کچ کوشتن ڕه‌وایه!
Monday, 11/03/2013, 12:00
له‌ماوه‌ی سێ هه‌فه‌تی ڕابردوو له کوردستانی خوارو دوو کچ له‌سه‌ر شه‌ره‌ف به‌ده‌ستی باوکه ناشه‌ریفه‌کانیان کوژراوون.
بکوژه‌کانیش له‌جیاتی سزادانیان، ده‌ستخۆشیان لێده‌کرێ، وه به‌ناوی ئابڕوگه‌ڕانه‌وه و له‌ناوبردنی په‌ڵه‌ی شه‌رمه‌زاری، له‌لایه‌ن کۆمه‌ڵگاوه شه‌رعیه‌ت به تاوانه‌کانیان ده‌ردرێ.
به‌داخه‌وه به‌رگوێش ده‌که‌وێ که که‌سانی خوێنده‌وار و گه‌نجێکی زۆریش ئه‌م کاره به‌ڕه‌وا ده‌بینن وه به‌رپه‌رچی ڕه‌خنه‌گر ده‌ده‌نه‌وه وه ده‌ڵێن:
هه‌ر باوکێک بووبا له شوێنی بکوژ ئه‌وا هه‌مان کاری ده‌کرد.
هه‌ر که‌سێک بێهه‌ڵوێست بێ به‌رامبه‌ر ئه‌م تاوانانه ئه‌وا ئه‌م بێهه‌ڵوێستیه‌ی به ناڕاسته‌وخۆ جۆرێکه له پشتیوانی لێکردنی بکوژه‌کان،وه هه‌ر که‌سێکیش ئه‌م کاره به‌ڕه‌وا ببینێ ئه‌وا ڕاسته‌وخۆ به‌شداره له تاوانه‌که،
باشه ئه‌م پیاوانه کێن که ده‌ستیان ده‌چێته کوشتنی کچه‌کانیان؟ بۆ ئه‌م مه‌به‌سته هه‌ر به‌گۆتره ده دانه حاڵه‌تی ژنکوشتنم هه‌ڵبژارد که له‌ساڵی ۱۹۹۲ تا سه‌ره‌تای ئه‌مساڵ ڕویانداوه وه هه‌وڵم دا لێیان بکۆڵمه‌وه، به‌شێک له‌م حاڵه‌تانه وه‌ک به‌سه‌رهات بۆم گێڕدراوه‌ته‌وه وه به‌شه‌که‌ی دیشیان له ئه‌رشیفی ڕۆژنامه کۆمه‌ڵایه‌تیه‌کانم ده‌رهێنان.
بکوژه‌کانی ده کچه‌که، هه‌شتیان باوکی کچه کوژراوه‌که‌ن، دانه‌یه‌کیان برایه‌تی وه دانه‌یه‌کیشیان مامی کچه‌یه.
له‌م ده که‌سه حه‌وتیان کۆنه جاشن، دوانیان پێشمه‌رگه‌ن، وه یه‌کێکیان عه‌شایره
له‌م حه‌وت کۆنه جاشه سییانیان ده‌ستیان هه‌بووه له ئه‌نفال وه ده‌بووایه ببردرێنه به‌رده‌م دادگای ئه‌نفال ، دانه‌یه‌کیان نێربازه وه دانه‌یه‌کیشیان کۆنه هینه،
دوو دانه له‌م کۆنه جاشانه به خۆیان و یه‌ک ڕه‌وه ماڵ و منداڵ له وڵاتێکی ئه‌وروپی ده‌ژیه‌ن.
له‌م دوو پێشمه‌رگه‌ش دانه‌یه‌کیان ته‌نها ئامێزانی کوڕی ده‌کرد وه مه‌یلی نێری هه‌بووه یان هه‌یه
دانه‌که‌ی دیشیان خۆی لاقه‌ی کچهکهی کردووه وه دواییش هه‌ر خۆی کوشتی ، بوختانیشی پێ کرد که گوایا پیاوێکی به‌سه‌ره‌وه بینیوه بۆیه کوشتوویه‌تی
کابرا عه‌شایره‌که قوماربازه، ماڵه‌کی کردوه به لگاوخانه وه شه‌وانه تا دره‌نگێک قومارچی له‌ماڵه‌که‌ی کۆده‌بوونه‌وه، له‌وانه‌یه قومارچیه‌کی دۆڕاو تۆڵه‌ی خۆی له خاوه‌نماڵ کردبێته‌وه وه کچه‌که ئه‌تک ده‌کا.
حه‌وت دانه کۆنه جاشه‌کان:
که‌سانی دۆڕاون به‌رامبه‌ر به‌خۆیان وه خۆیان فرۆشتووه بۆ پاره، هه‌موو که‌ڕامه‌تێک و پیاوه‌تیه‌کیان له‌پاره و معاشی جاشایه‌تی ده‌دیته‌وه، وه شه‌ره‌فیش ته‌نها له چه‌ند سانتیمه‌ترێک له‌به‌ده‌نی ژن دا ده‌بیننه‌وه.
هه‌رهه‌مووشیان له‌کاتی جاشایه‌تی دا به‌به‌رده‌وام سه‌ردانی مه‌لهاکانی به‌غدایان ده‌کرد و پاره‌یان له له‌شفرۆه‌کان خه‌رج ده‌کرد، که ده‌شگه‌ڕانه‌وه ناو ماڵومنداڵیان سمێلیان قنیجه‌ی ده‌هات و خۆیان له‌به‌رده‌م جاشه‌کانیان ده‌کرد به که‌ڵه‌شێری شامی وه باسی ڕابوواردنی ناو مه‌لهاکانیان به‌به‌رده‌وام له‌به‌رده‌می منداڵه‌کانیان به‌شانازیه‌وه ده‌گێڕایه‌وه.
