كاتێك لەگەڵ هاوشارێَكی هەولێریمدا ئەكەوینە گفتوگۆ لەسەر وەزعی ناهەمواری شارەكەمان لەژێرسایەی حوكمی بنەماڵەی بارزنیدا، زۆرجار گوێبیستی قسەیەكی سەیر ئەبم كە بوە بەوێردی سەرزمانی زۆربەی هەولێرییەكان، ئەویش خستنی مەسئولییەتی ئەم وەزعەیان بەسەر شانی حزبەكانی تری كوردستانەوە.ئەمەش لەلایەك  ئەوپەڕی ناهەقییە بەرامبەر بەلایەنەكانی كوردستان، لەلایەكی تریشەوە بیانویەكی زۆر ترسنۆكانەیە بۆ ئیفلیجبونی ئیرادەی گەلی ئەم شارە دێرینە كە بەحیساب رۆژێ لەرۆژان سوپای هۆلاكۆیان بەزاند.

لەمرۆژانەدا لەگەڵ مامۆستایەكی هەولێری كەوتینە سەر ئەو موناقەشەیە و هەر لەسەرەتاوە ئەم بالۆرەی دوبارە كردەوە لەگەل ئەوەی بەحیساب ئەو رۆشنبیریشە، بەڵام وادیارە ئەویش وەكو هەولێریەك بیر ئەكاتەوە،بۆیە كاتێك لێمپرسی" ئێوە تاكەی بەرامبەر بەزەبرەزەنگی پارتی و بنەماڵەی بارزانی دەستەوئەژنۆ دائەنیشن،لەكاتێكدا ئێستا وایلێهاتوە دەست لەهیچ شتێكی ئەم شارە ناپارێزێت بەقودسیەتی مزگەوتەكانیشەوە؟.وەڵامی ئەوە بو" جا ئێمە چیمان پێ ئەكرێ لەكاتێكدا یەكێتی وگۆران هیچیان پێنەكراو ناكرێ؟!.وەلامی ئەو برادەرەم قسەكەی ئەلبیر كامۆی بیرخستمەوە كە ئەڵێ" كەتۆ بریاری خۆت دابێ ببیت بەكۆیلە،بۆچی داوا لەمن ئەكەی شەڕی ئازادیت بۆ بكەم".

ئەگێڕنەوە گەورە زانای میسری عز عبدالسلام لەسەردەمی داگییركردنی میسر لەلایەن سوپای تەتارەكانەوە بەشەقامێكدا تێئەپەڕێ ئەبینێ 40 زەلام دەستەوئەژنۆ دانیشتونو تەنها یەك پاسەوانی تەتاری بەخۆیو شمشیرێكەوە بەسەر سەریانەوە وەستاوە.ئەپرسێ ئیوە بۆ وا زەلیل دانیشتون. ئەوانیش ئەڵێن" چاوەڕێی نۆرەمان ئەكەین بۆ ئەوەی بمانبەنە سەر سێدارەكە؟.ئەویش پێیان ئەڵێ" دەك داوەشین لەچی میللەتێكن، ئێوە چل زەلام ئەویش تەنها یەك پاسەوان بۆ هەڵناستن یەكدەست بیخەنە ژێرپێتانەوەو بیكوژن وخۆتان نەجاتی بدەن لەپەتی سێدارە؟.

ئێستا پارتی بەزەبری هێزو چەكو زێرەڤانیو پاراستنەوە میللەتی هەولێری كردوە بەكۆیلەی خۆی، بەراورد لەگەڵ دانیشتوانی ئەم شارە، هەمو هێزو تانكو تۆپی پارتی ناكاتە نوكە دەرزییەك بەرامبەر هێزی لەبن نەهاتوی میللەتێكی ژێردەستەی وەكو هەولێر..كاتی خۆی كە راپەڕینی سەرتاسەری لەكوردستاندا تەقییەوە، لەچەقۆیەكی بچوكی دەستی هاوڵاتیەكی شاری رانیەوە دەستی پێكرد،ئینجا خەڵكەكە بەخاكەنازو دارو بەردەوە هەڵیانكوتایە سەر دامودەزگا داپڵۆسێنەرەكانی بەعس و خاكی خۆیان ئازاد كرد،خۆ سوپاكەی سەدام و دامودەزگاكانی زۆر لەوەی پارتی گەورەتریش بون، بەڵام بەرامبەر بەئیرادەی خەڵكی شارەكە هەمویان وەكو گەڵای پاییز یەك لەدوای یەك هەڵوەرین.

