كورسییەكەی تاڵەبانی و شەست و شەش

Saturday, 03/12/2011, 12:00

دۆست و ناحەزانی تاڵەبانی كۆكن لەسەر ئەوەی تاڵەبانی ئامادەیە هەموو شتێك، هەر لە ماف و داخوازییەكانی خەڵكەوە تاوەكو سامان و داهاتی كۆمەڵگا و تەنانەت خودی یەكێتیش بكاتە قوربانی بۆ پاراستنی كورسی دەسەڵاتەكەی، ئەو كورسییەی لە مەیدانی سیاسەتی ئێراقیدا بێجگە لە قەباڵەیەكی بەتالأ هیچی تر نییە. گومانی تێدانییە ئەم بۆچوونە ڕاستییەكی حاشاهەڵنەگرە، نەك لەبەرئەوەی ناحەزانی تاڵەبانی بەردەوام خەریكی وتنەوەی ئەم قەوانەن، بەڵكو لەبەرئەوەی خودی تاڵەبانی ڕۆژانە و سات بە سات بەڵگەی جۆراوجۆر دەخاتە بەردەم خەڵك لەسەر ڕاستی ئەو بۆچوونە.
لێ ئەوەی كەمتر پرسیاری لەسەر لێدەكرێت ئەوەیە: ئایا بۆچی تاڵەبانی بەو شێوەیە ڕەفتاردەكات، لە كاتێكدا خۆیشی زۆر باش دەزانێت گەیشتووەتە تەمەنێك كە پێیدەوترێت لەسەر قەراغی قەبرە، واتە هاكا لاربووەوە و هەناسەی لێبڕا؟ ئایا هۆی پیری و خەڵەفاوییە یان هەر سیاسەتی یەكێتی بەوشێوەیە؟ ئایا دەبەنگیی تاڵەبانی دەتوانێت بگاتە ئەو ئاستەی لەبەر دەمی هەموواندا بەو شێوەیە ڕەفتار بكات، لێ كەسێك نەبێت بەئاگای بێنێتەوە و بە كارە نەشیاوەكانی خۆی ئاشنای بكات؟ یان مەسەلەكە تەواو پێچەوانەیە و تاڵەبانی بەوپەڕی ئاگاییەوە ئەو كارانە دەكات و خواست و حەزێكی تاكەكەسی سواری سەری بووە و پێیوایە تەنیا بەو شێوەیە بە مرازی دڵی خۆی شاددەبێت؟
ئەگەر وردتر بڕوانینە مێژووی تاڵەبانی ئەوسا بۆمان دەردەكەوێت، خودی كورسی دەسەڵات ئامانجی سەرەكی تاڵەبانی نییە، بەڵكو ئەو كورسییە لای تاڵەبانی ئامڕازێكە بۆ گەیشتن بە مردن و پرسەیەكی قەرەباڵغ و گەورە و لێرەشەوە دەكرێت ئەگەر بۆ ماوەیەكی كورتیش بێت دەم و پێنووسی ڕەخنەگرانی نەیار و كەسانی سەرقاڵی نووسینەوەی مێژوو لە ئاست مێژووە پڕ شەرمەزارییەكەیدا كڕو بێدەنگ بكات. واتە تاڵەبانی دەیەوێت لە سایەی كورسی و پرسەی گەورەدا مێژووەكەیشی لە گۆڕ بنرێت و كەس باسی جاشبوونەكەی بۆ نەوەكانی داهاتوو نەكات.
ڕەنگە كەسانێك هەبن تائێستاش جاشێتییەكەی شەست و شەشی تاڵەبانی و هاوڕێكانی بە جیابوونەوەیەكی سیاسی لە پارتییە كارتۆنییەكەی بارزانی دابنێن و لەمەشەوە ڕەوایەتی بە جاشێتیەكەی بدەن، بەڵام لە ڕاستیدا ئەمە بێجگە لە گەوجبوون و گەوجاندن زیاتر هیچ شتێكی تر نییە. بەڵێ ڕاستە جیابوونەوەی گروپی گەورە یان بچوك لەم یان لەو حیزبی سیاسی مەسەلەیەكی ئاساییە و پابەندی كاریگەریی بۆچوونە سیاسییەكانە، بەڵام ئەوەی لە شەست و شەشدا ڕوویدا، جیابوونەوە نەبوو بە مەبەستی برەودان و درێژەدان بەكاری سیاسی بەشێوەیەكی باشتر و چالاكتر، بەڵكو ئەوەی ڕوویدا بریتی بوو لە خەساندن و لەكارخستن و بێدەنگكردنی باشترین كادێرە هەڵسوڕاوەكانی كایەی سیاسەتی كوردی ئەو سەردەمە بە قازانجی دەسەڵاتی مەركەزی دوژمن بە كورد، بەوەش پڕۆسەی بەرەوپێشچوون و كۆمەڵایەتیبوونەوەی پڕۆسەی سیاسەتكردنی تەواو بەرتەسك كردەوە و ئەوەی مابووەوە لە بەرژەوەندی بارزانی و حیزبی بنەماڵەكەی بوو. لە هەمان كاتیشدا ئەو توێژە چالاك و تاڕادەیەك ڕۆشنبیرەی سەرقاڵی سیاسەتكردن بوون لە خەباتگێڕی كوردەوە بوون بە نۆكەر و جاشی دەوڵەت و گورزی دەستی دوژمنان بۆ لێدانی بزوتنەوەكەی بارزانی، كە بەدەر لە ویستی بارزانی، پڕبوو لە مرۆڤی پاك و بەوەفا و ئامادەی قوربانیدان