له سی و دوو ساڵیادي له سێداره‌داني شێره‌کوڕاني ڕێکخراوی هه‌ڵــــــــــــــــــــــــــۆی سوردا قســـــــــــــه‌م هه‌یــــــــــ
Thursday, 01/04/2010, 12:00
له‌رێگه‌ی خزمایه‌تیمه‌وه له گه‌ڵ (یادی هه‌ر زیندوو بێت) ره‌حمه‌تی حاجي داود حاجی حسین که له بنه‌ماڵه‌ێیه‌کی دێرینی ناسراوی شاری مه‌نده‌لیه ، ئاشنای کارو چالاکی رێکخراوی هه‌ڵۆی سور بوم . کاک داود ، هه‌ر له دێره‌وه وه‌ک که‌سایه‌تێه‌کی تێکۆشه‌رو شیوعی له ناوچه‌که‌داو له شاری به‌غداد ناسراو بوو ڕۆڵێکی دیاری هه‌بو له‌و مه‌یدانه‌دا ، به‌ڵام به‌هۆی ئه‌و هه‌ڵه‌و کۆسپانه‌ی حزبی شیوعی تێیکه‌وت دوا به دوای شۆڕشی چوارده‌ی گه‌لاوێژی ساڵی1958 و دوای گرێدانی به‌ره‌ی نیشتمانی له‌گه‌ڵ حزبی به‌عسی فاشی ، په‌یوه‌ندی ئه‌و ره‌حمه‌تیه له‌گه‌ڵ حزبی شیوعی سارد بوو هاته کۆتایی و که‌وته هه‌وڵی په‌یوه‌ندیکردن به کۆمه‌ڵه‌ی مارکسی لێنینیه‌وه له رێگه‌ی شه‌هید تالب رۆسته‌می برامه‌وه که ئه‌و کاته هه‌ڵسوڕاوێکی چالاکی کۆمه‌ڵه بو * . من هه‌رچه‌نده ئه‌و کاته ئه‌ندامی حزبی شیوعی بوم به‌ڵام په‌یوه‌ندیه‌که‌م له‌گه‌ڵیاندا ئه‌وه‌نده توندو تۆڵ و جێگه‌ی متمانه بو که نهێنیه‌کانمان له یه‌کدی نه‌ده‌شارده‌وه ، بۆیه من ئاگاداری ئه‌و جمو‌جو‌ڵه‌ی هه‌ردوو ره‌حمه‌تی و په‌یوه‌ندیانبوم به کۆمه‌ڵه‌وه‌و دواتریش په‌یوه‌ندی شه‌هید سه‌لمانی کوری کاک داود به رێکخراوی هه‌ڵۆی سوره‌وه به تایبه‌تیش که له هه‌مو سه‌ردانێکیان بۆ سلێمانی له ماڵی من ئه‌مانه‌وه .
له سه‌ره‌تای مانگی گه‌لاو‌ێژي ساڵی 1977و دوای کوشتنی خۆفرۆش (عوسمان فایه‌ق) له رۆژی 16/5/1977 ، شه‌هید سه‌لمان و خوشکانی به‌سه‌ردانێکی پشوی هاوین هاتنه میوانیمان بۆ سلێمانی ، هه‌ر به گه‌یشتنیان و دوای گفتوگۆێیه‌کی کورت شکی ئه‌وه‌مکرد که ئه‌و به‌چکه شێره یه‌کێکه له بکوژانی خۆفرۆش (عوسمان فایه‌ق) له به‌غــــــــداد له‌به‌رده‌م به‌رێوه‌به‌رایه‌تی (ده‌زگای چاپ و بڵاوکردنه‌وه‌ی کوردی) که ئه‌و خۆفرۆشه به‌رێوه‌به‌ری بو ، ئه‌و شکه‌شم له‌وه‌وه په‌یداکرد که شه‌هید سه‌لمان په‌یتا په‌یتا پرسیاری ئه‌وه‌ی ئه‌کرد که ئایا کاریگه‌ری و کاردانه‌وه‌ی کوشتنی عوسمان فایه‌ق چۆنه له ناو دانیشتوانی شاری سلێمانی و هاورێیانی ئێمه.
