گۆڕان لەدیدى منەوە

Sunday, 09/10/2011, 12:00

 
لەدیدى منەوە گۆڕان بەدیهاتنى بارودۆخێكە كە هەموو مرۆڤەكان، بەبێ جیاوازى ئاینى و نەتەوەیى و رەگەزى و سەربەخۆ لە ئینتیماى سیاسى و پایەى كۆمەڵایەتى، ئازاد و یەكسان بن، هەمووان (ئەوانەى تواناى كاركردنیان هەیە) بەشداربن لە كارى كۆمەڵایەتى و بەرهەمهێنان و خزمەتكردنى كۆمەڵگادا، بەهیچ بیانوویەكەوە كەس لەم ئەركە بێبەشنەكرێ و كەسیش نەتوانێت خۆى لێبدزێتەوە، بەرهەمى كارى گشتى بۆ هەمووان بێت و هیچكەس لەبەر دەسەڵات و خۆشگوزەرانى خۆى نەبێتە مایەى هەژارى و بندەستى كەسانى تر، هەركارێك كۆمەڵگا بەسودبەخشى نازانێت بێپاداشت و هەركارێك دژى بنەماكانى ئازادى و یەكسانیە قەدەغە بكرێ. ئەمە گرنگترین و پێویستترین گۆڕانە كە پێویستە لەسیستەمەكانى ژیانى كۆمەڵى مرۆڤدا بكرێت، بەڵام ئەم نووسینە باسكردنى ئەم گۆڕانە كۆمەڵایەتى و سیاسى و ئابوورى و كەلتورییە نیە، بەڵكو باسكردنە لە دیاردەیەك و رێكخراوێكى سیاسى بەناوى "بزووتنەوەى گۆڕان" كە یارو نەیارەكانى ناتوانن نكوڵیبكەن لەوەى بووەتە بەشێك لەهاوكێشەى سیاسى ئێستاو ئایندەى كوردستان.
بەدواى سەرهەڵدانى بزووتنەوەى گۆڕاندا، ژمارەى خەڵكى ناڕازى زیادیكرد، بوێرى دژى دەسەڵات پەرەیسەند، دەسەڵات زیاتر كەوتە ژێر مەنگەنەى گوشار، نارەوایى دەسەڵات و گەندەڵییەكانى ئاشكراتر دەركەوتن، بۆیە لەسەر ئاستى كۆمەڵایەتى لەناو خەڵكى نارازى و لەسەر ئاستى نوخبەش لەناو روناكبیران و پێشكەوتنخوازان و ئازادیخوازان پشتیوانى لێكراو چەپ و سۆسیالیستەكانیش بەدەلایلى بابەتى هەستپێكراو دەستیان شلكرد لە زەقكردنەوەى جیاوازیەكان و ناكۆكیەكان، ئەمەش نەلەبەر باشى بەرنامەكەى و نەلەبەر ماندوو بوون و تێكۆشانى خۆى بوو، بەڵكو بەشێكى ئوێدەوارى بوو بە رێكخستنى بزووتنەوەى ناڕەزایەتى خەڵك، كە خۆشباوەڕى بە رابردووى كۆمەڵەى رەنجدەران و كاریگەرى لیبراڵیزم لەسەر رەوەندى كوردى لەدەرەوە و كارى چەندین ساڵەى رەهەندیەكان رۆڵى هەبوو تیایداو بەشەكەى تریشى بۆ شكاندنى تەوتەمى دەسەڵاتى پارتى و یەكێتى بوو.
ئەم بزووتنەوەیە، لەبارودۆخێكى سیاسى پڕلەئاڵوگۆڕدا سێ ساڵى تێپەڕاند و نەخشى خۆى لەهەردوو مەیدانى پەلەمان و شەقام تاقیكردەوەو دۆست و دوژمنەكانى بەخواستى خۆى هەڵبژاردووەو رێرەوى كارى خۆى دیاریكردووەو خەڵكیش دەزانێت چى دەوێت و چى دەكات، بۆیە باسكردنى دیاردەو دەركەوتەكانى وەك ئەوەى كە هەیەو نیشاندانى كاریگەرییەكانى لەسەر ئێستاو ئایندە كارێكى سودمەندەبێت.
