یادگاره‌کانم له راپه‌ڕینی ساڵی 1991دا
Monday, 04/03/2013, 12:00
به‌رده‌وام ساڵی سیاسی کوردستان، سوڕی هه‌ر چوار وه‌رزه‌که له مێژووی خۆیدا چه‌ند باره ده‌کاته‌وه .. یه‌کێک له‌و وه‌رزه هه‌میشه زیندووانه‌ی له یادوه‌ری کورددا کاڵ نابێته‌وه به‌هاره‌کانیه‌تی.. به‌هاری ڕاپه‌ڕینی ساڵی 1991، جۆرێک له ژیانه‌وه و بوژانه‌وه‌ی به گیان و جه‌سته‌ی کورددا هێنایه‌وه . زیده ڕۆیی نییه ئه‌گه‌ر بڵێم ئه‌و به‌هاره بوو گوڕ و تینی دایه‌وه به‌ر هه‌ره‌سی هه‌ست و نه‌ستی نه‌ته‌وه‌یی کورد به گشتی له هه‌موو پارچه‌کانیدا. له باشووری کوردستانه‌وه هێشتاکه کۆی نیشتمانه‌که‌مان له پشتی زیله‌کاندا به‌ره‌و عه‌رعه‌ر ده‌برا و له نێو لمی بیابانه‌کاندا نغرۆیان ده‌کردین ، ئاو و هه‌واکه‌مان بۆنی سێوه ترسناکه‌کانی کیمیایی و هه‌ڕه‌شه‌ی ئه‌منه‌کانی لێده‌هات . له باکووره‌وه زیندانه‌کانی ئامه‌د و ئه‌نکه‌ره سیخناخ بوو له چالاکوانه سیاسییه کورده‌کان و موساعه‌نته‌ره‌کانیان به ڕۆژی ڕووناک تیرۆر ئه‌کرد، ژه‌ندرمه تورکه‌کان به‌وه‌شه‌وه نه‌وه‌ستان تا خۆرئاوای کوردستان و قامیشلۆ به دووی کوردبوونه‌وه بوون و له شه‌و و ڕۆژێکدا به به‌رچاوی سوپا و ده‌سته‌ڵاتی سوریاوه په‌که‌که ئاواره‌کانی له نێو خاکی سوریاشدا ده‌قڕان .. له ڕۆژئاواشه‌وه خۆڵی مردوویان کردبوو به‌سه‌ر ناو و چاوی کورددا و ڕۆژ به‌ڕۆژ به بیانی کردنمان به‌سه‌ر ماڵ و خاکی خۆمانه‌وه زیاتر و زیاتر ده‌کرد .. ئاله‌و ساته‌نه‌دا یه‌که‌م چرۆی به‌هاری کوردی له ده‌روازه‌ی ڕاپه‌ڕینه‌وه ڕوویدا .. ئه‌و چرۆیه‌ی هه‌موومانی ژیانه‌وه و نه‌یهێشت چیدی له ته‌سلیمی بێ هیوایی و نائومیدی بین . به جارێک ئه‌گه‌ر به‌هۆی کۆڕه‌و و کۆچه به‌کۆمه‌ڵه‌کانه‌وه بێت یان به‌هۆی تێکشکانی سنووره‌کانه‌وه بێت کورد خۆ به‌خۆ پێک ئاشنا بوونه‌وه له ئاسته جه‌ماوه‌ریه‌که‌یدا ، گه‌رچی له ئاسته حیزبی و سیاسه‌تی بنه‌ماڵه‌ییدا له‌و ساته‌وه ده‌یان جه‌نگی ناوخۆ و ماڵوێرانی دیکه‌یان بۆ خولقاندین، به‌ڵام جه‌ماوه‌ر وه‌ک چۆن به‌خۆی راپه‌ڕینی تاودا ، هه‌رئاواش لێک نزیک بونه‌وه و کۆکردنه‌وه‌ی ماڵی کوردی ئه‌نجام دایه‌وه .. ئه‌مانه شایه‌نی ده‌یان ڕاوه‌ستانی جدی و خوێندنه‌وه‌ی تایبه‌تن سه‌باره‌ت به هۆکار و ده‌رئه‌نجامه‌کانی ڕاپه‌ڕین . ده‌توانرا چی زیاتری لێ به‌رهه‌م بێت و ئه‌و هۆکارانه‌ی بونه هۆی پاشه‌کشه پێکردن و ڕاگرتنی به‌سه‌ر دوو هێڵی دابه‌شکاری زۆنی زه‌رد و سه‌وزی حیزبایه‌تی پارتی و یه‌کیه‌تیه‌وه . کێ ڕاپه‌ڕینی ئه‌نجامدا و مه‌دالیاکانی به‌کێ به‌خشرا؟ کۆمه‌ڵێک پرسیار و ڕاستکردنه‌وه‌ی دیکه که له‌سه‌روی هه‌موویانه‌وه خستنه‌رووی ئه‌و ڕاستیه‌ی که به‌ر له په‌ڕینه‌وه‌ی هێزه‌کانی به‌ره‌ی کوردستانی له ئێرانه‌وه بۆ نێو خاکی باشووری کوردستان، ئه‌و هێز و ته‌ره‌فانه کێ بوون داینه‌مۆی بزواندنی جه‌ماوه‌ربوون که بۆ مێژوو ده‌ڵێم به‌هه‌موو جیاوازی و خیلافێکی فیکریم له‌گه‌ڵ چالاکوانه نهێنیه‌کانی چه‌په‌کاندا وه‌ک ڕه‌وتی کۆمۆنیست و بزوتنه‌وه‌ی شوراکان و ده‌سته‌ی کرێکارانی کۆمۆنیست که ئه‌مانه تا گه‌یشتنه‌وه‌ی به‌ره‌ی کوردستانی ، هێزێکی بزوێنه‌ری سه‌ره‌کی شه‌قام و شار و جه‌ماوه‌ری کوردستان بوون و خوێن و قوربانیه‌کی زۆریشیان دا بۆ ئه‌نجامدانی ڕاپه‌ڕین تا ئه‌وه‌ی که به‌ره‌ی کوردستانی گه‌یشتنه سه‌ر حازری و ئیهانه‌کردن و داخستنی باره‌گا و بنکه‌کانی ئه‌و کۆمه‌ڵه لاوه چه‌په‌ی ڕۆڵی سه‌ره‌کی و به‌شی شێریان له ئه‌نجامدانی ڕاپه‌ڕینه‌که‌دا به‌رکه‌وت . ئه‌م ڕاستکردنه‌وه‌یه‌ش ته‌نیا بۆ مێژوو ده‌ڵێم و هه‌رچی بوون و هه‌رچۆن تێده‌فکرین ، مانای ئه‌وه نییه ئه‌و چاو له‌و حه‌قیقه‌ته دابخه‌ین که ڕوویدا و تۆمارنه‌کرا .
یه‌که‌م به‌یاننامه‌ی ڕه‌وتی کۆمۆنیست
له‌پاش ئه‌نفاله‌کانه‌وه ، دروست له پاش ڕاوه‌ستانی جه‌نگی هه‌شت ساڵه‌ی نێوان عێراق و ئێران شێوه ئاشبه‌تاڵێکی تر وه‌ک خۆڵی مردوو کرابوو به‌سه‌ر شاره‌کانی کوردستاندا که ئه‌وکاته ته‌نیا چه‌ند شارێک و هه‌ندێ شارۆچکه‌ی زۆره‌ملێ مابوونه‌وه. ئیدی سه‌رجه‌م گوند و دێهات و ته‌نانه‌ت قه‌زا و ناحیه‌کانیش به‌ده‌م شاڵاوی ئه‌نفاله‌کان و ڕاگواستنه زۆر ملیه‌کانه‌وه کرابوونه ناوچه‌ی محه‌ره‌مه. هه‌رچی له ده‌ره‌وه‌ی جاده قیره‌کانیشه‌وه بوو ده‌که‌وته زۆنی سه‌ربازگه و سوپا.
