سەعەی هاوڕێم 2

Thursday, 04/04/2013, 12:00

سەعەی هاوڕێم بۆی گیڕامەوە و وتی:-
شەو درەنگە دونیا خامۆشە، لە سەر جێ درێژ بوومە و چرکەکانی پێش نوستنمە، گوێم لە پشیلەیە ئەوەڕێ ، سەگ ئەمیاوێنێ، کەڵەشێر لە شیرین خەوە و مریشکەکان پاسەوانن..........
لاتان سەیر نەبێ ئێرە کوردستانە!!!! هیچ کەسێ گونجاو لە شوێنی گونجاو نیە و کەسیش لە بواری زانستی و شارەزایی خۆی کار ناکات!!! بۆیە ئاژەڵەکانیش ئەڵێن:-
- بۆ لە ئێوە عادەتە و لەئێمەش عیبرەتە؟؟!!
لەگەڵ هەناسەیەکی ساردەوە و بە دڵێکی پڕ کەسەرەوە بۆ ئەو هەموە حەیفەی کە لەم کوردستانە شیرینەیا هەیە و کۆتایی پێ ناهێنن، چاوە کزە ئاوات نەدیتەکانم پێڵۆکانی نایە سەر یەك چومە ناو خەوێکی ئەرخەوانی خۆش.
لە پڕ هەستم بە دەستێکی نەرم و ناسك کرد گەشتێكی پڕ سۆز ئەکات لە ناو شەقامەکانی قژە زوو سپی بووەکەم و نەغمەیەکی ناسکیش ئەچرپێنێ بە گوێما:-
ئــازیــز ئەوا کاتژمێر حەوتە، خواردنم ئامادەکردوە و هەستە با دوا نەکەوی لە دەوامت، (لە دڵی خۆما وتم: ئەمە حەلەی ژنمە؟!! دیارە ئاخیر زەمان نزیك بۆتەوە چونکە هەرگیز شتی وای نەکردوە و لێشی ناوەشێتەوە بیکا).
تا من نانەکەی بەیانیم خوارد چالاکانە هەستا کراس و پانتۆڵی بۆ ئوتو کردم و پێڵاوەکەشی وەها جوان بۆیاغ کرد و سڕێوە پێم حەیف بوو ئەو پێیە چڵکنانەی خۆمی تێکەم. بەر لەوەی لە ماڵیش دەرچم دوو ماچی رەنگینی لە سەر روومەتە سیسەکانم نەخشاند و وتی:-
- گەر دەوامت تەواو بوو زوو وەرەوە بیریت ئەکەم!!!!!
بە چواردەورەی خۆما ئەمڕواند تا بزانم لەگەڵ منێتی یان کەسێکی تر هەیە لەگەڵمانا. هاتمە دەرێ و بڕوام بەخۆم نەئەکرد کە ئەم نەفرەجایە بۆتە دەنکە هەنارە!!!! ئۆتۆمبیلەکەم شورابوو ، چەپکە نێرگزێکیش لەسەر دەشپول داندرابوو. کەوتمە رێ و رادیۆم کردەوە تا گوێبیستی هەواڵەکانی ئەمڕۆبم سەیروسەمەرم پیست:-
- حکومەتی هەرێم بڕیاریدا پارەی داهاتی هەناردەی نەوتی کوردستان داپەش بکا بە یەکسانی لەسەر هاوڵاتیان و هەموو کەسێ مانگانە لەگەڵ پسولەی خۆراك بڕە پارەی خۆی وەرەگرێ!!!!!!!!!!!!!!!!! لەخۆشیا پڕ بە دەنگ هاوارم کرد بژی یابان!!!!
- بیمەی بێ کاری بۆ هەموو کەسێ سەرف ئەکرێ تا کار ئەدۆزێتەوە و مناڵیش تاکو تەمەن 18 ساڵی مەنگانەیەکی تایبەتی خۆی هەیە لە حکومەتەوە!!!!!! ئەمجارەیان دەسم لەسەر هۆرن دانا و کردم بە بەزم و رەزم و وتم بژی ماهاتما غاندی (لێم مەگرن تێکچوم لە خۆشییا).
- وەزارەتی رۆشنبیری رایگەیاند کە نەورۆزی داهاتوو هەر چوار پارچەکەی کوردستان بەیەکەوە ئاهەنگ ئەگێڕن و باراك ئۆباما و جنێڤەر لۆپێزیشیان بانگهێشت کردوە و ئەوانیش بە جلی کوردێوە بەژدار ئەبن. لە تاوا ئەمجارەیان دەستم کرد بە حەیران گۆتن (حەیران دەرێێێێێێم براینە برادەرینە،
نەورۆز نەورۆزە
شاییە رەشبەرەکە جەژنە پیرۆزە
ئۆباما سەرچۆپیکێشە و گاوانیش لۆپێزە!!!! (دەنگت نەڕزێ سەعە).