سەرەتا رەنگە ئەوە پێویست بێت بڵێین كە بزووتنەوەى گۆڕان سەربەخۆ لەهەولأو ئیدیعاكانى نەیتوانى لەخولگەى ناسیونالیزمى تەقلیدى كورد دووركەوێتەوەو رۆژ لەدواى رۆژ زیاتر گرێى پێوەدەخوات و لەهەموو بوارەكاندا ئاكارو ئامانجى ئەو بەرهەمدێنێتەوەو وەك رەوتێك ساغدەبێتەوە كە ئامانجى سەرەكى "رزگاركردنى ناسیونالیزمى كوردە لە قەیرانى دەسەڵات، نەك رزگاركردنى خەڵكى كوردستان لە بێنەزمى و بێمافى" ئەمەش رۆژبەرۆژ زیاتر لەچاوەڕوانیەكانى خەڵك دووریدەخاتەوە.
ئەم بزووتنەوەیە كە هاتۆتە سەر سفرەى خەباتى هەزاران هەڵسوڕاوى ماندوو نەناسى پێشكەوتنخواز و سكولارو یەكسانیخوازو هێزى زۆریشى لێكێشكردون، نەك هەر بەبوونى ئەم بزووتنەوەیە خۆشحالأ نیە، بەڵكو ئامانجدارانە خۆى لێلادەدات و هەڵسوڕاوەكانى دەبوغزێنێت و بەپێچەوانەشەوە دەرگاى بۆ دۆستایەتى و هاوپەیمانى لەگەلأ ئەوانە خستۆتە سەرپشت كە سەرسەختانە دژى ئازادیخوازى و پێشكەوتنخوازى و سكولاریزمن.
سیاسەتى گۆڕان لەسەر یەك راستەهێلأ و بەدوو ئاراستەى پێچەوانەدایە، ئاڕاستەیەك بۆ خۆدوورگرتن لە بزووتنەوەى ئازادیخوازى و پێشكەوتنخوازى و چاو نوقاندن و گوێ كەڕكردن لە داخوازى و ناڕەزایەتى سەربەخۆى خەڵك و ئاراستەیەك بۆ هاوڕێیى لەگەلأ ئیسلامیەكان و موجامەلەكردن و شیرینكردن و بەفریشتەكردنیان و چاوپۆشى لەمەترسیەكانیان.
یەكێك لەو هەڵەو هەنگاوە مەترسیدارانەى كە هەندێك بەخیانەت و هەندێك بە هەڵەى ستراتیژى ناو دەبەن، هاوپەیمانى حیزبى شیوعى عێراقە لەگەلأ بەعس كە كاریگەرى زۆر نیگەتیڤى دانا لەسەر چارەنووسى خەڵكى عێراق بەگشتى و سەروبن هاوكێشە سیاسیەكانى گۆڕى. ئەوەى شۆڕشى 958 بەدیهێنا، وە ئەو وەرچەخانە سیاسى و كۆمەڵایەتى و كەلتوری و روناكبیرییە فراوانەى بەخەبات و گیانبازى 3دەیەى شیوعییەكان بەدیهات، لەسایەى ئەو هاوپەیمانێتیەدا بەعس لە خەڵكى عێراقى سەندەوە، ئەوەى كە عێراق وەك وڵاتى هاوبەشى كوردو عەرەب پێناسە كرا دوایى گەیشت بە ئەنفال و جینۆساید، ئازادى و سەربەخۆیى ژنان حەملەى ئیمانى جێى گرتەوە بۆ رەشەكوژى ژنانى بێدەرەتان، ئازادى كارى نەقابى و هەڵسوڕانى سیاسى هەڵوەشاندنەوەى چینى كرێكارو قەدەغەى كارى سیاسى بەشوێندا هات، وەك دەڵێن ئەوەى "با "هێناى "زریان" بردییەوە، كە بەبێ كەڵكوەرگرتن لەئۆتۆریتە و تواناو پەیوەندیە ناوخۆیى