ئایا پڕۆژەى ئەنجومەنى ناوەندى (ى ، ن ، ک) بیرۆکەى (د. کەمال فوادە)؟؟؟ ئایا هەرکەس باسى گۆرانى کرد سەر بە گردەکەو قەوارەى گۆرانە ؟؟؟

Saturday, 09/01/2010, 12:00

لە ماوەى رابردودا پێش ئەوەى باسى گۆڕان یان پلینیۆمو هیچ پرۆسەیەکى هەڵسوڕاوى بەرنامە دارێژراو بونى هەبێت وتارێکم بە دوو بەشى یەک لە دواى یەک لە گشت سایتەکاندا بڵاو کردەوە بێ ئەوەى لایەنێکى دیارى کراو کاردانەوەى لە سەر من بوبێت ، وەک بیروبۆچونى سایتو رۆژنامەکانی یان هەچ لایەنێکى سیاسى جگە لەو نایەکسانیەى لە وڵاتەکەمدا بونى هەیە بۆیە کاتێک شتێکم نوسیوە وەک مرۆڤێکى کورد ئەوەى لە بیرو ئەندێشەمدا بوە کە لە گۆرانیەکدا جێگاى نەبوەتەوە دامڕشتوەو بە نوسین وێنام کردوە ، بۆیە بە شایەنى خۆى دەزانم هەڵسەنگاندنێک لە نێوان ئەو نوسینەو ئەو وەرچەرخانە سیاسیە بکەم بە تایبەت کە لە هەرێمى سلێمانیدا رویانداوە ئیتر هەر ناوو ناونیشانێکى هەیە من بێ لایەنانە باسى دەکەمو هۆکارى دڵگرانیمە ، دڵگرانیشم لەوەیە کە پڕۆژەى ئەنجومەنى ناوەند بەشێکە لە پرۆژەى ناوەندێکى هونەری کە من دامرشتوەو لە کەناڵو میدیا کوردیەکان چەن ساڵێک لەمەو بەر لە هەموو بەرنامەیەکدا باسم کردوەو لە وەزارەتى رۆشنبیرى پێشکەشم کردوە بۆ کردنەوەى ئەو ناوەندە هونەریە کە تا ئێستا سێ دەستەى گۆڕیوە بە داخەوە لە بەر ئەوەى حیزبى لە پشتەوە نەبوو نەگەشتە ئەنجام ئەوەش هەر من نیم بە هەزاران گەنج لەم وڵاتەدا ئامانجو ئاواتى هەبوەو پێى نەگەشتوە .

بەشێک لەو پرۆژەیە بڵاو دەکەمەوە کە پێک هاتوە لە بیست مادە ئەمە چەن مادەیەکیەتى بە ناوى

(ناوەندى پەروەردەو هونەرى ئاران)

مادەى شەشەم / (دەستەى کارگێڕى ناوەند) :

لە حەوت ئەندام پێک دێن (کرۆپکى) دەسەڵاتى ناوەندەکە لەواندایەو لە کاتى نەداریدا بە شێوەیەکى خۆبەخش (خۆیی) کار دەکەن.

مادەى حەوتەم / (ئەرکو دەسەڵاتەکانى کارگێڕى) :

1- بەرپرسە لە تێک هەڵکێش کردنى ناوەند و پەیرەوى ناوەکیەوە.

2- دەستەى کار گێڕى بە پشتیوانى دەستەى بەڕوەبردن بەرپرسە لە بەدیهێنانى ئامانجەکانى ناوەند بە دانانى پلانى ساڵانەو مانگانەو وەبەرهێنانى خۆیی.

3- تاک گەرایی و بڕیارى تاکە کەس لە هیچکام لە دەستەکاندا نیە بە پێچەوانەوە هەمو بڕیارەکان بە گۆڕینەوەى بیرو بۆچون و هەڵبژاردن پەسەند دەکرێت.

4- دانانى پلان و نەخشەى ستراتیجى بۆ چالاکیەکانى ناو ناوەندەکە.

5- لە هەردو دەستەکە ئەنجومەنێکى پێنج کەسى بە شێوەى ئەستێرەیی پێک دێننو هەفتانە کۆدەبنەوە بۆ تاوتوێکردنى کارەکان.