له‌و سه‌رده‌می ئاشبه‌تاڵی دووه‌مه‌وه که ڕه‌حمه‌تی محه‌مه‌د موکری له ڕۆمانی هه‌ره‌سه‌دا به هه‌ره‌سی دووهمی ناوهێناوه، ئه‌و گوته‌نی کورد له ژێر باری هه‌ره‌سه‌که‌دا له شاره‌کاندا چ په‌یوه‌ندیه‌کی ئه‌وتۆی نێوان ڕێکخراوه نهێنیه‌کانی ناوشار و شاخه‌کانی نه‌مابوو، په‌یوه‌ندییه‌کانی به ته‌واویی پچڕابوون و ئیفلیج بووبوون، جموجوڵێک له‌نێوان کورده خوێندکاره‌کانی زانکۆ و په‌یمانگه‌کاندا دروست بوو که زیاتر له ده‌وری بیری سیاسی چه‌پگه‌رایی کۆببونه‌وه ، دیارترینیان ره‌وتی کۆمۆنیست بوو، که له هه‌ڵمه‌تێکی ده‌زگا ئه‌منیه‌کانی سه‌دامدا زۆرێک له‌و حه‌لقه سیاسیانه که‌شف بوون و تا کاتی ڕاپه‌ڕین له زیندانه‌کاندا مانه‌وه. له‌و کاتانه‌دا له به‌یاننامه‌یه‌کی سێ لاپه‌ڕه‌یدا به‌ناوی (ئه‌رکه ده‌ست به‌جێکانمان). ڕه‌وتی کۆمۆنیست خه‌ڵکی هانده‌دا که گۆڕانکاری له عێراق و ناوچه‌که‌دا به‌ڕێوه‌یه به‌هۆی جه‌نگی کوه‌یت و تێکشانی سوپای عێراق له‌به‌رانبه‌ر هێزه هاوپه‌یمانه‌کاندا، .ئەو سەردەمە ئێمە کۆمەڵێک بووین. لەهەولێر دەژیاین. شوقەیەکمان هەبوو بەکرێ، لەسەر دەرمانخانەیک بوو لەناو بازار، زۆر جار کە شه‌وانە دەخوتین هەوڵمان دەدا، هەندێک بڵاو کراوە بشارینەوە، بەڵام دواتر، ئەوەندە زۆر بوون، بۆمان نەدەکرا، هەر بە پێکەنینەوە بەخۆمان دەوت، بەیانی لە دائیرەی ئەمن خۆمان دەبینەوە، هەر هەمومان قاچاخ لە بەعس، بە پێناسه‌ی ساختەوە، دەگەراین و سیاسەتیشمان دەکرد. بەڵام ئومێدێکمان هەبوو، کە بی دەژیان، ئەویش نەمانی بەعس بوو!
بەیاننامەی تریش دەرچوو، تا دەهات شەوانە قسە و باسی ناو هاوڕیان گەرمتر، ده‌بوو، من زۆر تاقەتی گفتوگۆم نەبوو، زۆرجار ڕەخنەیان لێ دەگرتم، کەمن زوو دەخەوم بەشداری گفتۆگۆ گەرمەکەی ئەوان نابم. منیش شەوێک پێم ووتن، ئێوە ناڵین ڕاپەڕینی جەماوەریی بەڕێگاوەیە، خەمی منتان نەبێت، لەهەر شوێنێک لەوکاتەدا، گەر کەمتر لە دوو سەد کەسم کۆنه‌کرده‌وه له قه‌وم و عه‌سره‌تی خۆم ئه‌وا هه‌قی خۆتانه قسه بکه‌ن، هه‌روه‌ها ئه‌گه‌ر یەکەم کەسیش هەڵم نه‌کوتایه سەر بارەگاکانیان ئەوسا گلەییم لێبکەن. باش بوو ئیتر ئەو هاوڕیانە سەریان نەکردە سەرم، ئەوان شەوان تا نیوە شەو هەر گرمەیان دەهات، منیش پرخەی خەو!
بانگەشە بۆ ڕاپەڕین
یەکەم/ ڕانیە
لە یەکەم سەردانم بۆ ڕانیە، کۆمەڵێک هاوڕی کۆنم بەسەر کردەوە، باس و خواسی ڕاپەرینم لەگەڵ کرد،. هەر هەموشیان، لە من گەرم و گوڕتر بوون، بۆیە پشنیارم بۆ کردن، کە هوڵ بدەن، جەماوه‌ر ڕیکبخەن و گروپ دروست بکەن، ئەوانەی له بیرم مابن، عەبدوڵا ناو دەشتی و کاک جوتیار بوون، کاتی پیش ڕاپەڕینیش بەردەوام سەردانم دەکرد و ڕاو بۆچون و هەواڵی شارەکانی ترم بۆ دەهێنان!
دوەم/ ئۆردوگای حاجیاوە
لەوێش بەهەمان شێوە، دەیان کەسم بینی و قسەم لەگەڵدا کردن، ڕۆژێکیان لەماڵی هاوڕییەکم بووم، بەناوی کاک ساڵح، ووتی وەرە سەیرکە، بەرەی کوردستانی نامەی ناردوە بۆ سەرۆک جاشەکان، کاتێ نامەکەم، خوێندەوە، توشی شۆک بووم، چونکە ئەوکەسەی ئەو نامەیەی بۆ هاتبوو، دەیان کەس و پێشمەرگەی شەهید کردبوو! بەهەرحاڵ. لەوێس بەهەمان شیوە.. قسەو باسمان لەسەر ئەوە کرد ، کە ورەی جەماوەر به‌رز بکەینەوە، ڕاپەرین دەبێت و بەعس لەبەین دەچیت!
ئێوارەیەک لە حاجیاوای خوارەوە، لای ماڵی خوشکم وەستا بووم، هەر ئەوەندەم زانی دەیان کەس کۆبونەوە، دەستم کرد بە قسە و باس لەگەڵیاندا، خەڵکەکە هێندە قسەباسەکەیان پێ خۆش بوو، تەنانەت یەکێکیان بڕاوی نەدەکرد، هەر لێی دووبارە دەکردمەوە، منیش هەر بە پێکەنینه‌وە دستم گرتوو، ڕام کێشا بەرەو مەخفەی پۆلیسەکە و وتم، ماوەیەکی تر، ئێوە هەڵدەکوتنە سەر ئەم مەخفەرە و ئازادی دەکەن، لەساتەدا، کەسێکی سەر بە دائیری ئەمن هات، کە لەنزیکەوە دەمناسی، منیش بی ئەوه‌ی گوێ بده‌مێ، درێژەم بەقسەکانم دا!، ئەوێس بۆ سارد کردنەوەی خەڵکەکە ووتی، هەرکەسێک ڕاپەڕین بکات، ئەوه حکومەت، بە کیمیایی لێی دەدات، ئیستا لەناو هەموو شوێنەکان ئار پی چی کیمیان بۆ هاتووە، دوای ڕاپەڕییم هەمان که‌سی سەر بە دائیرەی ئەمن، بوو بە ڕابەر سیاسیی تێپێکی پێشمەرگە! بەڵام لە روداوێکدا، گیانی لەدەستدا! ئاخۆ ئیستا ده‌بێت موچه‌ی شەهیدانەکەی چەند بێت ئاخۆ خزمەتی ئەمن و ئەو قسانەش هەر بەخەباتی شاخ بۆ حیساب کراوە؟
کاکی ئەمن لێیدا ڕۆیشت، دیار بوو قسەکانی بەدڵ نەبوو، هێندەی نەبرد، برایەکی ئەو بەکرێگیراوە هات، ئەو قسەکانی زۆر پێخۆش بوو، بەڵام دەترسا. بەهیواشی هاتە بن گوێمەوەو جیای کردمەوە، ووتی تۆ دەزانی باسی چی دەکەیت؟ ئایا کاتی ئەو قسانە هاتووە؟ ووتم خەمت نەبێ، نەک هەر کاتی هاتووە بەڵکو زۆریش دره‌نگە! وام نیشاندا کە من ئاگاداری هەموو شتێکم و لە ئان و ساتدا ڕاپەڕین دەبێت! ڕۆژ هاتوو چو دوای ڕاپەڕین ئەم برادەرش بوو بە بەر پرسێکی بەرەی کوردستانی، بەڵام لەهەر شوێنێک منی بینیبا، لەچاوەکانی ئەو شەرمم دەخوێندەوە، ئەو پەڕی ڕیزی دەنواند بۆم، خۆی دەیزانی، کەکێ ڕاپەڕیوە و کێ دەسەڵاتی بەدەستە!
