چۆن پارسه‌نگی پاسۆک به‌لای ته‌نها حیزبێک دا که‌وت؟!
Sunday, 09/10/2011, 12:00
وه‌کو که‌سێکی هه‌ندێک ئاگادار به‌ڕابوردوی (پاسۆک) ، هه‌روه‌هاپابه‌ندێکی سه‌ره‌تایی ئه‌و حیزبه ئه‌م نووسینه ده‌نوسم، زیاتر بۆ ڕوون کردنه‌وه‌ی دیده‌ی خوێنه‌رانی به‌ڕێزه له‌هه‌ر شتێکی تر.
(پاسۆک) وه‌کو حیزبێک له ساڵی 1976 دا ده‌رکه‌وت ؛ په‌رچدانه‌وه‌یه‌کی شکستی هه‌ره‌س و ئاشبه‌تاڵی شۆڕشی ئه‌یلول بو ، که‌سی ئاگای به‌ویژدان ڕێزی ئه‌م سه‌ره‌تایه‌ی له‌هه‌مو بارێک بۆ ده‌گرێت.
هه‌ر له‌و ساڵه‌ش دا، من که‌سێکی ئاگادارم له هه‌ندێ به‌رخوردی سه‌ره‌تای ئه‌و مێژووه ؛ به‌قه‌ده‌ر بون و توانای خۆم.
(پاسۆک) له بیروبۆچوون دا جگه له‌بیری نه‌ته‌وه‌یی ، روداوی ڕابوردو ی بزوتنه‌وه‌ی چه‌کداری کوردی جارسی کردبون؛ له‌و ماڵ مالێنه‌ی ، دوای جیابونه‌وه‌ی مه‌کته‌بی سیاسی و سه‌رکردایه‌تی بزوتنه‌وه‌ی چه‌دکداری ئه‌یلول.
(پاسۆک) له بنه‌ڕه‌ته (کاژیکی)ه‌که‌یه‌وه ، ئه‌و به‌شه کزه‌ی ناڕازی بون بوه به‌رامبه‌ر جیابونه‌وه‌ی ساڵی 1964 له نێو بزوتنه‌وه‌ی چه‌کداری ئه‌یلول دا و تائه‌وه‌ی گه‌یشت به دوبه‌ره‌ی چه‌سپاوی سوتانی خه‌رمانی ڕه‌نج و خه‌بات ، به زمانی خه‌ڵکی ساده به (جه‌لالی) و (مه‌لایی) ناو نران.
(پاسۆک) سستی و ژێماله‌یی کردنی ئه‌ندامانی (کاژیک) ــ کۆمه‌ڵه‌ی ئازادی و ژیانه‌وه و یه‌کێتی کورد ـ به‌سه‌ر دوبه‌ره‌ی (جه‌لالی) و (مه‌لایی) ، دیسان جۆرێک له‌هه‌ڵوێست و تێڕامانی تیا دروست کردبوون.
ئه‌مانه سه‌رجه‌م دیدو بۆچونی کادیره پێشکه‌توه‌کانی کاژیکیان له سه‌ره‌تای کۆستی هه‌ره‌س و ئاشبه‌تاڵ دا پێکهێنابوو.
تا ئێستا ئه‌و هه‌ڵوێستانه ی به‌راییانه‌ی (پاسۆک) بێ چاره‌سه‌ر ماونه‌ته‌وه .
له‌وێدا بیری پێکهێنانی پارتی یه‌ک هاتۆته گۆڕێ بۆ پاکژ کردنه‌وه‌ی بزوتنه‌وه‌ی ئازادیخوازی نه‌ته‌وه‌یی کورد . ئه‌مانه پێڕست و درێژ کردنه‌وه‌ی مێژویی تری ده‌وێت که ئه‌م نوسینه توانای هه‌ڵپێچانی ته‌واوی له هه‌مواردا نییه.
زۆر لێک دانه‌وه‌ی هه‌نوکه‌یی هه‌یه . به‌رامبه‌ر به‌دیارده‌ی به‌لاداکه‌وتنی زوربه‌ی ئه‌ندامانی پاسۆک به‌لایه‌نی (پارتی) دا ، هه‌ر که‌س ئازاده له بیرو لێکدانه‌وه‌ی خۆی . من ته‌نها یه‌ک لایه‌نی مێژویی ده‌خه‌مه ڕو خۆم تێی دا ژیاوم، چونکه من ته‌نها له‌و بواره‌وه له‌تێکی شکاوی ئاوێنه‌ی ڕاستیه‌کان لای خۆم شک ده‌به‌م.
