چه‌قۆ ده‌سکی خۆی نابڕێت!
Wednesday, 09/06/2010, 12:00
قه‌ندیل وارگه‌ی ڕه‌وند و کۆچه‌ری هه‌ردانگه‌ڕی خاک و خه‌ڵکێکه، سێ پاڕچه‌ی جه‌رگی دابڕاوی پێکه‌وه لکاندووه که به هیچ تیر و شیر و فڕگه و فڕۆکه‌یه‌ک قه‌ڵشی تێناکه‌وێت.
قه‌ندیل مێنگه و حه‌شارگه‌ی چه‌کهه‌ڵگری برسی، بریندار، نه‌قوستان و شه‌هیدانێکه، که هه‌تا قه‌ندیل ته‌می چه‌وسانه‌وه، داگیرکاری و خۆێن و فرمێسکی به داوێن دا هه‌ڵبکشێت، کچی زانا و کوڕی ئازا له ده‌وری قه‌ندیلدا چه‌ک به شان و گیان له سه‌ر ده‌ستان ده‌مێننه‌وه.
قه‌ندیل یادگاری په‌یمانی سێ سنوورانه و هێستایش که هێستایه، ده‌نگی به‌ڵێن و سوێندی یه‌کگرتووی نوێنه‌رانی په‌یمانی سێ سنووران له دڵی ته‌لانه‌کانی قه‌ندیل دا ده‌نگ ده‌داته‌وه؛ سوێند و په‌یمانه‌که له قه‌ندیل دا بۆته به‌رده‌نووس و له سه‌ر دڵی پیره مێژوو ناسڕێته‌وه.
قه‌ندیل بۆته وشه؛ وشه خۆی له شێعری شاعیری شۆڕشڤان هاڵاندووه و ده‌نگبێژی تێکۆشه‌ریش به ده‌نگ ده‌ێڵێته‌وه.
قه‌ندیل بۆته چارۆکه‌ی ئه‌و به‌له‌مه ده‌ریاییه، که پێی سپێردراوه چلۆن جه‌رگی زۆڵه شه‌پۆلی سیاسه‌تی ناوچه‌که ببڕێت و نه‌هێڵێ به‌له‌م له ڕێدا هه‌تڵه ببێت. به‌ڵام ئه‌مڕۆکه باری سه‌ر شانی قه‌ندیل گه‌لێک گرانه، ده‌یان پۆله گورگ و چه‌قه‌ڵی گه‌ڕ و گه‌ڕۆک له ده‌وریدا مڵومۆیانه، فڕۆکه‌ی بێ فڕۆکه‌وانی ئیسڕاییلی به سه‌ریدا هه‌س هه‌س و پاسه‌وانه، چاوی مانگیله‌ی سیخوڕی ئه‌مریکایی بۆ دۆزینه‌وه‌ی ڕه‌وت و ڕۆی گه‌ریلا کێشک و که‌وانه، پلانی پڕ له پیلانی ناتۆ ده‌ست به چه‌ک و ده‌م به فه‌رمانه، تورکی تووڕه به ئاگر و قورقوشمی ناپاڵمی زاڵم خه‌ریکی ئه‌نجامی هه‌زاران تاوانه، ئیسلامی پاکی محمدی به تانک و تۆپ و کاتیۆشا سه‌رگه‌رمی خاک و خۆڵ تێک وه‌ردانه.
