كورد لە هەڵبژاردنەوە بۆ یاریكردنى مار و پەیژە

Tuesday, 06/04/2010, 12:00

راپۆرتى شیكارى: هەورامان محەممەد
هەڵبژاردنى 25ى 7 ئەوە چى بوو؟!
ئاشكرایە هەڵبژاردنى 25-7-2009 لە كوردستاندا گەرموگوڕى و تین و تاوێكى تەواوى بە خۆیەوە بینى، بە تایبەتى لە رووى بانگەشەى هەڵبژاردنەوە لە لایەن بزوتنەوەى گۆڕانەوە بانگەشەكان بەردەوام بوون، هەرچەندە بانگەشەكان لە شوێنە جیاجیاكاندا جیاوازى هەبوو، كە ئەمەش لە ئاستى دیموكراسیەتدا چەندین وتووێژى لە دواى خۆى بە جێهێشت، سەرەنجام ئاكامى هەڵبژاردنى 25ى7 25 كورسى پەرلەمانى كوردستان بۆ بزوتنەوەى گۆڕان بە دەست هات، ئەنجامى ئەم 25 كورسییەى بزوتنەوەى گۆڕان بۆ ناو پەرلەمانى كوردستان چەندین لێكدانەوەى جۆراوجۆرى لە ناو كۆمەڵگا بە گشتى و لە نێوان پارتى و یەكێتیى لێكەوتەوە، ئەوەبوو لە نێوان هەردوو زلحیزبەكەى كوردستاندا رۆژانە تاوتوێى گومانەكانیان لە ئاست یەكتردا دەكرد، بەرەى پایز واتە پارتى مەزەندەى بە دەستهێنانى ئەو چەند كورسیەى گۆڕانى بە تاكتیك هەڵدەسەنگاند و واى لێكدەدایەوە، كە تەواوى نفوسى یەكێتیى دەنگیان بە گۆڕان داوە و بونەتە مایەى خیانەتكردن لە سیاسەتى هاوپەیمانى، لە لایەكى دیكەشەوە لە وەرزە سەوزى سەركردایەتى بە ناو بەهارى یەكێتیى تا دەهات گومانەكانیان لە مەڵبەند و كۆمیتەكانى خۆیان چڕ دەكردەوە، ترس و دڵە راوكێیان لێ پەیدا بووبوو لە بەدەست هێنانى ئەنجامەكانى بزوتنەوەى گۆڕان، كە گوایا ئەگەر نفوسى ناو یەكێتیى بە رێژەیەكى بەرچاو دەنگى بە گۆڕان نەدابێت، ئەوا بزوتنەوەى گۆڕان بە هیچ شێوەیەك ناتوانێت ئەو رێژیە بە دەست بهێنێت، هەر بۆیەشە لە ناو چین و توێژى تەواوى كۆمەڵگادا لە كاتى ئاشكراكردنى دەنگەكان لە لایەن كۆمیسیۆنى باڵاوە، نوكتەیەكى تەنز ئامێز لەسەر زمانى تاڵەبانى بڵاوبووبوەوە، كە دەیانوت: "كاتێ رێژەى بە دەستهاتووى گۆڕان ئاشكرا بووە، تاڵەبانى وتوویەتى: ئەرێ ئەوە چى بوو؟!".