پارتی ئێستا خۆی بەخاوەنی هەولێر ئەزانێت، تەنانەت بە حوكمە دیكتاتورییەكەشی نایەڵێت ئەوەی نەیاری بێت بێتە ناو شارەكە وەكو ئەوەی هەولێر مولكییە خاسەی بنەماڵەی بارزانی بێت، پێشتر  رێگری لەسەرۆكی هەڵبژێردراوی پەرلەمان كرد بێتە ناو هەولێرەوە، ئێستاش نوێنەری پەیەدەی لە كوردستانی باشور نەیهێشت بچێتە نوسینگەی نەتەوە یەكگرتوەكانەوە، بەپێی قسەی ئەو نوێنەرەش كاتێك داوای ناسنامەیان لێكردبو دواتر بردویانەتە ژوری كۆمپیوتەر و لەوێ بۆیان دەركەوتوە كە ئەم پیاوە مەمنوعە لە چونە ناو هەولێرەوە، ئەمەش واتای ئەوەیە رەنگە لیستێكی دوورو درێژی هەزاران ناو هەبێت لەگشت سەیتەرەكانی دەوروبەری هەولێردا كە بۆیان نییە بچنە پایتەختی هەرێمەوە، دوور نیە ناوی من و سەدان نوسەر و رۆژنامەنوس و چالاكوانی مەدەنی وسیاسیشی تێدا بێت بەوانەی بەئەسل و فەسڵو باپیری باپیرانیشنیشانەوە هەر لە هەولێر ژیاون.

پارتی بەزەبرو زەنگ و سیاسەتی ترس و تۆقاندن ئەم شارە بەرێوە ئەبات، وەكو ئەوەی میللەتەكەی مێگەڵە مەڕ بن، ئەوەتا لەهەر كوێیەك دەنگێكی كزی نارەزایی هەڵبڕێت، لەبەرامبەردا سەدان ئاسایش و پاراستن ئەڕژێنە سەر شەقامەكانەوە. ئەوەتا سیروان بارزانی لەكاتی گرژییەكاندا بەخۆی و 30-40 تانكو زرێپۆشەوە بەناو هەولێردا خۆی نمایش ئەكات كە ئەم تانك و زرێپۆشانە وڵاتانی دونیا بۆ شەری داعشیان داوە  بەهێزی پێشمەرگە كەچی ئەوان بۆ ترساندن و تۆقاندنی میللەتی هەولێر بەكاری دێنن،ئەمەش ئەوپەڕی ئیهانەیە بۆ هەولێرییەكان ئەگەر لێی تێبگەن.

كێ هەیە لەم هەولێرە ناوی لای موختاری گەڕەكو دەزگای پاراستنو رێكخراوەكانی پارتیدا نەبێت؟. كێ ئەتوانێ ماڵەكەی بگوازێتەوە یا خانویەك بەكرێ بگرێت بەبێ رەزامەندی  دەزگای پاراستنەوە؟. كێ هەیە بۆ نان و قوتی بڕدراوی خۆی بتوانێ بێتە سەرشەقام؟. كێ ئەوێرێ لەمەزرەعەكانی سەر رێگای مەسیف نزیك ببێتەوە و گوێ لەئاهەنگی شەوانی سوری مەسئولانی پارتی بگرێت.؟.فازل میرانی و نێچیرڤان بارزانی كاتێك ئەڵێن میللەتی ئێمە خۆڕاگرن و تەحەمولی بێ موچەیی وهەژاری و نەداریش ئەكەن، ئەمە ئەوپەری ئیستهتار و بێقییمەتكردنی خەڵكی هەولێرو بێ منەتی ئەوانە لەئاست هەولێرییەكان، كاتێك لەسڵیمانی خەڵك بۆ داوای مافی رەوای خۆی دێنە سەرشەقام وخۆپیشاندان ئەكەن و ئەچنە سەر بارەگاكانی پارتییەوە، بۆچی هەولێرییەكان قەدەمیان وا شكاوە تەنانەت بۆ نان و قوتی مناڵەكانیشیان ناوێرن فززەیەك بكەن؟.

ئەم شارەی من ئێستا داگیركراوە لەلایەن دوژمنانی كوردەوە كە پارتین، شارەكەم زەلیل بوە بەدەست مناڵ و تاڵی عائیلەی بارزانییەوە، كاتی ئەوە هاتوە رۆلەی ئەوانەی بەحیساب سوپاكەی هۆلاكۆیان بەزاند، بۆ دواجار خۆیان لەكۆت و بەندی كۆیلایەتی ئازاد بكەن و سەربەرزانە بژین چاوەڕێی كەسیتر نەكەن بۆ ئەوەی شەڕی ئازادییان بۆ بكات.

عەرەب مەسەلەیەكی هەیە ئەڵێ" بەشمشێری دەستی خۆمەوە نەوەك بەشمشێری عەمرەوە".