و دەرەكیەكانى حیزبى شیوعى و بەبێ سڕكردن و خەواندنى ئەو هێزە سیاسى و جەماوەریە، بەعس ئەنجامدانى ئەوكارانەى بۆ ئاسان نەبوو، بەڵام نییەتى باشى حیزبى شیوعى نەیتوانى رێگربێت لەبەردەمیاندا. نیەت و ئامانجى گۆڕانیش هەرچییەك بێت ئەم هاوپەیمانێتیەى لەگەلأ ئیسلامیەكان داهاتوویەكى لەوە باشتر بەشوێن خۆیدا ناهێنێت، وەك دەبینین لەكورتماوەدا تاى تەرازووى هاوكێشەكانى بەزەرەرى بەرەى ئازادیخوازى و پێشكەوتنخوازى و بەقازانجى بەرەى دژى ئازادى و دواكەوتوویى، بەزەرەرى جوڵانەوەى جەماوەرى و بەقازانجى كەین وبەینى حیزبى گۆڕیوە و لەدرێژماوەدا ئەگەر بەم رەواڵە بەردەوام بێت جگە لەپەیژەیەك بۆ سەركەوتنى ئیسلامیەكان شتێكى ترى لێبەرهەم نایەت، بۆ نیشاندانى مەترسى سەركەوتنى ئیسلامیەكانیش وێنە و نمونەى زۆر لەبەردەستدایەو هەر لەبەر ئەو مەترسیەش خەڵكى ناڕازى كوردستان چەندین ساڵ چاوپۆشى لەخراپكارییەكانى پارتى و یەكێتى كردو لە هەڵبژاردنى 25/ 7/2009 كەمتمانەیان بە بزووتنەوەى گۆڕان بەخشى پێیانوابوو هەم لەپارتى و یەكێتى رزگاریان دەكات و هەم لەمەترسى ئیسلامیەكان دەیانپارێزێت.
بەڵام هاوپەیمانى گۆڕان، ئیسلامیەكانى لە كەناركەوتن رزگار كرد، خەڵكى كوردستان هۆشیارانە لەناو ئەو بۆشاییە سیاسیەدا كە ساڵانیكە سەریهەڵداوە نەدەچوونە پالأ ئیسلامیەكان و وەك بەدیل قبوڵیان نەدەكردن، تەنانەت دامێنى رێكخستنەكانى خۆشیان لێیان نەبان بوون و بەپێچەوانەى مەیلى رابەرایەتیەكانیانەوە بەشدارییان لە خۆپیشاندانەكاندا دەكردو بەگشتى جیابوونەوەیەك لەنێوان سەرەوەى لایەنگرى دەسەڵات و خوارەوەى ناڕازى سەریهەڵدابوو، سەركردایەتى حیزبە ئیسلامیەكان تەنانەت لەلاى زۆرێك لەئەندام ولایەنگرانى خۆشیان وەك توێژێكى مفتەخۆرى دامێنى دەسەڵات تەماشا دەكران و بەوهۆیەوە جگە لە كێشەو ناكۆكى ناوخۆییان، هەمیشە لەبەردەم مەترسى ئەوەشدابوون لەگەلأ پارتى و یەكێتی بچنە گۆڕى گەندەڵییەوە. بەڵام گۆڕان لەو چارەنووسە رزگاریكردن و ئەوانى لەتاوانى هاوبەشى دەسەڵات پاككردەوەو لەگەلأ رێكخستنەكانى خۆیان ئاشتى كردنەوەو ناكۆكیەكانى ناویانى خاوكردەوەو دەستى گرتن بۆ ناو ناڕەزایەتى جەماوەرى، ئەوەى بەهاوكارى دەسەڵات چنگیان نەكەوت، ئەوەى بەچەك و تۆقاندن و بەكۆمەكى وڵاتانى دراوسى و رێكخراوە جیهانیەكان نەیانتوانى