(پاسۆک) وه‌کو حیزبێکی نوێ ، به‌هۆی سیاسه‌تی پاوه‌نخوازی گۆڕه‌پانی شۆڕشه‌وه له لایه‌ن ده‌سه‌ڵاتداره موخه‌زره‌مه‌کانی بزوتنه‌وه‌ی چه‌کداری کوردیه‌وه ، توشی ته‌نگ پێ هه‌ڵچنین بو ، هه‌روه‌ها به‌هۆی کوژران و وازهێنانی سه‌رکرده به‌تواناکانیه‌وه . له‌وێدا ته‌نها پاسۆک بووه حیزبێکی بڕکه‌مرده‌ی ناکام ، که‌مبونه‌وه‌یان بۆ گروپێکی بچوکی ناو باره‌گاو چا کزو خه‌مباره‌کانی سه‌رسنور ، تائه‌وه‌ی حیزبه‌نه‌یارو نوکته چیه‌کانی ده‌یان گو‌ت ئه‌و حیزبه‌ی به(مه‌نجه‌ڵێک پاپراخ تێر ده‌خۆن) ، گاڵته‌یان به‌و سه‌ره‌نجامه ده‌کرد که‌خۆیان خوڵقاندبویان ، له‌گه‌ڵ ئه‌وه‌ش دا به‌پێوانه‌ی ئه‌م ڕۆژگاره (پاسۆک) حیزبێک بوو گیانی گه‌نج بونه‌وه یاخی بون له مێژوی جارسی بزوتنه‌وه‌ی پێسوی کورد و غه‌دری نه‌ته‌وه‌یی دروستی کردبوو ، به‌ڵام ئیتر وای به‌سه‌رهات و بڕی نه‌کرد ئامانجه‌کانی خۆی به‌ئاکام بگه‌یه‌نێت . به‌هه‌ر حاڵ ، نامه‌وێت زیاتر له مه‌به‌ستی باسه‌که‌م دور بکه‌ومه‌وه ، ئه‌ویش دوا سه‌ره‌نجام و چاره‌نوسی ئاینده‌ی (پاسۆک)ه.
له‌بارێکی ئاوا ناجۆردا سه‌کردایه‌تی پاسۆک کورتی هێنابو بۆ سه‌ر دو که‌سایه‌تی له‌دواساتی بزوتنه‌وه‌ی شاخ و به‌رگری چه‌کداری دا .
ده‌گه‌ڕێمه‌وه بۆیاداوه‌ری خۆم له ساڵانی ئاشت بونه‌وه‌ی گشتی 1986 به‌دواوه .
له‌و ده‌مه‌دا(پاسۆک) هاته‌وه ناو گۆڕه‌پانی قۆڕغ کراوی پێشو .
له پشتی دێی (مالومه) بنکه‌ی سه‌رکردایه‌تی دانا نزیک له دێی (یاخسه‌مه‌ر) ی بنکه‌ی سه‌رکردایه‌تی (یه‌کێتی نیشتمانی کوردستان) و له‌نزیک ئه‌و حیزبه‌وه که له‌ساڵانی 1981 به‌دواوه ، دوای دابڕانی نێوانیان له سۆنگه‌ی دو ڕوداوی خوێناوی ، له دێی (مامه‌خه‌لان) و (گه‌ڕه‌دێ) و ده‌رپه‌ڕاندنی پاسۆک بۆ سه‌رسنوره‌کان .
ئه‌م گه‌ڕانه‌وه‌یه‌وه به‌ته‌نهایه‌ی سه‌رکردایه‌تی (پاسۆک) بۆ ئه شوێنه نیشانه‌یه‌کی نزیک بونه‌وه و له‌یه‌ک ئه‌مین بونه‌وه بوو دسو حیزبی نه‌یاری پێسو، جێگه‌ی تێ ڕامان بو بۆ که‌سانێکی پاسۆک، به‌وه‌ی چوار پێنج ساڵ بوو به‌وه گۆش ده‌کران که یه‌کێتی پاوه‌ن خوازو که‌م فرسه‌ته. چۆن له ناحه‌زیه‌کی قوڵه‌وه له پڕ بون به‌دو دۆستی هێنده متمانه‌داری یه‌کتری، من یه‌کێک بوم له‌و که‌سه تێڕاماوانه بوم و به‌ئاسانی بۆم قوت نه‌ده‌چو ، چۆن هه‌مو هێلکه‌کان خراونه‌ته نێو سه‌به‌ته‌یه‌کی به‌ر ده‌ستی نه‌یاری دوێنێ .