دواى تەواوبوونى پرۆسەى هەڵبژاردنى 25-7 یەكێتیى بە تەواوى كەوتە پیادەكردنى گومانەكانى لە ناو ریزەكانى خۆیدا، ئەویش بە دەستگیركردن و نانبڕینى زۆرینەى ئەندامەكانى لە سنوورى دەسەڵاتى خۆیدا، بەوەشەوە نەوەستا بەرپرسى مەڵبەندى قەڵاى هەمیشە بەهارى خۆى گۆڕى، لە لایەكى تریشەوە پارتیش بۆ بەخۆدا چوونەوە لە رووداوى كورتهێنانى دەنگ لەو هەڵبژاردنەدا بە تەواوى كەوتە متابەعەكردنى دەزگا جۆراوجۆرەكانى بە گشتى و سنوورى لق و ناوچەكانى بە تایبەتى، بەڵام لە هەڵبژاردنەكانى گشتی عێراقدا بە پێى رێژەى دەنگەكان تا رادەیەك دەركەوت، كە هەریەك لە گومانەكانى پارتى و یەكێتیى بەرامبەر بە دەزگا جۆراوجۆرەكانیان ریزەكانى هەردوو حیزب لە جێى خۆیدا نین، بۆیە نەیانتوانیبوو وەك پێویست كۆنترۆڵى بكەن، چونكە رووداوى هەڵبژاردنەكان ئەوەى سەلماند كە تەنها بۆ ئەوە ناگەڕێتەوە كە بزوتنەوەى گۆڕان وەك بزوتنەوەیەكى سیاسیى دەنگە ناڕەزایەتیەكانى ئەو دوو لایەنەى بۆ خۆى بە دەستهێنابێت، بە پێچەوانەوە دەتوانین بڵێین، ئەم كۆمەڵگایە بە گشتى داخوازى گۆڕانخوازیە، هەربۆیەشە گۆڕانكارى لە ناو ناخى هەموو تاكێكى كوردا بوەتە مایەى لێكدانەوە و هەریەكەش بە شێوازێك بە نهێنى و بە پێى خواستى خۆى پیادەى دەكات، هەربۆیەشە لەو روانگەیەوە دەشێت بڵێین: مەرج نییە زۆرینەى نفوسى یەكێتیى و پارتى دەنگى بە گۆڕان داوە، ئەى بۆ نەڵێین هەواداران و لایەنگرانى یەكێتیى و پارتى، نەك ئەوانەى وەك پێویست سودمەند نەبوون، بەڵكو ئەوانەى كە سودمەندیش بوون و دەنگیان بە لایەنى خۆیان نەداوە، یاخود وەك پێویست نەچوون بە رەو رووى سندوقەكانى دەنگدان.

گۆڕان بوەتە ئەمرى واقیع
كورد واتەنى دەربڕینى هەقیقەت و داننان بە هەڵەدا كەمێك تاڵە، ئەمەش هەمیشە لاى ئەو كەسانە تاڵە كە ناتوانن بەخۆدا چونەوە لە هەنگاوەكانیان بكەن، بەڵام ئەوانەى كە بەدواى تەحقیق بوونى خەونەكاندا دەگەڕێن، ئاساییە دان بە هەڵەكاندا بنێن و گفتوگۆى بەردەوام بهێننە مەیدان، نەك پەناگیرى و پفخواردنەوە لە ئاست كارەكان بسازێنن، هەر بۆ ئەم مەبەستە و ناونیشانى ئەم كۆپلەیە گەر لە بیرى خۆمانى نەبەینەوە لە كاتى هەڵبژارنەكانى 25-7 لە بن دەسەڵاتى پارتى لە كاتى بانگەشەكردندا ئەو خروقاتانەى كە دوور بوو لە پێوەرى سیاسیى بەرامبەر نووسینگەى گۆڕان لە هەولێر روویدا، دەخوازرا بڵێین چەند كەسێكى بەرژەوەند پەرست دەیەویست نێوانى لایەنەكان تێكبدات و ئاژاوە لە هەرێم بسازێنێت، ئەوەبوو (نێچیرەڤان بارزانى) بۆ هێوركردنەوە و لێكتێگەیشتن لە نزیەكەوە و ئیعتیزارهێنانەوە لە رووداوەكە، سەردانى ئەو بزوتنەوەى لە هەولێر كرد، لە دواى ئەم هەنگاوەش (نێچیرەڤان بارزانى) بووە مایەى دەرگاكردنەوە لە رووى گفتوگۆكردنى نزیكەوە، ئەوەبوو لە چاوپێكەوتنێكى تێر و تەسەلى كەناڵى knn لە سەر رەوشى سیاسیى هەرێم بە