که‌مێک دوورتر له قه‌ندیل، مه‌ڵبه‌ندی (غه‌ززه)، دژ به ئیسراییل شه‌ڕیانه. ئیسراییل بۆ به‌رگری له دزه‌کردنی(چه‌ک و چۆڵی ئیسلامی)، که بۆ چه‌کدارانی حه‌ماسی ئاییندار ده‌گاته جێ، گه‌مارۆی خستۆته سه‌ر مه‌ڵبه‌ندی غه‌ززه. تورکیای ئه‌ردۆغان زیره‌کانه ده‌ست به‌کار بووه و به ده‌ستێک دوو شووتی هه‌ڵده‌گرێت. به ده‌ستێکه‌وه سیاسه‌تی ئاییندارانه‌ی تورک ئیسلامی حیزبی داد و گه‌شه له تورکیا دا گه‌شه‌دارتر ده‌کات. به ده‌سته‌که‌ی تریشی بۆ ئه‌ستاندنه‌وه‌ی پله و پایه‌ی ڕێبه‌رایه‌تیی عاله‌می ئیسلامی سوونه له عه‌ره‌بستانی سعودی، هه‌ر ئه‌و غه‌ززه‌یه ده‌کاته چلمێرده (ئه‌هروم)ی سیاسه‌ت و، گۆنگه‌ڵی گه‌مێی پێ ساز ده‌کات. ئهمریکا له‌م سیاسه‌ته‌ی تورکیا پڕ به دڵ لالووته، به‌ڵام سه‌ره‌ڕای ئه‌م گشته لالووتییه، ئهمریکا له قه‌ندیل دا یاریکاری ماندوونه‌ناسی تورکیایه؛ تورکیا له ڕۆژهه‌ڵاتی نێوه‌ڕاست دا ده‌سکی چه‌قۆی ئه‌مریکایه؛ چ که‌رده‌ن که(چه‌قۆ ده‌سکی خۆی نابڕێت).
ئێرانی ئیسلامی، به ئاشکرا برای بڕبڕه‌ی پشتی(خالد مه‌شعه‌ل) و(حسن نێرالله)یه. ئێران له شه‌ڕی حیزبوڵلای لوبنان و ئیسراییل دا سه‌رکه‌وتووی شه‌ڕ بوو. هه‌روه‌ها ئه‌م سه‌رکه‌وتنه له شه‌ڕی حماس و ئیسراییلیش دا هه‌ر به ئێرانی ئیسلامی بڕا؛ ئێران له‌م شه‌ڕانه دا چۆکی ئهمریکا و ئیسراییلی پێکه‌وه شکاند. ئهمریکا به‌پێی بریار، دۆستی ژماره یه‌کی عێراقه و له ئه‌ستۆیه‌تی له به‌رامبه‌ر هه‌ر هێرشێک دا، عێراق وه‌ک به‌شێک له خاکی خۆی بپارێزێت، به‌ڵام سه‌یره و زۆریش سه‌یره که ئێران له لایه‌ک و تورکیاش له به‌رێکی تره‌وه به‌شێک له خاکی عێراق داگیر ده‌که‌ن و به شه‌و و ڕۆژیش به خه‌ستی بۆمبارانی ده‌که‌ن، که‌چی و ئه‌گه‌رچی ئهمریکا ژماره‌ی دانه دانه‌ی بۆمباکانیش ده‌زانێت، به‌ڵام چۆنه جووکه‌ی لێ نایه؟! تورکیا ده‌سکی چه‌قۆی ئه‌مریکایه، به‌ڵام ئێرانی ئیسلامی چی؟! ده‌ڵێن سیاسه‌ت به‌ر و پشتی نییه و ئه‌گه‌ر وابێ، ده‌بێ ئێرانی ئیسلامیش ده‌سکی چه‌قۆی ئهمریکا بێت؛ چ که‌رده‌ن که چه‌قۆ ده‌سکی خۆی نابڕێت.
هه‌رێمی کوردستان و شێر و پلنگه‌کانی سه‌رکردایه‌تیی حکومه‌تی دوو حیزبیش، که پێیه‌کیان له‌م دیوه و ئه‌وی تریان له‌و دیوه، زۆر جاران له ڕێ و ڕێبازان دا سه‌ردارانی ئیسلام ده‌بینن که چۆن خه‌ریکی تۆپ بارانن و چلۆن دار و دره‌خت و ئاژه‌ڵ و به‌رد و خۆڵی دایکی نیشتمان تێکه‌ڵ به یه‌ک ده‌که‌ن. که‌چی ئه‌وانیش مرقه‌یان لێ نایه. ده‌ڵێن سیاسه‌ت بێ دایی و باوکه. ئه‌گه‌ر وابێت، ده‌بێ ئه‌مانیش یان کوڕی ئه‌م دایکه نه‌بن، یان بوونه‌ته ده‌سکی چه‌قووله‌ی ئێران و تورکیا و چکه‌رده‌ن که چه‌قووله‌ش ده‌سکی خۆی نابڕێت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
