لەیەكەم رۆژدا ئەندامانی كۆنگرەی یەكێتی باسی چییان دەكرد؟
Wednesday, 02/06/2010, 12:00
چەند رۆژێك بەر لەكۆنگرە بۆم دەردەكەو كە باڵی جەلال دەیانەوێ هەر چۆنێ بێت لەم كۆنگرەدا كۆتایی بە ژیانی سیاسی هەر دوو باڵی كۆسرەت و بەرهەم بێنن، بۆیە لەیەكەمین رۆژی كۆنگرەی سێ یەمی یەكێتی دا كوتلە و كوتلەكاری بەكۆنگرەوە دیار بوو، وا بەباش دەزانم لەم چەند خاڵەدا قسەی دڵی ئەندامانی كۆنگرە لە یەكەم رۆژدا بخەمەڕوو:
یەكەم : لەناو كۆنگرەیدا باس لەوەیان دەكرد كە لە 1578ئەندامی كۆنگرە 500ئەندامی بەتەزكیەی جەلال چونەتە كۆنگرەوە كە 30% ی زیاتر دەكا لەكاتێكدا جەلال تەنیا سەڵاحیەتی %15 ی هەیە بەتەزكیە بیخاتە ناو كۆنگرە.
دووەم : لەسەرو ئەوەوە كە جەلال 30% ی ئەندامانی كۆنگرەی بەتەزكیە بردیە بەڵام بۆ لێدانی باڵی كۆسرەت و بەرهەم زیاتر لە 150 ئەندام ناویان بۆ ئەندامی كۆنگرە هەبوەو بە هەڵبژاردن رۆیشتون، بەڵام ناسنامەی چاودێریان بۆ هاتۆتەوە كە چاودێر بۆی نی یە دەنگ بدەن و هەمویان سەر بەباڵی كۆسرەت،ن كەواتە جەلال توانیویەتی بەفێڵ و تەزكیە نزیكەی 38% ی ئەندامانی كۆنگرە بۆ خۆی دەستەبەر بكات.
سێ یەم : لەكاتی بڵاوكردنەوەی ناوەكانی خۆ پاڵاوتن بۆ سەركردایەتی و ئەنجومەنی ناوەند لەراگەیاندنی یەكێتی ، ئەو خەڵكانەی جەلال مەبەستیبوونە بەتەنسیق لەنێوان دەزگای هەڵبژاردن و دەزگای ئیعلامی یەكێتی واتە لەنێوان ئازاد جوندیانی و شۆڕش ئیسماعیل، ناوەكان هێنراونەتە پێشەوە یان بارز كراون و یان لەقەبەكانیان نوسراوە و ئەوەشی بەشی زۆری سەر بەباڵی كۆسرەت بوون ناوی چواری و خراونەتە دواوە و لەهەندێ شوێن حساب بۆ پیتی ئەبجەدی كراوە و لەهەندێ شوێن حیسابی بۆ نەكراوە، بەشێوازێك شۆڕش ئیسماعیل چۆنی ویستووە وای داناوەو تێكیداوە، تەنانەت لەهەندێ شوێن بەبیانوی هەڵەی تەكنیكی ناوی كەسێك كە مەبەست بووە دوو جار دانراوە و هەندێ ناویش پەڕێنراوە یان وا شێوێنراوە نەناسراوەتەوە.
چوارەم : لەیەكەم رۆژی كۆنگرەیدا باڵی كۆسرەت كەوتنە خۆڕێكخستنەوەو لەكاتی خوێندنەوەی وتارەكان لەدەرەوەی ناو هۆڵەكەی كۆمەڵ كۆمەڵ گفتوگۆیان دەكرد و بەرنامەی ئەوەیان دادەڕشت كە مەسەلەی دەنگدان بۆ چاودێرەكان بخەنە دەنگدانەو زۆرینە بەدەست بهێنێ ، هەروەها باڵەكەی بەرهەم و كۆسرەت لەبەرنامەی ئەوەدان كە ئەو كەسانەی پۆستی تری حكومیان هەیە فشار بخرێتە سەریان و محاوەلە بكەن بخرێتە دەنگدانەوە و نەهێڵدرێ خۆیان بپاڵێون ، چونكە ئەوانەی كە پۆستی تری حكومیان هەیە سەر بەباڵی جەلال، ن و بە مەبەستیش دانراون تا لەكاتی دەرچونیان نەپەرژێنە سەر كاری حزبی.
پێنجەم : لەدوای نیوەڕۆوە باڵی جەلال كەوتنە بەڵێندان و پارە و ئیمتیازات بەخشینەوە و هەر ئەو دوانیوەڕۆیە زیاتر لە150 دەنگ كڕان بەپارەو بەڵێنی دەنگدانیاندا بەو كەسانەی سەر بەجەلال، ن و خۆیان دەپاڵێون.
شەشەم : توڕەیەكی زۆر بە (كۆسرەت و بەرهەم) ەوە دیار بوو چونكە هەر یەك لە جەلال و هێرۆ-ی ژنی وەعدیان پێدان كە كۆنگرە بەدڵی ئەوان دەبێ و ئەو كاندیدانەی ئەوانیش مەبەستیان و دەیانەوێت بیبەنە كۆنگرە دەتوانن بەتەزكیە بیبەن بەڵام لەدواهەمین شەوی 31-5 جەلال 400 ناوی رەتكردۆتەوە كە كۆسرەت و بەرهەم تەزكیەیان كردبوو، هەر بۆ رازیكردنی دڵی بەرهەم و نیشاندانی ئاشتبونەوە، هێرۆی ژنی جەلال داوای لەكەناڵی كوردسات كرد كە مقابەلەیەكی دورودرێژی بەرهەم ساڵح بكەن، شەوی 27/5 لەهەردوو كەناڵی سەتەلایتی گەلی كوردستان و كوردسات لەیەك وەختدا لێدرا و تەنانەت بەرهەم لای هەندێ لەسەركردایەتی یەكان وتبوی مادەم (دادە هێرۆ)م لەگەڵ ئاشتبۆوە لەكۆنگرەش دەرنەچم كێشەم نی یە.
حەوتەم : جەلال پیلانێكی تری داناوە و بەنیازە لەكاتی خۆپاڵاوتنەكەدا دەرگای خۆپاڵاوتن بكاتەوە بۆ هەموو كەس و ئەو فۆرم پڕكردنەوەیە هیچ ئەساسێكی نەمێنێ لەم كاتەدا باڵی كۆسرەت خۆیان حازر كردیە ئەمە نەهێڵن چونكی باڵی كۆسرەت بەپێچەوانەی باڵی جەلال خۆیان رێكخستوە و نوێنەرەكانیان داناوە و كوتلەكەیان دیاری كردوە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
