خۆزگه وه‌ها ده‌بوو مه‌سعوود!
Friday, 26/02/2010, 12:00
له‌و گوتاره‌ی که مه‌سعوود به‌رزانی پێشکه‌شی کرد له کۆنگره‌ی 11ی یه‌کێتیی قوتابیانی کوردستان باسی سووکایه‌تیکردن ده‌کات به پێشمه‌رگه و به‌تایبه‌تی له په‌رله‌مانی کوردستان، هه‌ڵبه‌ته ئه‌ندامێکی لیستی گۆڕان پێشمه‌رگه‌ی ناوناوه یاخود یه‌کسانی کردووه به "میلیشیا".
بۆ ئه‌مه به‌رزانی زۆر تووره‌بووه و به‌وه نێزناوی ده‌کات که ئه‌مه په‌ڕاندنی هێڵێکه که له هه‌موو هێڵه سووره‌کان سوورتره!
به‌ڵام ئایا نێونازکردنی هێزی پێشمه‌رگه به میلیشیا سووکایه‌تی و سووکایه‌تیکردنه؟
میلیشیا وشه‌یه‌که، چه‌مکێکه که چه‌نده‌ها واتای هه‌یه. بۆ نموونه به درێژزییی خاکی ئه‌مریکا هێزی میلیشیا هه‌ن که به‌ده‌رن له سوپای ئه‌مریکی. ئه‌م هێزانه ڕاسته‌وه‌خۆ له‌لایه‌ن سه‌رۆکی ولایه‌ته‌کان سه‌رپه‌رشتی ده‌کرێن وه‌کوو هێزی به‌رگرین بۆ هه‌ر ولایه‌تێکی ئه‌مریکی.
هه‌روه‌ها میلیشیا ده‌شێ هێزێک بێ له‌و که‌سانه‌ی که خۆیان ئاره‌زوومه‌ندانه چه‌کهه‌ڵده‌گرن بۆ یارمه‌تیدانی هاوڵاتیانی وڵاتێک یان کۆمه‌ڵگایه‌ک.
میلیشیاش هه‌یه هێزی جه‌کداری ڕێکخراوه‌یه‌کی سیاسییه دووره له هێزی چه‌کداری ده‌وڵه‌ت واتا سوپا. ئه‌مانه‌ش هه‌ر ئاره‌زوومه‌ندانه ده‌بن به ئه‌ندام و مه‌به‌ستی یه‌کمیانیش به‌رگریکردنه له هێزه سیاسییه‌که‌یان و بۆ مووچه و پاره کارناکه‌ن (هه‌رچه‌نده ئه‌مه ده‌گۆڕێ به‌پێی سرووشتی هێزه سیاسییه‌که و خودی ئه‌ندامه‌کان). باشترین نموونه‌ی ئه‌م جۆره میلیشیای "حیزبولڵا"یه له لوبنان. حیزبولڵا جه‌نگیوه و ئێستاش ئاماده‌ی جه‌نگاندنه دژی ئیسرائیل و له‌سه‌ره‌تاشه‌وه هه‌ر بۆ ده‌رپه‌ڕاندنی سوپای ئیسرائیل له خاکی لوبنان دروستکرا. هه‌موو که‌سیش پێیان ده‌بێژه میلیشیا و هیچیش نیگه‌ران نابن و به سووکایه‌تیشی دانانێن. چونکه باوه‌ڕیان به خۆیان هه‌یه، باوه‌ڕیان به خه‌باته چه‌کدارییه‌که‌ی خۆیان هه‌یه، چونکه ناڕۆن بجه‌نگێن له‌گه‌ڵ هێزه‌کانی تری لوبنان یان فه‌ڵه‌ستین یان دۆستان!