هەمان ئێوارە چووم بۆ لای موستەشاریک کە خەلکی لای ئێمە بوو، داوای چەکم لێ کرد، ئەویش وای زانی کێشەم هەیە، ووتم بابە من چەکم بۆ خەڵک دەوێت، بۆ ڕاپەڕین، ئەویش وتی، منیش نامەی بەرەی کوردستانیم بۆ هاتووە، بەڵام بڕوام بەو شتانە نیە، چەکەکەشی نەدامێ، دەشڵێن، گەر جاشه‌کان نەبونایە ڕاپەڕین سەری نەدەگرت، من هەمیشە پییان دەڵێم، خۆ لە خواروی عیراق ، جاش نەبوو ، ڕاپەرینیش پێش کوردستان دەستی پێکرد!
سێهەم / کۆیە
لە کۆیە و لە ماڵی کاک ئازاد چاوشین، هەمیشە لام ئەدا بۆ پشویەک و وەرگرتنی هەواڵی ناو شاری کۆیە، بە حوکمی ئەوەی ماڵی ئازاد چاوشین، هەم خزمایەتی و هەم کۆنە پێشمەرگەی یەكیتی بوو، قسەوباسمان، دەکرد، ڕۆژێکیان دەیان کەسی سەر بە لایەنە سیاسییەکان لەوێ بوون، وەک چۆن بەرەی کوردستانی، ئاواش داهاتووی کوردستانیان لە نێوان خۆیانا تەخشان و پەخشان دەکرد، بێ ئەوەی هیچ حیسابێک بۆ جەماوەر و خەڵکی تر بکەن، ئەوەیان بیر نەبوو، خەڵکی چەپ و کۆمنیست بوو، کە ئەو سەردەمە هەڵوڕاوترین توێژ بوون...منیش زۆر بە توندی بەرەو ڕویان بوومەوە، بەشێوەیەک قسەکانم ڕەق بوون، کە چاوەڕێیان نەدەکرد، بەم شیوەیە بەگژیاندا بچمەوە.
چوارەم/ دارەتوو
بەدوای ڕاگواستنی شاری قەڵادزێ و شارۆچکە و ئۆردوکانای دەورو بەری. خەڵکەکەی دابەش بوو بوون به‌سەر چەند ئۆردوگایەکی زۆرە ملێ، لە هەولێر، (دارەتوو، جەدیدە، تۆبزاوا،کەورگۆسک، خەبات (منیش بە حوکیم ئەو پەیوەندییە کۆمەڵایەتییە به‌ر بڵاوەی هەم بوو، لەهەر شوێنێک، دۆستو ناسیاو جا چ لە ڕووی سیاسیەوە یان پەیوەندی کۆمەڵایەتیەوە سودم لێ دەبینی. لە دارەوەتوو، کۆمەڵێک ماڵی سەنگەسەری لێ بوو، بەڵام بۆ پیوەندی و گەیاندنی دەنگ و باس و تەنانەت بڵاوکرەوەی پێش ڕاپەڕین، ماڵی گوڵە خانی حاجی حەمەد برایم بوون، هەرچەندە گوڵە خان سەر بە ڕیکخستنەکانی یەکێتی بوو، بەڵام هیچ کێشەمان نەبوو، ئامانجی من ئەوە بوو که زۆرترین خەڵک بێتە مەیدان..هەندێک بڵاو کراوەم لای گوڵە خان دانابوو، کە بیداتە برادەرانی تر، ئەویش بە بیانووی ئەوەی ئەو بڵاوکراو و دروشمانە هی کۆمنیستەکانه، شەو بلاویان نەکردبۆوە، بۆ بەیانی کاتی چوم بۆ دارەتوو، هەواڵی ئەوه‌م بیست، ووتم بەناوی منە پێان بڵێ، بابێن، دروشم و بڵاو کراوەی ئەو حیزبەی بڕوای پییانە بڵاوی بکەنەوە، من هاوکاریان دەکەم دەستخۆشیان لێ دەکەم.
پێنجەم/ هەولێر
بڵاوکردنەوەی یەکەم کۆمەڵە بەیاننمامە دیوارنوسین و بە دروشمی بەرەو ڕاپەڕینی جەماوەری.
شەوێک (من و جەمال کرێکار و گۆران عەبدوڵای سایتی دەنگەکان (لەناو جەرگەی شاری هەولێر و کۆڵانەکانی تەیراوە دەستمان کردە به هەڵوسینی بەیاننامە و نوسینی دیوارەکان بە بۆیەی سوور، دوای چەند کۆڵانێک و شەقامێک، درەنگ بوونی کات، گۆران گەڕایەوە ماڵەوە، منیش دەبوایە جەمال کرێکارم بگەیاندایە ماڵەوە، کە ماڵیان لە سەر ڕیگای شەقڵاوە بوو. من سەیارەیەکی تۆیۆتا سوپەری مۆسیل ١٩٨٢ تەکسیم پێبوو، جەمالم گەیاند، لە ڕیگای گەڕانەوەم بۆ ماڵەوە، لە پڕ کەوتمە ناو هێزێکی هاوبەش کە بازگەیان دانابوو، له‌سەر ڕێگای شەقڵاوە، نزیک شەست مەتری.. کاتێک هێزەکە و بازگەکەم بینی، ووتم تازە بە هیچ شیوەیەک دەرناچم، مەجالی گەرانەوشم نەمابوو، ناو سەیارەکە پڕ بوو لە بەیاننامە و بۆیاغی سور و سیکۆتین و دەمانچەیەکی چواردە خۆریشم پێ بوو! بەبێ هیچ خۆ تێکدانێک، جامی سەیارەکەم بە دوگمەیەکی ئۆتۆماتیکی دابەزاند و شەوباشیکی گەرمم لێ کرد، ئەوندە لێ نزیک بوومەوە نەم هێشت ناو سەیارە باش ببینی، ووتی بەم شەوە لە کوێ بوویت، ووتم لە خەستانەی مناڵ بوون، هاوسەرەکەم مناڵی دەبێت، بەپەلە گەیاندمە خەستخانە، کە وام ووت، بەبێ ئەوەی داوای پێناس یاخود سەیارەکە بپشکنی، ووتی فەرموو بڕۆ، هەڵبەتە کابرا عەرەب بوو، منیش کێشەی زمانم نەبوو.. کە وتی بڕۆ هەناسەیەکی قوڵم هەڵکێشا، پاشان دڵم نەک هەر سەد و بیست هەزرا و بیست لێدەدا، دەم وت، ئەمجارەش تیا نەچووم
شەشەم / ئۆردوگای خەبات
بڵاو کردنەوی بەیاننامە
زۆرترین خەڵکی سەنگەسەر و قەڵادزێ لە ئۆردوگا خزابوون، دەیان ناسیاو و خزمی لێ بوو، کۆمەڵێک بڵاو کراوەم لە ماڵێک دانابوو، منیش نیشانی کۆنە پێشمەرگەیەکی یەکێتیم دابوو، کە لە نزیکەوە یەکتر دەناسین..ئەو پێشمەگە کۆنە ووتبووی ئەوانە سەیر مەکەم، ئەو جەماعەتەش دەستمان بکەون شۆڕش دەیانگرێ! کاتێک ئەوەیان بۆ گێڕامەوە لە توڕەییدا شێتگیر بووم، ووتم پێی بڵێن، ئەوە منم شۆڕش دەکەم، منیش دەتوانم ئەو نمونەکانه‌ی وەکو ئەو بگرم، ئەو برادەرە و هیشتا چوار تەقە نەکرابوو لە ئۆردوگای خەبات، بەتەمابوون ماڵەکەی بەرێته ئۆردوگای کەور گۆسک، ئەویش دوای ڕاپەرێن، لە ناو چەکە بوو بە بەرپرس و دەسته ڕاستی حیزبەکەی !