هه‌ر دوا به دوای گه‌یشتنی شه‌هید سه‌لمان به یه‌ک دوو رۆژ شه‌هید شێرۆی کوری ئه‌ندازیار قادری مه‌لا عبدالرزاق (که ئه‌ویش خزمی هاوسه‌ره‌که‌م بو) چه‌ند جارێک سه‌ردانی شه‌هید سه‌لمانیکرد و به جووته له یه‌کێک له ژووره‌کان کۆ ده‌بونه‌وه ، بۆیه منیش وه‌ک خا‌وه‌ن ئه‌زمونێک ، شکی ئه‌وه‌م په‌یداکرد که ئه‌م دوو لاوه به جه‌رگ و خوێن گه‌رمه له یه‌ک رێکخراودا کار ئه‌که‌ن و ده‌ستیان له کوشتنی عوسمان فایه‌قدا هه‌یه (كه واش بو) ، زیاتریش ئه‌و شکه‌م هاته دڵنیابون کاتێک ئاگریان به‌ردایه داره‌کانی مه‌یدانی داره‌کانی کانێسکان که ئێستا به مه‌یدانی داره سوتاوه‌که ناوبانگی ده‌رکردوه .
شه‌هید سه‌لمان له ژێر کاریگه‌ری گه‌رموگو‌ڕیو ته‌ووژمی ئه‌و بیرو بۆچونه‌ی له‌و رۆژانه‌دا باو بون له ناو هه‌ندێک له لاوه ناسێۆنالیسته چه‌پڕه‌وه‌کانداو (دواجاریش له ژێر کاریگه‌ری چه‌ند هۆکارێکه‌وه ، کپ بونو دامرکانه‌وه) ، وه‌ک که‌سێکی مارکسی لێنینی و هه‌واداری ماوو هێڵی جیڤارا له‌به‌رپاکردنی شۆڕشدا ، توندڕه‌وانه خۆی نمایشئه‌کرد ، له هه‌موو گفتو گۆو ده‌مه‌ته‌قه‌ێه‌کدا بێسڵکردنه‌وه‌و روو به روو پێی ئه‌وتم که ئێوه لاده‌رو (ته‌حریفین) و به یه‌کیه‌تی سۆڤیه‌تیشی ئه‌ووت ئمپریالیه‌تی سۆڤیه‌تی ، سوریش بو له‌سه‌ر ئه‌وه‌ی که ده‌بێت له سه‌ر تاپای عێراقداو له‌سه‌ر بنه‌ماێیه‌کی نوێ حزبێکی شیوعی راسته‌قینه بهێنرێته‌کایه‌وه به سودوه‌رگرتن له رێنمایه‌کانی لێنین له کتێبی (ما العمل) که وه‌کو له‌و گه‌ێنرابو گوایه حزبی شیوعی ئه‌و کتێبه‌ی له ئه‌ندامه‌کانی قه‌ده‌غه‌کردوه ، له کاتێکدا من خۆم دانه‌ێیه‌کم له‌و کتێبه هه‌بوو پێشکه‌شی ئه‌ومکرد .
دوای تێپه‌ڕبونی چه‌ند رۆژێک و دوای ئه‌وه‌ی ته‌واو دڵنیابوم که هاتنه‌که‌ی ئه‌و جوانه‌مه‌رگه بۆ سلێمانی کارێکی نهێنی ترسناکی به‌دواوه‌یه‌و په‌یوه‌ندی به کوشتنی عوسمان فایه‌قه‌وه هه‌یه ، به ته‌واوی تینم بۆ هات و له ترسی ئه‌وه‌ی نه‌وه‌ک ئه‌م خزمه‌م له ماڵی مندا بگیرێت و ئه‌م به‌چکه شێرانه ده‌ست دوژمن بکه‌ون ، بۆیه ناچار بوم داوای لێبکه‌م به هۆی حزبمانه‌وه ڕه‌وانه‌ی ده‌ره‌وه‌ی شاری بکه‌ین بۆ لای هاورێیانی کۆمه‌ڵه ، به‌ڵام هه‌وڵه‌که‌م بێسودبو چونکه ئه‌و له‌و جۆره که‌سانه نه‌بو که ده‌ستبه‌رداری تێکۆشان بێت له ناو رێکخراوی هه‌ڵۆی سوردا .
