زمانی زبر لە فەرهەنگی راگەیاندنی سەرۆكدا! .. خەبات و هەولێر وەك نمونە.

Wednesday, 23/03/2011, 12:00

سەرۆكى هەرێمى كوردستان بەبۆنەى جەژنى نەورۆزەوە پەیامێكى ئاراستەى كۆمەڵانى خەڵكى كوردستان كرد، لەو پەیامەى سەرۆكدا داواكرا كە چیدى راگەیاندنەكان رەچاوى بارودۆخەكە بكەن و لە زمانى زبرو ناوزڕاندن دووركەونەوەو بەهەستى بەرپرسیاریەوە هەڵسوكەوت لەگەڵ بارودۆخەكەدا بكەن، هەر لەو پەیامەدا سەرۆكى هەرێم ئامادەیى خۆى نیشاندا كە گوێ لەهەموو كەس دەگرێ و خۆشحاڵیشەبێت كە گفتوگۆ لەگەڵ هاونیشتمانیانى وڵاتەكەیدا بكات، من وەك رۆژنامەنوسێك ئەم راپۆرتە لەشێوەى نامەیەكى رۆژنامەوانیدا ئاراستەى سەرۆكى هەرێم دەكەم بەو ئومێدەى پاش خوێندنەوەى راپۆرتەكە ئەو چاككاریە یەكەم دەزگا راگەیاندنەكانى (پ.د.ك) بگرێتەوە
ئۆپۆزسیۆن و زمانی زبری راگەیاندن هۆكاری مەینەتیەكانن..!
زمانی زبر لە فەرهەنگی راگەیاندنی سەرۆكدا ..
خەبات و هەولێر وەك نمونە.
كارەساتی (17ی شوبات) و كاردانەوەكانی رۆژانی دواتر زۆر شتی گرنگی رونكردەوەو ماسكی زۆر پارت و لایەنی سیاسیشی هەڵماڵی، سلێمانی كردە مەڵبەندی گەورەترین شۆڕشی دادپەروەری، شۆڕشێك كە دەبێت هەموان ببینە فێرخوازی وانەكانی، دواجار ئەو خەونەی جێی گرنگی ئازادی خوازان و نوسەرو روناكبیرو رۆژنامەنوسە ئازادو بوێرەكانی كوردستان بوو لە كەناری ئارامی نزیك بویەوە، ئارامییەك كە چیتر دەرفەتێك بۆ زوڵم و زۆر و كوشتن و خنكاندنی ئازادیەكان نەماوە، ئارامییەك كە ئیدی دەبێت جەللادەكان لەخوێنی رژاوی مرۆڤێك بترسن، ئەمە شۆڕشی نەوەیەكە لە دادپەروەری، نەوەیەك كە چیدی چاوەڕێی ئازادی دەستی ستەمكارەكان ناكات، ئەو نەوەیە خۆی بەربەستەكان دەشكێنی و خۆی خۆی ئازاد دەكات، مەرگی چەند لاوێك و خوێنی رژاوی دەیانیتر بوونە درەوشاوەترین خاڵی نێو ئەو شۆڕشە، ئەگەر تا (16/2) سەردەشت عوسمان و سۆرانی مامە حەمەو د.عبدالستار تاهیر شەریف شەهیدانی قەڵەم بوون، ئیدی (رێژوان و هاوڕێكانی) شەهیدانی دادپەروەرین، رۆژ لە دوای رۆژ ئاپۆرای خۆپیشاندانەكان مەوداكەی فراوانترو ئامادەبوانی زیاتر دەبێت، داواكاری خۆپیشاندەران رۆژانە روو لە زیادبوونە، ئێستا تەنها لە مەیدانی سەرای ئازادی چالاكی ئەنجام نادرێت بەڵكو زانكۆی سلێمانیش مەیدانێكی تری ئازادییە لە بەرگێكی زانستی باڵادا، ئەم شۆڕشە ئاڵایەكی هەڵگرتووە كە چیدی دەرفەتنەماوە بۆ پشت تێكردنی، رۆژانە هەزاران كەس لە چین و توێژە جیاجیاكان و بە لێشاو پەلەی زووتر بەشداریكردنیانە.