بەدەستى بێنن، هاوپەیمانى گۆڕان بۆى دەستەبەركردن و ئەو رەخنەیەى لەشەڕى ناوخۆدا لەپارتى و یەكێتى دەگیرا لەدەستگیرۆیى كردنى ئیسلامیەكان بۆ مەبەستى سیاسى، گۆڕان دووبارەى كردەوەو ئەو متمانەیەى پێیبەخشرابوو خەمساردانە خستیە مشتى ئەوان. سەرهەڵدانى بزووتنەوەى گۆڕان بوارى كارى ئەوانى بەرتەسك نەكردەوە و وەك پێشبینى دەكرا هێزى ئەوانى هەڵنەمژى، بەڵكو پاشەكشەى ئەوانى گۆڕى بۆ گەشەو پێشڕەوى. بوارى پێدان زیاتر وەك هاوپەیمانى ئێران و توركیا مەترەح ببن بەتەماحى ئەوەى لەكایە سیاسیەكانى كوردستاندا زیاتر دەرگایان بەروودا بكرێتەوە و هەڕەشەى مەلاكانیش بۆ بەرتەسككردنەوەى ئەو دەسكەوتە كەمانەى لەبوارەكانى پێشكەوتن و تەمەدون و مافەكانى ژنان و منداڵان و بەرپێگرتنى توندوتیژى خێزانى بەدیهاتوون، بەرەنجامى سەرەتایى ئەو هاوپەیمانێتیەیە و لەداهاتوودا دەركەوتەى زیاتریشى دەبێت. " دیارە مەلاكرێكار خوێندنەوەیەكى دروستى بۆ لایەنگرى لەبزووتنەوەى گۆڕان كردووە"
هەروەها ئەم هاوپەیمانێتیە كۆمەكى كرد بەمانەوەى دەسەڵات و كاریگەرى ئاڵوگۆڕەكانى ناوچەكەى لەسەر كوردستان خاوكردەوە، ئەگەرچى لەكوردستانیش جەماوەرێكى فراوان و جیلێكى گەنج هاتوونەتە پێشەوە داواى گۆرین دەكەن و لەو پێناوەدا قوربانى زۆریان بەخشى و زیاتر لە 2 مانگ لەشەقامەكان بەپێوە وەستان، بەڵام سیاسەتى ئەو سێ حیزبە هاوپەیمانە هاوكێشەكەى گۆڕى و رێگەى گرت لەوەى كوردستانیش بەئاقارى گۆڕینى دەسەڵات یاخود سەپاندنى كۆمەڵێك داخوازى جدى پێشڕەوى بكات، لەلایەكەوە ترس لەدەسەڵاتى ئیسلامیەكان خەڵكى نارازى كوردستان و چاودێرانى سیاسى دەرەكیشى توشى داچڵەكین و سڵەمینەوە كردو لەلایەكى تریشەوە ئەم سێگوچكەیەى ئۆپۆزسیۆن بوو بە ئیسفەنجێكى گەورە بۆ هەڵمژینى نارەزایەتیەكانى خەڵك، خۆپیشاندانەكان بەرلەوەى لەلایەن دەسەڵاتەوە سەركوتبكرێت ئەم ئیسفنجە وشكى كردەوەو كردى بەبارمتەى سیاسەتێكى بەرتەسك، هاوكات لەگەلأ دروستبوونى ئەم هاوپەیمانێتیە، خۆپیشاندانەكان ناوچەیى بونەوەو لەسەربەخۆییان كەمبۆوە و ئاراستەى ناڕەزایەتیەكانیش بەئاقارێكدا رۆیشت كەبوارى بۆ مانۆڕى سیاسى كردەوەو دەسەڵاتخوازى لەجێگەى ئازادیخوازى بوو بە ئەڵقەى سەرەكى و بەمهۆیەوە خەڵكى ناڕازى و گەنجە شۆڕشگێرەكان جگە لەفشارى دەسەڵات گوشارى ئۆپۆزسیۆنیشیان كەوتۆتەسەر.
