لەهەولێرەوە بەبەڵگەوە من پێتان ئەڵێم كـــێ كەناڵى ئاسمانى نــــالیاى سووتان
Monday, 21/02/2011, 12:00
من كەبراى یەكێ لەسوتاوەكانم و مامۆستایەكى سەرەتایم ، برا بچوكەكەم لەساڵى 2008 وە سەربازە لەفەوجى پاراستنى دەزگاى زانیارى لەقەلاچوالان ، دوێنێ نیوەڕۆ بەپەلە دایكم بەگریانەوە تەلەفونى بۆكردم و وتى هاوڕێەكى براكەت هاتووە و وتویەتى كوڕەكەتان دوێنێ شەو بەزۆپا سوتاوە و ئیستا لەنەخۆشخانەى تەوارى هەولێرە ، هەربۆیە بەپەلە لەقوتابخانە گەڕامەوە و لەگەڵ خێزانى براكەم و دایكم و خوشكێكمدا بەرەو هەولێر رۆشتین ، لاى عەسر گەیشتینە هەولێر و لەرێگا بەتەنها بیرم لەوەدەكردەوە كەچۆن براى من بەزۆپا سووتاوە ، چونكە من ئاگام لێبوو كەلەكاتى ئەو بەفربارینە زۆرەى ئەم دوایەدا هەموو كاتێ دایكم بەبراكەمى ئەوت لەگەڵ سەرما و سۆڵە وەزعتان چۆنە ، براكەم بەپێكەنینەوە ئەیووت دایە گیان سەرماى چى تەنانەت لەئاودەستەكانیشدا سپلیتمان هەیە و كارەبامان فوولە و یەك چركە ناكوژێتەوە ، ئەى ئیتر زۆپاى چى و سوتانى چى .
كاتێ لاى عەسر گەیشتینە هەولێر راستەوخۆ چوینە خەستەخانەى تەوارى یان ئیمنجرسى هەولێر ، تەئكیدمانكردەوە كەبراكەمان لەگەڵ چەند كەسێكى ترلەوێیە ، بەڵام لەگەڵ ئەوەى تانزیكەى كاتژمێر دەى شەو لەوێ ماینەوە نەیانهێشت بیبینین ، ناچار چوینە ئوتێلێك تاكو بەیانى زوو واتە ئەمڕۆ دووبارە چوینەوە بەر خەستەخانە ئەمجارە دایكم زۆر وەزعى خراپبوو زۆر ئەگریا ، دكتۆرێك وتى لاى نیوەڕۆ مەجالتان ئەدەینێ بیبینن ، نزیكەى سەعات یانزە بانگیان كردین و چوینە ژوورێ براكەمان لەگەڵ كەسێكى تر لەقاوشێكى پشتەوە بوون ، زۆربەى گیانى بەشاشى سپى بەسترابوو ئاویشى بۆ هەڵواسرابوو بەڵام ئاگاى لەخۆى بوو ، دكتۆرەكە وتى زۆر ماندوى مەكەن و وتى رێژەى 40% ى گیانى سووتاوە مەترسى بۆسەر ژیانى نیە ، پاش ئەوەى خێزانەكەى و دایكم زۆر گریان و بووە دەنگەدەنگ ، دكتۆرێك تووڕەبوو و بەچەند سستەرێكى وت بیانبەنە دەرەوە ، بەڵام من زۆر تكام كرد چەند دەقیقەیەك لەگەڵى بمێنمەوە ، پاشتر یەكسەر راستى هۆى سوتانەكەم لێپرسى براكەم كەوتە جنێودانى دكتۆر خەسرەو و شێخ لاهوور ، وتى ئەو شەوە نزیكەى یەك و نیوى شەو بەچەند سەیارەیەك بردویانین گوایا بۆگرتنى چەند كەسێك ، بەڵام كەگەیشتونەتە گوندى ئەڵمانى چەند حیمایەیەكى شێخ لاهوور شەش دەبەى بیست لیترى بەنزینیان داگرتووە و وتیانە ئەم شوێنە بسوتێنن ، پاش ئەوەى براكەم لەگەڵ سێ كەسى تردا بەدوو دەبە بەنزینەوە دەچنە قاتى سەرەوە چەند كەسێك لەقاتى خوارەوە بێ ئەوەى لەبیریان بێ چەند كەسێك لەسەرەوەن چوار دەبە بەنزینەكەى تر دەڕێژن و ئاگرى تێبەردەدەن و دەست بەتەقەكردن دەكەن ، براكەم ئەیگوت ئێمەش هاتینە خوارەوە و بەشپرزاوى بەناو ئاگرەكەدا خۆمان رزگاكرد بەڵام جلەكانمان گڕى گرت لەبەر ئاگرەكە و لەبەر ئەو بانزینەى پێمانا رژابوو ، پاشان بردویانن بۆ مستەوسەفى عەسكەرى قەلاچوالان و لەبەرسەختى برینەكانیان بەرەبەیانى زوو بەسەیارەى ئیسعافى ئەوێ بەرەو هەولێریان بردوون پاش ئەوەى دكتۆر خەسرەو و شێخ لاهوور هەڕەشەى كوشتنیان لەهەر كەسێك كردووە كە یەك وشە لەسەر ئەم كارە لاى یەكێك باس بكات .
بەپەلە نووسینم بۆ گێڕانەوەى بەسەرهاتى راستەقینەى براكەم بە شاهیدى خواى گەورە تەنها لەبەر ئاسوودەكردنى ویژدانى خۆم بوو لەگەڵ ئابرووبردنى ئەم تاقمە تیرۆریستە كەخۆیان ناوناوە یەكێتى و دەزگاى زانیارى و حكومەت ، باهەموو لایەك بزانن ئەم تاقمە چەند درۆزنن چەند تاوانبارن ، ئەكرا براكەى من ئەو شەوە بەزیندوویى تاكو مردن بسوتێت و مناڵ هەتیوبێت و ژن بێوەژن و دایكى جەرگ سووتاو و برا و خوشكى كۆستكەوتوو تــەنها بۆ هەوەسێكى شێخ لاهوور و دكتۆر خەسرەوەى پیاوكوژ و تاوانبار ، مەگەر ئەو گەنجە خوێنگەرمانەى سەر شەقام حەقى براكەم و هەموو ستەملێكراوەكانى وەك براكەم بسێنن .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
