هەتا سێو و پرتەقەڵ مابن، ئەم كۆبوونەوانە قەت تەواو نابن!

Thursday, 31/03/2011, 12:00

ئافرەتانی هێژا و تێكۆشەر!
مامۆستا و خوێندكاران!
لاوانی چالاك و هەردەم خۆڕاگر و نەچەماوە!
نزیك بە بیست وچەند ساڵانێكە، دەسەڵاتی گەندەڵ و ئۆپۆزیسۆن، كۆبوونەوە دەكەن، بەوتەی بەرزی مامۆستا عەوڵاپەشێو، هەتا سێو و پرتەقەڵ مابن، ئەم كوبوونەوانە قەت تەواو نابن، ئەمجارە كە كۆبوونەوە، هەرچی میوەیە، لەسەر مێزەكانیان لا بەن، ئیسكی ئەنفالكراوەكانیان، لە پێش دانێن. بەڵام هێشتاش ئەگەر خوودی مێزەكەیان لە ئیسك و پرووسێكی ئەنفالكراو و سەرجەم گیان بەخت كردووەكانی هەرێمی كوردستانیان لەبەردەم دابنرێ، هەر ئەوەی دەكەن، كە ئێستا دەیكەن. ئەمجارەش نوێنەرانی دەسەڵاتی گەندەڵی هەرێم، كۆبوونەوە دەكەن و وادەنوێنن كە گوایە گوێیان بۆ داواكانی ئێوە و ڕێزیان لێ خوێنە ڕژاوەكان، گرتووە و بەوجۆرە هەر وەكوو پێشوو، بەناوی كۆبوونەوەكانی ئۆپۆزیسۆن و ئەم شتەگەندەڵانە، كاتەكان دەكووژن و تەنیا دەیانەوێ ئێوە لە مانگرتن و خۆپێشاندان سارد بكەنەوە و كاتێكیش ئێوە جارێكی دیكە داوای وەدیهێنانی داخوازیەكانتان بكەن، دەڵێن جارێ مەجالمان بدەن و هەر وا خەریكی كۆبوونەوەین و لە بەرنامەی كارمان دا هەیە كە گۆڕان دروست بكەین! و ئامانجەكانی ئێوە وەدی بێنین.
ئەمە هەروەكوو ئایینەكەیە كە دەڵێ، ئەگەر لەو جیهانەش ژیانتان بۆ نەكرا، لە جیهانێكی دیكەی دوای مردن بۆتان دروست دەبێ، یان وەكوو كڕینی پاسكیل و داواكاریەكانی دیكەی مناڵەكە، هەر ئەمساڵ بۆ ساڵێكی تر فریو دەدرێ و دەخەڵەتێندرێ و هەر بەبیری ئەمساڵ نا ساڵێكی تر، پێ دەنێتە دەورانی گەنجیەتی و سەرەنجام پیری!
