له به‌هاردا بنه‌ماڵه به‌ره‌و پایز هه‌نگاوده‌نێت
Saturday, 22/02/2014, 12:00
یه‌کێ له‌و قه‌یرانانه‌ی ده‌سه‌ڵاتی کوردی ڕووبه‌ڕووی ئه‌م میلله‌ته‌ی کردووه قه‌یرانی بێ موچه‌ییه ، که ژیانی خه‌ڵکی له سه‌ره بۆ بژێوی ڕۆژانه وژیانیان به‌تایبه‌ت هه‌ژاران که به‌شه زۆره‌که‌ن . ئه‌م قه‌یرانه ئاماژه به زۆر شت ده‌کات وپه‌رده له سه‌ر زۆر عه‌یب وشاراوه هه‌ڵده‌ماڵێت .
حکوومه‌تی عیراق توانیویه‌تی له جێیه‌کی هه‌سیاره‌وه ده‌سه‌ڵاتدارانی کورد به چنگ بگرێت ، مل که‌چ وشه‌پرزه ولاواز بکات ، ناڕه‌زایی میلله‌ت وترسێکی گه‌وره لای بنه‌ماڵه‌ی به‌رزانی ورووژاندووه . هه‌ر بۆیه‌ش مه‌سعود بۆ هێورکردنه‌وه‌ی خه‌ڵکه برسییه‌که ده‌ستی داوه‌ته کۆبوونه‌وه له گه‌ڵ سه‌رۆکی حیزبه‌کان . نازانم بۆ مه‌سعود بۆ وا بێده‌سه‌ڵات ده‌می داخراوه ووه‌کوو جاران هه‌ڕه‌شه له مالیکی ناکات ؟
ئه‌م قه‌یرانه حیکمه‌تی گه‌وره‌ی هه‌ردوو به‌رزانیه‌که‌مان مه‌سعود ونێچیر که به ڕاستی ده‌سه‌ڵاتیان به‌ده‌سته بۆ ئاشکرا ده‌کات له به‌ڕێوه‌بردن وحوکمداریدا . نه به‌رنامه نه پلاندانان نه‌بیرکردنه‌وه ته‌نها به‌شێوه‌ی دیوه‌خان ئاغا ئه‌م لادێیه به‌ڕێوه‌ده‌بات . ئه‌م باره ناله‌باره مه‌سعودبه‌رزانی ناچارکرد دان به شکست وسیاسه‌ته هه‌ڵه‌کانیدا بنێت ئه‌گه‌رچی یه‌کێتیشی کرده شه‌ریک له و هه‌ڵانه به‌گوێره‌ی په‌یمانی ستراتیجی .
ئه‌م باره نه‌ک ته‌نها په‌رده له سه‌ر حیمکه‌تی ده‌سه‌ڵاتدارانی کورد هه‌ڵده‌ماڵێت به‌ڵکوو ئه‌وپه‌ڕی ساکاری ونه‌زانییان ده‌خاته روو ئاشکراده‌کات . ئه‌وه‌نده هیچ نه‌زانن نێچیرڤان به‌رزانی په‌نای بردۆته به‌ر ئه‌ردۆغانی ئاغایان بۆ یارمه‌تی وقه‌رزوه‌رگرتن . ئه‌ردۆغان به ئاشکرا نێچیری بێهیواکردووه ونه‌ویستی وناتوانایی تورکیای بۆ یارمه‌تی خستۆته ڕوو ، به‌ڵام نێچیری ئیحراج کردووه وپێی راگه‌یاندووه ئه‌ری ئێوه له سه‌ر حسابی شه‌خسیتان له بانکه‌کانی ئه‌وروپا پاره زۆره (پاره‌ی نه‌وته دزراوه‌که) بۆ وه‌کوو قه‌رز به‌کاری ناهێنن ؟
ئه‌رێ پاره‌ی نه‌وته‌که که نێچیر هه‌میشه ده‌یگوت پارێزراوه وهیچی لێ خه‌رجنه‌کراوه بۆ به‌کار ناهێنن ، له کوێیه ؟
ئه‌رێ بۆچ به‌ڵێنده‌ره‌کان له هه‌ستێکی نیشتمانپه‌روه‌رییه‌وه ده‌ستێکی یارمه‌تییان درێژکرد ، ئه‌رێ بۆ به‌رپرسه‌کان ئه‌و هه‌سته نه‌ته‌وایه‌تییه له‌لایان وجوودی نییه ؟
ئه‌م قه‌یرانه تاڵه ، به‌ڵام له‌وه تاڵتر ئاشکرابوون ودرۆکردن وکارنه‌کردنی ئه‌م ده‌سه‌ڵاته‌یه بۆ بنیاتنانی ده‌وڵه‌تی کوردی . ده‌سه‌ڵاتێت نه‌توانێت به‌رگه‌ی یه‌ک مانگی بێ موچه‌یی بکات چۆن ده‌توانێت ئیعلانی ده‌وڵه‌تی کوردی بکات .
ئێمه ڕوومان له به‌هاره وبنه‌ماڵه‌ی به‌رزانی به‌هه‌نگاوی گه‌وره به‌ره‌و پایز هه‌نگاو ده‌نێت .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
