مەلا كرێكار لە نێوان ئاغاى حوشترى و ئاغاى موزعیجیدا نەخشەى شارەكانى لىَِ تێك چووە؟:

Friday, 13/01/2012, 12:00

مەلا كرێكار لە چاوپێكەوتنى شەوى (12/ 1/2012) لە كەناڵى(nrt) دەڵێت لە كاتى شەرى ناوخۆى نێوان پارتى و یەكێتى ئێرانیەكان لە كەزنەزان لاى یەكێتى بوون و لە هەولێریش لە قەلا لاى پارتى بوون، نازانم مەلا هەر لە بنەرەتەوە بە هەڵە لە شتەكان تێگەیشتووە یان بە هەڵە ئەو مێژووە دەگێرێتەوە، لەشەرى ناوخۆدا رووى نەداوە پارتى لە هەولێر بێت و یەكێتى لە كەسنەزان، كاتێك یەكێتى دەستى بەسەر هەولێردا گرت، كەسنەزان بە دەستى پارتى مایەوە، یەكێتى بە تاكتیكێكى جەهەنمى و پر مەترسى دەستى بە سەر كەسنەزاندا گرت، لەو هێرشەى كە لە رێگاى گواستنەوەى لۆرى ئاژەڵەكانەوە ئەنجامى دا، بەڵام رۆژێك زۆربەى چەكدارەكانى یەكێتى ئەو شارەیان چۆڵ كردبوو، لەوەیە چۆڵ كردنەكە هەر لە ئیهمالى بووبێت، هەواڵ گەیشتە پارتى و ئەوانیش رۆژى نیوەرۆ بێ شەر دەستیان بەسەر كەسنەزاندا گرت و ئیتر لەو مێژوەوە كەسنەزان بە دەستى پارتیوە بووە و هەولێرێش بە دەستى یەكێتى تا (31) ئابى (1996). پاش ئەو مێژوەش هەولێرو كەسنەزان هەر بە دەستى پارتى ماونەتەوە تا ئەمرۆ.

هەر لەسەروبەندى ئەم جۆرە گفتوگۆیانە دەبێت پرسیارى ئەوە بكەین:
ئایا ئێمەى كورد دەمانەوێت چى بكەین؟
ئایا سیستەمێكى مۆدرێن ودیموكراسى و كراوە دامەزرێنێن یان بگەرێننەوە بۆ مێژووى هەزارو چوار سەد ساڵى پێش ئێستا كە تا ئێستا ئەو شێوازە نەیتوانیوە حوكمرانییەكى گەنجاو بەرهەم بێنێت، ئایا ئێمە سیستەمێكى وەك و وڵاتانى ئەسكەندەنافیامان هەبێت كە پەناى دەیان وەك مەلا كرێكارى داوە یان دەسەڵاتێك وەك ئەوەى تالیبان، ئایا هیچ نەبێت لاسایى ئیمارات بكەینەوە لە بوارى ئابوورى و كرانەوەدا بە رووى جیهاندا یان وەك و ئێران بین؟.
ئایا وەك و یەهود و ئیسرائیل بین كە لە ناوخۆدا توانیویانە سیستەمێكى دیموكراسى پەیرەو بكەن و تواناكانى دەوڵەتە زلهێزەكانى دونیایانیش خستووەتە خزمەتى سیاسەتى خۆیانەوە. یان وەك و سۆمال بین، ئەڵى سۆمالیەكان هیچ كێشەیەكى سیاسى و ئابوورى و كۆمەڵایەتیان نەماوە تەنها چەند بارێك نەبێت لە خاكى وڵاتێكى دیكەى وەك و كینیا كە لەم ماوەیەدا چەند چەكدارێكى سۆمالى هێرشیان كردە سەر چەند بارێك لەو وڵاتەو چەند كەسێكیان كوشت.
پێم وایە كاتى ئەوە هاتووە گەلى كورد بریارى گەورى مێژووى خۆى بدات، ئەوەش بە بەرزكردنەوەى دروشمى ((ئاین و ئاین ناسى و خوا پەرستى بۆ خواو قییامەت، كاروبارى دەوڵەت و حوكمرانیش بۆ خەڵكى پسپۆرو شارەزا)). ئەگەر ئاین بۆ ئەم دونیاو كورسى و دەسەڵات بەكار بێت ئەوە دەكەوێنە بازنەیەكى بەتالەوە و بەهیچ ئەنجامێك ناگەین، لە باشوورى كوردستان خەڵكانێك بە ناو نەتەوەو پاڵەو رەنجدەرانەوە ئەمە دەكەن، ئەى ئەگەر خەڵكێك بەناو خواوە حوكم بكات دەبێت چى بكات؟. ئەمەو فرسەت بۆ ئیسلامى سیاسى لە ناوچەكە رێك كەوتووە بۆ حوكم رانى، جارێك زووە حوكمى لەسەر بدرێت، بەڵام هەر لە ئێستاوە مەترسى لە توركیا دروست بووە بۆ گەراندنەوەى توركیا بۆ سیستەمى تاكە حزبى، ئایا چەند ساڵى دیكە حزبێكى بەناو ئیسلامى كۆنترۆڵى دەسەڵات دەكەت بێ دەستاو دەست كردنى دەسەڵات؟ ئەوە پرسیارێكەو ئایندە وەڵامى دەداتەوە، ئایا چارەنوسسى تونسیەكان و میسریەكان وەك ئەفغانیەكان و ئیرانیەكان دەبێت؟، ئەوەش ئایندە وەڵامە دەداتەوە.
لە كۆتایى باسەكەشدا دەڵێم پارتى دەبێت رەچاوى سروشتى خەڵكى بادینان و هەموو كوردستان بكات ئەگینا بە دەردى شاى ئێران دەچێت، دەبێت دەسەڵات لەناو شارەكاندا بە تایبەت شارە بجوكوكان مۆڵەتى هەر جێگایەك نەدات كە لە گەڵ كەلتورى كۆمەڵگەى كوردیدا ناگونجێت. دەكرێت جێگاى گەشتیارى ستانداردى جیهانى لە هەندێك شوێنى گەشتیارى دور لە ناوەندى شارەكان هەبێت، ئەوەش بۆ ئەوەى هەم خەڵكى ئێمە پارەكەى نەبات لە توركیاو لوبنان و ئەو شوێنانە سەرفى بكات، هەم گەشتیارى ناوچەكەش روو لە باشوورى كوردستان بكەن و داهاتى گەشت و گوزاریش ببێتە بەشێك لە داهاتى نیشتمانى.