هەرچەندە من باوەڕى تەواوم بەوە هەیە كە كوردستان زەوییەكى بە پیت نیە بۆ هێزە ئیسلامیەكان و پێویستیەكانى ژیان و پێشكەوتنى خەڵكى كوردستان بەبەرنامەو سیاسەت و ئەجینداى ئەوان وەڵام وەرناگرێتەوەو هاوپەیمانیشیان لەگەلأ گۆڕان ئەوان لەم قەیرانە رزگار ناكات، بەڵام شەڕە ناوخۆییەكانى پارتى و یەكێتى و لەم دووساڵەى دواییشدا ململانێى نێوان گۆڕان و دەسەڵات كۆمەكى زۆرى بەوان كردووە، وەك دەڵێن كەباران باریوە ئاشیان گەڕاوەو كە نەشباریوە جوتیان گەڕاوە، ئەوەش بەڵگەى ئەوەیە كە ئەوان رەگەزى سیاسى سەرەكى نین بەڵكو هێزى ئامادەن بۆ گەرمكردنى ناكۆكى هێزە سەرەكیەكان، هەر بەمهۆیەشەوەیە هەم ئەو دەوڵەتانەى كە ویستوویانە لە كوردستان سیاسەت بكەن و هەم پارتى و یەكێتى و تەنانەت گۆڕانیش وەك هێزێكى سەرەكى ئۆپۆزسیۆن، بوونى ئەوانیان بەقازانجى خۆیان زانیوەو لەبەر قازانجى خۆشیان گوێیان بە بەرژەوەندى خەڵكى كوردستان نەداوە. بەڵام ئەمەش كاتى بەسەردەچێت و بزووتنەوەیەكى پێشكەوتنخوازى نوێ كەئەگەرى سەرهەڵدان و بەهێزبوونى هەیە لەكوردستان، چارەنووسى هەموو ئەوانە بەیەكەوە یەكلادەكاتەوە.
پرۆژەى سیاسى گۆڕان ئەوەیە حكومەت و پەرلەمان و یاساو دامودەزگا سەربازى و ئەمنیەكان و داهات و سامانى گشتى دوور لەدەستى قۆرخكارى پارتى و یەكێتى رێكبخاتەوەو بۆ ئەو مەبەستەش دەیەوێت كەڵك لە ئیسلامیەكان وەربگرێت، كە تائێستا پێچەوانەكەى روویداوە واتە ئیسلامیەكان كەڵكیان لەگۆڕان وەرگرتووەو لەداهاتووشدا هیچ ئاماژەیەك و گرەنتییەك نیە بۆ ئەوەى پێچەوانە بێتەوە، لەلایەكەوە بزووتنەوەى گۆڕان بەرامبەر ئاین زۆر موحافەزەكارە و بیرمەندانى راوێژكارى گۆڕانیش دەمێكە خەو بەدەسەڵاتى عەدالەت و تەنمیەى توركیاوە دەبینن بۆكوردستان و لەژێر كاریگەرى ئەوەشدا نەوشیروان مستەفا ئەم دواییانە لەبەرنامەى رووبەڕووى ك.ن.ن بۆ بەدیموكراتى نیشاندانى ئیسلامیەكان وتى " جاران بۆچوونێك هەبوو ئیسلامیەكان ئەگەر بەهەڵبژاردن بێنە سەردەسەڵات دوایى بەرى نادەن" گوایە ئیستا وانیە و هاوپەیمانەكانى ئەو دیموكراتین!!!، ئەوە لەكاتێكدا یەكگرتوو 17 ساڵەو كۆمەلأ 9 ساڵە (واتە بەدرێژایى مێژووى خۆیان) سەرۆكەكانیان ئامادەنین دەسەڵات بۆ هاوڕێكانى خۆیان چۆلأكەن چجاى بۆ نەیارەكانیان. كەوایە ئەگەر پارتى و یەكێتى لەدەسەڵاتى خۆیاندا جێگایەكیان بۆ گۆڕان و ئیسلامیەكان كردۆتەوە ئەوان بێنە سەركار ئەو جێگایە تەنانەت بۆ گۆڕانیش ناكەنەوە.