كۆبوونەوەی ئەوانە، تەنیا وەكوو پیاوی گوندی بەر سۆبەگەرمەكەی مزگەوت لە وەرزی زستان دا، حەیكایەت و بەسەرهات گێڕانەوە و گاڵتە و گەپ و خواردن و خواردنەوە و پێكەنینە. گاڵتە و گەپ و بێ ڕێزی بە سەرجەم ماف و ئازادیەكانی جەماوەری كوردستان بە گشتی و خوێنە ڕژاوەكان بەتایبەتی بووە. ئەوانە نەتەنیا نوێنەری هاووڵاتی چەوساوەی كوردستان، نین، بەڵكوو ئەو تاوانبارانەن كە فەرمانی بێ ڕێزی و قەڵاچۆ كردنی جەماوەری ئازادیخوازی كوردستان دەدەن. نوێنەری ئەم دەسەڵاتە گەندەڵەی هەرێمن، كە ئاسمانی ژیانی هاووڵاتی ڕەش كردووە و ئاسایش و چارەنووسی هاووڵاتیان خستۆتە مەترسیەوە. چۆن دەكرێ، بە دایكێك بڵێی دایك كە لە نیوەشەودا كۆرپەكەی بخاتە ناو ڕووبارەوە، چۆن دەكرێ بە باوكێك بڵێی باوك، كە مناڵەكەی خۆی لە خەوی شیرین دا سەر ببڕێ، چۆن دەكرێ، بە هاوڕێیەك بڵێی هاوڕێ، كە كاتێك ڕەخنەت لێ گرت، بەچەقۆ زمانت ببڕێت، چۆن دەكرێ، بە مامۆستایەك بڵێی مامۆستا، كە لە ناو هۆڵی زانكۆ و قوتابخانەدا، دەس درێژی بكاتە سەر قوتابیەكەی و شەڕەفی تێك بشكێنێ، چۆن بە سەرپەرشتیاری كۆڕی پەروەردەو فێر كردن، دەڵێی سەرپەرشتیاری ڕاستەقینە، كە ئەم ناوەندە بەرز و مەزنە بۆ قوتابیەكان بكاتە، گۆڕەپانی فێربوونی، بازرگانی تریاك و ماددەسڕكەرەكانی تر و دزی و تاڵانكردن و تیرۆر و قەڵاچۆكردنی هاووڵاتی، سەرەنجام، چۆن دەكرێ بە ڕێبەرێك بڵێی ڕێبەر، كە لەپێناو دەسەڵات و دراو دا، لەشكرێك دێنێتەوە سەر هاووڵاتی، كە سەردەمانێك بەچەكی كیمیایی، كارەساتێكی بەسەر هاووڵاتی هێنا، كە هەتا مرۆڤ و مرۆڤایەتی هەبێت، وێژدانی مرۆڤ، دەتەزێن و لەبیر ناچێتەوە و هەروەها چۆن دەكرێ، بە ڕێبەرێك، بگوترێ ڕێبەر كە، جەماوەرێك كە ئەو ڕێبەری دەكا، چارەنووسیان بكاتە ناو ئۆتۆمبیلێكی بازرگانی و بە دراو و دەسەڵات ئاڵووێریان پێ بكا؟
ئەو ڕێبەرانە، جارێ بیریان لە سزادانی ئەم بریندارانەی شاری سلێمانی كردۆتەوە كە چۆنیان سزا بدەن و بەندیخانە یان هەڵواسینیان بۆ ببڕنەوە نەك بیریان لەوە كربێتەوە كە چۆن دەكرێ كۆتایی بە دیكتاتۆریەت و تیرۆر و كوشت وكوشتاری ئەم جەماوەری كوردستان بێت و ئەوان بە ئامانجەكانی خۆیان بگەن.
نوێنەری حیزبی ئیسلامی دەڵێ، هەوڵمان داوە متمانەیەك بۆ خۆپێشاندەران لە لایەن دەسەڵاتەوە دروست بكەین و هەر لەجێشدا سزای ئەو كەسانە بدەین كە لەسەرەتا دا خۆپێشاندانیان سازدا و سفرەی بازرگانی و گاڵتە و گەپی ئەم سەرۆكانەیان شێواند!
بەڵام پێموایە، كاكی حیزبی ئیسلامی ئەوەندەی مۆز و سێو و پرتەقەڵ و شیرینی و گەندە و گەڵاش خواردووە، جەنایەت و خەیانەتەكانی سەرۆكەكانی پارتی و یەكیەتی خاوەن دەسەڵاتی لەبیر چۆتەوە، یان شاقەلەكەیان ئەوەندە بۆ پڕ لە دۆلار كردووە، كە زمانی بكاتە زمانی ئەوان و ئەو كەسانە تاوانبار بكا، كە داوای ژیان و ئازادیەكانی خۆیان دەكەن!