دوای گه‌ڕانه‌وه‌ی بۆ به‌غدادو سه‌رنه‌گرتنی هه‌وڵێ رێکخراوی هه‌ڵۆی سور بۆ کوشتنی خۆفرۆش هاشم عه‌قراوی و به هۆی دزه‌کردنی سیخورێک به ناوی کاوه بۆ ناو رێکخراوه‌که‌یان، زوربه‌ی ئه‌ندامانی رێکخراوه‌که که‌وتنه ده‌ستی دوژمن و شه‌هید سه‌لمانیش له 21/8/1977 ده‌ستگیرکراو تا سه‌ره‌تای مانگی یه‌کی ساڵی 1978 له‌ژیر ئه‌شکه‌نجه‌دا مایه‌وه .
له هه‌وڵێکی پاڵه‌وانه‌شدا شه‌هید سه‌لمان و شه‌هید ملازم جوامێر و هاورێیه‌کی دیکه‌یان هه‌وڵی ده‌ربازبونیاندا له گرتوخانه‌ی ئه‌منی گشتی به‌غداد ، به‌ڵام به‌داخه‌وه شه‌هید سه‌لمان به برینێکی سه‌خته‌وه‌و ملازم جوامێریش له یه‌کێک له کۆڵانه‌کانی نزیک گرتوخانه‌که ده‌ستگیرکران ، هاورێی سێهه‌میشیان له دوا کاتدا له هه‌وڵی ده‌ربازبونه‌که په‌شیمانبوه‌وه .
ئه‌م زانیاریانه‌و هه‌ندێک زانیاری دیکه‌م له‌سه‌ردانێکی شه‌هید سه‌لماندا ده‌ستکه‌وت کاتێک له خه‌سته‌خانه‌ێیه‌کی ئه‌منی گشتی که‌وتبو بۆ چاره‌سه‌رکردنی برینه‌کانی که له‌ناوقه‌دیه‌وه به‌ره‌و خوار له جوڵه‌کردن که‌وتبو به‌هۆی شکاندنی بڕبڕه‌کانی پشتی له ئه‌نجامی ئه‌و ده‌ستڕێژه‌ی به کڵاشنکۆف له پشته‌وه لێیکرابو کاتی هه‌ڵهاتنی له گرتوخانه‌ی ئه‌منی گشتی ، بۆیه به په‌له‌و به چرپه باسی چۆنیه‌تی کوشتنی عوسمان فایه‌قی بۆ کردم که خۆی به ده‌مانچه‌ێیه‌کی بێده‌نگ له به‌ر ده‌رگای به‌رێوه‌به‌رایه‌تیه‌که‌یدا داویه‌تیه به‌ر گولله ، پێش ئه‌وه‌ش چۆن جانتاێیه‌کی مینڕێژکراوی له هۆڵی فڕۆکه‌خانه‌ی سه‌دامی نێوده‌وڵه‌تی ته‌قاندۆته‌وه (ئه‌وه‌ی جێگه‌ی ئاماژه پێکردنه ، له بۆنه‌ێه‌کدا له زانکۆی سه‌واس له له‌نده‌ن باسی ته‌قاندنه‌وه‌ی ئه‌م جانتایه‌مکرد ، فۆاد مه‌عسوم دانی به‌وه‌دا نا که ئه‌و جانتایه جانتای تایبه‌تی ئه‌و بوه و به‌رێکه‌وتیش هه‌ندێک براده‌ری دیکه ئاماده‌بون له‌وانه براده‌رێک به‌ناوی ــ ره‌عد ــ وه‌ک خۆی وتی ئه‌ویش یه‌کێک بوه له ئه‌ندامانی رێکخراوی هه‌ڵۆی سورو ئێستا له له‌نده‌ن جێنشینه) له گه‌ڵ سوتاندنی داره‌کانی مه‌یدانی داره‌که‌ی کانێسکان بۆ شڵه‌ژاندنی باری ئاسایی شار ، دواتریش چۆن وا به ئاسانی به هۆی دزه‌کردنی سیخوڕێکه‌وه ده‌ست دوژمن که‌وتن .
