دژ بە سەركوتكردنى ئازادى خۆپێشاندان و كۆبونەوەگشتیەكان وەرنە مەیدان

Sunday, 07/11/2010, 12:00

لەدرێژەى هەوڵ و هەنگاوە یەك لەدواى یەكەكانى دەسەڵاتدارانى كوردستان بۆ سەركوتكردن و بەرتەسككردنەوەى ئازادیەكانى خەڵكى كوردستان لەلایەن دەسەڵاتەوە هێرشێكى دیكە بەرێوەیە لەرێگەى پەسەندكردنى پرۆژە یاساى خۆپێشاندان و كۆبونەوەگشتیەكان،3 ساڵ لەمەوبەر بەدەستپێشخەرى وەزارەتى ناوخۆ پرۆژەیەكى پرلە سزا بۆ كۆنترۆلكردنى خۆپێشاندان و كۆبونەوەى خەلك بەناوى "پرۆژەیاساى رێكخستنى خۆپێشاندان و كۆبونوەگشتیەكان " خرایەبەردەمى پەرلەمان ،وە لە 5-11-2010 بەزۆرینەى دەنگ لەلایەن پەرلەمانى كوردستانەوە پەسەندكرا،كە بەپێى بڕگەكانى ئەو پڕۆژە یاسایە سەرەتایترین مافى خەڵك بۆ بەدەستهێنانی داواكاریەكانیان و دەبرینی ناڕەزایەتیەكانیان بە خۆپیشاندان و كۆبونەوە زەوتدەكرێت ,ئەمە لەكاتێكدایە كەدەسەڵاتدارانى كوردستان رۆژانە بانگەشەى فەراهەمكردنى دیموكراسى و ئازادى دەكەن بۆ دانیشتوانى هەرێمەكە ئەمە لەلایەك, لەلایەكى دیكەوە رۆژدواى رۆژ سەرقاڵى هەرەشەو دانانى یاسان بۆ سەركوتى خەڵكانى ئازادیخوازو نارازى لەخراپى گوزەران و ئایندەیان.؟؟.
ناچاركردنى خەڵك بۆ وەرگرتنى مۆڵەت و لەقاڵبدانى داواو سنورداركردنى كات و خواست و بیرى خەڵك بۆ دەنگ هەڵبرین بەرامبەر بە خراپى باریگوزەران و خزمەتگوزارى سەرەتایى، ناوەرۆكى ئەوپرۆژەیە كە پەرلەمانتارانى سەربەدەسەڵات شانازى پێوە ئەكەن و بەبۆنەى پەسەندكردنیەوە پیرۆزباى ئاراستەى خەڵكى كوردستانەكەن. بەگوێرەى حكومەكانى ئەم یاسایە وە بەهەمان ئەوبیانوە سواوانەی دەسەڵاتدارانی كوردستان كە هەمیشە بۆبەرگرتن بە ناڕەزایەتیەكانی خەڵكی كوردستان دەیڵێنەوە بە نمونەى وەك (پاراستنی سیستم و ئادابی گشتى) هیچ كەس ولایەنێك مافی كۆبونەوە و خۆپیشاندانی نابێت .
پڕۆژە یاسای لەو جۆرە بێجگە لەوەی راستەوخۆ ئازادی خۆپیشاندان و كۆبونەوە زیندەبەچاڵ دەكات لەهەمانكاتدا دەستی هێزەكانی دەسەڵات ئاوەڵادەكات بۆ كوشتن و پەلامار و بڵاوە پێكردن و گرتن و تەنانەت كوشتنى خۆپیشاندەران وەك لە ماوەى رابوردودا لەلایەن هێزەكانى دەسەڵاتەوە دژ بە خۆپێشاندەران رویداو چەندین كەس بونەقوربانى و تاوانباران وەك بەرزەكى بانان بۆى دەرچون.
داواكردنى مۆڵەت بۆ خۆپیشاندان لەگەلأ هیچ پێوەرێكى دنیاى مەدەنى و مۆدێرندا نایەتەوە ، لەمانەش سەمەرەتر ئەوەیە كە مانگرتن و كۆبونەوەكان تا بەرلەخۆراوابون بەردەوامیان هەبێت كەئەمەش پێشێلكردنى مافى خەڵكى نارازیە لەچۆنیەتى دیاریكردنى شێوازى بەدەستهێنانى ماف و داواكاریەكانیان.
رێكخراوە مەدەنیەكان ، خەڵكانى ئازادیخواز:
ئازادى مانگرتن و خۆپیشاندان و كۆبونەوەی گشتی یەكێكەلە بەڵگەكانى بونى ئازادی لە هەر كۆمەڵگایەكدا ، وە مافێكی بێ ئەملاولای خەڵكە بۆ یە هەرجۆرە رێگریەك بەهەربیانویەك پێشێلكردنی ئەو مافەیە، وە كاری ئێمەیە وە رێكخراوى مەدەنى و خەڵكى ئازادیخواز بەهەموو توانایەكمانەوە بەرگری لەو مافە بكەین و دژبە تێپەراندنى برۆژە یاسایەك بوەستینەوە، وەپێویستە دەنگ هەڵبڕین و تواناكانمان یەك بخەین لەپێناو فشارخستنەسەر سەرۆكى هەرێم تا ئیمزاى تێپەربون لە برۆژە یاسایەك نەدات كە سەركوت و گرتن و كوشتنى خەڵك بەیاساى ئەكاتەوە، وەلێرەوە هەوڵى هەڵوەشاندنەوەى ئەو پرۆژە پاسایە بدەین و كار بكەین لەپێناو جێخستنی یاسایەكدا كە ئازادی بێ قەید و شەرتی خۆپیشاندان و مانگرتن و كۆبونەوەگشتیەكان فەراهەم بكات .بۆیە بانگەواز لەهەموو پارتەسیاسیەكان و رێكخراوەمەدەنیەكان،،كرێكاران و فەرمانبەران،خوێندكاران و مامۆستایان،پزیشكان و ئەندازیاران،پارێزەران و رۆژنامەنوسان و سەرجەم خەڵكانى ئازادیخوازدەكەین كەبێن لەم پێناوەدا تواناكانمان بخەینەگەر تا دژبە تێپەراندنى یاساى خۆپێشاندان ، خۆپێشاندان و چالاكى جۆراوجۆرى مەدەنى ئەنجام بدەین.
تۆرى بەرگرى لە ماف و ئازادییەكانى خەڵك
سلێمانى 7/11/2010
[email protected]