وێرانکردنی عەقڵ..وێرانکردنی وجود

Wednesday, 21/10/2020, 19:54

مافیاکانی یەکێتی و پارتی سێ دەیە لەسەر یەك وەکو سەرسەخترین دوژمنی نەتەوەی کورد تێکۆشان و قوربانیانداو تیرۆریان کردو خیانەت و دزی و درۆزنی دنیایان کرد لە پێناوی بەردەوامییدان بەدەسەلاتی زۆرەملێی خواروخێچو پڕ ستەمی خۆیان، مەگەر چوەڕوانی چ چاکەیەك لە بەدفەڕ دەکرێت؟ (کەسێك شتێکی نەبێت چۆن دەتوانێت بیبەخشێت؟).
ئەوانە تاوانبارو خائین و ناحاڵیی و پیاوکوژو جەردە پیشەن و لەگەڵ حوکم و بەڕێوەبردن و دەوڵەتدا کوجا مەرحەبا، حوکمداری کەسانی زاناو دادپەروەرو مرۆڤدۆستی دەوێت، ئەوەی ئەوان لە دوای ڕاپەرینی ساڵی ١٩٩١ی میللەتەوە کردیان و دەیکەن لە روخاندنی بەهاکانی مرۆڤ و کەسایەتی تاک و هوشیاری نەتەوە و بڵاوکردنەوەی دیاردەی بندیوار..... هیچ دوژمنێكی کورد ئەوەندە زیانی بە کورد نەگەیاندووە، ئەو جانەوەرە بۆگەنانە بەس داروبەردی کوردستانیان ئاودیوی ئێران و تورکیا نەکرد، بەس شەڕی براو باوکیان بەیەکتر نەکرد، بەس شێری گیانی میللەت و ڕێوی گەڕی بەردەم قاپی داگیرکەران و دوژمنی کورد نەبوون، بەس کاوە گەرمیانی و زەردەشتەکانیان تیرۆر نەکرد، بەس هەواو نەوت و ئاوی کوردستانیان تاڵانفرۆش نەکردو گەلیان نەکرد بەژێر باری قەرزەوە، بەس دزییان لە پارووەنانی دەمی میللەت و موچەی فەرمانبەران نەکرد، بەس هاوڵاتانیان فێری دزی و تاوانکاری نەکردو گەنجانیان دەربەدەری وڵاتان نەکرد، یهەموو کەلوپەل و شەهادەو ژیانیان نەکرد بە ساختە و هەر بە تەڵەکەو بە ساختەچێتیش دەیانجار میللەتیان نەبردە سەر ئاو و ئاویان نەدایە.
گەندەڵییان کرد بە سیمای گشتی ژیان، دنیایان بۆ خۆیان داگیرکردو هەژار و بێکەسانیشیان خستە کونجی زیندان، ئەوانەو موشتەمەلاتەکانیان یاسانایانگرێتەوەو بە رۆژی رووناك لەسەر شەقامەکان سوکایەتی بە هاوڵاتی دەکەن و دەکوژن کەس دەنگ ناکات، سوپایەکیان لە بندیوار دروستکردووە تاکو وەکو مخۆرکە جەستەی میللەت هەڵکۆڵن و خۆیان لەسەر کورسی دەسەڵات درێژە بە زوڵم و ناحەقی خۆیان بدەن، ئەمانەو سەدان دەردو زیان و کاولکاری و لێکەوتەی تری بەرپرسەکانی ناو ئەو دوو حيزبە گەر باس بکەین هەر بە کۆتا ناگات، هەمووانیش وەکو خۆری رووناك ئەو راستییانە دەزانن، جوانتری دیاریان بۆ میللەت کاڵای ئێکسپایەرو نەخۆشکەرو ئاوی بۆگەن و کارەبای موەلیدەو ژینگەی تەپوتۆزاوی و پیس بووە، هیچ بنخانێکی ئابوورییان پێ بنیات نەنرا تا نەوەکانی داهاتوو لەسەری کاربکەن و پەرەی پێ بدەن، شەڕە پەڕۆو واستەو حیزب حیزبێنەو باڵ باڵێن و تیرۆرکردن و بێبەشکردنی دەنگی ناڕازی پیشەی باب و باپیرانیان بووە..