به‌ڵام بۆ مه‌سعوود ئه‌وه‌نده تووڕه‌بووه له ناوی "میلیشیا"؟
هیچ کوردێکی نیشتمانپه‌روه‌ر "به‌هه‌ڵوێست و کرده‌وه نه‌ک هه‌ر به هه‌ڵپه‌ڕکێی و گۆرانی و ڕسته‌ی زل!) سووکایه‌تی به پێشمه‌رگه نه‌کردووه و نایکات! به‌ڵام کام پێشمه‌رگه؟
چه‌مکی "پێشمه‌رگه" ڕه‌ها نییه به‌ڵکوو ڕێژه‌یییه. واتا هه‌ر تاکێک چه‌کێکی هه‌ڵگرت (هه‌میشه یاخود زۆر جار هه‌ر تفه‌نگ بووه و ئه‌ویش کڵاشینلۆف!) چوو به‌ره‌و شاخ نابێ به‌بێ یه‌کودوو بڵێین ئه‌مه پێشمه‌گه‌یه و ته‌واو!
پێشمه‌رگه كێێه؟
پێشمه‌رگه ئه‌و که‌سه‌یه، ئه‌و تاکه‌یه، ئه‌و ڕۆڵه‌یه که چه‌کی هه‌ڵگورتووه بۆ ڕزگارکردنی خاکه‌که‌ی له‌ده‌ست داگیرکه‌ران و دوژمنان. ناوبراو چه‌که‌که‌ی دانانێ (چونکه چه‌کدانان واتا چۆکدانان، واتا سووکایه‌تیکردن به خود و به چه‌مکی پێشمه‌رگه و پێشمه‌رگایه‌تی!) تاکوو یان شه‌هید ده‌بێ یانیش سه‌رده‌که‌وێ.
پێشمه‌رگه ئه‌و تاکه‌یه که خاوه‌ن هه‌ڵوێسته که نیشتمان و گه‌له‌که‌ی له‌خۆی زیاتر خۆش ده‌وێ و ڕۆحی خۆی ده‌کاته قوربانی بۆپیان و نه ده‌ترسێ له مردن ونه سه‌رشۆر ده‌کات له حزووری دوژمن.
پێشمه‌رگه ئه‌و که‌سه‌یه که مه‌حاڵه چه‌که‌کی ئاراسته‌ی سنگی یه‌کێکی تر بکات له دوژمنی گه‌له‌که‌ی و نیشمانه‌که‌ی به‌ولاوه. ئاماده‌یه بکوژرێ یاخود خۆی بکوژێ به‌ڵا نکه کارێکی ئاوها بکات.
پێشمه‌رگه شه‌یدای ئازادییه، خولیای که‌رامه‌تی نه‌ته‌وه‌یییه، بۆ سه‌ربه‌خۆیی ده‌جه‌نگێ، سنووری خاکی وڵاته‌که‌ی ده‌پاریزێ و یارمه‌تی گه‌له‌که‌ی ده‌دات به‌بێ ئه‌وه‌ی داوای هیچ پاداشتێک بکات، چونکه کاره‌که‌ی خۆی له خۆیدا پاداشته!
ئه‌وی ئه‌م خه‌سڵه‌تانه‌ی سه‌ره‌وه‌ی تیادا به‌دی نه‌کرێت پێشمه‌رگه نییه به‌ڵکوو هه‌ر چه‌کدارێکه و هیچی تر.
ده‌با بزانین ئه‌و پێشمهرگانهی که مه‌سعوود باسیان ده‌کات ئه‌م خه‌سڵه‌تانه‌یان تیایه؟ خۆ هه‌ر به قسه نابێت.
پێشه‌کی با بزانین کێ سووکایه‌تی به پێشمه‌رگه کردووه؟
ئه‌و ده‌بێژێ ده‌ستووری عیراق دانی ناوه به هێزی پێشمه‌رگه ده‌ها چۆن کوردێک دێت و سووکایتی ده‌کات پێێ و ئه‌مه‌ش له په‌رله‌مان.
نه‌خێر ده‌ستووری عیراق دانی نه‌ناوه به پێشمه‌رگه!