ته‌نها داخی دڵی ئه‌و شه‌هیده ئه‌وه بو که ئاوه‌ها به ئاسانی سیخوڕێکی ڕژێم بتوانێت دزه بکاته ناویان و ده‌ست دوژمن بکه‌ون پێش ئه‌وه‌ی بتوانن ته‌واوی ئاواته‌کانیان بهێننه‌دی .
ئه‌وه‌ی له‌هه‌موی سه‌رنج ڕاکێشتربو وره‌ی به‌رزی ئه‌و بێچوه شێره بو که به نیوه جه‌سته‌ێیه‌که‌وه وره‌ی ئێمه‌ی به‌رز ئه‌کرده‌وه‌و ئه‌یوت خه‌متان نه‌بێت پێش ئه‌وه‌ی برینه‌کانم ساڕێژ ببنه‌وه‌و بشێم بۆ هه‌ڵواسین و له سێداره‌دان ، ئه‌م رژێمه له ناو ئه‌چێت و منیش به سه‌ر به‌رزی دێمه‌وه ناوتان ، کاتێکیش که به‌جێمهێشت و ئه‌ملاو ئه‌ولاو ناوچه‌وانیم ماچکردو هه‌ستی به ته‌ڕی فرمێسکی چاومکرد که رژایه سه‌ر ده‌موچاوی ، به زه‌رده‌خه‌نه‌وه پێی و‌وتم عه‌یبه تۆ شیوعیت چۆن ئه‌بێت بگریت !!!!! .
گرتنو دواجار له سێداره‌دانی ئه‌م پۆله هه‌ڵۆیه له‌رۆژی 10/4/1978، زیانێکی گه‌وره بو بۆکه‌س و کارو بنه‌ماڵه‌کانیا‌ن و گه‌له‌که‌مان و ئه‌و خوێنه به‌ناهه‌ق ڕژاوه‌شیان په‌ڵه‌ێیه‌کی ڕه‌شه به ناوچه‌وانی رژێمه دڕنده فاشیه‌که‌ی سه‌دام و شه‌رمه‌زاریشه بۆ ئه‌و لایه‌ن و که‌سانه‌ی که به شاباشی (کوڕی سێو له باخه‌ڵ) به‌ره‌و ئه‌و کۆتایه‌یان بردن و دواتر به سه‌دو هه‌شتاپله له ڕێڕه‌وه‌که‌یان پاشگه‌ز بونه‌وه‌و ئێستاش ته‌لار و سامان و ده‌سته‌ڵات ، ڕابوردوی له بیر بردونه‌ته‌وه‌و ئه‌و بنه‌ماڵه‌یه‌و به سه‌ده‌ها بنه ماڵه‌ی دیکه‌ی وه‌ک ئه‌وانیان له یادچوه !!!! .
1/4/2010
بۆ چۆنیه‌تی ئه‌م په‌یوه‌ندیکردنه‌ی خودالێخۆشبو حاجی داود به کۆمه‌ڵه‌ی مارکسی لێنینیه‌وه له‌رێگه‌ی تالب رۆسته‌می برامه‌وه ، مه‌لا به‌ختیار له دیدارێکیدا له گه‌ڵ ته‌له‌ڤزیۆنی گه‌لی کوردستاندا باسی چۆنیه‌تی ئه‌و په‌یوه‌ندیکردنه ئه‌کات .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