- وەزارەتی کارەبا رایگەیاند کە ئیتر کارەبە 24 کاتژمێر دەبێ و لە مانگی داهاتوشەوە کوردستان کارەبا دەفرۆشێتە تورکیا و سوریا و ئێران و مالیزیا. بە دەستی خۆم نەبوو گریام و وتم رەحمەت لە گۆڕت خاڵە ئەدیسۆن دەبی سەرت بەرز بێ بە بەرپرسانی کورد و ێۆمال!!
- وەزارەتی تەندروستی بڕیاریدا کە لەمەودوا چارەسەر و دەرمان بە خۆڕایی ئەبێ بۆ هاوڵاتیانی کوردستان!!! (لێدە سەعە ئیتر بە کەیفی خۆت شیرینی و سوێری و چەوری بخۆ و خەمی جەڵتەت نەبێ چونکە خەمخۆرت بۆ پەیا بوو).
- وەزارەتی پیشەسازی رایگەیاند کە 88 کارگەی گەورە لە کوردستان ئەکرێتەوە و بێ کاری نامینێ و ئیتر کرێکاری ئۆروپیمان پێویست ئەبێ!! (کرێکارانی جیهان ئیتر تێر کەباب ئەبن).
- یانەی هەولێر بووە پاڵەوانی ئاسیا و دهۆکیش پلەی دووەمی بە دەست هێنا لە فوتبۆڵ، (کورە بتخۆم مارادۆنا).
پاش ئەم هەمووە هەواڵە فێنك و خۆشانە رادیۆکەم کوژاندەوە و ئەندازەی سەرسامیم وەکو پەرلەمانتارەکانمان بوو کاتێ کە گوێیان لێ بوو سەرۆك خۆی کاندید ناکاتەوە بۆ پۆستەکەی لە هەڵبژاردنی داهاتودا. هەروەها سیمای حزبی لە دامودەزگا حکومیەکان نامینێ.
گەیشتمە ترافیك لایتێ و بینیم دوو وەزیری بەڕێز وەك هاوڵاتی ئاسایی لە ناو ئۆتۆمبێلەکەیان لە سور راوەستاون و چاوەڕێی سەوز ئەکەن!! سەرۆکی پەرلەمانیش بە سواری پاسکیل بەرەو پەرلەمان ئەچێ!! شەقامەکان خاوێنە و خەڵکی دەبە ئاوە بەتالەکان و کلێنێکسی پیس فڕێنادەنە دەرەوە لە جامی سەیارەکانیانەوە. ئەم بەیانیە گوێم لە هۆرنی ئۆتۆمبیلەکان نەبووە و شۆفێرەکان هەستیان کرد کە ئەم زەڕڕەی هینە خەلکی نا ئارام دەکات!! لە دڵی خۆمەوە وتم 100 رەحمەت لە گۆڕت مامۆستا قادر کابان چەن دوور بین بووی کە ئەدووت :- جادە چۆڵ و سێبەر بوو.......... پڕ بە دڵ حەزم ئەکرد بچم بۆ گۆڕستان لە دیار گۆڕەکەی باپیرم بوەستم و بڵێم حاجی گیان هەستەوە هەر ئەدووت :- کورد قەد نابێ بە هیچ چونکە نەفام و خۆخۆرین. عەفوت فەرموو، هەستەوە تەماشاکە ئەمڕۆ ئەوەندە هۆشیار و فامدارین وەکو نافورە زانست و ئەدەب و رەوشتبەرزیمان لێ ئەتکێتەوە. میللەت هەمووی نەرم و ئارامە، کەس دەنگی بەرز ناکاتەوە.
لە پڕ گوێم لە هاوارێك بوو تەختی ئارامی و بێدەنگی روخاند و خاپووری کرد:-
- کورە سەعە پرچت بە بڕینچێ هەستە لە خەو ئەوا سەعات هەشت و نیەو ئەی کەی ئەچی بۆ دەوام هەی زەغەلی تەمبەڵ؟! رەبی خوا لە کۆڵمتکاتەوە پێم بڵێن بێوەژنەکەی سەعە گێژ!!
راچەنـیـم لە جـێ کە روانـیـیـم ئەوە
بۆم ئاشکرا بوو هەرچیم دی خەوە