له ده‌ستووری عیراق ئه‌م ناوه نه‌هاتووه. نووسراوه "پاسه‌وانی هه‌رێم" و ئه‌مه‌ش بووته چه‌مکێکی ناسراو له هه‌موو عیراقا و خۆشی مه‌سعوود به‌رزانی وهه‌روها جه‌لال تاڵه‌بانی ئه‌مه‌‌یان په‌سه‌ندکردووه و باسیشی ده‌که‌ن له کاتی پێوستدا. باشه کامه‌یان سووکایه‌تییه "میلیشیا" یان "پاسه‌وانی هه‌رێم"؟ ئایا پێویست ده‌کات وه‌ڵامی پرسیاره‌که بده‌مه‌وه. بۆچی ناتوانی له به‌غدا بێژی پێشمه‌رگه و قایل ده‌بی که پێێ بگوترێ پاسه‌وان؟
بۆچی به‌رامبه‌ر کوردێک ئه‌وه‌نده به‌زاتی و چاوسوور ده‌که‌یته‌وه به‌ڵام به‌رامبه‌ر برا عاره‌به‌کانیش هیچ هه‌ڵوێستێکت نه‌بووه ونات بێت؟ کێ سووکایه‌تی به پێشمه‌رگه ده‌کات نووجه‌یفی که گاڵته‌ی به کورد و کوردستان دێت، موتڵه‌گ که تۆ شانبه‌شانی جه‌لال پاکانه‌ی بۆ ده‌که‌ی؟
تۆ دیاره مێژووی خۆتت له‌بیرچووه‌ته‌وه!
یه‌ک پرسیارت لێده‌که‌م و به‌ڵام ڕاستگۆیا‌نه وڵامم بده‌روه!
ژمارهی ئه‌و پێشمهرگانهی پارتی یاخود هی پارتی و یه‌کێتی یاخود هی کوردستان (ئه‌گه‌ر وات پێخۆشتره) چه‌ندن که له جه‌نگی دژی سوپای عیراق و به‌عس و ڕژێمی گۆڕبه‌گۆڕ شه‌هیدبوونه؟ ئه‌مه له پاش ئاشبه‌تاڵه‌وه، واتا له شۆڕشی نوێوه (وه‌کوو خۆتان ناوتان لێناوه به‌هه‌ڵه‌ش نه‌جووبێتم شۆڕشی گوڵانه!).
هه‌روه‌ها ژمارهی ئه‌و پیشمه‌رگانه‌شمان (لێره ده‌بنه شتێکی تر ته‌نانه‌ت له میلێشیای نامێنن!) پێبڵێ که له شه‌ڕی ناوخۆ کوژراون یان شه‌هیدکراون خۆتگوته‌نی؟ ئه‌وانه‌ی که له‌شه‌ڕی شانبه‌شانی یه‌کێتی و سوپای تورکیا دژ به پێشمه‌رگه‌کانی باکوور؟ ئه‌وانه‌شی که له شه‌ڕی شانبه‌شانی خۆتگوته‌نی عه‌ربه شۆڤینییه‌کان که به پێشمه‌رگه‌یان ده‌گووت یاخیبووان واتا عوسات!- کوژراون واتا شه‌هیدکراون دژ به یه‌کێتی و داگیرکردنی هه‌ولێر یاخود ڕزگارکردنی (به‌ڕاستی ڕزگارکردن وداگیرکردن پردی نێوانیان ڕووخاوه!)؟ ئه‌مه جگه له‌و پێشمهرگانهی که له جه‌نگی دژ به پێشمه‌رگه‌کانی ڕۆژهه‌ڵات.
ژمارهی هه‌ردوو لامان پێ ببێژه ئه‌گه‌ر تۆ پێشمه‌رگه لات پیرۆزه و خه‌تی سووره وه‌کوو ده‌ڵێێ؟
بێگومان دواکارییه‌که‌م له ڕووی ته‌کنیکه‌وه ئاسانه و ده‌بێ ده‌فته‌رێکتان هه‌بێ و ناوی یان له‌لایه‌ن که‌مه‌وه ژمارهی شه‌هیده‌کانتان تۆمارکربێت تیایدا. به‌ڵام له‌وانه‌ی له ڕووی سیاسییه‌و یان له‌رووی ئه‌خلاقییه‌وه قورسبێت!
