17 ی شوبات
Sunday, 19/02/2012, 12:00
ئەگەر گوڵەکانی باخێک
هەموو جوان بن
گوڵێک هەیە لە هەموویان
ڕەنگینتر بێت
ئەگەر ڕۆژەکانی ساڵیش
هەر هەموویان پرشنگدار بن
ڕۆژێک هەیە پرشنگی خۆر
لەوانیتربە تینتر بێت!
١٧ی شوبات..... تاجی سەری،
هەموو ڕۆژەکانی ساڵە!
لە زەمەنی بێدەنگیدا،
دەنگێکی یەکجار زوڵاڵە!
١٧ی شوبات........١٧ی شوبات
یەک ڕۆژە دوو مانای هەیە
ڕۆژی شانازییە بۆ من،
ڕۆژی شەرمە بۆ دەسەڵات
١٧ی شوبات.......... یەک تابلۆیە
دوو پەنجە ڕەنگی کردووە!
پەنجەی هەمیشە سەوزی گەل،
کە بۆ ژیان.....
داری ئازادی دەنێژێ.
لە گەڵ پەنجەی ڕەشی سوڵتان،
کە بۆ مەرگ.... خوێن دەڕێژێ!!
١٧ی شوبات.... یەک تابلۆیە
هەڵگری دوو ناسنامەیە
بۆ من جێگای سەربەرزییە،
بۆ تۆ شەرمە....
بۆ من ڕیزکردنی داوای ئازادییە.
بۆ تۆ ڕیزکردنی تەرمە!!
١٧ی شوبات ...
یەک یادە .....دوو ڕێگای هەیە!
بۆ من یادی ڕێی ژووانە ئەو (ڕێژوان)ە
بۆ دەسەڵات......
یادی هەرەس و داڕمانە
١٧ی شوبات.....١٧ی شوبات
بە مەرگی تاقانە (ڕێژوان)
بە مەرگی تاقانە (گەرمیان)
گەر ڕۆژەکانی ساڵ هەمووی،
ڕۆژی تێکۆشان بن بۆمان
تۆ تاقانە ڕۆژی ساڵی،
بۆ سەرفەرازی کوردوستان!!
/////////////////////////////////////////////////////////////////////////////////////////////////
ئەم شیعرە لە سەر داوای هونەرمەندێکی بەڕێز نووسرا کە بڕیار بوو بکرێتە سروودێک بۆ ١٧ شوبات بەڵام لە بەر هەندێک هۆکار، نەکرا!!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