گشتى و هەڵبژاردنەكانەكان سازدرا، لە وەڵامى یەكێ لە پرسیارەكان (نێچیرەڤان بارزانى) وتى: "گۆڕان بوەتە ئەمرى واقیع"، لە لایەن بەشێك لە ناحاڵیەكانى هەردوو سەركردایەتى پارتى و یەكێتییەوە شیكارى ناجۆرى بۆ كرا، ئەوەبوو لە دواییدا لە ناو ریزەكانى یەكێتیى دا بەوە دەخوێندرایەوە، كە (نێچیرەڤان بارزانى) هاوسۆزە لەگەڵ گۆڕاندا و هاوكارى ماددى راگەیاندنى گۆڕان دەكات دژ بە یەكێتیى لە لایەك، لە لایەكى تریشەوە وەك ئەو جەستە پیرەى كە چۆن مرۆڤێك پیر دەبێت و هەمیشە لە ماڵدا خزمەت دەكرێت بەڵام بە هیچ شتێك رازى نییە، بەوجۆرە لەو قسەى (نێچیرەڤان بارزانى) رازى نەبوو، هەربۆیە لە ناو ریزەكانى پارتى و لایەنگران و هەوادارانى پارتیدا دەوترا نەدەبوایە (نێچیرەڤان بارزانى) گۆڕان بە حەجمى گەورە پیشانى كۆمەڵگا و پارتى بدات، بەڵام بە كۆى گشتى خوێندنەوەى بێ لایەنى لە ئاست دەربڕینى ئەو قسەیەى (نێچیرەڤان بارزانى) لە ناو كۆمەڵگا بە گشتى و چین و توێژى رۆشنبیران بە تایبەتى هاوكێشەیەكى هەق بێژى و راستگۆیانەبوو لە ئاست رووداوەكانى هەڵبژاردندا.

هەڵبژاردنى گشتى عێراق 7-3-2010
لە دواى رووداوى هەڵبژاردنى 25-7-2009ى هەرێمى كوردستان جارێكیتر حیزبە سیاسیە كوردیەكان هەریەك لە ئاستى خۆیەوە بۆ هەڵبژاردنەكان بە بەرنامەى تایبەتى خۆیان سازدا، هەرچەندە هاوپەیمانى كوردستان لە 13 حیزبى كوردى پێكهاتبوو، بەڵام هەریەكە بە لیستى كراوە واتە كاندیدى خۆیان بە ئاشكرا بەرامبەر بە كۆمەڵگا بۆ هەڵبژاردنەكان ئاشكرا كرد، بوونى ئەم لیستە كراوەییە تا رادەیەك بەهانەى جۆراوجۆرى حیزبەكانى لەگەڵ یەكتردا نەهێشتەوە، بە تایبەت گومانەكانى نێوان پارتى و یەكێتیى، چونكە لە هەڵبژاردنى 25-7 پارتى و یەكێتیى لەسەر رێژەى بە دەستهاتووى دەنگەكان لە یەكتر بە گومان بوون لە لایەك، لە لایەكى تریشەوە گومانى نێوان یەكگرتوو و كۆمەڵ و زەحمەتكێشان و سۆسیالیست، بە پێى ئەزموونى هەڵبژاردنهەرچەندە بوونى لیستى كراوە و كاندیدى ئاشكرا ئەمجارەش نەیتوانى حەجمى حیزبەكان بە تەواوى یەكلابكاتەوە، هەرچەندە پارتى لە رووى هەڵبژاردنەوە میكانیزمى دیسپلینى حیزبی خۆی لە ناو ریزەكانى خۆیدا بۆ بە ئامانج گەیاندنى سەركەوتنى تەواو بەكار هێنا، بەڵام ئەم هەنگاوەش بە تەواوى خەونەكانى پارتى نەگەیاندە تەحقیق بوونێكى یەكجارەكى، چونكە بۆ نموونە ئەگەر لە قەزایەكى ژێر دەسەڵاتى یەكێتیى لە رووى بوونى ئەندامێتی و دۆست و لایەنگرەوە پارتى خاوەنى نزیكەى پەنجا هەزار نفوس بووبێت، بۆچى نزیكەى پازدە هەزار دەنگێكى بە دەست هێنابێت، لە لایەكى تریشەوە یەكێتیى لە ناوچەكانى پارتى كاندیدەكانى لەبەر نەبوونى سیاسەتى مەركەزى كە هەریەكە بە ربەى كوتلە و كوتلەكارى هاتبوونە مەیدان و هیچ حیسابێكیان بۆ هێزى ململانێكان نەكردبوو، بۆیە بە دەردى هاوڕێ ستراتیژیەكەى خۆیان چوون.