ئەمانە با هەموو لە لایەك بمێنن، بەڵام ئەوەی لە هەموو دەردەکان سەخترە و کاریگەری زۆر خراپی لەسەر بوونی تاکی کورد هەیە و بەکەس چارەسەر ناکرێت، ئەوەیە دوای خۆیان نەوەیەکی ناحاڵی و نەزان و بێ ڕوانین و بێ بیرکەدنەوەیان دروستکرد کە دەیان ساڵی تری دەوێت (گەر دەسەڵاتێکی دادپەروەر حوکم بگرێتە دەست) تاکو نەوەکان بێنەوە سەر هۆش و راستبکرێنەوە، ئەم هاوارە هاورێکی دڵسۆزانەیە کە لێرەدا دەیکەم تکایە ئەوانەی خۆیان بە دڵسۆزی گەلی کورد دادەنێن با بە زووترین کات کۆتایی بەم دوو دەسەڵاتە مافیایە بهێنن و ڕێگری چەوتییەکانیان لێبکەن و بزانن کە نەوەیەکی هاوشێوەی دەسەڵات و خوو خراپ پەروەردەی دەستی ئەو دوو حیزبە بوون لەم سێ دەیەی ڕابردوودا کە هەر جوێن وسوکایەتی و بێ بەرهەمیی و نەخوێندەواری و وغەدرو درۆ و تێنەگەشتن و بێ بەرنامەیی و پوچێتی مۆرك و پیشەیان دەبێت، نە بەکەڵکی کەس و کاریان و نە کۆمەڵگاو نە میللەتی کوردیش بێن، ئەم نەفامکردنە بە شێوەیەکی مەنهەجی یەکێتی و پارتی کاریان لەسەر کرد تاکو زەمینەی مانەوە بۆ خۆیان بڕەخسێنن، خۆ ئەوان هیچ لایان گرنگ نەبووە قوربانیی بە هەموو موقەدەسەکان بدەن و لە ژێر پێی بنێن لە پێناوی بەرژەوەندییەکانی خۆیاندا، ئەوە کەسانی دڵسۆزن کە بیر لە (پەروەردە)و (رۆشنبیری) دەکەنەوە، لای ئەو دوو دەستە مافیایە حەقیقەتی ئەو دوو مانایە بوونی نییەو لە کەلاوەدا فڕێدراوە، بەڵکو ئەوان دژی ئەو بنەمایەن چونکە بە برەودان پێیان و هوشیاربوونەوەی گەل ئیتر کەس قبوڵی ئەو قەزەمە جەللادانە ناکاتەوە و بە پەڕۆیەکی پیس تووڕیان هەڵدەدەنە زبڵخانەی مێژووەوە . لە نەمانی عەقڵدا غەریزە شەڕەنگێزەکانی کوشتن و تاوان و لۆجیکی جەنگەڵستان شوێنی دەگرێتەوە، کەس ئاسوودەیی و بەختەوەریی و ئارامی کۆمەڵایەتی تام ناکات، شیرازەی کۆمەڵگا تێكدەچێت، کەس متمانە بە کەس ناکات، ڕێزو راستگۆیی و دەستپاکی بوونی نامێنێت، تکایە ئەم هاوارەم بە جدی وەرگرن میللەتی کورد لە باشوور لەسەر چاڵێکی لەناوچوونی گەورەیە، لە ناوچوونی گیان و فیکرو دەروونی مرۆڤەکان، میللەتیش بێ دڵ و رۆح ناتوانێت بژی و هەناسە بدات و مانەوەی خۆی مسۆگەر بکات.