کاتێک له ده‌مه‌دا پرسیارم له که‌سی سکرتێر ده‌کرد ، هه‌میشه وه‌ڵامی ته‌ماوی سه‌رابیانه‌ی ده‌دایه‌وه ، یان من وای تێ ده‌گه‌یشتم ، ئه‌وه‌ش دنیای سیاسه‌ت بو ، دیاره من به‌هه‌ڵه‌تێی که‌وت بوم ، هه‌مواری جوت مۆراڵی ، دوروییه کانی ئه‌و دنیایه‌م نه‌ده‌کرد.
ئیتر له‌و ڕێگه‌یه‌وه نه‌متوانی له وه‌ڵامی گرده بڕ تێر ببم.
له‌وێدا نیه‌گه‌رانیه‌ک به‌ره‌و دوباره به‌سه‌ر کردنه‌وه‌و موراجه‌عه‌ی کردم .
ئیتر خۆم ده‌گه‌ڕام به‌دوی تاپۆو تارمایی وه‌ڵامی بن بڕ دا .
له‌و خاڵه‌وه ، به‌مێژوی دو سه‌رکرده‌ی ته‌نهاو تاقانه‌ی ئه‌و حیزبه‌دا یه‌کانگیر بوم ، خولیای چیوه کنه‌کردنی، ڕاستیه‌کانی ژیانیان بوم .
ئه‌وانیش (حه‌مه مسته‌فا) ناسراو به (ئازاد مسته‌فا) و (که‌ریم شێخ سه‌لامی به‌رده‌زه‌ردی) ناسراو به (مولازم که‌ریم) ، یه‌که‌میان له بنه‌ڕه‌تا کارمه‌ندی ته‌ندروسی بووه له‌پێشه ی شاریدا، ئه‌وی تریان ئه‌فسه‌رو ده‌رچوی کولێژی پۆلیسی به‌غدا بو، ئیتر هیچ سه‌رکرده‌یه‌کی تری دیار له مێژوی 1986و ئاشت بونه‌وه‌ی گشتی و له ته‌نهایی و ده‌ور چۆڵی حیزبه که‌دا له‌و کاته‌دا له گۆڕه‌پانی ئازاد دا له‌ئارادا بون ، دور له دواترو ئێستای .
له‌و مێژووه قوڵتری ژیانی(ئازاد مسته‌فا)ی سکرتێر ، به‌پێی قسه که‌ره‌که‌ی من و ئاگارێک له چالاکی ئه‌وکاته‌ی له‌شه‌سته‌کانی ؛ به (جه‌لالی) بون ده‌ست پێ ده‌کات له‌سه‌ر داواو بڕیاری (کاژیک) و له حه‌فتا کاندا به‌تایبه‌ت له‌دواکاتی نزیک هه‌ره‌س و ئاشبه‌تاڵ دا له‌نێو پارتی دا بووه وه‌کو جه‌لالیه تێکه‌ڵکراوه‌کانی دوای حه‌فتاکان و وه‌کو کاژیکێک له‌نێو پارتی بووه ، خۆی ئه‌و قۆناسه‌ی بۆ باس کردوم و ، یه‌کێک بووه له وانه‌ی به‌یانه‌ی ناڕه‌زایی کاژیکیان ده‌رکردووه که به به‌یاننامه‌ی پێنجونی کادێره ناڕازی یه‌کانی کاژیک ناوزه‌دا له ئه‌ده‌بیاتی کاژیک دا و له‌سه‌ر ئه‌و به‌یانه له‌هه‌ردولای پارتی و کاژیک تاوانبار بون و ئاشبه‌تیاڵ و میانجگه‌ری هه‌ندێک که‌سی نزیک له باره‌گای بارزانی ملی له‌په‌ت و به‌ندیخانه‌ی ڕایات ڕزگار کردون .