6- ئەنجومەنى ناوەند هەمو بۆچونو رەخنەکان کۆ دەکاتەوەو ستایڵى کارکردن دیارى دەکات.

مادەى دەیەم / (ئەرکو دەسەڵاتەکانى بەرێوە بردن) :

1- بەڕێوەبردنى کارو چالاکی ناوەندەکە بە پێى ئامانج و پلانى بڕیار لە سەر دراو .

2- دەرکردنى بڕیارى کارگێڕى بۆ :

ڕ‌- دامەزراندنى کارمەندى بەشەکان و راوێژکارو کار گوزار بە لە بەرچاو گرتنى مەرجەکانى دامەزراندن و دەرماڵە .

ب‌- دیارى کردنى دەسەڵاتى لێپرسراوى بەشەکان و ئاڵوگۆڕ کردنى پۆستەکانیان.

ت‌- دانانى پلانى بەڕێوەبردن و چالاکیەکان.

پ‌- لە سەر کار لابردن و پەسەند کردنى دەست لە کار کێشانەوەو لێبوردن لە پۆستى کارمەندانى بەشەکان و کارگوزاران.

ج‌- بانگێشت کردنى دەستەى ئەنجومەنى بەڕێوە بردنى ناوەند بۆ کۆبونەوەى ئاسایی و نا ئاسایی لە کاتى پێویستدا.

ح‌- پێک هێنانى لیژنەى تایبەت و پسپۆر بۆ ئەنجامدانى چالاکیەکان.

خ‌- ئامادەکردنى ژمێریارى بودجەى رابردو ئامادە کردنى بودجەى ساڵى نوێ.

د‌- سەرجەم ئەو بڕیارانەى کە ئەنجومەنى جێبەجێکردن دەرى دەکەن ، کە کار دەکاتە سەر مافى ئەندامانى ناوەند ، لەوانەش ئەندامانى دەستەى بەڕێوە بردن ، شایەنى پیاچونەوەن لە بەردەم ئەنجومەنى ناوەنددا بۆ ماوە 10 رۆژ لە بەروارى دەرچونیەوە ، بڕیارەکەش شایەنى پیاچونەوە دەبێت لە بەردەم دادگاى بەراییدا ، بە ئاگاداربونى لایەنى کێشەکە بە بڕیارى ئەنجومەن.

مادەى یازدەیەم / (مافەکانى ئەندامانى ئەنجومەنى بەڕێوە بردن)

1- وەرگرتنى دەرماڵەى مانگانە.

2- ئازادى رادەربرین و رەخنە گرتن.

3- مافى رونکردنەوەو بەرگرى لە خۆ کردن لە کاتى سزادانى لە بەردەم ئەنجومەنى ناوەنددا.

مادەى دوازدەیەم / (ئەرک و دەسەڵاتەکانى بەڕێوەبەرى ئەنجومەنى بەڕێوەبردن) :

1- نوێنەرى ناوەندە لەبەردەم ئەنجومەن و دەزگاو لایەنە پەیوەندیدارەکان.

2- سەرپەرشتى کۆبونەوەکانى دەستەى ئەنجومەنى بەرێِوەبردن دەکات.

3- ئامادەکردنى راپۆرتى وەرزى و ساڵانەى تایبەت بە چالاکیەکانى ناوەندەکەو راپۆرتى دارایی و بەرز کردنەوەیان بۆ ئەنجومەنى ناوەند.

4- جێبەجێکردنى بڕیارو رێنمایە کارگێڕیەکان و سەرپەرشتى کارو چالاکیەکانى بەشەکانى ناوەندەکە.