شەو درەنگانی من و کاک جەباری وەستا ڕەفیق، بە کۆمەڵێ بەیاننامەوە کەوتینە دیوار نووسین و هەڵواسینی بەیاننامەکان.. ڕژێم لەترسی تەقینەوی جەمارەی، تەنانەت ، پاسەوانی بە قوتابیش دەگرت، لە نیوان دوو خاڵی ئیشک گراندا، بە حوکمی ئەوەی جەباریان دەناسی، سه‌ڵاومان لێکردن و هەر چەند مەترێک دوای ئەوان، بەیاننامەمان هەڵواسی... دواترم هەر ئەو شەوه زانرا، کە بەیاننامە، هەڵوسراوە کەوتنە لێکردنەوه‌یان، لە بارەگای بەعسەوه هاتن، بەلام سەدان مابوون، بۆ بەیانیەکەی خەڵک ده‌یخوێنده‌وە، ڕژێم زۆر تەنگە تاو بوو بوو، هێزیکی زۆر هاتن بۆ ناو خەبات، بەمەبه‌ستی لێکردنەوە بەیاننامەکان. ئەوە یەکەم شەڵەقاندی گۆمی بێ دەنگی بوو، یەک پەیام بوو، کە ڕاپەڕین بەڕێوەیە!
چەند ڕۆژێک پێش ڕاپەڕین...
بڕیارم دا لەکاتی ڕاپەڕیندا. لە شوێنێک بم. کە زۆرترین خەڵک دەناسم، بۆ ئەوەی بتوانم سود لە پێگە کۆمەڵایتی و پەیوەندییەکانم ببینم، زۆرتین خەڵک کۆبکەمەوە لەکاتی هێرش بۆ سەر بارگا و بنکەکانی بەعسدا، لە ڕاستیدا خەوم بە یەکەم ساتە وەختەوە دەبینی.. دەمویست گۆللەیەکی شۆڕشگیرانە لە بەعس بکەمەوە! بۆیە بڕیارمدا له کاتی ڕاپەڕیندا لە ئۆردوگای زۆرە ملێی خەبات بم! بەڵام:
ڕۆژی 5 ی ئازار لەکاتێکدا دەمویست بچم بۆ ڕانیە، لە نەقڵیاتی هەولێر، کوڕێکی سەنگەسەریم، بینی کە بەداخەوە ناوەکەیم، بیرنەماوە، ووتی نەتزانیوە، دوێنی لە خەبات چیڕوویداوە، وتم نەخێر، بەکورتی بۆی گێڕامەوە کە خەڵک ڕاپەڕیوه بەختیار هۆڕیوەیی شەهید بووە، بۆیە بڕیاری چوونە ڕانیەم تێکدایەوە، هاتم بەرەوە خەبات!
لەبازگەی خەبات نەیاندەهێشت خەڵک بچیتەوه ناو ئۆردوگاکەوە، هیزێکی زۆر لەوناوە خزابوو، بەتایبه‌تی جاش، لە بازگە کۆبووبوونه‌وه، ووتم دەچم بۆ ماڵی خوشکم، ڕێگەیان پێدام، دوای ئەوەی هەندێک هەواڵی سەرەتایم وەرگرت، چوومە سەر پرسەی شەهید بەختیار، کە لە نزیکەوە دەمناسین!
سەرەڕای ترسی خەڵکی خەبات، کە جار ناجارێك دەسترێژی گوللە دەکرانە سەر ئاسمانی ئەو ناوچەیە، بەڵام خەڵکێکی زۆر له‌سەر پرسەکەی ئامادە بوون!
یەکەم ڕوو بە ڕوو بوونەوە لەگەڵ مەلایەک دا!
مەلایەک کە خزم و ناسیاوی ماڵێ شەهید به‌ختیار بووم دوای فاتیحا خوێندنێک، دەستی کرد بەقسەی سازش و سارد کردنەوەی خەڵک.. منیش چاوەڕێم کرد، تا تەواو بوو، دواتر بەو پەڕێ توڕەیی حەماسەو ڕوو بەڕووی بومەوە و، ووتم، ئەوەی کراوە نەک هەر بەس نییە، بەڵکو هیچ نەکراوە و دەبێ درێژەی پێ بدەین، ئەمڕۆ یان سبەی بەعش تێک دەشکێنین، مەلا ویستی وەڵام بداتەوە، نەمهیشت قسە بکات، چونکە مەلەفی ئەو مەلایەو کوڕەکانی لام بوو، ووتم، بێ دەنگ بی باشترە، دەنا ئەوەی بن بەڕە، دەهێنمە سەر بەڕە.. ئامادە بووان، لە نیوان ترس و قسەکانی مندا.. سەریان سوڕمابوو، هەندێکیان دەستخۆشیان لێکردم و هەندیکیش بێدەنگ بوون، لە سەر تازیەکە هاتمەوە دەرەوە، پیاوێکی بەساڵاچوو، جیای کردمەوە و ئەملاو ئەولای ماچ کردم، ووتی دەستەکانت خۆش بێت، بەڵام جارێ زوو نییە بۆ ئەم قسانە! ووتم نا خاڵە گیان خەمت نەبێت، شوێنی تازیەکەم بەجێ هیشت بۆ ناو خەڵک، کۆمەڵیک گەنج کۆبوونەوە جارێکی تر دەستم کرده‌وە بەقسەکردن دەربارەی ڕاپەڕین، چونکە کۆمەڵێک ڕیش سپی و پیاوانی ڕژێم ، هەواڵی ئەوەیان بڵاو کردبووه‌وه کە جاشه‌کانی هەرکی سورچی هێرش دەکەنه سەریان، منیش ووتم ئەوانە هەمووی درۆیە، بەعس خۆی دەسەڵاتی نەماوە، جاش چێ پێدەکرێت..لەکاتەدا، تادەهات خه‌ڵک زیاتر لە دەورم کۆدەبوونەوە و حەماسەتێکی زۆر ل و لاوانەدا بەدی دەکرا.
لە پڕ ئۆتۆمۆبیلێک هات، وەستا لامانەوە، پرسیاری کرد، چییە ئەم قەرەباڵغیە؟ ووتیان باسی ڕاپەرین دەکەین ئەوێش پرسیبووی ئه‌وه کێیە قسەتان بۆ دەکات، ئیتر خەڵکەکش، جێگایان بۆ چۆڵ کرد، تا من ببینێ، بە فیزێکەوە هەر لەناو سەیارەکەیەوە ووتی، کوڕم وەرە له‌گەڵ مامی خۆت سوار بە، هەرچی بووە با له‌وه زیاتر ئاژاوە نەنرێتەوە.. ووتم، من هیچ ئیشم بە مامی خۆم نییە، من کارم لەگەڵ ئەو گەنجانەیە، تۆش بڕۆ لێرە مەوەستە، ووتی تۆ من دەناسی، ووتم بەڵێ، ئێوە بەناو کۆمەڵێک ڕیش سپی بوون له‌کاتی گواستنەوەی قەڵادزی، خەڵک وای دەزانی بەرگریان لێ دەکەن، کەچێ لێرە من بەچاوی خۆم بینیم، شەڕتان لەسەر خانوی ڕوکن ده‌کرد!
کابرا لێیدا ڕۆیشت، ئێمەش بەردەوام بووین، هەمان ئەو برادەرەی کە ووتبووی شۆڕس دەمانگرێت، بیینم لەحەوت ژوور خۆی حەشار دابوو. بە پێکەنینەوە بەخاوەن ماڵەکەم وتم ئاگات لێ بێت ئەو برادەر نەمان گرێت!