دەسەڵات چیمان پێدەڵێت..؟
ئەگەرچی ئاماژەو واتاكانی ئەم راچەنینە جەماوەریە مێژووییە رون و ئاشكران كە خۆی لە داوایەكی فراوان لە كۆی ئازارە جۆراوجۆرەكانی بیست ساڵی رابردووی ئەم بەشەی كۆمەڵگای كوردیدا دەبینێتەوە، بیست ساڵ لە یەكتر كوشتن و دوو ئیدارەیی و گەندەڵی و زوڵم و زۆر و ستەمەكانی حزب بەسەر حكومەتەوە، دزین و تەخشان و پەخشان كردنی سەروەت و داهاتی ئەم وڵاتە، بەڵام راگەیاندنەكانی دەسەڵات بەردەوام ئەم راچەنین و شۆڕشە بە ئاژاوە نانەوەو گێرەشێوێنی و دەستی دەرەكی و پیلانی دوژمنان لەقەڵەم دەدەن، هەر لەم راگەیاندنە شێوێنەرەوە چەندین جار گەورەیی و مەزنی شۆڕشی دادپەروەری مەیدانی ئازادی لە دژایەتیكردنی بارەگایەكی حزبیدا بچوك دەكرێتەوە، پێناسەیەكی تری دەسەڵات بۆ ئەم شەپۆلی ناڕەزاییە تەخوینكردنی هەڵسوڕاوە دیارەكانی ئەم شۆڕشەیە بەبەكرێگیراوو دەستی دەرەكی..!
هۆكارەكان لە فەرهەنگی میدیای دەسەڵاتەوە..!
لەبیست ساڵی رابردوودا ئەم دەسەڵاتەو میدیا بەرفراوانە نا پڕۆفیشناڵەكەی زۆرترین كاری بۆ شێواندنی ئەو وێنانەبووە كە تەعبیر لە دەسەڵات ناكەن، زۆرترین توانای بۆ تۆمەتباركردنی نەیارەكانی تەرخان كردووە، بەردەوام هەوڵیداوە وێنەی مرۆڤە ئازادو بوێرەكان بشێوێنێت و پڕۆژەكانیان بە تۆمەتی ناڕەواو شۆڕشەكانیان بە دوژمنی وەهمی شكست پی بهێنێت، لەكاتێكدا كە خۆیان بەردەوام دوژمنی واقعی بەرژەوەندیەكانی خەڵكن و هەمیشە بەسەر لاشەی خەڵكەوە رووەو كۆشك و ڤێللاكانیان هەنگاو دەنێن، لەئێستادا میدیاكانی دەسەڵات بەدەر لەوەی ئەم خرۆشانە جەماوەرییە بە دەستی لایەنە سیاسیە ئۆپۆزسیۆنەكان دەزانن زۆرترین هێرشیان دەبەنە سەر میدیا ئازادەكان، سوتاندنی كەناڵی ئاسمانی نالیاو نوسینگەكانی كەی ئێن ئێن و رادیۆی گۆڕان و هەڕشەكردن لە رۆژنامەنوسان بەشێوەیەكی بەرفراوان بەڵگەیەكی ئاشكرای تۆمەتباركردنی میدیای ئازادە بەهاندان و ئاراستەكردنی شەقامی كوردی. زمانی زبر ئەو پەرەگرافەیە كەهەمیشە لە میدیای دەسەڵات و سەرۆكەوە دەدرێتەوە بەرووی شەقام و میدیاكارە سەربەخۆو ئەهلیەكاندا، بەردەوام خۆیان لەباسكردن و ناوهێنانی بكوژەكان دەپارێزن و بەدوای سەرچاوەی خۆپیشاندانەكەدا دەگەڕێن، بكوژەكان لەبەر چاویاندان لە جیاتی دادگاییكردن سەرۆكی حكومەت سەردانی لقی (4) دەكات و دڵنەواییان دەكاتەوە، كەچی ئامادەنییە سەردانی بریندارێكی قەسابخانەكەی (17ی شوببات) بكات، لەلایەكی ترەوە تا ئێستاش پارتی پێیوایە