5- لە کاتى مۆڵەت یان هەر روداوێکى کتو پڕ جێگرەکەى ئەرکو دەسەڵاتەکانى لە ئەستۆ دەگرێت. )

هەرچەندە لە ساڵى (2006)وە ئەو پڕۆژەیەم نوسیوە دەستاو دەستى زۆرى کردوەو لە شوێنە حوکومیو حیزبیو مەدەنیەکان وێنەى کۆپى کراوى هەیە کە هەوڵمانداوە دایبمەزرێنین ، کە وێنەیەکیشى گەشتوەتە دەس مەکتەبى سیاسى (ى ن ک)و زیاد لە 36 جار کۆپیم پێشکەش کردوە وە دورو نزیک لە هەندێک شوێن کە دەیاناسم سودیان لە پڕۆژەکە بینیوەو بەلامەوە کێشە نەبوە چونکە ئەو شوێنانە بەس وەک ئۆتێلو چا خانە وایە تەنها بودجەى ئەم وڵاتە بە سەریاندا بەش کراوەو هێواش هێواش هەپەلوشى دەکەن .

شیاوى باس کردنە کاتێک بیستم (ى ن ک) پلینێۆم دەگرێت کە گوێم لە وشەى ئەنجومەنى ناوەند بوو جا بە وردى زانیم کە ئەو بیرۆکەیە زۆر نزیکە لە پڕۆژەکەى من چونکە لە سیستمى حوکمرانى کوردیدا بە هیچ شێوەیەک ئەنجومەنى ناوەند بونى نیە جا نە لە حیزب نە لە حوکمەت نە لە هیچ سەنتەرو رێخراوێکدا چونکە لە هەولێر لە وەزارەتى ناوخۆ پێیان وتم ئەو بەشەى بە ناوى ئەنجومەنى ناوەند کە لە پڕۆگرامەکەى تۆدا بونى هەیە لە سستمى وەزارەتى ناوخۆدا نیە خۆشم دەمزانى بەڵام پێشنیارێکى نوێ بوو ، من بۆیە ئەنجومەنى ناوەندم داناوە بۆ ئەوەى هەموو بەرپرسیاریەتێک نەکەوێتە ئەستۆى بەڕێوەبەر بە پێچەوانەوە (ئەرک) لە کارى رێخراوەییدا گشتیەو نیشاندەرى سیمبولیزمى دیموکراتیە لە هەر دامو دەزگاو کۆمەڵگایەکدا ، ئەگەریش بێتو ئەنجومەن بەکار بهێنرێت بۆ دەسەڵاتى تاکە کەس یان گروپێکى دیارى کراو ئەوە تەمەنى کورتە و پوچەڵ دەبێت ، وەک ئەوە وایە گروپێک موزیک ژەنت هەبێت دەنگى چەن ئامێرێک لە تەک ئەوانى تردا جوت نەبن ئەگەر کەمیش بن دەبنە تێکدەرى دەنگى زۆرینەو بە ئاشکرا دیارە بۆیە من بە پێشنیارو پڕۆژەى خۆمى دەزانم بەڵام پرسیارەکەم لێرەدایە ئایا بەڕێز (د.کەمال فواد) ئەوەى دەزانى بۆ چەن ساڵ پێشتر پێش نیارى بیرۆکەى ئەنجومەنى ناوەندى نەکرد ؟ لێرەدا کێشەکەى من ئەوە نیە بە ناوى من بێت یان هەر کەسێک ، من پێم خۆشە هەموو کوردێکى راستگۆى ئەم وڵاتەم سەرکەوتو بێو بگاتە ئامانجى رەواى خۆى تا بتوانێت لە گۆشەیەکەوە خزمەتى نیشتیمان بکات ، ئیتر هەر کەسێکە لە سەربازێکەوە تا سەرۆکى وڵاتو لە کارگوزارێکەوە تا دەگاتە بەرزترین پیشەى مەدەنى سیاسى حوکومى ئەم وڵاتە بۆ من وەک یەکە تەنها لە (تواناییدا) جیاوازیى هەیە .

