ئەوەتا لەیەک کاردانەوەدا بە ناچاری، بۆ فشارێکی راستەوخۆ و دەرخستنی حەقیقەتەکان ، حکومەتی هەرێم نیمچە دانپێدانانێکی  بە داهاتی هەرێمدا نا و، دەڵێت مانگانە داهاتی هەرێمی کوردستان دەکاتە یەک ترلیۆن و بیست ملیار دینار ، بە جیاوازی 390 ملیار دینار زیاتر لەوەی لە بودجەکەی بەغدا بۆ هەرێم دیاریکراوە . کەواتە بۆچی تا ئێستا لەم برە پارەیەی بەردەستتان کە هەر  زۆر بەکەمی حسابی بکەیت هەر مانگەو دەتانتوانی موچەی مامۆستایان و فەرمانبەران بە تەواوی بدەن نەک چارەکە موچەکە و بە دوو مانگ جارێک، ئێستا چۆن لەگەڵ خەڵکدا مامەڵەدەکەن . ئەی بۆ وەڵامی خەڵک نادەنەوە، هەر هیچ نەبێت باس لەوە بکەن ئەم هەموو قەرزە لە پای چی، کە داهاتی کوردستان لە موچەدان و خەرجی بەکاربردن زیاتریش بووە، بۆچی باس لە شکستی راستەقینەی خۆتان ناکەن و داوای لێبوردن ناکەن و،  خۆتان بە راست لەقەڵەم دەدەن  . 

بۆیە، لەم ماوەیەی پێشودا، ئەگەر خەڵکی کوردستان گومانێکی هەبوو لەمەر بری داهاتی کوردستان  و لەحاڵەتی نیمچەباورەێکدا بووبن کە ئەو پارەیەی دێتەدەستیان بەشی موچە و خەرجیەکان ناکات و ئەو قەرزانە دەستی گرتوون و ئەم موچە برینە سیاسی نیە وەک نەیارانی پارتی و خەڵک باسی دەکەن، بەڵام لەئەمرۆ بەدواوە زۆر شت روون بووەوە . ئەم داهاتەی کە حکومەتی هەرێم بە فەرمی بە خۆی دەڵێت  و دان بەوەدا دەنێت کە بودجەکەی بەغدای سەبارەت بە هەرێم  لە داهاتی خودی هەرێم کەمترە، ئەگەر وەک تائەمرۆ بەسەربەخۆ نەوت بفرۆشێت، ئەمە وەزعی داهات و دزی و گەندەڵی ئەم دەسەڵاتەی وەک رۆژی رووناک و بێ پێچوپەنا بۆ خەڵک دەرخست و، ئەگەر ئەم یاسایەی بودجەی پەرلەمانی عیراق نەبوایە قەت ئەم دانپێدانانەمان نەدەبیست و نەدەبینی . بۆیە وەک پەندە کوردەکەی خۆمان دەڵێت دار هەڵگرە سەگی دز دەرئەکەوێت، وا بە سوکە دارهەڵگرتنێکی راست و دروست و راستەوخۆو، شتەکان دەرکەوتن و  ئەم حکومەتە دەڵێت ئەی گەلی کوردستان، داهاتی حکومەتی هەرێم لەوە زیاترە کە لە بەغدا دانراوە، کەچی بەغدا دەڵێت ئەمەی لە بودجەدا دانراوە بەشی موچەخۆران و خەرجی بەکاربردنیش دەکات، لەولاشەوە هەرێم بەو داهاتە زیادەشەوە بۆ دوو ساڵە موچەی فەرمانبەران نادات .

بۆ سێ ساڵە خەڵک دەناڵێنێت و حکومەت بێباکە لە هەموو شتێک و تەنانەت گوێ لە خانەوادەی شەهیدانی بەرێزیش ناگرێت، وا ئەمرۆ کە تەنها یەک رۆژمان لەبەردەم ماوە بۆ تێپەراندنی بودجەی عیراق، حکومەتی هەرێم  بۆ ئەوەی هەر هیچ نەبێت نەهێڵێت بەوشێوەیە بروات، دەڵێت، بە‌مە‌بەستی دڵنیابوون لە وردەکاریی و بەراوردکارییە‌کانی نێوان داهاتی هەرێم  (بەقسە و دانپێدانانی خۆی ) لەگەڵ ئەوەی بەشی هەرێم لە بودجەی بەغدادا دیاریکراوە و خستنەرووی دۆکیۆمینتەکان و ڕاپۆرتەکانی شیکردنەوە، میوانداریی سەرجەم ئەندامانی بەرێزی فراکسیۆنە کوردستانیەکانی  پەرلەمانی عیراق بۆ کۆبونەوە و خستنەرووی راستیەکان دەکەن . حکومەتی هەرێمی کوردستان جارێکی دی ئامادەیی تەواوی خۆی دەردەبرێت بۆ دانوستان و گفتوگۆ لەگەڵ حکومەتی فیدرالێ و لەبەرامبەر دابینکردنی تەواوی شایستە داراییەکانی  مووچەخۆرانی هەرێمی کوردستان، ئە‌وا حکوومەتی  هەرێم ئامادەی رێککەوتنە لەگەڵ حکومەتی فدیراڵ بە مە‌رجێک زیان بە هەرێم نەگات . ئا لەم کاتەدا و بە دانپێدانانی راستیەکان بەو شێوەیە  و وائێستا ناچاریت لەگەڵ ئەندامانی فراکسیۆنەکان دانسوتان بکەیت و جارێکی تر بۆ سەرخەڵەتاندن و، هیچت بۆ نەمابێتەوە بە ناچاری لە کاتی بەسەرچودا پەنا بۆ ئەندامانی پەرلەمان بەریت و لەمەو پێش هیچ منەتێکت نە بە میلەت و نە بە پەرلەمانی کوردستان نە عیراق و نە هیچ دڵسۆزێکی کوردستان و نە بەکەس نەبێت، ئەمرۆ بۆ جاپۆشینی کردەوە نابەجێ و شکستەکانت بەم شێوەیە بدوێیت کە زۆر شەرمەزاریە . بۆیە حەقە بڵێین لەبەغدا دار بەرزکرایەوە لە هەولێر دەرکەوت .