تەعەدای لێكراوەو بە مشارەوە خەریكی بڕینەوەی دەستی تەعەداكارانە، نێچیرڤان بارزانی جێگری سەرۆكی پارتی دەڵێت "ئێمە لایەنی مەزڵومین و زوڵممان لێكراوە" سەرۆكی هەرێم درێژەی بە سەفەرەكەیداو بۆ ماوەیەكی زۆر بەدەنگ داوای خۆپیشاندەرانەوە نەهاتەوە، سەرۆكی كۆمار لەبیری چوو كە سلێمانی شارە حەیاتەكەی لەژێر رەحمەتی لولەی تفەنگی بەڵتەجیەكاندا بەجێیهێشت، بەهەرحاڵ باشرۆڤەی تەنها بەشێكی تۆمەتەكانی دەسەڵات بەتایبەت لە رێگەی میدیاكانی سەرۆكەوە بكەین، بزانین و تێبگەین زمانی زبر یەعنی چی؟ ئەو كە سەرۆكە، باوكە، دەسەڵاتە، سیاسییە، سەربازییە، ئاشتی خوازە، دژی زمانی زبرە، دژی تۆمەتە، دژی ناوزڕاندنە، سەرۆكی كوردستانە نەك تەنها بەشێك، بزانین فەرهەنگی ئەو سەرۆكەو راگەیاندنەكەی چ عەقڵێك كاری تیادەكات و چۆن بەڕێوە ئەچێت، بزانین چ پەیڤێك بەرهەم دێنێت.؟ فەرمون بزانن چی لەهەگبەی راگەیاندنەكانی سەرۆكدایە بۆ كۆمەڵگا، بەبەڵگەوە ببینن ئەوانە كێن زمانیان زبرەو تۆمەت ئەبەشنەوە.؟ بزانن ئەوانە كێن سوكایەتی بەكۆمەڵگا دەكەن.؟ ئەوانە كێن كارگەی بەرهەمهێنانی تەشهیرن..
زمانی زبر لە فەرهەنگی راگەیاندنی سەرۆكدا ..
خەبات و هەولێر وەك نمونە.
لەم راپۆرتەدا تیشك دەخەینە سەر دوان لە دەزگا راگەیاندنەكانی پارتی دیموكراتی كوردستان كە هەمیشە وەك زمانحاڵی سەرۆك دەدوێن و لە راستیشدا هەر بەو شێوەیەن، رۆژنامەی خەبات كە زمانحاڵی پارتی دیموكراتی كوردستان، رۆژنامەی هەولێر زمانحاڵی پارتی دیموكراتی كوردستان، رۆژنامەی خەبات كە (عەلی عەبدوڵڵا) خاوەنی ئیمتیازو (نەژاد عەزیز سورمی) سەرنووسەریەتی، رۆژنامەی هەولێریش كە ئەنجومەنی پارێزگای هەولێرو پارێزگارەكەی دەریدەكات (ئاریان فەرەج) خاوەنی ئیمتیازو (جەواد قادر) سەرنووسەریەتی، هەرهەموشیان بەفیكەو چەپڵەو دەهۆڵی پارتی نەبێت، بەهیچ ئاوازێكیتر هەڵناپەڕن و نایەنە سەماكردن، رۆژنامەی هەولێر پارێزگاری هەولێر (نەوزاد هادی) دەریدەكات و لە بودجەو پارەی پڕۆژەكانی شاری هەولێری دەداتی، (نەوزاد هادی) كە دەیبینین هەمیشە وەك فریشتەیەكی ئاشتی خواز خۆی نمایش دەكات بەڵام بڕوانن لە رێگەی ئەم بەلاشنامەیەوە (رۆژنامەی هەولێر) چۆن سوكایەتی بە گەلێك دەكات.؟ پاش ئەوەی بەیاننامە حەوت خاڵیەكەی گۆڕان بڵاوكرایەوە، ئیدی شتێك نەما ئەم دوو دەزگایە كاری لەسەر بكەن جگە لە فریودان و جنێودان و تۆمەت دروستكردن و سوكایەتیكردنێكی گشتگیر بەهەموان نەبێت، ئیدی تەنها دێڕو مانشێت و پەرەگرافەكانی ناو ئەو دوو رۆژنامەیە دەخوێنینەوە تا هەموو لایەك تێبگەن كە زمانی زبر چییەو كێ تۆمەت بەخش و جنێو فرۆشە.؟ كی راستیەكان ئاوەژوو دەكات؟ كی دۆخەكە ئەشێوێنێت؟ تەنها لە رۆژنامەی خەباتداو لە بەرواری (30/1/2011)ە واتە تەنها (1) رۆژ لەپاش بڵاوكردنەوەی بەیاننامەكەی گۆڕانەوە تا بەرواری (9/2/2011) لە لاپەڕە جۆراوجۆرەكانی (رۆژنامەی خەبات)دا بەرامبەر بە (570)وشەی بەیاننامەكە (912)جار وشەی (بزوتنەوەی گۆڕان، گۆڕان، سەرانی گۆڕان، بەناو گۆڕان) هاتووە، تەنها لەو ماوە كورتەداو لە بەرامبەر (570)وشەی بەیاننامەیەكدا (482)جار وشەی (تێكدەر، ئاژاوەگێڕ، كودەتاچی، ژەهراوی، سوكورسوا)بەرامبەر بزوتنەوەی گۆڕان وتراوە،لەماوەی ئەو دە رۆژەداو تەنها لە رۆژنامەكەی سەرۆكدا (35) جار وشەی (پیلان گێڕان) لە تەنیشت ناوی (بزوتنەوەی گۆڕان)ەوە هاتووە، هەرلەو ماوەیەدا (28)جار ناوی كەناڵی (كەی ئێن ئێن)هاتووە، هەر لەو ماوە كورتەداو لەپای بڵاوكردنەوەی ئەو بەیاننامە (570) وشەییەدا (226)جار هەر جارەو بە توانجێكەوە ناوی (نەوشیروان مستەفا) هاتووە، هەر لەو (226)جارەدا (33)جار نەوشیروان مستەفا وەك خیانەتكاری نەتەوەیی ناوی هاتووە، هەر لەو (226) جارەدا دیسانەوە (33)جار (نەوشیروان مستەفا) وەك دەرون نەخۆش باسكراوە، هەر لەو (226) جارەدا (28) جار ناوی (نەوشیروان مستەفا) بەشێوەی بەراوردو هاوپەیمان و لێكچوو لەگەڵ (عەبدولكەریم زیدان، حارس الزاری، وائیل عبدول لەتیف، ئەسیل نوجەیفی، ئوسامە بن لادن، ئەیمەن زەواهیری، مەلا كرێكار) دا هاتووە، بەدەر لەوەی كە (3) جار ناوی گۆڕان و لیستی حەدبا پێكەوە هاتووە، تەنها لەماوەی ئەو دە رۆژەدا (21)جار ناوی (د.كەمال میراودەلی) هاتووە، كە چەندین جار وەك دەرون نەخۆشێك باسكراوەو لە زۆربەی جارەكانیشدا وەك كاندیدی گۆڕان لەهەڵبژاردنی پەڕلەمانی كوردستاندا ناوی هاتووە، كە یەكجاریان (فەیسەڵ دەباخ) لە نوسینگەی سەرۆكەوە هێرش دەكاتە سەری، لەگەڵ ئەمانەشدا بەیاننامەیان بە زیاتر لە (50) رێكخراوی میكیاژكراوی بەناو مەدەنی دەركردووەو بڵاوكردۆتەوە، كە تیایدا بەداخەوە بەیاننامەی زانایانی ئایینی تێدایە كە سەرسام دەبیت بەچەندین بوختان و وشەی هەڵبەستراوی ناوی....!
کلیک له‌سه‌ر ئه‌م لینکه‌ بکه‌ بۆ بینینی ژماره‌ی جوێنه‌کان:
 https://www.kurdistanpost.nu/biz/gif/nawsherwan jwen.jpg
مانشێتەكانی رۆژنامەی خەبات لەماوەی ئەو دە رۆژەدا..!