هەواڵی ئازاد کردنی ڕانیەمان پێ گەیشت کە ئومێدێکی گەورە بوو هەم نیشانەی ئەوە بوو، کە ڕاپەرین دەبێت و خەڵک سەردەکەوێت..هەمان شەو گەڕامەوە ناو هەولێر، بۆ خۆئامادەکرد، هاتن بۆ خەبات، ڕۆژی ٦ ئازار، لە پڕ بوو بەتەقە و هاتو هاوار، منیش بەپەلە لە شوقه‌کەمان دابەزیم، بینیم هەر خەڵکه و ڕادەکات، کابرایەکم بینی هاواری دەکرد، ڕاکەن ڕاکەن، منیش چووم ئێخەی کابرام گرتوو، تۆ خۆت ڕادەکەی ئازادیت، بەلام بۆ خەڵک دەترسێنی، منیش بە پێچەوانەی ئەو کەسەوە، هاوارم کرد، کەس ڕانەکات بەره‌و ناو بازاڕ، کۆمەڵیک کەسی تریشم بەدوا کەوت، کە زوربەیان بەتەمەن لەخۆم بچوکتر بوون، من دەمانچه‌یەکم پێ بوو، باڵتۆیەکی ئەمه‌ریکی و کۆڵێ ڕیش، کڵاوەکەم تا ناو چەوانم هێنا بوو، بەپێچەوانەوەی راکردنی خەڵکەکه تێمان ته‌قاند بۆ ناو جەرگەی شار و بۆ شوێنی تەقەکان ڕۆیشتین، تا گەیشتینە لای دائیرەی سەفەرو جنسیە، لەلایەک خەڵک ڕای دەکرد، لەلایەکی تریشەوە پیاوانی ڕژێم، کۆمەڵی ئەفسەر لە بەردەم ئەو دائیرەیە کە ئێمەیان بینی، بەپەلە سوای سەیارەیەک بوون ڕایان کرد... پاشان کەسێکم بینی کەخۆی لەوێ بوو، ووتی کۆمەڵێک خەڵکی سەر بە حیزبی شیوعی بوون لای باتە ئەو هەرایه‌یان ناوەتەوە... لەگەڕانەوەماندا بە لای بەڕیوەبەرایەتی پەروردە وێنەیەکی گەورەی سەدامان بەر بەرد دا... خەڵکە نەیاندەزانی لەترس و لە خۆشیانا چی بڵێن.
٧ ی ئازار گەڕانەوە بۆ خەبات
هەواڵی ئازادکردنی شارو شارۆچکەکان تا دەهات گەرمتر دەبوو، پێش نیوەڕۆی 7 ی ئازار بەماڵەوە هاتینە خەبات، بۆ بەشداریکردن لە ڕاپەرێن، هەڵبەتە پێشتر دەیان کەسم بینی بوو، سه‌ر به شانەچەکدارەکانی برسک بوون، یان کۆنە پێشمەرگەی یەكیتی بوون، ڕۆژانە چەند جارێک یەکتریمان دەبینی، ئەوەی منی لەوان جیا دەرکردەوە، هەر وەکوو ئێستا، بە ئاشكرا لەناو خەڵک دەگەڕام و بانگەشەی ڕاپەڕینم دەکرد، لە هەر شوێنێک وێنەی سەدامم بیینبایه ده‌م دڕاند. تەنانەت ڕۆژی 8 ی مانگ وێنەیەکی گەوره‌ی سەدامم بەبەرچاوی خەڵکەو ورد کرد، کەچەند جاشێکی برایم کانەبی لەوی بوون.
ئێوارەکەی هەواڵیان پێدام، کە ئەمشە و لەماڵەوە نەبم، چونکە ئەو هەواڵە گەیشتۆتە ده‌م برایم ئاغا کە من هاتوومە بۆ ئەوەی بانگەشە بکەم، بۆ ڕاپەڕین، ئەو کەسەی هەواڵەکەی پێدام، کەسێکی باوەڕ پێکراو بوو، منیش لە وەڵامدا ووتم، نەک جاشه‌کانی برایم کانەبی، هەموو سوپای به‌عس بێتە سەرمان، ماڵ چۆڵ ناکەم، بەرگری دەکەم، کێش دەتوانێت، با بفەرموێ، من تەنیا بووم، شەو لەسەر بانی ماڵی خوشکم، تا ١٢ی شەویش هەر چاوەڕێ بووم، تەنیا دەمانچەیەک و کڵشینکۆفێکم لا بوو، کەس نەهات بەو ناوەدا، دواتر منیش لێی خەوتم. من دەمزانی بەعس دەڕوخێت، کە ئه‌وساتە جاش و بەکرێگیراوەکانی نەیان دەتوانی بەعس لە مەرگ ڕزگار بکەن.. بۆ بەیانی جاریكی تر دەستم کرده‌وە بە بانگەشه‌ی ڕاپەڕین
١٠ ئازار جێهێشتنی خەبات بەرەو کەور گۆسک و جەدیدە
کاتژمێر ١٠ سەرلەبەیانی بووم لەماڵی حەبدوڵا نێو دەشتی کۆبووینەوە، بۆ ئەوەی دوا ۆلانی سبەینێ دا بڕێژین، پلانەکشمان بەم جۆرە بوو، دوای ئەوەی دەست دەگرین بسەر مۆڵگاکانی بەعس، کە زوربەیان دەکوتنە سەر شەقامی گشتی هەولێر/ موسڵ، بڕیار بوو سەر پردی ئاسکی کەڵەک بگرین، بۆ ئەوەی هیچ هێزیک نەتوانێت لە موسلەوە بێت، هەر کەسێکیش کە بیەوێت ڕا بکا بۆ موسڵ، ڕێگای لێ بگرین...
لەم قسەو باسانەدا بووین کە کوڕێک هاتە ژورەو ووتی من بە شوێن ئێوەدا دەگەڕیم، من ئەو برادەرەم نەدەناسی، دیار بوو ئەوانی تر هەم دەیانناسی هەم لەگەڵ خۆشیان پێشمەرگە بوو بوو..
ئەو برادەرە کە بەداخەوە ناوەکەیم بیر نەماوە، لە ئۆردوگای جەدیدەوە هاتبوو بۆ ئەوەی هاوکاری بکەین، بەقسەی ئەو کەس نییە، خەڵکەکە ڕێک بخات. کاتێک لەقسەکانی تەواو بووم بینیم کەس ئامادەیی ئەوەی تیژا نیە بچێت لەگەڵیا بۆ هاوکاری کردنیان، من وتم من دێم لەگەڵتا و لەوێ ڕاپەڕین دەکەین، بەڵام تکا لەو برادەرانە دەکەم، کە پلانەکە تێک نەدەن، بۆ ئەو مەبەستە سەعاتی سفرمان دانا، کە سبەی سەعات ١٢ی نیوەڕۆ لە خەبات و کەور گۆسک و جەدیدە لەیەک کاتدا، هەڵبکوتینە سەر بارەگاکانی بەعس!
