پێشێلكاری بواری میدیا، سوتاندنی 800 نوسخە توێژینەوەی میدیای نێوان رێكخراوی NPAو PDA

Wednesday, 30/05/2012, 12:00

هادی ئەمین *

لەلایەن كۆمەڵەی خەڵك بۆ گەشەپێدان PDA، 800 نوسخەی تازە لەكۆی هەزار نوسخەی توێژینەوەی (راگەیاندنی سەربەخۆ لەهەرێمی كوردستان لەروانگەی رۆژنامەنووسانەوە) سوتێندراو ئەندامێكی ئەو رێكخراوەش كارەكەی لەدەستدەدات لەبەرئەوەی ناڕەزایی دەربڕی بەرامبەر بەسوتاندنی ئەو توێژینەوەیە؟!
رۆژی 16ی ئەم مانگە، كە چووم بۆ دەوام لەئۆفیسی سلێمانی كۆمەڵەی خەڵك بۆ گەشەپێدان PDA ، ئەو هەواڵە ناخۆشەم بیست، كە سەرجەم نوسخەكانی توێژینەوەی (رەوشی میدیای سەربەخۆ لەهەرێمی كوردستان)، كە لەمەخزەنی ئۆفیس مابووەنەوەو نزیكەی 800 نوسخەبوون، سەرجەمیان براون بۆ ناوچەی تانجەرۆو لەوێ سوتێندراون، چونكە دەستەی تەنفیزی رێكخراوەكە بڕیاری سوتاندنییان دابوو؟!
توێژینەوەكە لەساڵی 2007دا، لەلایەن رێكخراوی PDA بەهاوكاری رێكخراوی NPA ئەنجامدراوە، نزیكەی دووساڵی پێچووە بەتێمێكی نۆكەسیو سەرپەرشتیاری زانستی كارەكە كراوە.
دواتر لەساڵی 2009دا بەتیژاژی هەزار دانە چاپكراوە. بەقەبارەی 100 لاپەڕەی ئەیفۆر، كە توێژینەوەیەكی مەیدانییە لەشارەكانی هەولێرو سلێمانیو دهۆك ئەنجامدراوە، دەربارەی رەوشی راگەیاندنی سەربەخۆ لەروانگەی رۆژنامەنووسانەوە، تەنها دووسەد نوسخەی لێ دابەشكرا، 800 نوسخەی مابوەوە لەمەخزەنی رێكخراوەكە، لەرۆژی 16ی ئەم لەناوچەی تانجەرۆ سوتێندران. چاپی هەر نوسخەیەك لەو توێژینەوەیە نزیكەی سێ دۆلاری تێچوبوو.
هەر لەو رۆژەی كە توێژینەوەكەیان سوتاند، نامەی ناڕەزاییم نارد بۆ بۆردو ستافی رێكخراوی PDAو NPAو ئەو كەسانەی لەو توێژینەوەیەدا كاریان كردبوو، تیادا ناڕەزاییم دەربڕی بەوەی كە:
1- من بۆ ماوەیەی دوو مانگی لەسەر یەك، رۆژانە بۆماوەی لانیكەم چواركاتژمێر، سەرقاڵی پێداچوونەوەو رێكخستنی ئەو توێژینەوەیە بوومو ئامادەمدەكرد بۆ چاپكردن، بۆیە هەستدەكەم یەكێك لەبەرهەمەكانم سوتێندراوە.
2- ئەو توێژینەوەیە، كتێبیكی مێژووییو سەرچاوەیەكی بەنرخ بوو لەبواری میدیا لەهەرێمی كوردستان، توێژینەوەكە لەسەرانسەری كوردستان داتای مەیدانی كۆكردبوەوە بەهۆی تیمی مەیدانییەوە، چەندین دەفتەر دۆلارو جوهدێكی زۆری بۆ سەرفكرابوو، سەرچاوەیەكی بەسوود بوو بۆ كتێبخانەی كوردی تا وێنەی میدیای كوردستان بخاتەڕوو لەوساتەوەختانەی كە توێژینەوەەكەی تیا كرابوو.
3- ئەتوانرا ئەو توێژینەوەیە، بەكاربهێنرایە بۆ توێژینەوەی دیكەو وەك سەرچاوە، یان ئەنجامەكانی بەراوردبكرایە بەتوێژینەوەی تازە، بۆئەوەی رەوشی ئاراستەی گەشەی میدیا پێ بەراوردبكرایە.
4- ئەو توێژینەوەیە موڵكی گشتی بوو، موڵكی هەموو ئەوانە بوو كە تیادا كاریان كردبوو، موڵكی رێكخراوی PDA و NPA بوو، موڵكی سەرجەم هاوڵاتیان بوو، چونكە بوجەی رێكخراوی كۆمەڵی مەدەنی لەو توێژینەوەیەدا خەرجكرابوو.