هەر لەو بەروارەداو لەماوەی ئەو دە رۆژەی ئاماژەمپێدا لە (رۆژنامەی خەبات) دا دەیان رستەی ناسروشتی ئاماژەیان پێكراوە كە هیچیان لە هاوكێشەی راستگۆیی و ئیتیك و مۆڕاڵی كاری رۆژنامەوانیدا جێیان نابێتەوە، هەوڵەدەین لەم راپۆرتەدا بەشێك لەو مانشێتانە بەسەربكەینەوە تا هەموو لایەك تێبگەن زمانی زبرو شێواندن و هاندانی نا پێویست لە لای كێییە، سەرچاوەكەی كامەیەو لەكوێوەی سەرچاوەی گرتووە، ئەمە بەشێكە لەو مانشێتانەو لێكدانەوەكانی بۆ خوێنەران جێدەهێڵم (مێژووەكەی نەوشیروان لێوانلێوە لەخیانەتی نەتەوەیی، خیانەتەكانی نەوشیروان هێندەی چەو و لمی كوردستان دەبن، هۆكاری دەنگی كەمی كورد لە كەركوك ملهوڕی نەوشیروان بوو، ئینسان لای نەوشیروان و ئاژەڵ لای دەسەڵاتی كوردی، نەوشیروان پیاوە نەخۆشەكەی كوردستان، نەوشیروان مستەفا چیت لە سلێمانی دەوێت.؟، نەوشیروان مستەفا بۆ دژی دامەزراوەكانی كوردستانە، نەوشیروان مستەفا لە سەنگەری زەین العابدین بن عەلی و موبارەكدایە، ئایا وەختی نەهاتووە سەرانی گۆڕان داوای لێبوردن بكەن، گۆڕان بۆ كی شكۆی میللەت دەشكێنی، گۆڕان خەونی حوشتری دەبینێت، بزوتنەوەی گۆڕان لە توند رەوی و سەرلێشێواویەوە بۆ دوژمنایەتی كردنی كوردو كوردستان، بەیاننامەكەی گۆڕان و فتواكەی حارس زاری، بەیاننامەكەو بزوتنەوەكە لە پیرۆزیەكانی كوردیان داوە دەبێت ریسواو شەرمەزار بكرێت) ئەمە سادەترین پیناسەو شرۆڤەكردنی (رۆژنامەی خەبات)ی زمانحاڵی (پ.د.ك و سەرۆكە) ئیدی سەرۆكەكان چۆن دەتوانن بە میدیا ئازادەكان بڵێن زمانیان زبرەو شەقام بۆ خۆپیشاندان هانەدەن، كەی لەم كوردستانەو لە چ دەزگایەكی ئیعلامی كوردیدا ئەم دەستەواژە ناراست و نا تەندروستانە بەكار هاتووە.. ئەمە تەنها لە هەگبەی رۆژنامەی خەباتدا بوو.

كەشكۆڵی بەلاش نامەیەك... رۆژنامەی هەولێر..!
بڕوانن بەلاش نامەكەی هەولێر (رۆژنامەی هەولێر) ئەو رۆژنامەیەی كە بەپارەو بودجەی پاریزگای هەولێر واتە لەسەر قوو توو ژیانی خەڵك دەرەچێت بزانن چی لە كەشكۆڵیدا بۆ ئاشتی بۆ خۆشەویستی و پێكەوە ژیان خۆی مەڵاس داوە، فەرموون ببینن لەم بەلاشنامەیەدا چۆن كار بۆ ئەوە دەكرێت برا ناكۆكەكان لەیەكدی نزیك ببنەوە، بزانن زمانی زبرو تەشهیرو ناوزڕاندن و تۆمەت و بوختان هۆنینەوەو تەخوین كردن لەم بەلاش نامەیەدا لە چ ئاستێكدایە، رۆژنامەی هەولێریش تەنها لەماوەی دە رۆژی دوای بەیاننامەكەی بزوتنەوەی گۆڕان هەڵدەسەنگێنین، واتە لە بەرواری (29/1/2011)ەوە تا (9/2/2011) ئەم بەروارەش بەهەمان شێوەی رۆژنامەی خەبات دەكەوێتە تەنها (1)رۆژ پاش بڵاوبونەوەی بەیاننامەكەی بزوتنەوەی گۆڕان، لەبەرامبەر تەنها (570)وشەی بەیاننامەكەی بزوتنەوەی گۆڕاندا لە (9)ژمارەی یەك لە دوای یەكی (رۆژنامەی هەولێر)دا (503)جار ناوی (بزوتنەی گۆڕان، گۆڕان، بەناو گۆڕان، سەرانی گۆڕان)هاتووە، تەنها لەهەمان ماوەدا (130)جار ناوی گۆڕان بە (تێكدەر، پیلانگێڕ، ئاژاوەچی) هاتووە، هەر لەو ماوەیەدا ناوی بزوتنەوەی گۆڕان (24)جار بە (كودەتاچی)هاتووە، تەنها لەو ماوەیەدا (16)جار ناوی (كەی ئێن ئێن) هاتووە، لەبەرامبەر بەیاننامەیەكی حەوت خاڵی (570)وشەییدا (185)جار ناوی (نەشیروان مستەفا) هاتووە، كە تیایدا (30)جار وەك پیاوكوژ باسكراوە، (17)جار وەك دەروون نەخۆشێك باسكراوە، هەر لەو ماوەیەداو لەژمارە (962) لەبەرواری (3/2/2011) لە سێ لاپەڕەدا گفتوگۆیەك لەگەڵ (مەلا بەختیار) بەرپرسی دەستەی كارگێڕی مەكتەبی سیاسی (ی.