مەلا بەشیر، لە پلانەكانى پاراستن بەشدارە

Sunday, 23/05/2010, 12:00

چەند رۆژێكە راگەیاندنى پارتى بە شێوەیەكى بەرنامە بۆ دارێژرا و خەریكى ئاڵۆز كردنى كەیسى تیرۆركردنى سەردەشت عوسمانە و دەیەوێت بە رشتنى ژەهرى ناوچە گەرێتیى و شارچێتى فیتنەیەك لە ناو شارەكان دروست بكات و بەڵایەك بە سەر خەڵك بهێنێت كە تاوانى كوشتنى سەردەشتیان لە بیربەرێتەوە.
دەزگاى پاراستن بە ووردى خەریكى دروست كردنى چەندین پشێوى ترە، یەكێك لەو پلانانەشى هاندانى ناوەندى كۆمەڵایەتى و خەڵكى هەولێرە لە بزوتنەوەى گۆران، دەیەوێت وا لە خەڵك بگەیەنێت كە لە لایەن بزوتنەوەى گۆران و KNN ەو سوكایەتى بە خەڵكى هەولێر كراوە و هەولێر بە پایتەختى تیرۆر و فەللوجە وەسف كراوە.
بۆ ئەم هەوڵەى دەزگاى پاراستن، مەلا بەشیر و چەند نوسەر و كەسایەتیەكى ترى شارى هەولێر بەكاردەهێنرێن و لە رێگاى دەزگا راگەیاندنەكانیانەوە بە تایبەتى رۆژنامەى هەولێر و كوردستان تیڤى و رۆژنامەى رووداو سەرەتا زەمینەسازى دەكەن و خەڵكى هەولێر وا تێدەگەیەنن، كە لە لایەن گۆرانەوە سوكایەتیان پێكراوە. دوور نیە دواتر لە رێگاى چەند كەسێكى سەر بە پاراستن پەلامارى بارەگاى گۆران و نوسینگەى KNN لە شارى هەولێر بدرێت و واشى بڵاوبكەنەوە كە لە لایەن خەڵكى هەولێرەوە پەلامار دراون.
مەلا بەشیر یەكێكە لە مەلا بە ناوبانگەكانى شارى هەولێر و پێشتر بە وتارە توندەكانى لە دژى دەسەڵات دەناسرایەوە، بە هۆى ئەو هەڵوێستانەى پێشوشى تا ئێستاش خەڵك باوەرى پێدەكات و وەك پیاوێكى ئاینى گوێى لێدەگرن.
هەر بۆیەشە پاراستن ئەویان دەست نیشان كردوە بۆ موخاتەبە كردنى خەڵكى هەولێر و هاندانیان لە دژى بزوتنەوەى گۆران. لە چەند رۆژى رابردووشدا لە نێو ریپۆرتاژەكانى كەى تیڤى و رۆژنامەى رووداو، بە شێوەیەكى سەرەكى مەلا بەشیر قسەى كردوە و خەڵكى وا تێگەیاندوە كە سوكایەتى بە هەولێریەكان كراوە.
مەلا بەشیر بە هۆى ئەزموونى مەلایەتى و و تاربێژى لە مزگەوتەكانەوە ئەزمونێكى گەورەى لە جوڵاندنى خەڵك و راى گشتى شەقامى هەولێر هەیە، لە ساڵانى كۆتایى نەوەدەكان بە وتارەكانى هەینى خەڵكى لە دژى پارتى هاندەدا و چەندین جار پارتى تووشى گرفت كردوە، وتارە تۆماركراوەكانى مەلا بەشیر بە هەموو شارەكانى كوردستان بڵاودەبوونەوەو بۆیەشە پارتى حیسابێكى ووردى بۆ كردو بە پێش كەش كردنى ئیمتیازى پۆست و فشار خستنە سەر تەسلیمى ئیرادەى پارتى بوو.
هەروەها مەلا بەشیر یەكەم كەس بوو بابەتى گۆڤارى وێران و سوكایەتى كردن بە پێغمبەرانى جوڵاند و لە دادگا سكاڵاى لە سەر وێران تۆمار كردو لە راگەیاندنەكان باسى كرد. ئەوەش دیسان بە پلانى پاراستن بوو، فەرهاد پیرباڵ و زانا خەلیل(بەرێوەبەرى تەلەفزیۆنى قەڵاتى سەر بە لقى دووى هەولێر) بابەتەكەیەیان لە گۆڤارى وێران بڵاوكردەوە و مەلا بەشیریش بابەتەكەى لە ناو راگەیاندن و مەلاكانى هەولێر وروژاند. ئامانجیش لەو پلانە بە تەڵەوە كردنى پارتە ئیسلامیەكان بوو، بۆ ئەوەى بكەونە بەرەیەكى دژى رۆشنبیران. لەو پلانەشدا پاراستن ئامانجەكەى پێكا و یەكگرتووى خستە شەرێكەوە لەگەڵ رۆشنبیران و پێش بەستنى كۆنفرانس یەكگرتووى تووشى قەیرانێكى ناوخۆى و سیاسى كرد و درزەكەى نێو ریزەكانى قیادەى یەكگرتووى گەورەتر كرد، بە شێوەیەك كە چەند ئەندام مەكتەب سیاسیەكى یەكگرتوو دژى بەیاننامەكەیان وەستانەوە.