ئەو کاتەى کە ئەو وتارەم بڵاو کردەوە باس باسى ریفۆرم بوو ریفۆرم واتە فۆرمێکى نوێ لە هەمان فۆرمە کۆنەکەى پێشودا لە بەشى کۆتایی وتارەکەدا بە وردى باسى گۆڕانم کردوەو پێش ئەوەى باسى گۆڕان لە ئارادا بێت ، من هەمیشە حەزم لە گۆڕانکارى بوە لە هەموو بوارەکانى ژیاندا گۆرانکارى شتێکدا پێویستەو ئەوە سروشتى مرۆڤ خۆى وایە وە لە موزیکو هونەردا گۆرانکارى گەلێ رونتر بەدى دەکرێت ، ئەگەر گوێ لە پارچە موزیکێک بگرین لە سەرەتا تا کۆتایی چەندینجار گۆڕانى بە سەردا دێت ئەوەش چێژێکى خۆشترو بیرێکى فراوانتر دروست دەکات ، ئەگەر کەسێک حەزى لە گۆڕانکارى نەبێت لە ژیانیدا پێم وایە پێویستى بە دکتۆر هەیە چونکە مرۆڤ چەق بەستو نیە سروشتى مرۆڤ لە بنەماوە بەو جۆرە هاتوەتە بون بە مەرجێک سەرکوت نەکرێت ، لێرەدا پارچەیەک لە وتارەکە کۆتایی بەشى یەکەم دادەنێم بەڵام مەرج نیە سەر بە لایەنێک بێت چونکە لایەنەکان سەر بە بیرۆکەى نوسینەکەن من بوارەکەم هونەرەو بێ لایەنانە دەمەوێ لەو بوارەدا بنوسمو بڵێم ئەوەى بتوانم بیگەینمە هاونیشتیمانیانم ئەوەش بە ئەرک دەزانم ... بەڵام گرنگتر !! لەو نوسینەدا کە لە ساڵى (2008) لە مانگى یازدە بڵاوم کردوەتەوە لە زۆربەى سایتەکان بەم ناوە بڵاو بۆتەوە (سۆسیال دیموکراتى نا دیموکراتى) کە لە سایتى سبەى بڵاو بوەتەوەو بەو پێیەش قەوارەى گۆران سودیان لێ وەرگرتوە یان نا ئەوە ناکاتە قسەى ئەو خەڵکانەى من بە ئەندامێکى ئەو قەوارەیە بزانن ، لەو نوسینەدا بە وردى باسى ئەوە کراوە کە دەسەڵاتى کوردى چۆن دەتوانێت زاڵبێت بە سەر ئەو هەموو نەهامەتیەدا کە توشى کۆمەڵگەى کوردى بوە و کۆمەڵێک پێشبینی تێدایە کە لە ئێستەدا رویانداوە ئەوەش بەشێکى بچوکیەتى

(به‌ ڕای‌ من دواکه‌وتویی میله‌تی‌ خۆمان تاوانی‌ ده‌سه‌ڵاتی‌ خۆمانه‌ که‌ هه‌ر خۆمان هه‌ڵمان بژارد خوینیشماندا بۆ خواست و ئه‌ندێشه‌ی‌ سه‌ربه‌خۆیی و دیموکراتی‌ و‌ ڕزگاربون له‌ ته‌ونی‌ ده‌سه‌ڵاتێکی‌ دیکتاتۆر ، به‌ڵام ئێستا که‌ خواسته‌کانی‌ ئێمه‌ی‌ به‌ دی‌ نه‌هێناوه ‌و که‌چی‌ نه‌ک به‌ ده‌نگ ، به‌ڵکو هیچ هێزێک ناتوانێت گۆڕانیشی‌ تێدا بکات بۆ ده‌بێت هه‌مومان سه‌رقاڵی‌ سیاسه‌ت بیین بۆ نایه‌ڵن بیرمان بچێت به‌ لای‌ چاکسازی‌ له‌ هه‌مو بواره‌کانی‌ ژیاندا ، هه‌ر له‌ ناو ده‌سه‌ڵاتدا خه‌ڵکانی‌ کامڵ هه‌ن بۆ گۆرانه‌ گرنگه‌کان‌ به‌ڕاستی‌ ئه‌مه‌ دیموکراتی‌ نیه ،‌ نزیکی‌ چاره‌که‌ سه‌ده‌یه‌ک ده‌سه‌ڵاتێکی‌ ڕێکو پێک دروست نه‌بوه‌ برا کورده‌کانی‌ تورکیا کیانی‌ باشیان هه‌یه ،‌ ئه‌وان له‌ شاخن به‌ڵام وه‌ک حوکمه‌تێکی‌ کامڵ خۆیان سه‌لماندوه‌ له‌ بواری‌ هونه‌ریشدا کوردیان ناساندوه‌ به‌ دونیا ده‌بێ ڕۆشنبیرانی‌ ئێمه‌ ئه‌وه‌ باش بزانن کاتێک پێیان ده‌وترێت ڕۆشنبیر که‌ ئه‌ندێشه‌و بیری‌ نوێیان هه‌بێت بۆ گۆران و پێش خستنی‌ کۆمه‌ڵگاکه‌یان.