ن.ك) سازكراوە و مەلا بەختیاریش وەك ئەوەی فرسەتێكی مێژوویی بۆ هەڵكەوتبێت تیایداو تەنها لەو (3)لاپەڕەیەدا (58)جار ناوی (نەشیروان مستەفا)ی بەم شێوەیە هێناوە (كاك نەوشیروان، بەڕێز نەوشیروان، بەڕێز نەوشیروان مستەفا، نەوشیروان مستەفا، نەوشیروان)، هەر لەو سێ لاپەڕەیەدا (مەلا بەختیار) خۆی لەناوهێنانی (بزوتنەوەی گۆڕان) پاراستووەو تەنها (34)جار ناوی (گۆڕان)ی هێناوە، هەر لەو ژمارانەی (رۆژنامەی هەولێر) نوسەرێك بەناوی (حەمە سەعید حسن) ئەستۆپاكیەكی ئەبەدی پێشكەش بە پارتی كردووەو بۆ هەتاهەتایە بەڵێن ئەدات كە رێبازی پارتی و بارزانی چۆڵناكات، ئەو (حەمە سەعید حسن)ە بەبێ ئەوەی كەس پرسیاری لێكردبێت سەرەتای وتارەكەی بە سوێندو پاكانە دەست پێدەكات كە گوایە سەر بەهیچ حزب و لایەنێك نیە، بەڵام هەركەس ئەو وتارەی بخوێنێتەوە سەرسام دەبێت بە نزمی ئاستی وتارەكەو هەستدەكات كە ئەم نوسەرە پێش ئەوەی بیەوێت شتێك بە كۆمەڵگا بڵێت خۆی بەتاڵ دەكاتەوە، (حەمە سەعید حسن) داوا لە (نەوشیروان مستەفا) ئەكات بچێتە بەردەم پەڕلەمان و خۆی بسوتێنێت، من كە سەرەتا مانشێتی بابەتەكەیم خوێندەوە نوسرابوو (مەترسیەكی راستەقینە) هەستم كرد ئەم برادەرە باسی (دزینی داهاتی نەوت، گەندەڵی و كەشفكردنی ناوی گەندەڵًكاران، دەسەڵاتی خێڵ و بنەماڵە، دزینی داهاتوو بودجەی كوردستان، كوشتن و تیرۆركردنی رۆژنامەنوسان، لاوازی ئاستی خزمەتگوزاری و بژێوی ژیانی خەڵك، دیاردەی بێكاری و قۆرخكردنی بازاڕ، نزمی ئاستی زانستی زانكۆكان) بكات، بەڵام ئاش لە خەیاڵی و ئاشەوان لە خەیاڵێ ئەم برادەرە پاكانە بۆ هەموو ئەو بێدادیانە دەكات.
مانشێتەكانی رۆژنامەی هەولێر...!
ئەم رۆژنامەیە لەو ماوەیەدا گەلێك مانشێتی داناوە كە بەراستی من بە ریكۆرد تۆماركردنی ناوی ئەبەم بڕوانن ئەم مانشێتانە پڕن لە ئاشتی و برایەتی و دادپەروەری و پێكەوە ژیان (ئەوەی كە نەوشیروان تێی ناگات، چاكسازی بە پیاوكوژ ناكرێت، نەوشیروان بەڵا نەخۆشەكەی بزوتنەوەی گۆڕان، با نەوشیروان بچێتە بەردەم پەڕلەمان و خۆی بسوتێنێت، نەوشیروان مستەفا رقی لە ئافرەت و منداڵ و موزیك و ئەدەبە) ئەمەیە پەیامی سەرۆك، ئەمەیە واقعی فەرهەنگی راگەیاندنی سەرۆك، ئەمەیە زمانی ئاشتی و پێكەوە ژیان و دادپەروەری لە فەرهەنگی سەرۆكدا، ئیدی كێن ئەوانەی رویاندێت باسی زمانی زبر و تەشهیر و شێواندن و تۆمەت هۆنینەوە ئەكەن.؟ كێن ئەوانەی خۆیان پی فریشتەیەو میدیا ئەهلی و سەربەخۆكان بە تێكدەرو زمانی زبر ناودەبەن..؟

[email protected]
ئەم راپۆرتە لە ژمارە (31)ى گۆڤارى شەن دا بڵاوكراوەتەوە