غرورى گۆڕان
بە پێى ئامارى دەنگهێنان بێت دەتوانین بڵێین گۆڕان لە چاو هەڵبژاردنى 25-7-2009 دەنگەكانى زیاتر بووە، بەڵام لە رووى بەدەست هێنانى كورسى بێت، ئەوا لەچاو بەدەست هێنانى كورسى پەرلەمانى كوردستان زۆر لە كورتى داوە، چونكە بە پێى خوێندنەوەكانى خۆیان بێت كە لە پێش هەڵبژاردن چاوەڕوانیان دەكرد، دەبوایە گۆڕان لە رێژەى كورسى پەرلەمانى كوردستان باڵاتر بوایە، ئەم كورتهێنانەى گۆڕانیش دەتوانین بڵێین بۆ ئەم هۆكارانە دەگەڕێنەوە، لە كاتى بانگەشەكاندا راگەیاندنى گۆڕان بە چڕ و پڕى تەنها لەسەر كەموكوڕى و خروقاتى سەركردایەتى ناوچەى بە ناو هەمیشە بەهارى یەكێتیى بوو، هێمنى نواندنى راگەیاندنى گۆڕان بەرامبەر بە سیاسەتى ناچەى وەرزى پایزى پارتى دا، هەروەك دۆست و لایەنگرانى گۆڕانیش ئەوەیان نەدەشاردەوە و دەیانوت: "ئێمە لە یەك كاتدا ناتوانین شەڕى هەردوولا وەك پێویست بكەین"، ئەم وتەیەش بەس بوو بۆ بەهانەى یەكێتیى كە زیاتر گومانى خۆى لەسەر پارتى چڕتر بكاتەوە، كە گوایا پارتى بە تایبەت لە رێگاى (نێچیرەڤان بارزانی)ەوە هاوكار و هاوسۆزن لەگەڵ گۆڕاندا، لە دواى ئاشكرا بوونى بەشێك لە دەرەنجامەكانى هەڵبژاردن گومانەكانى پارتیش لەسەر تەزویركردنى یەكێتیى لە شارى كەركوكدا، دیسانەوە ئاوڕدانەوەى گومانى یەكێتیى بوو بۆ تەزویركردنى پارتى لە شارى هەولێردا، بەڵام تەواوى ناڕاستى ئەم گومانانەى لایەنەكان بە گشتى بەرامبەر بە یەك و نێوان پارتى و یەكێتیى بە تایبەتى، شاردنەوەى چەندین راستییە كە دەیانەوێت خۆیانى لێ بەدەر بكەن، چونكە دەشێت بڵێین رووداوى گۆڕانەكان لە ناو كۆمەڵگادا تەنها لە بزوتنەوەیەكى وەك گۆڕاندا نەماوە، بۆیە هەروا بە ئاسانى ناتوانرێت چارەسەر بكرێت، گەورەترین هەڵەى پارتى و یەكێتیش لەوەدایە، كە هەموو بەهانەكانیان تەنها لە ئاست بزوتنەوەى گۆڕاندا چڕكردوەتەوە، بۆیە وەك پێویست ناتوانن هەنگاو بۆ راستكردنەوەى هەڵەكانیان بنێن، بە تایبەتى لە شوێنێكى وەك كەركوكدا (ئەیاد عەللاوى) دیارترین رێژەى دەنگى بە دەست هێناوە.