ڕۆیشتن بەرەو ئۆردوگای کورگۆسک
گەڕامەوە ماڵەوە و بە پەلە خۆم ئامادە کرد کە لەگەڵ ئەم برادەردا بڕۆم، هاتینە گەراجی گوستنەوە، قسەمان لەگەڵ تەکسیەک کرد، کە بەتاڵی بێتە ئەو دیو سەیرترە، کە بە خسوسی بمانبات بۆ کورگۆسک، کابرای شوفێر خۆشی دیار چەکداری ڕژێم بوو، هەر چوار دەوری ئۆردوگای خەبات بەجاش گیرا بوو، بەڵام هیچیان نەدەکرد، هەر لەو ناوە بڵاوەیان پێکرد بوون، بەپێ چووینە سەر شەقامی نێوان خەبات و کور گۆسک، لەنزیک جاشه‌کانی تاکسیەکە وەستا و بەروە کەور گۆسک چوین، لەوێ چوینە ماڵی پورم ، هەر کە لە جاشه‌کان بە ژور کەوتم، وێنەیەکی گەورەی سەدامیان هەڵواسیبوو، یەکسەر پێش سڵاو کردن، پەلاماری وێنەکەیم دا و دڕاندم، پەرم نەیدەزانی لە ترس و لە خۆشیاندا بڵێ چی، ووتم هەر ئەمڕۆیان ماوە سبەی ئێرە و ئازاد دەبێت، لەوێ سدیقی مەلاعەبدوڵای خاسم بینی، پێم ڕاگەیاند، کە سبەی سەعات ١٢ی نیووەرۆ سەعاتی سفرە، هەڵبەتە پێشتریش کاک سدیقم بینی بوو، بەیاننامە و شتیان لەوێ بڵاوکرد بووە، لە ماڵی پورم کڵاشینکۆفێک وەر گرتوو، دەمانچەکه‌يشیم دا بەو برادەرە، له‌گه‌ڵماندا هات و به‌ڕێی کردین، تا لە ئۆردوگا دەرچووین بەرەو جەدیدە، کە هەرگیز ئەو ناوەم نەبینیبوو، ڕێگایەکی قوڕ و ناخۆش بوو، پاش کەمێک بینیم، دووکەس بەدوامانەوەن، ئێمەش بە ئەنقەست پێمان گرتەوە و بۆیان دانیشتین، ووتم بزانن، چ کارەن، ئەوان دیار بوو جاش بوون سەیرێکی منیان کرد بە کۆڵێ ڕیش و باڵتۆی ئەمریکیەوە کە هەر لە پێشمەرگە دەچووم هاتن بەلاماندا تێپەڕین دیار بوو خەڵکی ئەو گوندانە بوون. ئەوان دوور کەوتنەوه ئێمەش دەستمان کرد کردووە بە ڕێکرد، ماوەیەکی زۆر ڕۆیشتین، هەر نەگەیشتینە جەدیدە، ئەو ماوەیەی پێیان وتین دەمێک کۆتایی هاتبوو، کەسیش لەو ناوە دیار نەبوو، لیی بپرسین، ئێمە بەرەو ڕوی هەولێر دەهاتین، تا لە پڕ گوندێک دەرکەوت، نەشمان ویست بچینە ناو گوندەکە، دیار بوو هەمووی چەکدار بوون، لەدور لادێکە کانی ژنانی ڵیبوو، ڕوومان لەوێ کرد، ئەو برادەرەم دوور دامەزرا، خۆشم چومە لای ژنەکان لێم پرسین، ئۆردوگای جەدیدە لە کاملایە، دیار ئەوان لەدورەوە چاویان لە ئێمە بوو، وتیان لەکوێوە هاتوون، کەمێک بڕۆن چاوتان بە گردێک دەکەوێت، لەو دیوی گردەکە جەدیدەتان لێ بەدیار دەکەوێ، خوا ماڵیان ئاوا بکات، بەپەلە لەو ناوە دورکەوتینەوە و بەقسەی ژنەکان دوای نیو سەعاتێک گردەکەمان بینی و لە دورەوە ئۆردگای جەدیدەمان لێ دەرکەوت. باش بوو هێشتا دونیا تاریک نەبوو، بەجێی سەعات و نیوێک 4 سەعات لەناو گرد و تەلانەدا سوڕاینەوە، کە هەموو گیانمان شەڵاڵی ئارەقە و قووڕ بوو. هێندەی نەبرد، تراکتۆرێک لەو ناوە پەیدا بوو، جارێک دانیشتین، بۆ ئەوەی بێن و تێبپەڕبێ، سەرەتا ویستمان ڕایان بگرین، سورا بین لەگەڵیان، پاشان ووتمان کێ دەزانێ ئەمانە کێن، تراکتۆرەکە هات بەلامدا تێپەڕی و دیاره ئەوانیش زۆر ترسا بوون بۆ بەیانیەکەی لەکاتی ئازادیدا هاتنە لام قسەیان لەگەڵ کردم،
ئەوەندەمان نەما بوو ناو ئوردوگا، خەڵک له‌سەربانەکان دیار بوو، لە پر کسێکمان بینی لەناو جۆگایکدا، جار دادەنیشتن و تلی دەدا.. وامزانی کە منی جاشە.. بەو برادەرەم وت لێرە بە خۆم له‌سەر سک بۆی چووم بەبێ ئەوەی بهێڵم بمینێت، تا نەچوومە سەر سەری ئاگای لێ نەبوو، لە پڕ دەنگم دا و وتم تۆ کێت چی دەکەیت، لێرە، کابرا له‌ترسا ڕاپەڕی و بەخوا شوانکارەم خەڵکی گوندی شەروێتم، نازانم لە وه‌رزی بێ تاقەتی خۆم هاتوم بۆ ئەو دەشتە بیری مەڕەکان و شوانێتی دەکەم، وتم کە وایە، هەر چەند ڕۆژێکت ماوە، کوردستان ئازاد دەبێت و دەگەڕییتەوە سەر گوندەکەی خۆت، میش فڵان کەسم، کاتی خۆی مامۆستا ئەمینی برام لە گوندی شەروێت مامۆستا بوو. کابرای شوان کارە لەخۆشیانا شاگەشکە بوو بوو، ئەویشمان جێ هیشت گەیشتینە ناو ئۆردوگا،، بێش بوو . هەر لەسەرەتای ئۆردگا ، ماڵیکی پوری ئەو بردەرەی لێ بوو، لەوێ لاماندا، بەڵام خەڵکێکی زۆر ئێمەی بینی، کەلایانەوە ئاسایی نەبوو.
نانێکی سەر پێیان خوارد و من کڵاشینکۆفەکەم لەوێ جێهیشت، بۆ ئەوەی بێمە ناو خەڵک. چەند سەد مەترێک لەو ماڵە دەرکەوتین، مەفرەزەیەکی هاوبەشی ئەمن و پۆلیس و مونەزەمەی بەعس، بە بەردەماندا ڕەت بوون، باش ئێمه‌یان نەبینی، ووتم، هەر ئەمشەوتان ماوە، هێشتا بەخەیاڵی خۆتان بە دوای سەربازی ڕاکردوودا دەگەڕێن...
ئەم ئێوارەیە، تا دونیا تەواو تاریک بوو، دەیان سەدان کەسم بینی، گورز و تێبینی باشم پێدان، شەویش چوومە ماڵی فریادی مەلا مارف. دیسان هەرچی دۆستە و ناسیاو بوون هاتن بۆ لام، تا دەرنگ باسی ، پلانەکەی بەیانیمان کرد، خەڵک زۆر بە جۆش و خرۆش بوون.
بۆ بەیانیەکەی دەستم کردەوه بە گەڕان بە ناو خەڵکدا، لە هەر چوار دەورەی ئوردوگا، خەڵکم دەبینی پلانمان دانا کە سبەی سەعات ١٢ ، هەڵبکوتنە سەر مەرکەزی پۆلیس، کە ئەمنه‌کانیشی تیژا بوو، تەنیا مونەزەمەی بەعس بەتەنیشتیانەوە... بوو...
کاتژمێر ١٠ سەرلەبەیانی چەند دەستڕیژیکی تەقە کرا. من بەپەلە بەڕاکردن، خۆم گەیاندنە ئه‌و ماڵەی كڵاشینکۆفەکەمی لێ بوو، خێرا بەرەو لای تەقەکان چووم، هه‌ر دائیره بوو، هەر پیاوانی ڕژێم بوون له‌سەر بانی مەخفەرەکه‌وە لە ترساندا چەند فیشەکێکیان، تەقاند بوو، ئەوان لەوێوه دیار بوون، خۆیان ئامادە کرد بوو بۆ بەرگری، ئێمه‌ش خەریکی خۆ ئامادە کردن بووین، هەموو دەستە و تاقمەکانم ڕاسپارد بوو، کە هەر کەسە و لە قۆڵێ خۆیەوە هێرش دەکات.