وه‌لێ مێژوی (که‌ریم سه‌لام) به پارتی بون و ئه‌ندام بونی له یه‌کێتی قوتابیان ودواتر به‌ته‌زکیه‌ی حیزبی له ساڵی 1972 دا چۆته‌کۆلێژی پۆلیسی به‌غداو به‌پله‌ی ئه‌فسه‌ری یه‌ک ئه‌ستێره له‌وێ ده‌رچووه ، پاش ساڵیک دامه‌زراندن له کاری ده‌وڵه‌ت دا ساڵی 1974دا و له ئه‌نجامی تێکچونی ڕێکه وتن نامه‌ی ئازاردا چوه‌ته‌وه ڕیزی بزوتنه‌وه‌ی چه‌کداری که پارتی دیموکراتی کوردستان سه‌رکردایه‌تی ده‌کرد ، له‌وێ بووه به‌جێگری فه‌رمانده‌ی به‌تاڵێۆن له به‌تالێۆنه‌که‌ی (حسه‌ین به‌گی جوانڕۆ) ، دوای هه‌ره‌س وه‌کو عائیدون هه‌واڵه‌ی باشوری عێراق کرابوو وه‌کو کارمه‌ندی فه‌رمانگه‌ی نفوس و تا گه‌ڕانه‌وه‌ی بۆ سلێمانی بۆ سه‌رکاری فه‌رمانگه‌یی به‌هه‌مان پیشه . دواتر ناچارکردنی به‌هاتنه ده‌ره‌وه ی بۆ شاخ له ساڵی 1978دا .ئه‌م زانیاریانه‌م له‌خۆی بیستوه له‌ماوه‌ی ساڵانی 1986ـ 1988دا .
دردۆنگیه‌کی بن که‌وتو ، له‌نێوان ئه‌م دو سه‌رکردیه‌دا ههبووکهسانی نزیکیان ده‌یتوانی به ئاسانی بگات به و ڕاستیه ؛ هه‌نژیک جار وه‌کو گاڵته و پێکه‌نین له‌ڕوی یه‌کداو ، هه‌ندێ جاریش جار له پاشه‌مله‌و به‌شێوه‌ی بریندار که‌ر . باری دو لایه‌نی (جه‌لالی) و (مه‌لایی) وه‌کو تانه توانج له یه‌کتر ده‌دا ، ئه‌م نوسینه‌بواری وردتری به‌سه‌ر کردنه‌وه‌ی وه‌های تیا نابێت .
وه‌ڵی ئه‌وه به‌ڵگه‌ی شکستی په‌یامی (نه‌جه‌لالی) و (نه‌مه‌لایی) بونیان بوو، له‌لای که‌سانی وه‌کو من .
دواتر پاسۆک به کوێ دا گوزه‌ری کرد ؟به‌هۆی هه‌راشی دور نه‌بینینی ئه‌و لایه‌نه‌ی که پاسۆک له گۆڕه‌پان و پاوه‌نی دا ده‌ژیا ، لایه‌نی (که‌ریم سه‌لام)هه‌میشه ڕوی له گه‌شه‌بوون ده‌نا به‌بێ ویستێکی تایبه‌تی خۆی و کارێزمایبه‌رده‌وام گه‌وره‌تر ده‌بوو ، به‌وه‌ی که‌سێکی سه‌ربازی و مه‌یدانی بو ، زیاتر له‌وه‌ی سیاسی و مونه‌زیرێکی حیزبی بێت ، له‌و ڕۆژه‌شدا به‌خت ڕوی له‌و سیفاته بو .
به‌پێچه‌وانه‌ی (حه‌مه مسته‌فا)ی سکرتێر ، زیاتر نوسه‌رو ئه‌دیب بو زیاتر له سیاسه‌تیش کادرێکی ناوه‌ندی بو له بزوتنه‌وه‌ی پێشوی داو له‌نێو کایه‌ی جه‌لالی دا سیاسه‌ت و خه‌باتی کرد بو ، له کۆپی ئه‌وان بۆ نه‌خشه ڕێگای سیاسی خۆی ده‌گه‌ڕا ؛ له‌گه‌ڵ هه‌ندێک ڕیزی تایبه‌تی بۆ بارزانی و ئیدریسی کوڕی . به‌گشتی سه‌رده‌م و کاته‌کان یارمه‌تی (که‌ریم سه‌لام) یان زیاتر ده‌دا ، هه‌روه‌ها نه‌خۆشی و مه‌رگی (حه‌مه مسته‌فا)ش یارمه‌تی ده‌رێکی ناگه‌هان بۆ (که‌ریم سه‌لام) ، دور له‌حه‌زی خۆی ، چونکه له سیاسه‌ت دا خۆی به فێرخوازێکی ئازاد مسته‌فا ده‌زانی .