گۆڕانیش بۆ هاتنە مەیدانى بە ناو گۆڕانكاریەكى گشتگیرى تەنها پشتبەستوو بوو بەو كۆنە كادیرە باڵایانەى، كە لە كلتور و ئایدیاى خۆیانەوە لە درێژەى خەباتى خۆیاندا بە یەكەوە بوون، نەك كۆمەڵگا بە گشتى، چونكە ئێستاش رابەرایەتى كردنى ئەو بزوتنەوەیە گۆڕانێكى نەوعى تێدانییە، تاوەكو كۆمەڵگاش بە چاوێكى گشتگیرى بڕوانێتە سەركردایەتى بزوتنەوەكەى.

دەورى كۆمیسیۆنى باڵا لە هەردوو قۆناغى هەڵبژاردندا
بە پێى ئەزموونى هەردوو قۆناغى هەڵبژاردنەكان لە ناو تەواوى رۆشنبیرانى عێراق بە گشتى و كوردستان بە تایبەتى، بە پێى رووداوى خروقاتەكانى حیزب و قەوارە سیاسیەكان لە كاتى هەڵبژاردندا نەتوانراوە وەك پێویست بڕوابوونێك بۆ ناو كۆمەڵگا بگەڕێننەوە، هەربۆیەشە دەتواندرێت بڵێین، ئاكامى بێهێزى كۆمیسیۆن تاكو ئێستا نائومێدیەكى تەواوى لە كۆمەڵگاى عێراق بە گشتى و كوردستان بە تایبەتى دروست كردووە، هەربۆیەشە هەڵبژاردن لە دواى هەڵبژاردن لە پارێزگاكاندا خۆى لە كورتى دەدات، ئەمە جگە لە دەورى دەستێوەردان و پشتگیرى كردنى وڵاتانى زلهێز و ئیقلیم بۆ چەندین حیزب و قەوارەى سیاسیى لە عێراقدا رەنگى داوەتەوە.

هەڵەكانى پارتى و یەكێتیى لە هەڵبژاردندا
دوابەدواى ئەو رێككەوتنە ستراتیژیەى نێوان یەكێتیى و پارتى بە قەولى خۆیان لە راگەیاندنە مەركەزیەكانیاندا وا پیشانى كۆمەڵگاى دەدەن، كە بە هیچ شێوەیەك لە نێوان هەستى هەردوو حیزبدا گومانى تێدا نەماوە و هەمیشە هەوڵدانیانە بۆ وتارى یەكگرتووى ئایندەیى نەتەوەیى، بەڵام لە راستیدا كاتێك ئەو گۆڤار و رۆژنامانەى كە لە بن دەسەڵاتى یەكتردا بە چاپ دەگەیەندرێت و دێنە بەر دیدى خوێنەران، دەردەكەوێت كە هەموو ئەو بانگەشانەى هەردوولا بۆى دەكەن لە ئاست ئاشتەوایى و تەباییانەوە پێچەوانە دەوەستێتەوە، كورد واتەنى: "سوار بوون عەیبێك و دابەزین دوو عەیب"، چونكە هەر لەو گۆڤار و رۆژنامانەدا زۆرجار دەركەوتووە، كە چۆن ئێسك و پروسكى یەكتر دەهاڕن، كە ئەمەش دەلاقەیەكى گەورەیە كە بە تەواوى كۆمەڵگا لە هزرى خۆیدا گۆڕان دروست بكات، نەك سەر بە بزوتنەوەى گۆڕان بێت.