لێره‌دا پێویسته به‌راوردیه‌ک له به‌ینی له‌شفرۆێک له ئه‌وروپا له‌گه‌ڵ له‌شفرۆێکی لای خۆمان بکه‌ین،له ئه‌وروپا له‌شفرۆشی پیشه‌یه وه له زۆر وڵات ئه‌م ژنانه به‌ره‌سمی ئه‌ندامی ژووری بازرگانین، مه‌سه‌له‌که ته‌نها له‌شفرۆشتنه بۆ پاره په‌یدا کردن، وه زۆربه‌شیان شانازی به پیشه‌که‌یانه‌وه ده‌که‌ن، له‌ناو کۆمه‌ڵگاشدا بواریان پێدراوه وه نه‌فره‌تیان لێناکرێ،
ئه‌وروپی زۆر کراوه‌ن وه به پێداویستی پیاو وه ژن ده‌زانن وه به واقعیانه مامه‌ڵه‌ی مه‌سه‌له‌که ده‌که‌ن، که‌واته ژنه له‌شفرۆه‌کانی ئێره خیانه‌ت له عورف و عاداتی خۆیان ناکه‌ن وه نه‌فسیه‌تیان نافرۆشن. وه ئه‌و پیاوانه‌ی که ده‌چنه لایان اجوری خۆیان ده‌ده‌نێ وه دواییش که‌سیان له‌که‌س.
به‌ڵام لای خۆمان ژنی له‌شفرۆش نه‌ک به‌ته‌نها به‌ده‌نی ده‌فرۆشێ، به‌ڵکو خیانه‌تیش له مه‌بده‌ئه‌که‌ی ده‌کا، هه‌روه‌ک خیانه‌تی جاش به‌رامبه‌ر گه‌له‌کی، وه ئه‌م ژنانه به‌دزی ئه‌م کاره ده‌که‌ن وه هیچ کاتێکیش قبوڵ ناکه‌ن به قه‌حپه ناوببردرێن، هه‌موو پیاوێکیش که سه‌ردانیان ده‌کا وه دوای پاره دان و اجور، له‌گه‌ڵ خۆشی به‌شێک له عزه‌تی نه‌فس و که‌ڕامه‌تی ژنه‌که ده‌با. جا بۆیه له‌شفرۆشی لای خۆمان به‌مانه‌ی که‌لیمه قه‌حپه‌ن، وه ته‌نها که‌سی سووکی وه‌ک خۆیان ده‌خنه لایان.جا بۆیه ڕێکه‌ووتیش نیه که هه‌موو جاشێکی دۆڕاوی نه‌فسیه‌ت فرۆش له ئامێزی ژنێکی له‌شفرۆشی که‌م ڕه‌ووشت هه‌ست به ئاسوده‌یی بکا، چونکه هه‌ردووکیان هه‌ر یه‌ک شتن وه هه‌ردووکیان به جۆرێک له جۆره‌کان قه‌حپه‌ن
به‌س ئه‌م کچانه‌ی که حه‌ز له کوڕێک ده‌که‌ن و که‌تنێک ده‌که‌ن وه دواییش به‌ده‌ستی که‌سووکاریان ده‌کوژرێن ئه‌وانه ناتواندرێ به قه‌حپه دابندرێن. به‌ڵکو ده‌بێ به قوربانیان له‌قه‌ڵه‌م بده‌ین، قوربانی دامێن پیسی، خیانه‌ت، درۆ وه دواکه‌ووتوویین.
که باوکیان یان برایان به سه‌ربه‌رزیه‌وه به‌سه‌رهاتی شه‌وی دژوانی له‌شفرۆشێک ده‌گێڕێته‌وه، وه ئه‌میش گوێ بیست ده‌بێ ئیتر شه‌رمه‌که‌ی ده‌شکێ، وه به‌ڵێنی درۆی کوڕیش ترسه‌که‌ی ده‌شکێنێ، جا هه‌ر کچێک شه‌رم و ترسی نه‌بێ ئاماده‌یه له‌گه‌ڵ پیاو ڕاببوێرێ.
لێره‌دا مه‌به‌ست له‌و کچانه نیه که باوه‌ڕیان به ئاینه‌که‌یان بواری ئه‌م جۆره کارانه‌یان پێنادا.
که‌واته ئه‌و باوکانه‌ی که ده‌چن بۆ لای له‌شفرۆش یان به‌چاو قایمی ده‌ستدرێژ ده‌که‌نه سه‌ر ئابڕوی ژنی خه‌ڵک، یان به‌جۆرێک له جۆره‌کان بێشه‌ره‌فن، ئه‌وا هه‌ر ئه‌وان کچه‌کانی خۆیان به‌ره‌و ئه‌م جۆره ڕه‌فتارانه ده‌به‌ن.
که‌واته هه‌ر پیاوی بێشه‌ره‌ف هانی کچه‌کانی خۆی ده‌دا ئه‌م کارانه بکه‌ن، جا بۆیه ناڕه‌وایه بگووترێ که هه‌موو پیاوێک له شوێنی بکوژ با هه‌مان کاری ده‌کرد، نه‌خێر ئه‌مه ڕاستنیه چونکه ئه‌گه‌ر ئه‌و که‌سه به مانای پیاوه‌تی پیاو با بواری نه‌ده‌دا کچهکهی به‌ره‌و دۆڕان بچێ، وه به کووشتنی پاشه‌ڵی خۆی پێپاک نه‌ده‌کرده‌وه
بۆیه پاکانه‌ی ئه‌م تاوانانه به‌شداری بوونی له تاوانه‌که
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