بەهەموو پێوانەكان پێشمەرجى هەرجۆرە ئازادیخوازى و پێشكەوتنخوازییەك ئەوەیە خەباتى دژى چەوسانەوە (چینایەتى، رەگەزى، نەتەوەیى) بە رەوا ببینى، بەڵام گۆران بۆ هیچكام لەمانە بەرنامەى نیە، لەگەلأ باوەڕى یەكسانى ژن و پیاو ناكۆكە، ماف و بەرژەوەندییەكانى كرێكاران و خەڵكى زەحمەتكێش، ئەو بەشە گەورەیەى كۆمەڵگا، جێگایەكیان لە پرۆژەى سیاسى ئەودا نیە و تەنانەت لەو هەموو بێمافى و چەوساندنەوەیەى كرێكاراندا هیچ جێگایەك بۆ خۆى نابینێتەوەو لەسەروو ئەوانەشەوە بۆتە هاودەستى دواكەوتووترین هێزى سیاسى كۆمەڵگەى كوردستان كە خاوەنى مەترسیدارترین پرۆژەى دژى ئازادى و خۆشگوزەرانین.
ئەوەى گۆڕان زۆر بەتۆخى لەسەرى وەستاوە تەنها دەستاودەستكردنى ئاشتیانەى دەسەڵاتە، ئەوە ئەگەرچى لەكوردستان لەسایەى دەسەڵاتى خێڵەكى پارتى و یەكێتى و لەسایەى ئیسلامیەكان كە خەو بەخەلافەتى ئیسلامییەوە دەبینن و تەنانەت لەسایەى گۆڕانیشدا زۆر ئەستەمە، بەڵام ئەگەر بەدیش بێت لەباشترین حاڵەتدا تەنها عەدالەتى سیاسى بەدیدێنێت و عەدالەتى كۆمەڵایەتى و ئابوورى دەستبەر ناكات و گرەنتى ئەوە نادات كە ئەو دەسەڵاتەى بەوپەرى دیموكراتى دێتەسەركار ئەویش بەهەمانشێوە پارێزەر و رێكخەرى بەرژەوەندییەكانى دەستەیەكى حاكم یان چینێكى سەرمایەدار نابێت و ژیانى خەڵكى هەژارو نەدار نابێتە بارمتەى بیانووى پڕوپوچى وەك كورتهێنانى بودجەو ساسەتى ستراتیژى و دوژمنى دەرەكى و بەرژەوەندى باڵاى نیشتمان، ئەگەر هەڵبژاردنەكانیش بێگزى و پاك بەڕێوە بچن (كە ناچن) ئەمەش هیچ دەرگایەك بەڕووى كەسایەتى و رێكخراوەكانى چینەكانى خوارەوەدا ناكاتەوە بۆ بەشدارى لەدەسەڵاتى سیاسى و حیزبە بێ پارەو بێ پشتیوانەكان تەنها لەپەراوێز و خەڵكیش تەنها وەك دەنگدەرى بێدەسەڵات دەمێننەوە و ئەوەى روودەدات تەنها ئاڵوگۆڕە لە ژمارەى كورسى و پۆستەكانى فڵان و فیسار حیزب یاخود چەندكەسى لابەلا دەكاتە میوانى رەزاگرانى پەرلەمان و دەیانخاتە ژێر رەحمەتى دیكتاتۆریەتى زۆرینەى كەمینەیەكەوە، ئەمە چ دەسكەوتێك بۆ بەخەڵك بەدیدێنێت، بەتایبەتیش ئەگەر ئەو دەسەڵاتەى لەسایەیدا بەرهەمدێت وەك گۆڕان لایەنگرى بازاڕى ئازاد و سپاردنى ئابورى بەكەرتى تایبەت بێت، كە قازانج و كەڵەكەى سەرمایە هەموو شتێكە تیایدا. گۆڕان دژى كە قۆرخكارى پارتى و یەكێتیە، بەڵام هەرگیز بەڵێنى ئەوە نادات ئەو حكومەت و پەرلەمان و دامودەزگاو داهات و سامانە دواى پارتى و یەكێتى چۆن دەگەڕێنەوە بۆ خەڵك و دەخرێنە خزمەتى بەرژەوەندى گشتیەوە، لەكاتێكدا ئەو خۆى لایەنگرى كەرتى گشتی و زیادكردنى رۆڵى دەوڵەت نیە لەدەستەبەركردنى ژیانى خەڵكداو ئەوانە هەموویان دەكەونە دەست توێژێكى دەسەڵاتدارو بازاڕى كوێر بەپێوانەى خواست وخستنەڕوو هەموو شتێك دیاریدەكات و تەنانەت ژیانى ئینسانەكانیش دەخاتە ئەم موزایەدەیەوە.