كورد لە هەڵبژاردنەكاندا براوە نییە
گەر بە وردى لەسەر ئاستى هەڵبژاردنەكان بڕوانینە پێگە و دەسەڵاتى كورد بۆ بوونى نوێنەرایەتى نوێى كورد بۆ بەغدا، ئەوا ئەمڕۆ هەست پێدەكرێت كە كورد قۆناغ لە دواى قۆناغى هەڵبژاردنەكان پێگە و دەسەڵاتى بەرەو ئاڕاستەى بچوكبوونەوە دەچێت و ناتوانێت ئەو هەیبەت و ململانێیەى وەك جاران لە پەرلەمانى عێراقدا دەرهەق بە مافە هەڵپەسێردراوەكان قسەى لێبكات، ئەوەش سەرەنجامى ئەو ململانێ ناتەندروستە بوو كە لە ناوخۆى كوردستاندا زۆرینەى ململانێیەكان لە پێناو مانەوەى هەیبەتى حیزبایەتى و سیمبولى شەخسى هەوڵى بۆ درا، چارەكى ئەوەندە هەوڵ نەدرا بۆ مانەوە و گەورەبوونى ئایندەى كێشە نەتەوەییەكان لە ناوچەكاندا، ئەمەش ئەو نەخۆشییە كوشندەیەى دەسەڵاتى كورد لە ئاست سیاسەتمەدارانى دا دەردەخات، كە هەمیشە بوونى سیمبولى شەخسى لە نەتەوە گەورەتر دەزاندرێت، بۆیە نەیانتوانى میللەتى كورد لەم هەڵبژاردنەدا لە ئامانجەكانى ئایندەى نەتەوەیى نزیك بكەنەوە.
ئەگەر كێشە و ململانێیە ناوخۆییەكانى ئەمڕۆى ناو لایەنە سیاسیەكان بە باڵى ئۆزسیۆنەوە بۆ بەدەست هێنانى چەند كورسیەكى پەرلەمانى بەغدا تەنها لە پێناو خۆ ناساندن و مانەوەى حیزب و ئایدیا بێت، ئەوا گەورەترین هەڵە نیشانى كۆمەڵگا دەدرێت، هەقیشە كۆمەڵگا لەمڕۆوە حیزبە كوردیەكان بە باڵى ئۆپۆزسیۆنەوە بخاتە بەردەم بەرپرسیارێتى سبەینێ.

هەڵەى حیزبە سیاسیەكان بە باڵى ئۆپۆزسیۆنیشەوە لە هەڵبژاردنەكاندا
گەر بڕوانینە چەند ساڵەى ئازادى كوردستان، دەبینین بە هۆى ئازادى و بازاڕى ئازادەوە كۆمەڵگاى كورد توانیویەتى رێژەیەكى دیار و بەرچاو لە بوونى كەسانى بزنسمان دەربكەوێت، جا ئەو دەوڵەمەند بوونە دەتوانین بڵێین رێژەیەكى زۆرى لە پاڵ داهاتى حیزبە كوردیەكاندا بە ئاماند گەیشتووە، هەندێكیشیان دەگەڕێتەوە بۆ بوونى داهاتى خودى كەسەكان خۆیان و چالاكى ئابووریان لە رابردوودا، هێنانەوەى ئەم نموونەیە زیاتر مەبەست لەوەیە هەموو كاتێك لە هەڵبژاردنەكاندا حیزبە كوردیەكان تەنها چاویان لەو گەڕەكە میللى و چینە رەش و روتەیە، كە بەرەو پیرى بنەكەكانى دەنگدان بچن، ئەمەش هەوڵدانى حیزبەكانە كە دەیانەوێت زیاتر لە ژێر سایەى گەرەكە میللیەكاندا سەركەوتنەكانى خۆیان بە دەست بهێنن، ئەگەرنا بۆچى تاكو ئێستا حیزبە كوردستانیەكان بە باڵى ئۆپۆزسیۆنیشەوە ئەو داتایە لاى خۆیان دەستگیر ناكەن، كە ئایا دەنگەكانیان لەو بنكانەى كە لە گەڕەكە بزنسمانەكان و ئەو گەڕەكانەى كە خانەوادەى بەرپرسەكانى تێدایە چەند دەنگیان بە دەست