من خۆم گه‌نجێکی‌ گه‌شبینم بۆیه‌ ئومێدم به‌وه‌ هه‌یه‌ که‌ خه‌ڵکانی‌ ڕۆشنبیری‌ کورد جوڵانه‌وه‌یه‌کی‌ گرنگ له‌ مێژودا بکه‌ن موچه‌ی‌ چاکو چاڵه‌ دۆلار کۆتایی پێ‌ دێت، چونکه‌ ژیان کاتێک خۆشه‌ هاو زمان و هاو نه‌ته‌وه‌که‌ت وه‌ک تۆ بژین، مناڵی‌ کورد له‌ سه‌ر جاده‌ که‌وتوه‌ برسی و بێ‌ جل و به‌رگ مناڵه‌که‌ی‌ خۆشت پۆشته‌و په‌رداخ خۆ هه‌ردوکیان سروشت دروستی‌ کردون خۆ هه‌ردوکیان هه‌ر کوردن چۆن ئه‌توانی‌ ئاسوده‌بیت...) کۆتایی بەشى یەکەم .

لە راستیدا هەموو هیوایەکم دروستکردنى ئەو ناوەندە هونەریە بوو بەڵام پێى نەگەشتم ئێستاش فێرگەیەکم هەیە بە ناوى فێرگەى (باران) کە بەشێکە لە پڕۆژەى ناوەندەکە یەکەم شوێنە بە ناوى فێرگە لە کوردستاندا کرابێتەوە بۆ پەروەردەو فێربونى موزیک تایبەت بە ئامێرى (گیتار) وە ئێستا خەریکى کتێبێکم لە تەواو بوندایەو تایبەت بەو ئامێرە وە لە هەمان کاتدا گروپێکمان هەیە لە سەرەتادایە بە ناوى گروپى (زەریاب) زەریاب موسڵى یەکەم کەس بووە تەلى پێنجەمى بۆ ئامێرى عود زیاد کردوەو کۆچى کردوە بۆ ئیسپانیا لە شارى کۆردۆبا ژیاوەو ئامێرى گیتار لە سەر دەستى ئەو براوەتە ئیسپانیاو لەوێوە بە جیهاندا بڵاو بوەتەوە ، فارسەکان دەڵێن فارسەو عارەب دەڵێن عارەبەو منیش لە لێکۆلینەوەیەکى فرە ورد بە پێى کۆمەڵێک سەرچاوەى گرنگى شارستانیەتە سەرەتاییەکان نازناوى کوردم لێ ناوە ، وە چەن روناکبیرێکى عارەبیش دەڵێن کە کوردە ، زەریاب لە موسڵدا پشتاوپشتى رواوە بۆ دەبێت عەرەب بێت ، لەوەتەى زەوى هەیە موسڵ کوردوستانە بۆ دەبێت زەریاب فارس بێت ئەوە هەمووى هۆکارى ئەوەیە ئەوان خاوەن دەوڵەت بوون لە ناوچەکەدا کوردیش کۆمەڵ کۆمەڵ لە جوڵانەوەدا بوون هەندێکیشیا هەمیشە سەر بە میرى بوون ، بۆیە گرنگى رەمزى نەتەوایەتیمان دەبێت لە پایەیەکى بەرزدا تەماشاى بکەین هەر کێشەیەک کە لە سەر جیاوازى فیکر بێت شتێکى ئاساییە بەڵام تواندنەوەى هاونەتەوەکەى خۆت هەرگیز فیکر نیە ئەوە کورسیو دەسەڵاتە ئەوە بچوکى مێشکە نە ناوى سیاسەتە نە دەچێتە هیچ خانەیەکى مەعریفیەوە ، ئەوانەى کە لە پڕێک بون بە گورگ پێیان وایە ئێستا ژیانیان لە هەموو کەس خۆشترە کەس نازانێت ئەو هەموو سەروەتو سامانە لە کوێوە هاتوەو چۆن بەش دەکرێت با ئەمەیان واز لێ بێنین بۆ رۆژگارى خۆى زۆرن ئەوانەى کە بە مەلاین