ئه‌گه‌ر هاتوو ژمارهی شه‌هیده‌کانی جه‌نگی دژ به به‌عس واتا سوپای عیراق زیاتر بوو له ژمارهی ئه‌وانه‌ی له شه‌ڕی کوردکوشتن واتا پێشمه‌رگه‌ی تری کوردستان، ئه‌وسا ده‌توانی له‌لایه‌ن که‌مه‌وه نیمچه شانازییه‌ک بکه‌یت به خۆت و پێشمه‌رگه‌کانت یان پێشمه‌رگه‌کانی کوردستان.
به‌ڵام من مسۆگه‌ری ده‌که‌م بۆت که ژمارهی شه‌هیده‌کانت له جه‌نگی دژی به‌عس و سوپای داگیرکه‌ری عیراق ناگاته یه‌ک له ده‌ی ژمارهی کوژراوه‌کان له جه‌نگه‌کانی تر که تێکڕا دژی خودی کورد بووه و بۆ کوشتنی پێشمه‌رگه‌کان بووه و بۆ ده‌ژمن و داگیرکه‌ر بووه و به هاوکاریشیانه‌وه!
پاشان ئه‌گه‌ر بتوانی ژمارهی کوژراوه‌کانی سوپای عیراق و ژمارهی شه‌هیدانی پێشمه‌رگه‌ی لایانی کوردییه‌کانی ترمان پێ بێژی ئه‌وا کاره‌که‌ت جێگای ڕه‌زامه‌ندی گه‌ل ده‌بێت! واتا پێشمه‌رگه‌کانت چه‌ند تاکی دوژمن و چه‌ند تاکی کوردستانیان کوشتووه؟ ئه‌مه‌ش ئه‌گه‌ر یه‌ک له ده نه‌بێ، ئه‌وسا هه‌ر نزیکی ئه‌م ڕێژه‌یه، واتا هه‌ر سه‌ربازێکی دوژمنیان کوشتبێ، ئه‌وا ده پێشمه‌رگه‌یان کوشتتوه له به‌رامبه‌ری! ئه‌گه‌ر وه‌ها نییه فه‌رموو بیسه‌ڵمێنه. ئایا ئه‌مه سووکایه‌تییه به پێشمه‌رگه یاخود تاکێکی کورد پێی بڵێ میلیشیا. تۆ ئه‌م هه‌موو پێشمه‌رگانه‌ت دا به کوشت له پێناوی کورد و کوردستان یاخود له پێناوی به‌رژه‌وه‌ندیی خۆت و پارته‌که‌ت و بنه‌ماڵه‌که‌ت؟ له پێناوی ئازادی یان له پێناوی ده‌سه‌ڵات، له پێناوی خاکه‌که‌ت یان له پێناوی خاکی دوژمن و سه‌روه‌رر‌یی خاکه‌که‌ی؟
که‌س به ئه‌ندازه‌ی تۆ و تاڵه‌ه‌بانی سووکایه‌تیتان نه‌کردووه به پێشمه‌رگه! باوکتیش هه‌مان کاری کردووه! له 1975 ده‌یه‌هاهه‌زار پێشمه‌رگه‌ی به‌جێ نه‌هێشت و به‌ره‌و ئێران ڕۆیی و پاشانیش بۆ ئه‌مریکا. خۆ تۆشی له‌گه‌ڵ خۆی برد! چییان به‌سرهات ئه‌و پێشمه‌رگانه، مه‌گه‌ر به ملکه‌چییه‌وه و نه‌چوونه‌وه عیراق و چه‌که‌کانین ته‌سلیم نه‌کرده‌وه. ئایا سووکایه‌تی له‌مه مه‌زنتر، سووکایه‌تی له‌مه ئابڕووبه‌رتر!