کاتژمیر ١١ی پێش نیوەڕۆ دەنگی زرمەی ئار پی جی و دەستڕێژی زۆری لە ئۆردوگای کەور گۆسکەوە هات، واتە سەعاتێک پێش کاتی دیاریکراو، بۆیە منیش بە ناچاریی پلانەکەم گۆڕی و هەموو مەفرەزەکانم ئامادە کرد. لەچاو ترۆکانێکدا، هێرشمان دەست پێکرد، کە لە قٶڵی ئێمە زیاتر لە ٢٠ کەس دەبووین .له سەربانی بانی مەخفەره‌کەوە دراینە بەر دەسترێژی گوللە و چەند کەسێکمان لێ پێکرا، بەڵام نەگەڕایانەوە، له‌گه‌ل ئەوەی گوللە وەک باران دادەباریە سەرمان، لەوساتەدا چەند مەترێکم مابوو بگەمە پەنا دیوارێک و لەدڵی خۆمدا وتم، خۆزگە نەده‌پێکرام و بەچاوی خۆم مەرگی بەعسم دەبینی،
نە پێکرام، لە چه‌ند دەقیقەی کەمدا خۆمان کۆکردەوە و سەنگەرمان گرت، شەڕ دەستی پێکرد. لە قٶڵه‌کانی تریشەووە هێرش و ته‌قه دەستی پێکرد، ئەوان بەرگریان دەکرد، بەڵام بەرامبەر هەر دەسترێژێکی ئەوان، هەزاران گوللە ڕووبەڕوویان دەبوویه‌وه، بارەگای مونەزەمان گرت کە بەتەنیشت مەخەرەکەوە، خەلك دەستی کرد بەتاڵان.. لەوێ دوو کەس خەریک بوو لەسەر سۆپاییەک به شەر بێن.
لەکاتێکدا هەر سێ لای مەخفەرەکەمان گرتبوو، سەیارەکی تەکسی کە لە بەردەم مەخفەرکە بوو گڕی گرت.. دوکەڵ ئەو ناوەی تەنیبوو، هەر ئەوەندەم زانی تۆیۆتایه‌کی ڕەفیق حزبیەکان بەرەو مەخفەرکە هات، دایانە بەر دەستڕیژی گوللە، ڕەفیق حیزبیەکە دابەزیو دەستەکانی بەرز کردوە، هاوارم کرد، تەقەی لێ مەکەن، کەچی لە قٶلەکانی تره‌وە . کە لە ئێمەوە دور بوون، دایانە بەر دست ڕیژ و له‌به‌ر ده‌مانادا که‌وت و گیانی له ده‌ستدا..
شەڕ درێژەی هەبوو، زیاتر لە کاتژمێرێک زیاتر بوو، شوێنەکەی ئەوان قایم بوو، هاتم بۆ بەسەرکردنەوەی قٶڵەکانی تر.. بۆ نزیک ئەو ڕیگایە کە لە هەولێره‌وە دەهات بۆ ناو ئۆردوگا، مێردمنداڵیک ووتی دەچم بۆ لای ئەو سەیارەیە و دەمانچەی ئەو ڕەفیق حیزبیە دەهێنم، کە کەوتبووه نێوان ئێمە و مەخفەرکە، مێردمنداڵەکە بەڕاکردن تا لای سەیارەکه ڕۆیشت، تەقەیەکی زۆرمان لەو کاتدا لە مەخفەره‌کە کرد، دەمانچەکەی هەڵگرتوو، گەڕایەوە، یەکێک ویستی دەمانچەکەی لێ بستێنی، من نەم هێشت ووتم حەقی خۆیەتی. ئەو گیانی خۆی خستە مەترسیەو بۆ ئەو دەمانچەیە.
تا ئەوکاتە ٣ شەهید و چەند بریندارێکمان هەبوو، شەڕەکە درێژەی دەکێشا، هەوڵم دا لە بڵندگۆێ مزگەوتەوە بانگیان بکەم، کە خۆیان بدەن بەدەستەوە، بەڵام بڵند گۆکە ئیشی نەکرد.. دوای ماوەیەک، له‌سەر بانی مەخفەرەکەوە هاورای کرد، کە خۆیان دەدەن بەده‌ستەوە، سەدان کەس ڕایان کرد، کەچی جارێکی تر دەستڕیژیان لێکردین، ئه‌مجارە ئێمەش لەهەر سێ لاوە دەستمان کرده‌وە بەتەقە کردن لێیان، تا هیچ چارەیان نەما، بە به‌تانی ڕاوەشاندن، که نیشانەی خۆ بەدەستەودان بوو، داوای وه‌ستانی ته‌قه‌یان کرد، ئیتر له چاو تروکانێکدا، خۆمان کرد بەناو مەخفەکە کە بۆنی دوکەڵ و خۆێن وباروت ئەو ناوەی پڕ کرد بوو،
هەندێکیان لە ژوورەکان خۆیان شاردبوه‌وه، ئەوانەی بەرگریشیان دەکرد، له‌سەر بان بوون. بەسەر پەرشتی ملازم نەواف کە ئەفسەری ئەمن و بەپرسیاریەتی جەدیدە بوو.. لە سەر بانی مەخفەرکە دەستی تەسلیم بوونیان هەڵبڕی، بەڵام بەداخەوە که‌وتنە بەر دەستڕێژ، هەوڵمدا دیلەکان نەکوژڕێن، بەڵام گەر خۆم لا نەدابایه خۆشم دەپێکرام..
لەو هەموو هێزەی بەعس سێ کەسیان ڕزگاریان بوو، یەکێکیان، پۆلیسێکی پیری خەڵکی نەجەف بوو، مام خدر هێنای بۆ لای من، ووتی دەیانه‌وێ بیکوژن، پۆلیسەکە قورئانێکی بەده‌ستەوە بوو، لەترسانا دەلەرزی، ووتم من بڕوام بەدیل کوشتن نییە، مام خدر تۆ ئەو پۆلیسە بەرە ماڵی خۆتان، هەر کەسێکیش قسەی کرد، بڵێ من ڕیگام پێداوی، پۆلیسێکی تریش کە خەڵکی عەنکاوە بوو ڕزگارمانکرد، ئەویشم ناردە ماڵیک تا بەیانی.
لەناو مەخفەرکە کەس ئاگای لەکەس نەبوو، زوربەیان خەریک تاڵانی بوون. موبەردەیک گەورە لەناو حەوشەی مەخفەرکە بوو، چوومە سەری و ویستم چەند قسەیەک بۆ خەڵکەکە بکەم.. لەگەڵ یەکەم ڕستەمدا، تەکانێکی گەورەم دا خەریک بوو بەدەما بکەوم، کە سه‌یرم کرد، کەسێك موبەریدەکە ڕادەکێشێت،، ووتم بوەستە من دەمه‌وێ قسە بۆ خەڵک بکەم، دەستم کرده‌وە بە قسەکردن، ووتم. ئەگەر دوای بەعسیش لایەنێکی تر بێت ئاوا بەخەڵک بکات دڵنیاتان دەکەمەوە کە لەوە خراپتری بەسەر دێنین. خەریک بوو درێژەی بدەمێ، جارێکی تر موبەریدە ڕاکێشرا، سەیرم کرد، هەمان کەسە، ووتم کاکە گیان من موبەریدەم ناوی هی تۆیە بهێڵه قسەکانم تەواو بکەم، چەند وشەیەکی ترم نەوت، ئەمجارە خۆم نەگرتبایەوە کابرا ملی بەشکاندن دەدام.... بەناچاری دابەزیم.. کابراش موبەریدەکەی برد.
