پێویستمان بە ئۆپۆزسیۆنێكی كارا هەیە

Wednesday, 31/12/2014, 12:00

لە راپەرین بەدواوە، تارادەیەك تاوەكو رۆژگاری ئەمرۆشی لەگەڵدا بێت، كوردستان بەدەست دوو حزبی شۆرشگێری شاخ و ساویلكەی شارەوەیە، هەر یەك بە عەقڵیەت و رێبازێكی تایبەتی خۆی و بە جیاوازیەكی كەمەوە لەیەكتر و تا رادەیەك موحافزكارانە، بەرێوە دەچێت . بارودۆخی خودی خۆیان و كێبركێ و كوتلەبازی و شەری نێوخۆ و بۆ دەیەیەك ئابڵوقەی ئابوری دكتاتۆرەكەی بەغدا، ناچاری كردن هەڵەی زەقی وا بكەن كا كاریگەری گەورەی لەسەر رێرەوی دەسەڵاتی كوردستان و دوارۆژی هەبێت و، وای لێكەوتەوە كە دەردانەكانی ئەو بارودۆخە زەرەری گەورە لە سەر ژیانی خەڵك بەجێبهێڵێت .
چەقبەستنی دەسەڵات لەسەر یەك ریتمی جیگیری دواكەوتو و بڵاوبونەوەی گەندەڵیەكی زۆر و ناعەدالەتی و پاشەكشەكردن و زاڵبونی ململانێی حزبی و شەخسی تەسك ژیانی خەڵكی هەراسان كرد و، وەزعی سیاسی پیویستیی دەكرد بە راستەرێكردنی ئاراستە و جۆر و شێوەكەشی . بەهۆی زۆرێك لە فاكتەرە نێوخۆ و دەرەكیەكان و ترسی خەڵك و فەرزكردنی رای حزب و نەبونی ئازادیەكی پێویست، لەو نێوەندەدا هێزێكی بێلایەن خۆی فەرز نەكرد و كەس نەیتوانی لە ئاست ئەو وەزعەدا جموجوڵیكی وا دروست بكات كە لە رەوتی سیاسی و ئابوری كوردستان بگۆرێت . واتە هێزێكی سیاسی بێلایەنی تایبەتی وەك ئۆپۆزسیۆن لە درەئەنجامی زەرورەتی واقیعەكە دروست نەبوو. بەڵام لە درەئەنجامی ململانێی نێوخۆیی حزبی، بزوتنەوەیەك لە منداڵدانی حزبدا دروست بو كە دواجار پاش جیابونەوە بوو بە خاوەنی ئەو داواكاریەی كە لە هەناوی كۆمەڵگادا هەڵدەقوڵا و وەزعی نا دروست و بارودۆخی نالەباری سیاسی و ئابوری و كۆمەڵایەتی كوردستان دروستی كردبوو ، ئەمەش ترسی خەڵكی شكاند و بۆ یەكەم جار هەست بەئازادیەك لە ئۆپۆزسیۆنبون كرا، چونكو لە راپەرین بەدواوە تا ئەو كاتە دیاردەی تیرۆركردنی خەڵكی ئۆپۆزسیۆن و خاوەن تیروانین و بیرورای جیاواز باڵی بەسەر كوردستاندا كێشابوو.