5- سوتاندنی كتێبو توێژینەوە تاوانە لەرووی مەعریفییەوەو زیانگەیاندنە بەكتێبخانەی كوردی، نازانم چۆن لەو عەقڵیەتە تێبگەم كە لەناو رێكخراوی مەدەنی كاردەكاتو بڕیاری سوتاندنی توێژینەوەو سەرچاوەی بواری میدیایی دەدات.
وەك میدیاكارێكو ئەندامی رێكخراوی كۆمەڵی مەدەنی، دژی سوتاندنی ئەو توێژینەوەیە ناڕەزاییم دەربڕی، كەچی سەرەرای ئەوەی دەستەی تەنفیزی رێكخراوەكە، داوای لێبوردن بكات لەو هەڵوێستە نامەدەنییەو ناشارستانییەیان، یەكێك لەدەستەی تەنفیزی رێكخراوەكە، نوسراوی (واژونەكردنی پەیوەستنامەى كار)ی ناردووە بۆ من، تیادا نوسیوێتی "ناتوانین لەگەڵ بەرێزت كاربكەین. ئەویش بەهۆى ئەوەى كەجەنابتان بەهیچ جۆرێك پابەند نەبوون بەو رێكەوتنەى كەسەرەتاى ئەم مانگە ئەنجامدرا لەنێوان ستافى میدیا".
ئەوە لەكاتێكدا كە بڕیاربوو لەسەرتای مانگی پێنجی ئەمساڵەوە دەستبەكاربینو من هەفتەیەك بوو دەوامم دەكرد لەئۆفیس. و سێ ساڵە لەو رێكخراوە دەوامدەكەمو ساڵانە بەشێوەیەكی ئاسایی گرێبەستی كارەكانمان درێژدەكرایەوە لەچوارچێوەی پڕۆژەكەدا.
لەدەستدانی كارەكەم پێشێلكارییەكی دیكەی بواری میدیایە، كە ستافێكی بواری میدیا كارەكەی لەدەستبدات لەسەر ئەوەی ناڕازییبوە بەرامبەر بەرەفتارێكی نامەدەنییانەی رێكخراوەكەی.
ئاخر ئەوان دەیانویست بەنهێنی گفتوگۆ لەسەر سوتاندنی توێژینەوەكە بكرێتو دیزەبەدەرخۆنە بكرێتو تەنانەت دەستەی بۆردو رێكخراوی دۆنەریش ئاگادارنەبێت.
دوای ئەوەی نامەی ناڕەزاییم دەربڕیو ناردم بۆ لیژنەی سوتاندن، هەرجارەی پاساوێكی نەشیاویان دەهێنایەوە. جارێك وتیان ئەو توێژینەوەیە كاتی بەسەرچووبوو، سوودی ئانی نەبوو..
ئێمەش وەڵامماندانەوە بەوەی، كە ئایا گونجاوە كتێبەكانی مێژوو بسوتێنین بەبیانوی ئەوەی كە سوودی ئانی نییەو چەندین ساڵ بەسەر چاپكردنیان تێپەڕیوە.
جارێكی دیكە پاساویان هێنایەوە وتیان، توێژینەوەكە لەمەخەزەنێك دانرابوو مشكی لێبوو، جارێكی دیكە وتیان لەكاتی بارانبارین ئاو چووبوەناو مەخزەنەكە تەڕبوبون.
بەڵام ئەو شۆفێرانەی كە بەواندا توێژینەوەكان نێردرا بۆ تانجەرۆ تا بیسوتێنن، شاهیدی ئەوەن كە هیچ كام لەو كارتۆنانەی كە توێژینەوەكانی تیابوو، مشك نەیخواردبوو، ئاوی باراناویش نەیخوساندبوو.
جارێكی دیكە وتیان، بۆچی لەپێشوو كارمەندی مەیدانی بەشی میدیا، (كە بەندە بووە) ئەو توێژینەوەی دابەشنەكردووە.
من لێم دەپرسین بۆ سوتاندتان، ئەوان دەیانوت بۆ دابەشنەكراوە؟!
منیش وەڵاممدانەوە، بەوەی كە، مانەوەی توێژینەوەكان لەمەخزەن جیاوازە وەك لەسوتاندنیان، وەكئەوەوایە، مرۆڤێك دووساڵ نەخۆش بێتو لەجێگەدا كەوتبێتو نەتوانیت بڕوات،، بەڵام لەبری ئەوەی نەخۆشییەكەی چارەسەربكەیت تا هەستێتەسەر پێ، تۆ بێیت بیستوتێنیتو بیكوژیت.
ئەو كاتەی من كارمەندی مەیدانی بەشی میدیا بووم، سێ پۆستی دیكە لەسەرووی منەوە هەبوون، لەئاراستەكاری مەیدانی، رێكخەری گشتی، بۆرد. دووجار بەنوسراوی رەسمیو ئاگادارمكردوونو لێمپرسیون: بۆچی ئەو توێژینەوەیەتان چاپكردووەو دابەشی ناكەن؟
بەڵام وەڵامێكی قەناعەتپێكەرم دەستنەكەوت. (ئەگەر نوسراوەكانیان ویست جارێكی دیكە بۆیان فۆرۆرد دەكەمەوە بەمێژووی كاتی خۆی، یان لەرۆژنامەكان بۆیان بڵاودەكەمەوە.)