گرفتێكى دیكە ئەوەیە بزووتنەوەى گۆڕان ناسنامەو هەوییەتى خۆى دەشارێتەوە، دروشم و بەرنامەكەى گشتى و لاستیكیە، زۆر پۆپۆلیستەو تەماحى لەهەموو بزووتنەوەكاندا هەیە، كەمالیستەكانى توركیاو نازى ئەڵمانیا و فاشى ئیتالیاو بەعس لە عێراق بەهەمان شێواز و ناسنامەوە هاتن و هەوڵیانداو هەموو رێگایەكیان گرتەبەر بۆئەوەى ژێرپێى هەموو بزووتنەوەكان خاڵى كەن و سوارى شەپۆلى نارەزایەتى خەڵك بوون و سەرەنجام كۆمەڵگایان بەو ئاقارانە گەیاند كە مێژووى مرۆڤایەتى شەرم دەكات لەگێڕانەوەیان. من ناڵێم گۆڕان ئەمە دووبارە دەكاتەوە، بەڵام مەترسى ئەم ڤایرۆسە لەناو گۆڕاندا ئەوەیە كە ئەو لەسەر ئاستى ناوخۆ و دەرەوە، خۆى بەدووردەگرێت لە بزووتنەوە ئازادیخواز و یەكسانیخوازەكان و دۆستەكانیشى لەكوردستان ئیسلامیەكان و لەعێراق شۆڤێنیەكان و لەناوچەكە ئێران و لە جیهان ئەمریكایە.
گۆران پشتئەستوور بە كۆمپانیایەكى راگەیاندنى زەبەلاحى پڕمەسرەف، هەوڵدەدات نارەزایەتى خەڵكى كوردستان بكاتە هاوزەمانى دروستبوونى خۆى، بەڵام لەراستیدا ناڕەزایى لەدەسەڵاتى پارتى و یەكێتى و داخوازى بەدیهێنانى چاكسازى لەسەرەتاى نەوەتەكانەوە هەیە، یەكێتى بێكاران كە هیچ چاودێرو مێژوونووسێكى بەویژدان ناتوانێت فەرامۆشى بكات، دواى سەرهەڵدانى گۆڕان نەبوو، نەزیر عومەر و بەكر عەلى وەك رابەرانى خەباتى جەماوەرى لەسەردەمى دەسەڵاتى ئەواندا شەهیدكران، لەو سەردەمەشدا سەركوتى بەردەوامى كۆمۆنیستەكان و تەسفییەى جەسەدىو بارەگاداخستن و یاساخكردن و سزاى سیاسى بەرێوەدەچوون، رێكخراوە جەماوەرییەكانى ژنان، خوێندكاران، كارمەندانى نەخۆشخانەكان، كارگەكانى جگەرەو چیمەنتۆ و كارگە ئەهلیەكان و مانگرتن و چالاكیە سیاسى و جەماوەرییەكانیان وە هەروەها خۆپیشاندانە جەماوەرییەكانى خەڵك لەزاخۆوە تاكفرى دژى ناعەدالەتى دەسەڵاتى پارتى و یەكێتى و بەرامبەر نەبوونى مەوادى خۆراكی، پێش ئەوان بوون و دەسەڵاتى پارتى و یەكێتى و شەڕى نێوانیان گورزى كوشندەى لەم بزووتنەوەیە وەشاند كە رابەرانى ئیستاى گۆڕان بەخوێن و ئێسكەوە چوونە پشتى ئەم شەڕە دەسەڵاتخوازانەیەو بەنینۆك و ددانەوە سەركوتى نارەزایەتى و خەباتى جەمارى خەڵكیان دەكردو نارەزایەتییان بەخیانەتى نیشتمانى دەزانى، خۆپیشاندانەكانى ساڵەكانى 2006 و 2007 نارەزایەتى بەربڵاوى خەڵكى كوردستان بوون، تەنانەت لە خۆپیشاندانەكانى دواى 17ى شوباتى ئەمسالأ ئیقلیمگیرترو سەراسەرى تر بوون، هەڵسوڕاوەكانى دوێنێى ئەو ناڕەزایەتیانە لەلایەن هەڵسوڕاوانى ئەمڕۆى بزووتنەوەى گۆڕانەوە زیندانى دەكران و وەك تاوانبار لیپرسینەوەیان لەگەلأ دەكرا.