هێناوە! یاخود تاكو ئێستا لە كاتى هەڵبژاردنەكاندا جگە لە چەند بەرپرسێكى دیار و بەرچاو كە لە زوومى كامێراى راگەیاندنەكانەوە بە دیار دەكەون، كێ ئەو بەرپرسە ئیدارى و سیاسیانەى دیكەى دیت كە لەگەڵ خانەوادەكانیان لە بنكەى دەنگدانەكان وەردەر كەوتبێت، ئایا دەنگدان لەم كۆمەڵگایەدا تەنها بۆ چینى رەش و روت بۆتە كەلتور؟! ئایا ئێوەى حیزبە سیاسیەكان لە كاتى هەڵبژاردنەكاندا گوێ بیستى زۆرینەى قسەى كۆمەڵگا بوون، كە دەڵێ: "كێ كفتەى خواردووە ئەو بچێتە پاڵ بوكێ"! ئەمەش مەبەست لەوەیە هەزارها بەرپرس و خانەوادەى ئیدارى و سیاسیى و خانەوادەى دەوڵەمەند هەن، كە تاكە دەنگێك چییە بۆ لایەنەكانى خۆیانى نادەن، ئایا ئێوە دەتوانن ئەم داتایەتان وەك پێویست دەسگیر بێت؟! ئەگەر بە رێژەى زەوى و ئیمتیازات بەخشینەوە بێت، بۆچى هەتاكو كاتژمێر 2ى پاش نیوەڕۆ بنكەى دەنگدانەكانى ئەو شوێنانەى كە ماڵە بەرپرس و دەوڵەمەندەكانى لێبووە مێش میوانى نەبووە، لە پاشاندا ئایندەى فۆڕمەكان چى بووە!

هەڵەكان لە كوێدان؟!
لە دواى راپەڕینە مەزنەكەى كوردستانەوە و گرتنە دەستى دەسەڵاتى سیاسەتى ئیدارى لە نێوان پارتى و یەكێتیى بە چەند قۆناغێكى جیا جیا تێپەڕى، هەر ئەم قۆناغانە بوون كە چەندین رووداوى جۆراوجۆرى بە خۆیەوە بینى، گەر لە بیرمان بێت ناوەڕاستى نەوەدەكان زۆرینەى گەنج و لاوەكانى كوردستان بووبوونە جیگاى سەرنج و خەباتى تێكۆشانى هێزەكانى pkk ئێوەش دەچوون بە ناوى جۆراوجۆرەوە دەستگیرتان دەكردن، ئایا ئێوە هەڵە بوون؟! یان گەنجەكان؟! یان pkk؟! كە لە كاتێكدا بوونى ئەو pkkیەش زیاتر لە خانەوادەى بەرپرسەكانى پارتى و یەكێتیەوە سەرى هەڵدەدا! یاخود كاتێ یەكگرتووى ئیسلامى كە دروست بوو لە ناو خانەوادەى بەرپرسەكانى پارتى لە دهۆك پەیوەندیان بەو ریزەوە كرد، ئایا هەڵەى ئێوە بوو؟! یا هەڵەى ئەوانە بوو كە پەیوەندیان دەكرد؟! ئایا گۆڕان كە دروست بوو خەتاى گۆڕانخوازان بوو؟! یان كەڵەكە بوونى هەڵەى چەندین ساڵەى سیاسیى و ئیدارى خۆتان بوو؟! ئێوە بۆ چوون خەڵكى رەش و رووتى بێ پشت و پەناى خۆتان لە ریزەكانتان بە تایبەت یەكێتیى بە ناوى گۆڕانخوازانەوە دەستگیر دەكرد، یاخود نان بڕواتان دەكردن! كە لە كاتێكدا زۆرینەى پورزا و خوشكەزا و برازاى بەرپرسەكانى یەكێتیى هەڵسوڕاو و گۆڕانخوازن لە ریزەكانى بزوتنەوەى گۆڕان، كەچى كەس لە گوڵ كاڵتریان پێ ناڵێت! ئایا كۆمەڵگا هەڵەیە لە رووداو و سەرهەڵدانى پێشڕەوایەتى كردنى گۆڕانكاریە جۆراوجۆرەكاندا؟! یاخود خۆ بە زل زانین و خۆ سەپاندنى بیرۆكراتى سیاسیى؟!