خۆت به زاری خۆت گوتت که 3000 (ئه‌و ژماره‌یه‌ی که گوتی یان ئه‌مه بوو یان 2000 به‌ڵام ژماره گرنگ نییه به‌ڵکوو مه‌بده‌ئه‌که جێگای هه‌ڵسه‌نگاندنه) پێشمه‌رگه‌مان کردووه‌ته قوربانی بۆ تورکیا، هێشتا هه‌ر ڕازی نین لێمان، ئه‌ی که‌ی ڕازی ده‌بن! ئایا پێشمه‌رگه سووته‌مه‌نییه؟ ئایا پێشمه‌رگه‌ی خاوه‌ن دایک و خاوه‌ن ژن و خاوه‌ن منداڵ به‌ردی دامه‌یه، خه‌ڵووزی کووره‌ی حه‌ما‌مه، یاخود موڵکی تۆیه؟ ئاخر وه‌ڵام بده‌ره‌وه خۆ هه‌ر به قسه‌ی زل نابێ ئه‌ویش له‌به‌رده‌م ئه‌ندامه‌کانی حیزبه‌که‌ت که هه‌رچی ده‌بێژی ده‌یکه‌نه چه‌پڵه‌ڕێزان هه‌ر وه‌کوو چۆن به‌عسییه‌کان بۆ سه‌ددامیان ده‌کرد!
پاشان چۆن زاته‌که‌یت ده‌بێژیت ئه‌مانه‌ی ئه‌م قسانه ده‌که‌ن دوژمنان گوایا پاره‌یان ده‌ده‌نێ و هانیان ده‌ده‌ن؟ ئه‌مه زۆر بۆچوونێکی ناشرینه کاک مه‌سعوود! ئه‌گه‌ر وایه ئه‌وه‌تا ئه‌ندا‌مه‌که‌ی په‌رله‌مان زیندووه فه‌رموو بیدا دادگا ئه‌گه‌ر بڕوات به دیموکراسی و مافی مرۆڤ هه‌یه! کێ پاره‌ی وه‌رگرتووه له دوژمن تۆ یان ئه‌وان. وێوه یان ئه‌وان. مه‌گه‌ر له‌هه‌ر چوار داگیرکه‌ر پاره و جه‌کتان وه‌رنه‌گرتووه! ئایا کاتێ که خۆت وجه‌لال له‌گه‌ڵ سوپای تورکیا جه‌نگان دژی پێشمه‌رگه‌کانی باکوور چه‌ند پاره‌تان وه‌رگرت؟ به‌هه‌ڵه نه‌چووبێتم 25 ملیۆن دۆلارتان وه‌رگرتبوو بۆ ئه‌و کاره ناپاک و قێزه‌ونه! به چاوی خۆمان پێشمه‌رگه‌ی تۆمان بینی کاتێ که سه‌ربازی یان ئه‌فسه‌ری تورکی ماچ ده‌کرد! باشه نۆکه‌رایتی ده‌که‌یت، ئه‌ی ئه‌م ماچه‌ت له‌چی! تۆ بڵێێ ناوبراو عاشیقی برا تورکه‌کانی نه‌بووبێت! ئایا ئه‌مه سووکایه‌تی نییه، ئه‌مه ئه‌وپه‌ڕی کلکایه‌تی و خۆبه‌هیچزانین نییه؟ کوردستانتان واڵاکردووه و و یه‌ک ده‌رگاتان به داخراوه‌ییی نه‌هێشتووه‌ته‌وه له‌به‌رده‌م ئێران و تورکیا و هاوکاتیش خه‌ڵکانی تر تاوانبار ده‌که‌ی به‌وه‌ی گوایا له‌گه‌ڵ دوژمنان ده‌ستێکه‌ڵاوییان کردووه!
