخی ده‌رونی ئه‌و ژنه مه‌سئولانه‌ی که مێرده‌کانیان ژنیان به‌سه‌ر هێنان، بێ گوێدانه ئه‌و ده‌رده سه‌ری و ناخۆشیه‌ی که بینیان و شان به شانی هاوسه‌ره‌کانیان خه‌باتیان کرد
4. بۆچی تاکو ئێستا هیچ ژنکوژێك سزا نه‌دراوه؟ کێن ئه‌و که‌سانه‌ی ده‌بنه هۆی کوشتن و خۆ کوشتنی ژنان و لاوان؟
5. لێکۆڵینه‌وه‌یه‌ك بۆ کتێبی (ئۆقیانوسێك له تاوان)ی به‌ڕێز خه‌ندان محمد جه‌زا بکه‌ن. چونکه ئه‌و به‌ڕێزه له گیرفانی خۆی قسه‌کانی ده‌ر نه‌هێناوه و هه‌مووی توێژینه‌وه‌یه له ژنانی نێو زیندانه‌کانی کوردستان
6. له جیاتی ئه‌وه‌ی هه‌ر ڕۆژه ناڕۆژێك خۆفرۆشێکی وه‌ک مهاباد قه‌ره‌داخی و زوڕناژه‌نه‌کانی تری پارتی ده‌هێنن بۆ به‌رنامه‌کانتان، بۆچی میوانداریه‌کی به‌ڕێز خه‌ندان حه‌مه جه‌زا ناکه‌ن؟
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