بزوتنەوەی گۆران ململانێی حزبی دروستی كرد و، هەر ئەم بزوتنەوەیە بە ئامانجێكی حزبی لە رێگەی ململانێی حزبیەوە سواری سەری ئامانجە گشتیەكانی كۆمەڵگا بوو، یان راستتر بڵێین، خەڵكی نارازی پشت و پەنایەكیان بۆ درسوت بوو و خۆیان پێوە بەستەوە، بزوتنەوەی گۆرانیش وەك رێكخراوێكی بەرهەمهاتوی منداڵدانی كۆمەڵگە نەهاتە بون ، وەك لە دواجاردا رەفتاری سیاسیی خودی بزوتنەوەكە و رێككەوتنی لەگەل موحافزكارترین هێزی كوردستان لەسەر حسابی داواكاریەكانی گەل، ئەم حەقیقەتەی بۆ هەموان دەرخست . ئەمەش لە ستراتیجدا زەرەرێكی ئیجگار گەورەی لە رەوتی سیاسی كوردستان بەگشتی دا . ئەو ئیدعایانەی كە لەسەرەتادا دەیكرد وەك ئەوەی لە جەوهەری سیاسەتی راستەقینەی پێویستی بزوتنەوەكە دەردەچێت، بەڵام رەفتارەكانی ئەم دواییەی دەریخست ئەو راگەیاندنانەی پێچەوانەوەی ئەوە بووە كە لەقۆناغی یەكەمی دروستبونیەوە جاری بۆ دەدا، لە دواجاردا لە چوارچێوەیەكی تەسكدا خۆی بینیەوە و، تورَی بە قوناغی دیموكراسی راستەقینە و دەستاودەستكردنی دەسەڵات دا، كە ئامانحی گەورەی خەڵك و چاودێرانی سیاسیش بوو، متمانەی گەورەیان بە بزوتنەوەی گۆران هەبوو كە سەبری ئەوەی هەبێت تا ئەو كاتەی دڵنیا دەبێت لە فەراهەمبونی ئەم ئامانجانە وپشتیوانانی لەو باوەرەدابون كە ناچێتە ژێر ركێڤی دەسەڵات و تا دوا هەناسە خۆی بەبەدیل دەزانێت ، بەڵام لەم كارەدا بە بەشداریكردنی بزوتنەوەی گۆران لە دەسەڵات و هاوپەیمانێتی لەگەڵ هێزی موحافزكار و خاوەن مێژویەكی نادروست، نەك هەر بزوتنەوەی گۆران بەڵكو كاروانی سیاسی كورد چەردەیەك پاشەكشەی كرد. لە جیاتی ئەوەی دوو هێز بە فیفتی كوردستان بە رێوە بەرن، ئێستا تا رادەیەك سێ هێز هەن بە سێبەشی، بەڵام بە براگەورەیی پارتی دیموكراتی كوردستان و بە زاڵبون و تەواوی بێخەمی خۆیەوە دەسەڵاتی كوردستان بەو هەموو كەموكوڕیەوە بەرێوەدەبات و سڵ لە رای میلەت و هیچ لایەنێكیش ناكاتەوە .
ئیمرۆ، نارازیبونێكی زۆر لە نێو خەڵكدا بەدیدیكرێت و متمانەی خەڵكیش بە گۆران وەك نوێنەرایەتی كردنیان تا رادەیەكی گەورە وەك جاران نەماوە. تا ئێستا هێزێكی باوەرپێكراو دروست نەبووە، كە راستەوحۆ هەڵگری راوبوچۆن و ئامانجەكانی ئەو خەڵكە بێت و ئۆپۆزسیۆنێكی راستەقینەی ئەوان بێت، نەك ئەزمونی گۆران دوبارە بكاتەوە و بۆ خەڵك بیسەلمێنێت كە ئۆپۆزسیۆنی حزب بووە نەك دەسەڵات، لە جیابونەوەش ململانێی حزبی كردوە نەك راستكردنەوەی كاروانی دەسەڵاتی هەرێم .
بۆیە ئێستا لەم كاتەدا بارودۆخی گشتی خەڵك تا رادەیەك ئاڵۆزی پێوە دیارە و نارازیبون لە ترۆپكی كێرڤەكەدایە و واقیعەكە پێویستی بە هێزێكی كاریگەر و عەقڵیەتێكی بە توانا و دڵسۆزی ئەم گەلە و جموجوڵی دروست هەیە بۆ ریكخستن و كۆكردنەوەی تیروانینەكان و، لەو نێوەندەشدا لەدایكبونی ئۆپۆزسیۆنێكی راستەقینەی خاوەن ستراتیج و، وەك هێزێكی فشار لە هەر چوارچێوەیەكدا بێت، لە پێناو راستەرێكردنی دەسەڵاتی سیاسی ململانێی خۆی بكات و خۆی فەرزبكات و خۆی بە ئەڵتەرناتیڤی دەسەڵات بزانێت، بە پێویست دەزانرێت . دیارە ئەم ئامانجەش بەم حاڵەو باردۆخەی ئێستاوە زۆر زەحمەتە بێتەدی، بەڵام دەكرێت بەردی بناغەی جموجوڵیكی راست و دروست بنیات بنرێت و هەنگاوی یەكەمی ئەم ستراتیجە قورسە بنرێت و كاروانی خەباتی دورمەودا بەرێبكرێت و، نەوەكان قۆناغ بە قۆناغ پێی بگەیەنن و بیگەیەننە دوامەنزڵگەی خۆی .