ئه‌گه‌ر ڕاسته ئه‌مانه‌ی تۆ باسیان لێوه ده‌که‌ی پێشمه‌رگه‌ن، واتا پێشمه‌رگه‌ی کوردستانن، باشه بۆچی سنووری کوردستان ناپارێزن؟ بۆچی ئه‌مڕۆ یه‌کێتیی خاکی عیراق ده‌پارێزن، ئه‌و سنووره‌ی که خۆت وجه‌لال سه‌ته‌ها جارده‌تان شکاند شانبه‌شان له‌گه‌ل سوپای ئێرانا، بۆچی سنووری داگیرکه‌ران ده‌پارێزن، واتا سنووری عیراق و تورکیا، سنووری عیراق و ئێران جگه له سنووری عیراق سووریا؟ ده‌توانی بێژی نه‌خێر وه‌ها نییه؟ بۆچی سه‌نگه‌ر لێناده‌ن و بنکه‌ی پێشمه‌رگایه‌تی دروست ناکه‌ن له حه‌مرینه‌وه تاکوو زاخۆ یان ئیبراهیم خه‌لیل؟
ئه‌ی ئه‌وانه‌ی له 2003 هاتنه ناو که‌رکووک بۆچی شاره‌که‌یان تاڵانکرد له‌بری ئه‌وه‌ی ڕزگاری که‌ن له ده‌ستی به‌عس و دوژمن، ده‌ستیان کرد به دزی و فه‌رهوود، هاوکاتیش یه‌ک به‌عسییان نه‌کوشت به‌ڵکوو به‌رگرییان لێکردن و به‌ڵگه‌نامه‌یان بۆ کردن! فه‌رموو کاک مه‌سعوود وه‌ڵام بدره‌وه! خۆ هه‌ر به ده‌سته‌واژه‌ی ڕازاوه و میکیاجکراو نابێ!
ئه‌وه‌ی که گوتی پێشمه‌رگه میلیشیایه نه‌یویستووه سووکایه‌تی بکات به پێشمه‌رگه، به‌ڵکوو بیروبۆچوونی خۆی ده‌ربڕیوه، تۆش وا بزانم بڕوات به دیموکراسی و مافی ڕاده‌ربڕین هه‌یه، مه‌گه‌ر حیزبه‌که‌ت ناوی پارتی دیموکراتی کوردستان نییه؟
پاشان هێڵی سوور نییه مه‌گه‌ر له مێشکی ئه‌وانه‌ی تاکوو ئێستکانا وه‌کوو تاکه‌کانی سه‌ده‌ی ناوه‌ڕاست ده‌دوێن و ده‌ژێن. دانانی هێڵی سوور بۆ ئه‌وه‌یه که هه‌ڵه‌کان وتاوانه‌کان وکرده‌وه ناله‌باره‌کان بشارنه‌وه و هیچی تر. پاشان دادگا هه‌یه ئه‌وه‌ی دژی ده‌ستوور و دژی قانوون قسه‌ی کرد یان کرده‌وه‌یه‌کی کرد، ده‌درێته دادگا و ته‌واو! به مه‌رجێ دادگا سه‌ربه‌ست سه‌ربه‌خۆبێ نه‌ک که‌رسته‌ی حیزب و سه‌رۆک بیت!
ناوبراو ئه‌و قسه‌یه‌ی کردووه له‌به‌ر ئه‌وه‌ی ده‌یه‌وێ به شێوه‌یه‌‌کی زانستی و واقیعی بیرکاته‌و و بدوێ. هێزی پێشمه‌رگه ده‌بێ هی گه‌ل بێ، له‌ژێر چاودێری ده‌وڵه‌ت بێ نه‌ک هی حیزب وسه‌رۆکه‌که‌شی هه‌ر سه‌رۆکی خودی حیزبه‌که بێت. ئه‌گه‌ر ده‌ته‌وێت که‌س نه‌بێژێ میلیشیا ئه‌وسا سوپای کوردستان دروست بکه و دوور له سیاسه‌ت دوور له حیزبایه‌تی، ئه‌وسا ده‌بینی چۆن تاکه‌کانی گه‌ل شانازی پێوه ده‌که‌ن پێی ده‌ڵێن هێزی پێشمه‌رگه‌ی کوردستان!