لە پێناوی نەتەوەكەیاندا. ئالێرەوە تێدەگەین بزوتنەوەكەی تاڵەبانی و برایم ئەحمەدی خەزووری چ نەهامەتی و كارەساتێكی بەسەر ئێستا و پاشەڕۆژی نەتەوەكەیدا هێنا. گاڵتەگێڕی ڕۆژگار لەمەدایە، بزوتنەوەیەك لافى خەباتی سیاسی بۆ نەتەوەكەی لێبدات، كەچی ببێت بە جاشی دوژمنەكەی و هەوڵی سەرسەختانەش بدات بۆ ئەوەی نەوەی تازە پێگەیشتووی ئەو سەردەمە بەو شیرە حەرامە گۆشبكات، كە گوایە خەباتكردن دژی دوژمن بریتییە لە جاشبوون بۆ خودی ئەو دوژمنە. ئەمە چ پارادۆكسێكە لە ئەقڵی تاڵەبانیدا گەرای خستبوو؟
جاشێتییەكەی تاڵەبانی هێندە قێزەون و میكرۆباوی بوو، بە تۆپینی جاشەكانی بەكرەجۆ كۆتایی نەهات، بەڵكو ئەو قوڕاو و گواوەی تاڵەبانی ڕشتی پاشتر بووە نەریتێك و سەراپای جەستەی كۆمەڵگای كوردی لە هەشتاكانی سەدەی ڕابردوودا داڕزاند بەوەی سەدان فەوجی جاش خەفیفە لە كوردستاندا دروستبوون و هەندێكیان بە قۆنتەرات بەرەی جەنگیان لە بەعس وەردەگرت. (شەقی مێژووش لەوەدایە سەدام ئەو فەوجانەی ناونا خەفیفە، ئاخر چونكە ئەو لە شەستەكاندا جاشە قورسەكانی بینیبوو. جیاوازییەكەش ئەوەیە جاشە خەفیفەكان خەڵكانێكی ڕەشۆك و هەڵهاتووی سەربازی بوون، بەڵام جاشە قورسەكان ئەوانە بوون كە بارێكی ئایدۆلۆژیاشیان لە خۆیان باركردبوو، تیۆرییانە دەزڕین و پراكتیكییانە جووتەیان دەهاویشت. خەفیفەكان بونیادی كوردییان نەشێواند، بەڵام جاشە قورسەكان بێزكردنەوە لە كوردبوونی خولقاند...!!).
لێرەوە بۆماندەردەكەوێت هەموو ئەو شتانەی ئەمڕۆ تاڵەبانی دەیكات لەژێر زەبری ئەو مێژووە ڕەشەدایە، كە سەردەمێكی ڕەشتری بۆ كورد كردە دیاری. واتە تاڵەبانی ئەمڕۆ بەو خەونەوە دەژی كەوا لەمەودوا كەس جاشێتییەكەی زیندوونەكاتەوە، بەڵكو تەنیا و تەنیا تاڵەبانی سەرۆك كۆمار بناسرێت و وەك سەرۆك كۆماریش مامەڵەبكرێت. لێ لەبەرئەوەی تاڵەبانی لە بەشێكی زۆری كۆمەڵگا و بەشێكی بەرچاوی ئەندامانی حیزبەكەی دڵڕەشە و گومان لە هەڵدانەوەی ئەو ساڵانە دەكاتەوە، بۆیە ئێستا دەبینرێت، لەپالأ بەگەڕخستنی هێرۆ و كوڕەكانیدا، بە دوو ئاڕاستەی جیاوازدا كاردەكات: یەكەم تەسلیمبوونی خۆی و تەسلیمكردنی یەكێتی بە پارتی و بنەماڵە و دووەم خۆخەریككردنی بە بەغدا و ئێراقی عەرەبییەوە، ئەوەش بەو هیوایەی ئەو دوو لایەنە لە پاش مردنی لە بەڵای ناگەهانی زیندووكردنەوەی شەست و شەشی ڕزگاربكەن. بەڵام تاڵەبانی بزانێت یان نا ئەم دوو ئاڕاستەی كاركردنە دەقاودەق بریتییە لە تەواوكردن و درێژەپێدانی شەست وشەش، لەبەرئەوە زیندووكردنەوەی شەست وشەش، نەك لەگۆڕنانی، كارێكی حەتمییە و هەرگیزاوهەرگیز (خەونی شاعیرانە) نییە.
بمرە... تاڵەبانی هەتا زووە بمرە.. چونكە مردنی تۆ زیندووكردنەوەی شەست وشەش و تاوانباركردنی كاراكتەرەكانی دەهێنێتەوە سەر بەڕە.. مردنی تۆ واتە زیندووبوونەوەی بەشێكی گەورەی خەسێندراوی ناو یەكێتی... مردنی تۆ واتە كرانەوەی دەرگای پرس و كێشەكانی كورد.. مردنی تۆ واتە بە یەك دەستی مانەوەی مەسعود و بنەماڵەكەی.. مردنی تۆ واتە مردنی منداڵدان و مامانی جاشایەتی: ئیتر بۆ سەرۆكی حەكەم بێت یان بۆ مالیكی جاشی ئێرانی...بمرە چونكە مردنی تۆ هەموو گەندەڵییەكانی ئێستای یەكێتی ئاشكرا دەكات و ئەوسا هیوایەك سەوزدەبێت بەوەی یەكێتی و یەكێتییەكان بگەڕێنەوە ناو باوەشی خەباتی كوردایەتی... دەسا بمرە تاڵەبانی تازووە بمرە...!