شێعرێکی : فه‌ریده حه‌سه‌نزاده(موسته‌فه‌وی)
Thursday, 14/03/2013, 12:00
له وه‌ڵامی کچه‌که‌ما که لێی پرسیم :
" بۆچ پێی منت به‌م جیهانه کرده‌وه؟"
چوونکه سه‌رده‌م سه‌رده‌می شه‌ڕ بوو
ئه‌وینم ده‌ویست ،ئه‌وین
بۆ هه‌ستکردن به ئۆقره و سوکنا له ژین .
چوونکه ته‌مه‌نم سی تێپه‌ڕاندبوو
سه‌رتاپای ناخی ته‌نیبووم
ترسی ژاکان و هه‌ڵوه‌رین
پێش پشکووتن و چرۆده‌رکردن.
چوونکه دابڕان و جیابوونه‌وه په‌یڤێکه
ته‌نێ بۆ پیاو و ژنان
نه‌ک بۆ دایک و زارۆکان
هه‌ر له به‌ر ئه‌وه‌ی تۆ قه‌ت ناتوانی بڵێی:
" دایکه پێشووه‌که‌م "
ته‌نانه‌ت ئه‌و ده‌مه‌ی به‌خاک ئه‌سپێری لاشه و ته‌رمه‌که‌م .
له‌م جیهانه‌دا هیچێ شک نابه‌م له توانایدا بێت
جیایی و دابڕان بخاته به‌ینی دایک و مناڵ
ته‌نانه‌ت نه‌فره‌ت ،یانژی مردن و نه‌مان.
ئه‌زانم ئێستێ له من بێزاری
چوونکه دیده‌تم ئا به‌م جیهانه ڕۆشن کرده‌وه
ته‌نیا هه‌ر له‌به‌ر ترس له ته‌نیایی و ته‌نیامانه‌وه
قه‌تیش نامبه‌خشی
هه‌تا ئه‌و کاته‌ی منداڵه‌که‌ی خۆت له‌دایک ببێ
که‌چی تۆ به‌رگه‌ی خۆڵه‌مێشه‌که‌ی هه‌ڵقرچێنه‌ری
ئاوات و خولیای دوور دوورت ناگری..
تاران
23ی ڕه‌شه‌ممه‌ی 2712
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