ئه‌وانه‌ی ئه‌مڕۆ له‌ژێر فه‌رمانی تۆن نه‌ک له‌ژێر چاودێری گه‌ل. بۆ پاراستنی خۆت و حکوومه‌ته‌که‌ن نه‌ک بۆ ۆپاراستنی کورد و کوردستان، هه‌موومان بینیمان چۆن ڕاتانکرد کاتێ که هێزه‌کانی جه‌لال هه‌ولێریان گرت، پاشانیش بینیمان چۆن ئه‌مجاره‌یان جه‌لال ڕایکرد که چه‌کداره‌کانت شانبه‌شانی سوپای عیراق هێڕشتان کرده سه‌ر هه‌ولێر. جه‌لال تا سنووری ئێران ڕانه‌وه‌ستا. نه تۆ، نه ئه‌و، نه خۆیانگوته‌نی پێشمه‌رگه‌کانتان به‌رگریتان نه‌کرد له گه‌ل و نێشتمان به‌ڵکوو تێکڕا بۆی ده‌رچوون! پێشمه‌رگه چۆن ڕاده‌کات؟ پێشمه‌رگه چۆن گه‌ل به‌جێ ده‌هێڵێ؟ پێشمه‌رگه چۆن زاتده‌کات ژن و منداڵ ڕۆڵه‌کانی کوردستان به‌جێبهێلێ بۆ دوژمنی دڕنده، چۆن خاک چۆڵ ده‌که‌ن بۆی ده‌رچن! ئه‌ی پێشمه‌رگه نه‌مان گوت ئه‌و که‌سه‌یه که له مردن ناترسێ. ده‌ی کوانێ قسه و کوانێ کردار؟
پاشان ده‌بێژی پێشمه‌رگه کوردستانی ڕزگارکردووه! جارێ کوردستان تاکوو ئه‌مڕۆش رزگارنه‌کراوه و به‌شێکی سروشتییه له عیراق و ته‌نها نیوه‌ی خاکه‌که‌ی یان که‌مێک زیاتر له‌ژێر ده‌ست کورده، ئه‌ویش سه‌روه‌ر نییه به‌ڵکوو هه‌ر پارچه‌یه‌که له عیراق. پاشان ئه‌وه‌ی کوردستانی ڕزگارکرد له‌دستی به‌عس و ڕژێم سه‌ره‌تا جه‌ماوه‌ر بوو له 1991 کاتێ که ڕاپه‌ڕینیان کرد، پاشانیش ئه‌مریکا له 2003 هات و هه‌موو عیراقی پاککرده‌وه له ڕژێمه دڕنده و پۆخڵه‌که. له 1992 ه‌وه تاکوو 2003 چیتان کرد دژی ڕژێم؟ ته‌نانه‌ت زاتی ئه‌وه‌تان نه‌بوو پێێ بێژن دیکتاتۆر یان دوژمن یان داگیرکه‌ر یان ره‌گه‌زپه‌رست به‌ڵکوو ده‌تان گوت ده‌سه‌ڵاتی مه‌رکه‌زی یان حکوومه‌تی مه‌رکه‌زی. په‌یوه‌ندیتان له‌گه‌ڵی هه‌بوو، پێکه‌وه جه‌نگین دژی لایه‌نێکی کوردی تر. ئایا وه‌ها نه‌بوو خۆ ئه‌مه به چاوی خۆمان بینیمان کاک مه‌سعوود! به‌ڕاستی نووسه‌ر و مێژوونووس جه‌رجیس فه‌تحولڵا چاکی ده‌ربڕی که گوتی ئه‌گه‌ر شه‌ڕی کوێت نه‌بوایه ئێستکاش ده‌بوایه جاده‌کانی دیمه‌شق و ته‌هرانتان بپێوایه!
له‌وانه‌شه بێژی من ئه‌مڕۆ سه‌رۆکی هه‌موو هێزه چه‌کداره‌کانی یان پێشمه‌رگه‌کانی کوردستانم، ئه‌وسا پێت ده‌بێژم نه‌خێر وه‌ها نییه! ئێستاش هه‌ر حیزبێک له کوردستان هێزی چه‌کداری خۆی هه‌یه واتا میلیشیای خۆی هه‌یه. ئه‌مه شتێک نییه من بیبێژم به‌ڵکوو شته‌که خۆی وه‌هایه و واقیع وه‌هامان پێ ده‌ڵێ، نه بۆچوونی منه و نه تاوان من!