ئەگینا ئەوە بۆ هەر كەسێكی دانیشتوی ئەم هەرێمە ڕوونەكە، بیست ساڵ دیكتاتۆریەت، تیرۆر و ڕەشەكوژی، بڕینی زمانی لۆژیك و نووسەر و ڕۆژنامەنووس، بەهێزكردنی بنەماكانی ئایین كە گوورز و قەمچیەكی دەسەڵات بۆوە بۆ سەر كوتكردنی ئافرەتان و پێشێل كردنی مافی ژن بوونیان و برەوپێدانی كۆنەپەرستی و ژیانی ئاژەڵی و هەروەها دروستكردنی قەیرانی ئابووری، برسیەتی، بێكاری، هەڕەشە و ڕاونانی ئازایخوازان و بازرگانی بەژیان و چارەنووسی هاووڵاتیانی كوردستان، دیاری ئەم دەسەڵاتە گەندەڵەی هەرێم بووە. ئەدی ئێستا نابێ بەخەڵكی كوردستان بڵێن كۆبوونەوەی ئەم ئۆپۆزیسۆنە بۆ چی و لەسەر چیە ؟
كاتێك ئەم دەسەڵاتە، ئایین دنەدەدا و ئافرەتانی جوامێری كوردستانی پێ بێ ڕێز دەكا و دەیكاتە كۆیلەی پیاو و دەسەڵات، كاتێك مافی كرێكار چەندین قات دێنێتە خوار، كرێكارێك كە هەموو بەرهەمەكان ئەو بەرهەم دێنێ و لەهەموو بیمە و مافی بێكاری و نەخۆشی بێ بەشە، كاتێك ئەم دەسەڵاتە، تەحەموولی بیستنی ڕەخنە گرتنی نیە و زمانی ڕەخنە و لۆژیك و فەلسەفە دەبڕێ و داواكاریەكانی هاووڵاتی هەرێم، بە هەڕەشە و دەس درێژی وەڵام دەداتەوە و كاتێك وشەی خۆشەویستی بە جوێن و بێ ڕێزی گۆڕیوەتەوە و كاتێك كە ئەو كەسانەی بەدەست چەكداری دەسەڵات بریندار دەكرێن لەكاتێكدا كە داوای مافی خۆیان و ئازادیەكانیان دەكەن، لەجێگەی ئەوە هەوڵی ساڕێژبوونەوەی برینەكانیان بدا، بڕیاری سزادان و لەسێدارە دانیان دەدا و كاتێك لەشكر دەڕژێنێتە ناو جەماوەری خۆپێشاندەرانەوە و هەڕەشەی كوشتنیان لێ دەكا، و سەرەنجام كاتێك هاووڵاتی لە سەر داواكاری بۆ ئازادی و ئاسایش، دەكووژێت و سەرۆكەكانیش گوێی بیستن و چاوی دیتنیان نیە، كۆبوونەوەی ئەم ئۆپۆزیسۆنە لەگەڵ دەسەڵات، چ ئاكامێكی بۆ جەماوەری كوردستان بەداوە دەبێت ؟
بەڵام ئەم هەقیقەتە لە تیشكی خۆریش زەقتر و بەهێزترە كە، ئەوانە نەتەنیا نوێنەری دەنگ و مافەكانی جەماوەری كوردستان و ئافرەتان و خوێندكاران و كرێكارانی چەوساوە و مافخوار نین، بەڵكوو زۆریش و شێلگیرانە دژی ماف و ئازادیەكانی ئەوان دەجووڵێنەوە. كۆبوونەوەی ئەوان لەگەڵ دەسەڵاتی گەندەڵی هەرێم، ئەوە دەردەخا كە ئەوانیش دەبنە ، دڕندەیەكی تر بۆ سەر ژیان وگوزەرانی هاووڵاتیان.