ئه‌وانه مێژویه‌کی پێش نه‌وه‌ده‌کانی سه‌ده‌ی پێشوی ئه‌و که‌سه دیارانه‌ن که چاره‌نوسی پارته‌که‌یان که‌وت بووه ده‌ست ، ده‌توانرێت هه‌ندێک ڕێچکه‌ی ئاینده‌ی ئه‌و حیزبه په‌ژمورده‌یه ی پێ ده‌خویندرێته‌وه .
دواتریشی له‌دوای ڕاپه‌ڕینه‌وه پاش نه‌مانی (ئازاد مسته‌فا) ، هاتنه‌وه‌ی مولازم(شوان) یش به‌دره‌نگ وه‌ختی ، هیچی له‌وباره نه‌گۆڕی ؛ بگره به‌ره‌ی (که‌ریم سه‌لام)ی پته و تر کرد ، ئه‌و به‌ڕێزه خۆی زیندووه خۆی ده‌توانێت له‌ڕاستیه‌کانی خۆی بدوێت .
له دوای ڕاپه‌ڕین بۆ فراوان کردن و پڕ کردنه‌وه‌ی شوێنی چۆڵی سیاسی (ئازاد مسته‌فا) و باری تایبه‌تی ئه‌وه‌سه‌رده‌مه‌ی حیزب ، که‌سانێکی تری ئاوارته هێنرانه نێو حیزبه که‌‌وه ، نه‌ک سه‌ر به پارتی بون به‌ڵگو هه‌ندێکیان له ده‌زگا حه‌ساسه‌کانی ئه‌و حیزبه‌دا له کۆن و ئه‌و کاته‌دا کاریان ده‌کرد ، یان به‌لانی که‌موه داخ له‌دڵه‌کانی یه‌کێتی بون .
هه‌روه‌ها له‌گه‌ڵ نه‌بانی دور ئه‌ندێشی نه‌کردنی هه‌ندێک سه‌رکرده‌ی یه‌کێتی ، وای کرد باگردێنی گرانی پاسۆک بخولێته‌وه بۆ سه‌ر سه‌ربانی پارتی ، ئه‌م باسه ورد کردنه‌وه‌ی زۆری ده‌وێت به‌ڵام هیوادارم ڕۆشن کردنه‌وه‌ی ده‌لاقه‌یه‌ک بێت بۆ سه‌ر ڕاستیه‌کان و ته‌قه‌ی ڕو له تاریکی ڕوله کۆتای بێت .
هه‌روه‌هاده‌کری ئه‌مه پارسه‌نگێک بێت بۆ ئه‌و برا نوسه‌رانه‌ی که به ڕه‌مه‌کی ناتۆره ده‌به‌خشنه‌وه به‌سه‌ر هه‌مو (پاسۆکی کۆن)دا و هیچ هه‌ڵبواردنێکی تیا ناکه‌ن .
نازانڕیت ئاخۆ هیچ حیزبێکی تر ده‌بێت بتوانێت ، هه‌تا سه‌ر له کایه‌کانی (جه‌لالی) و (مه‌لای) بون هه‌تا سه‌ر خۆی بپارێزێت .
ئه‌گه‌ر (نه‌فره‌ت)ه یان (ڕه‌حمه‌ت) ، ئه‌وه‌ده‌گه‌یه‌نێت سه‌رده‌م له‌وه‌ی تێ په‌ڕاندووه ، یان(حیزب) له‌جیاتی (خوێ) له‌دژی بۆگه‌ن و خه‌سار بون خۆیشی بۆگه‌نی کردووه .
به(ئه‌گه‌ر)ێک کۆتایی به‌م نوسینه دێنم هه‌رچه‌نده ئه‌گه‌ر هیچی وای لێ سه‌وزنابێت .
(ئه‌گه‌ر ئازاد مسته‌فا بمایه ڕێچکه‌ی کاروانی پاسۆک ڕوی له کوێ ده‌بو؟)
5/10/2011
سلێمانی
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