ده فه‌رموو به ژماره‌یه‌ک له پێشمه‌رگه‌کانی یه‌کێتیی بێژه بگوازنه‌وه له شوێنی خۆتان بۆ شوێنێکی تر به هۆی سیاسییه‌وه یان به هۆی عه‌سکه‌رییه و یان وه‌ک ته‌کتیکێکی عه‌سکه‌ری، بزانه فه‌رمانه‌که‌ت جێبه‌جێ ده‌که‌ن؟ بێگومان نه‌خێر! چونکه ئه‌وان له‌ژیر فه‌رمانی جه‌لالن نه‌ک تۆ! ده‌ها ئه‌ندامی په‌رله‌مان چی بکات که ئێوه خۆتان وه‌هان!
نزیکه‌ی 20 ساڵ له‌مه‌وه‌به‌ر گه‌ل چاوه‌روانی ئه‌وه‌بوو که سوپایه‌کی یه‌کگرتوو بۆ کوردستان سازکه‌ن به‌ڵام هه‌ر نه‌تان کردوو و ناشیکه‌ن! سوپایه‌ک دروستکه‌ن ناوی سه‌ربازه‌کانی پێشمه‌رگ بێ، به‌ڵام هی ڕێکخراوه‌ی سیاسی نه‌بێت و ناویشی پاسه‌وانی هه‌رێم نه‌بێت!
پاشان چۆن ده‌بێژی ئه‌مانه‌ی ئه‌م جۆره قسانه ده‌که‌ن له کوردستان جێێان نابێته‌وه! ئاخر کوردستان ماڵی باوکته؟ کوردستان موڵکی تۆیه؟ کوردستان کۆمپانیایه یان بازاڕی نیشتمانییه؟ کوردستان خاکی مێژوییی کورده و مافی هه‌موو تاکێکی کورده له‌وێنده‌رێ بژێ و که‌سیش بۆی نییه ڕێگای لێبگرێت! ئایا ئه‌مه ڕوونه لات؟ هه‌ر کاتێ هاوڵاتییه‌ک دژ به قانوون کارێکی نوند.ئه‌وسا قانوون موحاسه‌به‌ی ده‌کات نه‌ک تۆ، ئاخر تۆ کێێت؟
به‌داخه‌وه ده‌بێ بزانی که ئه‌و قسانه‌ی له زارت ده‌رچوونه‌ده‌روه هیچیان ڕاست نه‌بوون و هه‌موویان درۆوده‌له‌سه و بوختان و پروپاگه‌نده‌ی دیماگۆگی بوون و هیچی تر!
ڕاستییه‌کان تاڵن، به‌ڵام ئه‌مه ئه‌وه ناگه‌یه‌نێ که باسیان نه‌که‌ین. ده‌زانی ڕاستییه تاڵه‌کان وه‌کوو چین؟ وه‌کوو ماسی مرداره‌وه‌بووی سه‌ر گۆمی ئاون! ماسی ئاوهاش بۆ خواردن نابێ مه‌گه‌ر گورگێ بێت په‌له‌ماری بدات و بیخوات، ئه‌گینا هه‌ر بۆ فڕێدان باشه. به هه‌مان شێوه ڕاستییه تاڵه‌کان ده‌بێ فڕێدرێنه زبڵخانه‌ی مێژووه‌وه بۆ ئه‌وه‌ی ڕاستیی تازه بێته کایه‌وه، بۆ ئه‌وه‌ی ڕاستیی نوێ له دایکبێ. ڕاستییه‌ک که پێشمه‌رگه ده‌خاته ڕیزی گه‌له‌وه، ده‌یخاته مه‌یدانی خۆیه‌وه، هاوکاتیش ناپاک ده‌خاته ژێر هه‌تاو، له ئه‌شکه‌وتی چه‌ته‌کانه‌وه ده‌ری ده‌کات بۆ ئه‌وه‌ی هه‌میشه ڕووره‌ش بێت له‌مه‌ڕ گه‌ل.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