دۆلاریان هەیەو بە لوقمەقازیەکیش دەمرن ، چونکە هەزارو یەک نەخۆشیان هەیە یان دەزانن چۆن پەیدایان کردوەو شەوان خەو ناچێتە چاویان گیرفانیان شیرینەو ژیانیان تاڵ ، بە هیوام هەموو قەڵاو شاخو شوێنە گرنگو سنوریو گەشتیاریەکان کە لە لایەن کۆمەڵە خەڵکێکەوە داگیر کراوە بدرێتەوە دەس دوڵەتو بکرێنە رایەڵەى ئاسایشى قەومی لە ژێر چاودێرى ئەنجومەنو پەڕلەمانێک کە هێزى میلەت بێت ، زۆرن ئەو بیرۆکەو پڕۆژانەى کە دەمانبات بەرەو وڵاتێکى ئاراموو یەکسانیو داد پەروەرى بۆیە دەبێت بیرێکى گشتى بکەینەوە ئەم وڵاتە بە سەدان هەزار مرۆڤى تیا شەهید بوە دەیانجار کاولکراوە حەیف نی ئێمە بێ شەرمانە ئەو هەموو خوێنە لە یاد بکەین ئەو هەموو غەدرە بسڕینەوە ئەو هەموو عاشقومەعشوقە ئەو شۆڕشە یەک لە دواى یەکانە نەسیمى ئەو هەموو گۆرانی یە جوانانە بکەینە قوربانى کۆمەڵە خەڵکێکى نەفامو بیر تەسک ؟؟، براڵە هیچ وەک شکستى سیاسى نیە هەر ئەونە سادەیە کە یەک جار شکستى هێنا ئیتر ئەوە یاسایە پەلە قاژە کردن ئازارى مەرگ کەم ناکاتەوە ، بە هیوام هەر ئەنجومەنو دەستەیەکى وەک نەزاهە دروست دەکرێت پرسو راى خەڵکو روناکبیرانى بێ لایەنى تێدا بێت هەر لایەنو حیزبێک گەر خۆى بە دۆڕاو بزانێت هەقە خۆى بە کوردیش نەزانێت ، وە خەڵکانێک لەو ئەنجومەنە دابنێن کە قەت دەستى سور نەبوبێت ، کە قەڵەمى نەپژابێت بە زمانى چەقۆ ، وە کاتێک پێى دەوترێت نەزاهە یان ئەنجومەنى بەڕێوە بردنى ناوەند کە لێپێچینەوەى ئاشکرا بکات ئەو خەڵکو بەرپرسانەى کە یەکى دەیان کۆشکو تەلاریان هەیە دایانماڵن بیاندەنە دادگا پێیان بڵێن چۆنتان پەیدا کرد ، سەرى دادوەرە گەورەکانى وڵاتمان بەرز بکەنەوە داواکارى گشتى بکەنە رەمزى دەسەڵاتى نەتەوەیی با ئەو خەڵکانەى کەیسیان هەیە لە بەردەمى دادگادا سەریان نەویکەن با شەهیدەکان سەر بەرز بکەنەوە با دڵى دایکانى ئەنفالو هەڵەبجە تیمار ببنەوە دەستو دڵى هەزاران گەنج بگرن ، لە سەر جادە خەڵک هەڵگرنەوە برسى تینو سواڵکەر شێت بێ لانە لە بەر هێچ نا بەس لە بەر ئەوەى کوردە یارمەتى هەموو خەڵکێکى غەریبى تریش بدەن لە بەر هیچ نا بەس لە بەر ئەوەى لە سەر خاکى کوردوستانە ... ئاوایە رێگەى نیشتیمان ... ئاوایە سرودى عەشقو ژیان ... ئاوایە خۆشەویستیو دادپەروەریو یەکسانیو گۆرانیە نەبیسراوەکان .......


نوێنەر ئەحمەد