من دەپرسم بۆچی سوتاندتان، بۆ چی كارتان نەكرد بۆ دابەشكردنی؟
ناكرێت وەك رۆژنامەنووس لەئیجرائاتە هەڵەكانی حكومەت رەخنەبگرینو بێدەنگبین لەبەرامبەر سوتاندنی ئەم توێژینەوەیە، با كارەكەشم لەدەستبدەم، گرنگە ئەوەیە من لەسەر داكۆكیكردن لەسەر پرسێكی بواری میدیا كارەكەم لەدەستدەم، ئەوەش مایەی شانازییە بۆ من، بەڵام مایەی شەرمە بۆ كەسانێك كە بەخۆیان بڵێن چالاكوانی كۆمەڵی مەدەنی، لەولاوە بڕیاری سوتاندنی توێژینەوەو سەرچاوەی میدیایی بدەن.
ئاخر لەكوێی ئەم دنیایەدا هەبوە، رێكخراوی كۆمەڵی مەدەنی توێژینەوەو سەرچاوەی زانستی بسوتێنێت، ئەوە تەنها لەرەفتاری فاشیو دیكتاتۆرەكان دەوەشێتەوە.
تائێستا بۆردی رێكخراوەكە وەڵامی ئەو پرسیارەیان نەدامەوە، كە بۆچی ئەو توێژینەوەیە چاپكراو دابەشنەكرا، ئەی بۆچی سوتێندرا، و بەدواداچوونی وردیان بۆ نەكردووە؟
هەروەها تائێستا رای رێكخراوی دۆنەریش كە NPA یە دیارنییە، لەبارەی دابەشنەكردنو سوتاندنی توێژنەوەكە!!
هەڵبەت ئەو راستەیەش روونبكەینەوە كە دەستەی بۆردی رێكخراوی PDA ئاگاداری سوتاندنی پێشوەختی ئەو توێژینەوانە نەبوو، تەنها لەلایەن دەستەی تەنفیزی حوكمی سوتاندنەكە دەرچووبوو.
هەرچۆنێك بێت، دواخستنی دابەشكردنی توێژینەوەكە هەڵەبوو، بەڵام بڕیاری سوتاندنی تاوان بوو، چونكە هەرچەند دابەشكردنی دواكەت، بەڵام نرخی زانستیو مێژووی ئەو توێژینەوەیە یەك زەرە كەمی نەكردبوو.
لەبەرئەوەی ئەو توێژینەوەیە بۆ فرۆشتن نەبوو، دەكرا دابەشبكرایە بەسەر ناوەندە ئیعلامییەكانی كوردستاندا.
دووبارە ناڕەزایی خۆم دەردەبڕم بەرامبەر بەسوتاندنی ئەو كتێبو سەرچاوە زانستییە، پاساوی سوتاندنی توێژینەوەكە هەرچییەكە بێت، رەفتارێكی نادەمەنی بووەو پێشێلكاری بووە بەرامبەر بەرەوشی میدیا لەهەرێمی كوردستانو بەفێرۆدانی جوهدو بوجەی رێكخراوی مەدەنیو بوجەی گشتی بوو.
تائێستا چارەنوسی ئەو 800 توێژینەوە سوتاوە، كە نزیكەی 2400 دۆلار تەنها بەچاپەكەی دراوە، بەنادیاری ماوەتەوە، كەس نازانێت كێ تەعویزی دەكاتەوە.
داواكارم دەستەی تەنفیزی رێكخراوی PDA داوای لێبوردن بكات لەرای گشتیو سەرجەم میدیاكارانی كوردستان، لەسەر ئەو رەفتارە نامەدەنییانو هەموو نوسخەكانیشی لەچاپ بدەنەوە.
با تازەنەكردنەوەی گرێبەستی كارەكەی منیشو لەدەستدانی كارەكەم، بچێتەنێو ئەو پێشێلكارییانەی كە بەرامبەر رۆژنامەنووسانو میدیاكاران كراوان لەمساڵدا، بەڵام ئەم پێشێلكارییەیان عەیارە بیستوچوارەو دەگمەنە، چونكە لەلایەن رێكخراوی كۆمەڵی مەدەنییەوە ئەنجامدراوە؟!
ئەمەش ئەو راستییەی روونكردەوە كە ئەشێت عەقلیەتی سوتاندنو پێشلێكاری بەرامبەر بە میدیاو رۆژنامەنووسان لە رێكخراوەكانی كۆمەڵی مەدەنییشدا بوونی هەبێت.

* كارمەندی مەیدانی پرۆژەی میدیا، سەرنوسەری ماڵپەری چاوی خەڵك، رێكخراوی PDA
[email protected]