خەڵكی تێكۆشەری كوردستان، پێویستی بە متمانەی حكوومەت نیە كە كاكی حیزبی ئیسلامی بۆی وەربگرێت، خەڵكی كوردستان، دەیانەوێ، لەبنەڕەتەوە، دام و دەزگای ئەم دەسەڵاتە داپڵۆسێنەرە، هەڵتەكێت و بڕەمێت. جەماوەری كوردستان، دەیانەوێ كوشت و كوشتاری هاووڵاتیان كۆتایی پێ بێت، دەیانەوێ ئاسایش و ئازادی و بەختەوەری لەهەموو بوارەكانی ژیاندا، هاووڵاتیان لەئامێز بگرێ، دەیانەوێ دەرگا و پەنجەرەكانی ئەم بەندیخانەی كە دەسەڵات بۆ هاووڵاتیانی دروستكردووە، تێك بشكێن و دەورانی بەندبوون كۆتایی بێت. زمانی هاووڵاتیانی هەرێمی كوردستان، زۆر ساكار و هەر لەجێشدا، كاریگەر و بەهێزە. ئەوان، داواكاریەكانیان، بچووكن، ئازادیان دەوێ، نان و ئاو و كارەبایان دەوێ، ئیش و ئاسایشیان دەوێ، پێنووس و ڕۆژنامە نووس و نووسەر و پەڕتووكیان دەوێ، قوتابخانە و لۆژیك و فەلسەفە و زانستیان دەوێ، هۆنەر و مۆسیقی و گۆرانی و شێعر و شاعیریان دەوێ، شادی و خۆشحاڵی و پێكەنین و سۆز و خۆشەویستی و هاوئانگی و یەكیەتی و پێكەوە ژیانی بە ئاشتیان دەوێ، گوندی ئاوەدان و چیا و پێدەشتی جوان و دڵگیریان دەوێ، شاری ئاوەدان و شەقام و كۆڵانی خاوێن و پاقژیان دەوێ، كۆڕی هونەر و هونەرمەدانیان دەوێ، ئەوان زمانی ڕەخنە و پێشنیار ولۆژیك و ژیاریان دەوێ، تەندروستی و دوكتۆری دەروونناس و پزیشك و نەخۆشخانەیان دەوێ، بەڵام دەسەڵاتی گەندەڵی هەرێم، گشت ئەوانەی لەناو بردوونە و لەجێگەدا، دزی، درۆ، بازرگانی بەخوێنی هاووڵاتی، وێرانی، تیرۆر و قەڵاچۆ كردن، زمانی ئەو بووە و هێشتاش هەر ئەوەی دەوێ!
بۆیە تەنیا دروشم و ڕێگایەك كە بۆ هاووڵاتی ماتەوە، درێژەدان بە خەباتی مانگرتن و مانەوە لە سەر شەقام و لەبەر دەم پەرلەمان و شوێنە گشتیەكانی هەرێمی كوردستانە. ئەگەر ئێوە هەمووتان یەك داوا و یەك دروشمتان هەبێت، ئەویش هەڵتەكانی بنەمای ئەم دەسەڵاتە گەندەڵە بێت، سەرەنجام دام و دەزگای سەركوت و ڕەهای ئەم دەسەڵاتە تێك دەڕمێت. جیا لەو ئەركە گرنگە، دەسەڵاتی گەندەڵ و ئەوە كە هی حیزبی ئیسلامی و گۆڕانیشی پێوە زیاد بووە، هەروا ئاسمانی ژیانی هاووڵاتیان تاریك و ڕەشتر دەكا و بەوتەی بەڕێز مامۆستا عەڵا پەشێوی شاعیر، هەتا سێو و پرتەقەڵ مابن، ئەو كۆبوونەوانە قەت تەواو نابن
ئەگەر هەموو جەستە بێگیانەكانیش گیانیان بێتەوە بەر و داوایان لێ بكەن، هێشتا هەر تێ ناگەن و ڕازی نابن و لە بێ ڕێزی و پێشێلكردنی ئازادیەكانی جەماوەری كوردستان و بازرگانی بە چارەنووسی هاووڵاتیان، هەرگیز تێر نابن.
سەردەشت هەژار