خەڵکی لەخوارەوە داوای لاشه‌ی مولازم نەوافیان دەکرد، لەسەر بانەوە بیان فریێیان دایه خوارەوە، ئەوەندەی من چاوم لی بوو، خەڵک پەتیان کردبووه ملی و ڕایان دەکێشا،، وردە وردە تاریک داهات، شەو بۆ خه‌وتن چوومە ماڵێک به‌لام تابەیانی خه‌و نه‌چووه چاوم.. دیمەنی ئەو کوژراوانە دەهاتنە پێش چاوم.. بەتایبەت ئەوانەی بە بەر چاوی منەوە کوژران، نەمتوانی ڕزگاریان بکەم.. هەموو کوژراوەکان کە ژمارەیان 23 کەس بوو بەشۆفڵ چاڵێکیان بۆ هەڵ کەند لە نزیک مەخفەرکە شادریانەوە.
بۆ بەیانیەکەی چوومەوە لای مەخفەرەکە، هەستم کرد، دەوری من لێرە کۆتایی پێهات، لە پڕ کاک قودسی عەبدوڵڵا کە ئێستا وەزیری بازرگانی عێراقه هات بۆل لام ، ووتی بریندارێک لە خەستنەکەی خەڵک دەیانەوێت بیکوژن، منیش بەپەلە چووم بۆ خەستخانەکه و بریندارەکەم لەگەڵ خۆمدا هێنایه دەره‌وە، ووتم کەس بۆی نییە دەستی بۆ درێژ بکات، ئەو که‌سە دیلە، دیل کوشتنیش پێشەی ئێمە نیە، پاشان دکتۆرێک لەوێ بوو، وتی بەڵکو ئەو بریندارە بدەیتە منم، من لەگەڵ خۆمدا دەیبەم بۆ موسڵ.
خەڵکەكەش هاواری کرد، کە دکتۆرەش بەعسیە، نابێت بڕوات، منیش ووتم من ڕێگای پیدەده‌م، ئیتر ئه‌وانیش دوای ناردم داوی پسولەیەکیان لێکردم بۆ ئەوەی لە ڕێگا کەس ڕێگایان نەگرێت، منێش، هەر بەده‌ستنوس بۆم نوسین، تکایە کەس ڕێگری لەو کەسانە نه‌کات که ناویان هاتووە، ئێمە ئازادمان کردووەم له خوارەوەش نووسیم
مستەفای حەسەنە گەورە سەرپرشتیاری ڕاپەڕینی جەدیدە ١٢/٣/١٩٩١ .
تا لای نێوەڕۆ لەوێ بووم، پاشان هەواكیان پێدام کە هەواڵی بریندار بوونم گەیشتۆتە ماڵەوە بۆیە لەبەر ئەوان ، گەرامەوە خەبات، هەر هەمان ڕۆژیش چوومه هەولێر.
ئەوە ئەو چیرۆک داستانە کە زۆر بەکورتی گێڕامەوە، دەنا دەیان لاپەڕەی تریش دەبێت، لەکۆتایشدا دەمەوێ چەند تێبینیەک بنوسم:
١/ لە زۆر شوێن وەک سەرپەرشتی کەرێک، ڕۆلی بەرچاوم بینیوە، نەمویستوە وەک پاڵەوان خۆم وێنابکەم، بەڵام ئەوە ڕاستیەکەی بوو، کە ئامادە بووم، گیانی خۆمی بۆ ببەخشم، دەیان سەدان جار لەو سێ مانگە توشی، حاڵەتی ترسناک هاتم، بەتایبەت لە بازگەکانی نێوان ڕانیە و هەوڵیر و خەبات، هەمیشە کۆمەڵیک بڵاوکراوەم پێبوون، جار جارەش چەک.
٢/ زۆرێک لەوانەی پێش ڕاپەڕین بینیمن، یان کەسانی سەر بەبەعس بوون، یان ترسنۆک و بودەڵە بوون، زۆریان دواتر بووونە بەرپرسی ئەم حیزب و ئەو حیزب، بەڵام لە هەر شوێنێک و کۆڕ و کۆبوونەوەیەکدا منیان بینی بێت، لەچاوەکانیادا شەرمەزاریم خوێندۆتەوە، کە ئەوە گەورەترین سەرمایە و دەستکەتی من بوو.
٣/ پێش ڕاپەڕین لەگەڵ جاشیک، کە سەیارەیه‌کی خۆم فرۆشتبوو لە پێشانگانی ئۆتۆمۆبیل، چوین بۆ ئوردوگای تۆبزاوا، لەڕێگا قسەم زۆر بۆ کرد، بەڵێنی دامێ کە ڕاپەڕین بووم یەکەم دەسترێژ ئەو بیکات، ماڵیان لە ئوردوگای پێزدین بوو، دوای ڕاپەڕین سوراغی ئەو پیاوەم کرد لە خزمەکانی، وتم بزانم بەڵینەکەی خۆی هێناوەتە جێ، کەچی بەداخەوە، ووتیان، یەکەم کەس هێرشی کردە سەر بارەگای بەعس، یەکەم کەس ئه‌و شەهید بوو، یادی بەخێر ناوەکەیم بیر نەماوە.
٤/ لە کاتی هەڵواسینی پۆستەرەکانی شەوی یەکەم، که‌سێک پێش هاتنی هێزەکەی ڕژێم دەسی کرد بوو بە لیکردنەوەی بەیاننامەکان، من بیرم نەمابوو ئەو وردەکاریە، ئەو کەسەی ئەو شەوە هاوکارم بوو، بە کورتە نامەیەک ئەوەی بۆ نوسیبووم (كاكه ئه‌وه‌ش بنوسه كه ...................قه لادزه كه ده‌مانجه كه‌ت لێراكێشا و كه ڕاى كرد . ئه‌و كه‌سه‌ى كه پۆسته‌ره‌كانى لێكرده‌وه ئێستا ئه‌ندام كۆميته‌يه له سويسرا قه‌ڵادزه‌یشه ئه‌و كاته ره‌ئيس اتحاد بۆ له خه بات).
٥/ لە جەدیدە لە یەکەم ساتتی تەقەکردنەوە تا کۆتایی، گەنجێکی ڕێشنم بەدواوە بوو، بۆ یەک ساتیش پشتی بەر نەدەدام، کۆڵێک دڵم پێی خۆش بوو، کە ئەوه‌ندە دڵسۆز بوو بۆم، دواتر کاتێک پرسیم، ئەو برادەرە کێیە، وتیان ئەوە دەستی لەگەڵ ئەمنەکان تێکەڵ بوو، بۆیە بەدوای تۆوە، چونکە دەیزانی کەس لە بەر خاتری تۆ هیچی پێ ناڵێت، ئەو کوڕە خەڵکی گوندی شێنێ بوو.
٦/ ساڵێک دوای ڕاپەڕین، هەمووو ئەو کەسانەی کە دەوری باشیان بوو لە ڕاپەرین، لە تەلەفزینەکان قسەیان دەکرد و باسی ئەو ڕۆژەیان دەکرد، کەچی بۆ جەدیدە کەسێک نەبوو، باسی بکات، کاتێکیس کۆمەڵێک خه‌ڵک کە سەر بەشانە چەکدارەکانی بروسک بوون، بینیم ، له راستییدا دەوری باشیان هەبوو، لەگەڵما بوون، ووتم بۆ نەچوون بۆ ئەو یادە قسە بکەن، ووتیان دەبوایە هەر باسی تۆیان بکردایە، بۆیە بێدەنگیمان لێ کرد.. وا ئەمڕۆ دوای ٢٢ ساڵی ئەم زانیاریانە دەخەمە بەردەست خوێنەران و خەڵکی کوردستان.
٧/ دوای گەرانەوەی بەعس بۆ کوردستان، چاڵی زۆر لەناو جەدیدە هه‌ڵدرایه‌وه و کەسوکاری کوژراوەکان بەچاو ساغی ئەو دکتۆرەیەی کە من ئازادم کرد، تەرمی کوژراوەکانیان دەرهێنا بووەوە، باوکی یەکێک لە کوژراوەکان ووتبووی، تۆ بڵێ کوڕەکەی من ئەوەندە خراپ بووو بێتم خەڵک بەم شێوەیان لێکردبێ!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