دیارە بەهیچ شێوەیەك مەبەستم ئەوە نیە خوێندنەوەى ئێستامان بۆ گۆڕان لەسەر بنەماى رابردووی هەڵسوڕاوەكانى بكەین، بەڵكو تەنها دەمەوێت ئەوە نیشانبدەم كە سەرهەڵدانى نارەزایەتى خەڵكى كوردستان گرێدراونیە بە سەرهەڵدانى گۆڕانەوە، وەك یەكێك لەسەركردەكانى لەدیدارێكدا دواى هەڵبژاردنى 25/7/2009 راستگۆیانە وتى "ئێوەكردتان ئێمە بردمان" ئەوان هاتن بەو ناڕەزایەتیە بوون كە لە1991 دەستى پێكردبوو. بەڵام ئەو كتومت وەكو یەكێتى و پارتى لەدەرەوەى خۆى و هاوپەیمانێتیەكانى دان بەهیچ شتێكى تردا نانێت و بگرە دژایەتیشى دەكات و هەرلێرەشەوەیە ئەو مێژووە رەتدەكاتەوە.
یەكێك لە موعاناتەكانى ئێمەمانان و هەڵسوڕاوانى سەربەخۆ لەماوەى دوو مانگى خۆپیشاندانەكاندا سكتاریزم و مامەڵەى نادیموكراتى گۆڕان بوو، جگە لەوەى تیمى تایبەتیان هەبوو بۆ رێگرى لە ئێمە و دوورخستنەوەو ئیزعاجكردنمان تەنها لەبەر بیروباوەڕمان، لەراگەیاندنەكانیش سانسۆریان لەسەر دانابووین كەتائێستاش درێژەى هەیە، وێنەو وتارەكانیان دەقرتاندین، بەپێچەوانەى ئەو هەموو تەشریفاتەى بۆ كەسانى كۆنەپەرست وتیرۆریستیان دەكردو دەیكەن، بەپێى ئەو بەڵگەنامانەى بڵاوبوونەتەوە بەڵێنیانداوە رێگرى بكەن لەسەرهەڵدانەوەى خۆپیشاندانەكان و وەك یەكەم هەنگاوى ئەو كارەش پێداگرییانكرد لەسەر هەڵوەشاندنەوەى ئەنجومەنى مەیدانى ئازادى و هەموو ئەنجومەنەكانى شاروشارۆچكەكان و بایكۆتى هەڵسوڕاوانى دەرەوەى خۆیان كرد، لەو پرۆژە چاكسازییەش كە پێشكەشیانكردووە، زیاتر لە پارتى و یەكێتى داخوازییە پێشكەشكراوەكانى خەڵكى كوردستانیان فەرامۆشكردووە.
ئەمانە چارەنووسى بزووتنەوەى گۆڕان بەجێیەك دەگەیەنن كە نەبۆخۆیان مایەى دڵخۆشیەو نە بۆ خەڵكى نارازیش ئومێدێك دەبەخشێت.

[email protected]